愛丁堡 5 大必試蘇格蘭美食

愛丁堡必試美食

    諗返起我第一次去蘇格蘭愛丁堡嗰陣,如果有美食導遊話我知羊雜布甸 (haggis) 入面究竟有啲乜、提吓我蘇格蘭牛油酥餅 (Scottish shortbread) 係會食上癮,又或者幫我喺蘇格蘭燕麥粥 (Scottish porridge) 裡面落啲鹽,咁就好喇!經歷令人進步,我哋而家就要為你介紹喺愛丁堡必試嘅 5 種蘇格蘭美食。

    1

    羊雜布甸

    蘇格蘭人好鍾意同外地嚟嘅遊客講笑,話「羊雜布甸 (haggis)」其實係一種動物嚟嘅!不過,呢個玩笑又無傷大雅吖,因為呢道菜望落真係幾「不同凡響」,食譜五花八門,而大部分傳統羊雜布甸都係由綿羊嘅內臟 (即係心、肝、肺) 製成,將肉連洋蔥、燕麥片、羊脂、香料同鹽一齊切碎,然後釀入羊肚,醃大約三個鐘就得。

    唔使問啦,羊雜布甸都幾難「廣獲接受」,搞到遠在 1700 年代嘅蘇格蘭著名詩人 Robert Burns 都曾經作詩捍衛呢道名菜 (笑~)!喺其中一首詩入面,佢俏皮咁嘲笑討厭羊雜布甸嘅人:「他低著頭,嘲諷地嘲笑著這道晚餐 (looks down with a sneering scornful opinion on such a dinner)」。為咗紀念呢位詩人擁躉,蘇格蘭各地每年都會喺佢生日嘅 1 月 25 日大搞「Burns Suppers」Party,而主菜又點少得羊雜布甸?

    • 品嚐美食

    相片由 Beck 提供 (CC BY 2.0) 經修改

    2

    蘇格蘭牛油酥餅

    咪走住,聽埋我介紹先—呢款蘇格蘭特色甜點算係比較「符合大眾口味」架!蘇格蘭牛油酥餅 (Shortbread) 一直沿用中世紀食譜,將食剩嘅麵包麵團擺入焗爐,再烤乾製成「餅乾麵包」,最後用牛油代替餅乾麵包裡面嘅酵母,牛油酥餅就出爐喇!

    蘇格蘭牛油酥餅以前賣得好貴,只有婚禮、聖誕節、新年等特殊節日先有得食;而家,愛丁堡 (Edinburgh) 各地嘅商家都有賣各種形狀嘅牛油酥餅,由「裙尾形」以至「手指形」等等,應有盡有。

    • 品嚐美食

    相片由 Dave souza 提供 (CC BY-SA 2.5) 經修改

    3

    蘇格蘭燕麥粥

    燕麥粥算係另一種蘇格蘭經典美食。雖然「粥」喺全球各地都廣為人「食」,但係蘇格蘭人總有獨一無二嘅食法,會慢慢煲滾啲燕麥粥,再用 12 吋長嘅「Spurtle」木匙攪碎結塊,之後加少少鹽甚至威士忌嚟調味,食落別有一番風味。

    • 品嚐美食

    相片由 Ungry Young Man 提供 (CC BY 2.0) 經修改

    4

    蘇格蘭威士忌

    蘇格蘭另一個特色名物,梗係蘇格蘭威士忌啦!可能因為呢樣知名飲品源自蘇格蘭,所以亦有人會簡稱佢做「Scotch」。蘇格蘭威士忌採用蒸餾大麥酒,配搭充滿泥炭味嘅清水兌製而成,風味獨特。如果你想進一步了解蘇格蘭威士忌,不妨參加愛丁堡 (Edinburgh) 嘅旅行團,試吓蘇格蘭威士忌體驗—到時選擇皇家大道 (Royal Mile) 附近留宿,就最方便喇!

    • 品嚐美食
    5

    蘇格蘭麥餅

    蘇格蘭麥餅 (Scottish Bannock) 係一種厚度同鬆餅相似嘅麵包,通常用麥片 (有時亦都會用普通麵粉) 焗熟製成,而家好多人都改用鐵鍋炮製嚕!多得蘇格蘭移民,蘇格蘭麥餅嘅足跡遍及全球,而美國同加拿大嘅美洲原住民仲早喺 18 世紀已經開始享用呢款美食添!其中一款最出名嘅蘇格蘭麥餅係「Selkirk Bannock」—諷刺嘅係…呢個版本似水果蛋糕多過似麥餅囉 (笑~)。

    每款蘇格蘭麥餅都似乎有過千個食譜,就連素羊雜布甸口味都見過!無論點樣變化,蘇格蘭麥餅總會帶俾你蘇格蘭正宗風味。

    • 品嚐美食

    相片由 Ninian Reid 提供 (CC BY 2.0) 經修改

    開始計劃行程

    Maps