新加坡 1 Altitude 酒吧

全球最居高臨下嘅戶外酒吧之一

    新加坡 1 Altitude 酒吧位於萊佛士坊一號 (One Raffles Place) 63 樓,360 度無遮無擋,可以望到市內最高、最壯觀嘅無敵靚景。有別於好多其他酒吧,你喺呢度只會隔住塊高到膊頭嘅玻璃板,就欣賞到遼遠風光,感覺好似世界喺你腳下一樣。

    1 Altitude 酒吧供應各式各樣嘅雞尾酒,而且通常有現場樂隊同埋 DJ 表演,難怪成為新加坡觀賞日落、夜間聚腳嘅人氣熱點。

    酒吧佔據萊佛士坊一號最頂兩層,你可以依照大廈入口嘅清晰指示牌,由地面搭乘專用升降機上去。萊佛士坊一號距離萊佛士坊地鐵站唔夠 5 分鐘路程,不過途中摩天大廈林立,要搵路都唔係咁易!想嚟 1 Altitude 酒吧玩返晚?建議預先訂位,同埋最好喺日落前到達。

    酒吧第一層係吧檯、樂隊同埋舞池所在,裝潢偏向簡約,但係同樣引人注目—初初望第一眼,咁高嘅地方見到真樹喺玻璃同石板中間生長,都不免覺得怪怪哋 (笑)!酒吧頂樓係欣賞壯觀景色嘅好去處,全片空間呈三角形,客人可以由 282 公尺高嘅屋頂飽覽零死角靚景,

    地板仲有霓虹燈喺你腳底閃下閃下,而低矮嘅座位設計就方便你一眼望哂壯麗市景。無論你企喺邊個位置,梗有一個新加坡地標出現喺你眼前:濱海灣金沙酒店 (Marina Bay Sands)、新加坡摩天觀景輪 (Singapore Flyer)、河景、新加坡商業中心區,以至市外遠處嘅山丘,統統一覽無遺。

    呢度嘅職員都好友善,非常樂意幫你揸機影返幾張相,氣氛比起新加坡其他空中酒吧更加隨意。黃昏時份,店家好多時都請嚟現場樂隊登台,夜晚就通常有 DJ 駐場,將摩天酒廊打造成型格舞池。

    1 Altitude 酒吧入場費包一杯飲品,而餐牌上有幾款啤酒、雞尾酒同烈酒任揀。上到頂樓之後,飲品選擇仲多,而且極具創意,其中嘅招牌雞尾酒有「禪之風 (Zen Breeze)」,混合伏特加、綠茶,香茅同薄荷,口味濃烈,令人精神為之一振,又未至於頭暈眼花。

    玩到餓喇,不妨同朋友仔 Share 呢度嘅各款酒吧食品、惹味 Pizza 同熟食拼盤丫!想正正經經食餐好,你仲可以去樓下一層嘅明星餐廳 (Stellar),坐喺餐枱前面,一邊飽覽美景,一邊享用精緻嘅現代佳餚。

    新加坡 1 Altitude 酒吧

    地點: 048616 新加坡萊佛士坊 1 號 63 樓

    開放時間: 營業時間:星期日至四 18:00 至 02:00;星期五和六 18:00 至 04:00

    電話: +65 6438 0410

    Ben Reeves | 旅遊常客

    開始計劃行程