新加坡發展神速,而濱海灣 (Marina Bay) 就係呢度得益最多嘅地方,成個地區歷經咗好大變化,搖身一變成為咗新加坡真正旅遊心臟地帶。其中,造價 SGD55 億嘅濱海灣金沙酒店 (Marina Bay Sands) 稱得上係海灣焦點,區內好多值得一去嘅景點都圍繞呢座史詩式建築兼度假勝地。

    既然嚟到濱海灣,又點可以錯過新加坡嘅象徵、最受歡迎嘅影相「打卡」勝地—大名鼎鼎嘅魚尾獅 (Merlion) ?除咗精彩景點之外,呢區仲有各種得意好玩嘅活動,等你嚟發掘,難怪每年都吸引咗超多遊客湧到嚟呢度!

    1

    濱海灣花園 (Gardens by the Bay)

    濱海灣花園 (Gardens by the Bay) 充滿未來感,令人讚歎,園內有巨型嘅「擎天樹 (Supertree Grove)」裝飾,高聳入雲!呢處新加坡名勝載譽無數,往往令遊客喜出望外,而你可以踏上無比壯麗嘅 Skywalk 空中走廊,穿越公園裡面嘅「樹林」,近距離接觸花花草草。

    入夜之後,50 米高嘅樹木會照亮夜空,好似萬花筒咁透現五彩燈光,為你帶嚟難忘嘅視覺體驗,亦都令花園本身更見璀璨。燈光 Show 每晚 20:00 左右開始,費用全免 (想踏足 Skywalk 空中步道,就會酌量收費)。

    地點: 018953 新加坡濱海灣花園大道 18 號

    開放時間: 每日 09:00 至 21:00;戶外花園每日 05:00 至 02:00 開放

    電話: +65 6420 6848

    地圖
    • 伴侶
    • 家庭
    • 拍照
    • 晚間娛樂
    • 經濟實惠
    2

    藝術科學博物館 (ArtScience Museum)

    新加坡藝術科學博物館 (ArtScience Museum) 坐落於濱海灣 (Marina Bay),本身已經係極具個性嘅地標!大多數傳統藝術或者科學博物館純粹用展品「吸客」,而藝術科學博物館就截然不同喇—

    呢座展館嘅蓮花設計美不勝收,令人一見難忘,單係為咗欣賞咁樣嘅壯麗建築而到此一遊,都夠哂值得;館內裝潢同樣瑰麗無雙,設有超過 20 個展廊空間,總面積達 50,000 平方英尺,深刻呈現出新加坡的創意和歷史元素。而館中展覽內容定期更改,新鮮感滿溢!

    地點: 018956 新加坡灣景道 10 號

    開放時間: 每日 10:00 至 22:00

    電話: +65 6688 8868

    地圖
    • 家庭
    • 歷史文化`
    • 拍照
    3

    金沙酒店空中花園 (Marina Bay Sands SkyPark)

    金沙酒店空中花園 (Marina Bay Sands SkyPark) 坐落於極具氣派嘅濱海灣金沙 (Marina Bay Sands) 三柱綜合大樓頂層,正正係欣賞新加坡招牌天際線嘅好去處,絕對值得一遊!

    花園入場費大約係成人 SGD23、小童 SGD12,而你可以飽覽同 Sky@57 豪華餐廳或者 CE LA VI Skybar 瑰麗酒吧幾乎一模一樣嘅景觀—呢兩間餐廳同樣位於金沙酒店頂層,不妨順道入去食餐飯!

    地點: 018956 新加坡灣景道 10 號金沙酒店

    開放時間: 每日 09:30 至 22:00 (星期六及日至 23:00)

    電話: +65 6688 8826

    地圖
    • 家庭
    • 拍照

    相片由 dronepicr 提供 (CC BY 2.0) 經修改

    4

    魚尾獅 (Merlion)

    魚尾獅 (Merlion) 絕對唔止係普通雕塑—呢座 70 噸重嘅半美人魚半獅石屎雕像堅不可摧,仲識噴水,堪稱係新加坡嘅神話象徵,更加係遊客去新加坡「打卡」嘅不二之處!

    魚尾獅周邊地區設有免費入場嘅階梯休息區,環境怡人,你可以嚟呢度抖一抖,欣賞美景,野餐一陣,又或者喺入夜之後飲杯啤酒「Chill 下」。區內另設碼頭,延伸到水面上,為魚尾獅以至濱海灣 (Marina Bay) 其他地域締造全方位影相「打卡」熱點,一樣咁抵讚!

    地點: 049213 新加坡浮爾頓 1 號魚尾獅公園

    地圖
    • 歷史文化`
    • 拍照
    5

    新加坡摩天觀景輪 (Singapore Flyer)

    新加坡摩天觀景輪 (Singapore Flyer) 規模屬全球數一數二,係欣賞新加坡都會壯麗天際線嘅不二之處!呢座摩天觀景輪穩踞 165 米高空,高度大約同佢嘅偌大直徑相若,訪客會喺每秒 0.21 米嘅優悠速度下兜圈,將市內遼闊景色盡收眼底—

    諸如新加坡河、萊佛士坊、濱海灣同中央商務區等等嘅著名景點,統統都可以由舒適嘅冷氣包廂入面見到。觀景輪每個包廂最多容納 28 位乘客,不過每次搭乘嘅旅客實際上少得多。

    地點: 039803 新加坡萊佛士大道 30 號

    開放時間: 每日 08:30 至 22:30

    電話: +65 6333 3311

    地圖
    • 家庭
    • 拍照
    6

    濱海灣金沙賭場 (Marina Bay Sands Casino)

    濱海灣金沙賭場 (Marina Bay Sands Casino) 佔地 15,000 平方米,廣闊偌大,係濱海灣金沙酒店 (Marina Bay Sands Hotel) 地標嘅一部分,場內有超過 500 張賭枱同埋 1,600 部老虎機;中央位置裝飾咗一盞 7 噸重嘅吊燈,由超過 130,000 顆施華洛世奇 (Swarovski) 水晶砌成,閃爍生光。

    呢處新加坡景點唔單止係消費度假嘅地方,仲有機會令你「一夜致富」添!事實上,唔少遊客專誠嚟到,純粹係為咗觀賞刺激博彩實況 (尤其是「啤牌」同「廿一點」最受歡迎),或者物色收費只係 SGD5¢、SGD10¢、SGD20¢ 嘅博彩機,小賭怡情。

    地點: 018973 新加坡灣景道 4 號

    電話: +65 6688 8868

    地圖
    • 晚間娛樂
    7

    濱海藝術中心 (Esplanade - Theatres on the Bay)

    濱海藝術中心 (Esplanade - Theatres on the Bay) 係新加坡濱海灣 (Marina Bay) 嘅文藝殿堂,佔地廣闊,設有獨立音樂廳、劇院同戶外表演區,功能多樣,會定期舉辦各種現場表演,仲有本地以至國際音樂節目同文化展覽,精彩紛呈。

    有少部分人將新加坡評為「文化沙漠」—呢班人絕對要嚟呢處夢幻場地一遊,參與定期上演嘅免費活動,盡享合家歡樂趣!只要乘搭地鐵去市政廳或者濱海地鐵環線地鐵站,再行一陣間,就可以輕鬆嚟到濱海藝術中心—呢座建築飾有兩個大型鋁製玻璃穹頂,喺河濱上面相當易認。

    地點: 038981 新加坡濱海藝術中心大道 1 號

    開放時間: 每日 08:00 至 02:00

    電話: +65 6828 8377

    地圖
    • 伴侶
    • 家庭
    • 拍照
    • 晚間娛樂
    • 經濟實惠

    相片由 Kunal Mukherjee 提供 (CC BY-SA 2.0) 經修改

    8

    濱海灣金沙酒店 (Marina Bay Sands)《幻彩生輝 (Spectra)》光影水幕表演

    每晚,《幻彩生輝 (Spectra)》光影水幕表演都會照亮新加坡濱海灣 (Marina Bay),譽滿海外,令人驚嘆!由 20:00 開始,節目不斷上演,鐳射激光由濱海灣金沙酒店地標嘅頂樓、以及隔籬嘅藝術科學博物館 (Art Science Museum) 投射到水面,

    喺海灣周圍嘅景點都觀賞得到,而且費用全免,相當吸引!萬一你錯過咗一場表演,都仲可以喺往後嘅每一日再次觀賞,唔怕「走寶」。行近濱海灣金沙酒店,音樂聲旋即傳入耳際;之不過,節目焦點仍然係落喺視覺效果上嘅!

    地點: 018956 新加坡灣景道 10 號

    開放時間: 星期日至四 20:00 及 21:00;星期五至六 20:00、21:00 及 23:00

    地圖
    • 伴侶
    • 家庭
    • 拍照
    • 晚間娛樂
    • 經濟實惠
    9

    濱海灣高爾夫球場 (Marina Bay Golf Course)

    濱海灣高爾夫球場 (Marina Bay Golf Course) 係全新加坡第一個對外開放嘅 18 洞高球場,配備優秀設施同極具挑戰性嘅球道,而真正特色在於場內可以飽覽新加坡天際線、以至濱海灣廣闊無邊嘅景色。

    環顧球場各個角落,好多位置都有棘手嘅水坑同沙坑,另外仲設有練習場同果嶺,喺入去主球場之前,俾你打返 72 桿 (共 18 個洞) 先,練習一下。

    地點: 437437 新加坡 01 沿禺十字路 80 號 #01

    開放時間: 每日 07:00 至 22:45

    電話: +65 6345 7788

    地圖
    • 豪華住宿
    • 遊歷
    10

    CE LA VI

    CE LA VI 餐廳位於濱海灣金沙酒店 (Marina Bay Sands) 57 樓,可以飽覽都會至海灣景致;店內售賣嘅雞尾酒價格同濱海灣金沙觀景台入場費相若,但係 CE LA VI 勝在位置高少少,觀景效果好啲,所以迅速晉身新加坡最熱門嘅頂樓餐廳之一。

    就算你今次咁啱唔係住濱海灣金沙酒店,都可以去 CE LA VI 餐廳飲返杯,享受呢座建築地標所帶嚟嘅完美奢華體驗。

    地點: 新加坡濱景道 1 號濱海灣金沙酒店北座

    開放時間: 每日 23:00 至深夜

    電話: +65 6508 2188

    地圖
    • 伴侶
    • 拍照
    • 晚間娛樂
    11

    新加坡飛行體驗中心 (Flight Experience Singapore)

    想喺新加坡享受獨一無二嘅體驗?不妨前往萊佛士大道嘅飛行體驗中心 (Flight Experience),自主駕駛波音 737-800 飛機…嘅超逼真飛行模擬器!除咗飛行前嘅訓練之外,你仲可以由持牌機師一對一指導,帶領你起飛、巡航同著陸。全段體驗歷時長達 90 分鐘,

    俾你揀喺日頭定係夜晚飛往知名城市,仲有超過 24,000 個機場任你選擇,當中包括享負盛名嘅香港國際機場,同埋飽覽曼哈頓壯觀天際線嘅紐約甘迺迪機場。

    地點: 039803 新加坡萊佛士大道 30 號

    電話: +65 6339 2737

    地圖
    • 家庭
    • 非一般行程
    12

    濱海堤壩 (Marina Barrage)

    濱海堤壩 (Marina Barrage) 係新加坡市內嘅多功能場地,既係水壩,亦係旅遊景點兼休憩場所。呢座水壩位於主島南端,距離新加坡另一個主要景點—濱海灣花園 (Gardens by the Bay) 只有幾步之遙,

    大壩上面嘅頂樓公園係野餐同埋放風箏嘅熱門好去處,而遊客仲可以喺草坪上面俯瞰全市嘅天際線,靜賞新加坡嘅絢麗日落—唔怪之得,大家都對呢度推崇備至啦!

    地點: 018951 新加坡濱海灣花園大道 8 號

    電話: +65 6514 5959

    地圖
    • 拍照
    • 經濟實惠
    13

    濱海灣金沙酒店 (Marina Bay Sands)

    濱海灣金沙酒店 (Marina Bay Sands) 堪稱新加坡日漸發展嘅都會天際線標誌,由三座摩天大樓組成,頂層望落好似有高速列車驚險行駛咁—事實上,嗰度淨係得一個巨型頂樓泳池,屬於濱海灣金沙酒店嘅特色之一,可以俾你將新加坡景色盡收眼底,一覽無遺。

    酒店另外一個優勢在於鄰近地鐵站嘅有利位置,住客行幾步就可以去到新加坡嘅幾個著名景點,包括濱海灣花園魚尾獅公園藝術科學博物館

    地點: 018956 新加坡灣景道 10 號

    電話: +65 6688 8888

    地圖
    • 伴侶
    • 家庭
    • 拍照
    • 品嚐美食
    • 晚間娛樂
    • 豪華住宿
    14

    新加坡國家體育場 (National Stadium Singapore)

    新加坡國家體育場 (National Stadium Singapore) 功能百變,你可以喺場內觀賞新加坡國足隊嘅主場比賽、板球賽、欖球賽、田徑同現場音樂節目。

    無論身處市內邊個角落,呢座壯觀嘅圓頂形體育場都清晰可見,場內嘅伸縮屋頂同紅白座椅別具特色,因而成為新加坡最知名嘅地標之一。新加坡國家體育場嘅規模冠絕全國,最多可以容納 55,000 人;如果要舉辦小型活動,亦都可以相應減少座位數目。

    地點: 新加坡加冷體育場大道 1 號

    電話: +65 6653 8900

    地圖

    相片由 L.M. Ramamuthusamy 提供 (CC BY-SA 4.0) 經修改

    15

    新加坡一級方程式格蘭披治大獎賽

    喺眾多一級方程式規格嘅賽事之中,新加坡格蘭披治大獎賽係唯一喺夜晚進行嘅比賽,場外頂尖音樂表演連場,賽道上滿載刺激動感,相映成趣!濱海灣街賽道 (Marina Bay Street Circuit) 就係位處新加坡海灣地區嘅一級方程式賽車賽道,全長 5.1 公里,設有 23 個彎位,可以飽覽風景如畫嘅海港,媲美摩納哥同華倫西亞嘅賽道。

    貴為一級方程式賽事裡面為數不多嘅逆時針賽路之一,成條濱海灣街賽道採用咗 108 條電纜,連接 12 部雙發電機同 1,600 部投射器,令場上燈光輝煌。賽道另外一個獨特之處,喺正第 18 號同 19 號彎位之間—呢段賽道會經過 The Float 看台下面,同觀眾近距離接觸!

    地點: 038975 新加坡共和大道 1 號維修大樓濱海灣街賽道

    電話: +65 6738 6738

    地圖
    16

    新加坡南灘 (South Beach Singapore)

    新加坡南灘 (South Beach Singapore) 係市中心天際線嘅一道風景,兩座 40 層高嘅摩天大樓屹立於濱海灣 (Marina Bay) 地區,裡面有生活風格購物中心、幾間豪華酒店、辦公空間,同埋幾百間長期住宅。

    「樓」如其名,南灘綜合大樓位處南灘路上面,行幾步就可以嚟到萊佛士酒店、濱海灣、濱海藝術中心同新加坡摩天觀景輪等等嘅知名景點;與此同時,呢度亦都係高檔精品酒店—新加坡南灘酒店 (The South Beach Singapore) 嘅所在地。

    地點: 189763 新加坡美芝路 30 號

    電話: +65 6672 5722

    地圖
    • 家庭
    • 購物
    • 拍照
    Stephan Audiger | 旅遊常客

    開始計劃行程

    Maps