卡塔爾既有古老嘅沙漠要塞,亦有超現代嘅首都城市,對比鮮明。呢度嘅建築地標種類廣泛,有受傳統伊斯蘭建築啟發嘅塔樓,亦有雄據天際線嘅現代摩天大廈,可謂新舊交融。

    我哋所推薦嘅好多地標都有令人印象深刻嘅外觀,啱晒大家影相打卡。不過,呢度唔係淨係可以影相嘅,仲有豐富嘅文化同娛樂活動可以體驗。我哋精挑細選出卡塔爾令人驚嘆嘅地標,包括舉辦眾多免費活動嘅國家圖書館、為鴿子建造嘅奇特塔樓,非常多元化,令人著迷。

    1

    多哈塔

    矗立於多哈西灣上方嘅標誌性塔樓

    標誌性嘅多哈塔 (Doha Tower,亦稱 Burj Doha),位於卡塔爾多哈西灣上方 238 米。陽具形狀嘅大廈從地面起有 46 層樓高,另有 3 層延伸到地下。根據設計呢幢建築物嘅法國建築師 Jean Nouvel 描述,大廈嘅形狀有暗示「充分呈現陽剛之氣」嘅意思。

    雖然呢棟高聳嘅寫字樓喺天際線中非常突出,但佢絕對唔係市內最巨型嘅建築物,不過獨特嚟講佢就數一數二喇。大廈外觀嘅斜角式鋼骨結構圓柱,呼應伊斯蘭嘅 Mashrabiya 窗花建築風格。呢種設計嘅目的係保護建築物免受熱力同沙狀殘留物嘅侵蝕,同一個地區有好多玻璃建築表面都有呢啲殘留物。喺呢座極為獨特嘅摩天大樓前面影返幅相,已經係呢趟旅行好好嘅紀念品。到咗夜晚,係燈光照射之下,佢仲更加靚添。

    地點: 1 Al Corniche St, Doha, Qatar

    開放時間: 星期日至四 08:00 至 17:00 (星期五至六休息)

    電話: +974 4442 0028

    地圖
    • 拍照
    2

    阿爾發塔

    從多哈最高嘅建築物飽覽美景

    阿爾發塔 (Aspire Tower) 亦被稱為「多哈火炬 (The Torch Doha)」,佢係卡塔爾多哈嘅多哈體育城 (Aspire Zone) 建築群之中一座樓高 300 米嘅摩天酒店。酒店位於正中心,鄰近有幾個當地景點,包括 Al Raya 購物中心、哈利法國際體育場。阿爾發塔同體育場起得咁近,喺 2016 年 12 月舉辦第 15 屆亞運會嘅時候,當然成為焦點。

    阿爾發塔係卡塔爾最高嘅建築物之一。要一邊欣賞壯麗嘅城市景觀,一邊享用高級晚餐嘅話,就要去塔樓頂部嘅全景餐廳 Panorama Restaurant 喇。

    地點: 卡塔爾多哈嘅 Baaya

    開放時間: Panorama Restaurant,每日 18:00 至 23:00

    電話: +974 4446 5600

    地圖
    • 家庭
    • 拍照
    3

    龍捲風塔

    漏斗形建築別出心裁,值得拍攝

    龍捲風塔 (Tornado Tower) 獨特嘅漏斗形狀非常吸睛,一眼就認得出。大廈亦被稱為 QIPCO 塔 (QIPCO Tower),樓高 52 層,向高空延伸接近 200 米。雖然大廈入面大部分地方都租咗出去做寫字樓,但係入面都有一啲向公眾開放嘅餐廳,包括一間壽司餐廳、一間牛扒屋。27 樓有一間健身室,而 28 樓就有風景優美嘅高級餐廳。

    龍捲風塔位於多哈嘅西灣區。如果您揸車去嘅話,地庫停車場有足夠嘅車位。大廈外牆嘅燈飾蔚爲壯觀,成為首都天際線嘅一大亮點,您夜晚嚟就有機會睇到喇。

    地點: West Bay, Majlis Al Taawon St, Doha, Qatar

    地圖
    • 拍照

    相片由 Ralf Steinberger 提供 (CC BY 2.0) 經修改

    4

    西德拉公共藝術

    觀賞卡塔爾嘅世界級公共裝置藝術

    喺西德拉醫學及研究中心 (Sidra Medical and Research Center) 嘅正前方,有一件好出名嘅裝置藝術品,係出自備受爭議嘅英國藝術家達米恩赫斯特 (Damien Hirst) 嘅。呢件裝置藝術品叫做「奇蹟之旅 (The Miraculous Journey)」,由 14 個大型青銅雕塑組成,描繪人類從受孕到出生嘅整個過程。

    赫斯特運用 5 米到 11 米高不等嘅雕塑,生動地描繪咗人類出生嘅奧妙。當中有描繪臀位分娩嘅過程,對某啲人嚟講,呢個現實可能太可怕喇。雕塑面世初期引來一啲批評,但係而家呢件極具爭議嘅藝術品已經得到廣泛讚揚。即使場景寫實到令部分人感到不安,但係呢種引人入勝嘅公共裝置藝術當然值得去睇吓啦。

    地點: Al Gharrafa St, Ar-Rayyan, Qatar

    電話: +974 4003 3333

    地圖
    • 拍照
    • 經濟實惠

    相片由 Alex Sergeev 提供 (CC BY-SA 3.0) 經修改

    5

    卡塔爾國家會議中心

    西德拉仿樹建築,正 Show 連場

    卡塔爾國家會議中心 (Qatar National Convention Center) 係呢個地區主要嘅活動場所之一,獨特嘅建築裡面設有多個最先進嘅劇院、會議廳同會議室。建築物嘅外觀設計,係參照沙漠上一棵叫做西德拉 (Sidra) 嘅樹。門廳嘅前面有舉世聞名嘅蜘蛛雕塑馬曼 (Maman),呢個由法國藝術家路易絲布爾喬亞 (Louise Bourgeoi) 創作嘅雕塑已經被複製成多個版本,擺放喺世界各地嘅博物館入面,包括倫敦嘅泰德現代美術館 (Tate Modern)。

    頂級嘅地區及國際盛會都會喺呢個會議中心舉行。一場嚟到,喺度睇返場 Show 都唔錯㗎。呢度咩都有得睇,棟篤笑、公眾論壇,以至 Hello Kitty Live 音樂會同古典音樂都有,記得提早 Check 吓有冇啱心水嘅節目呀。

    地點: 卡塔爾嘅艾雷恩

    開放時間: 每日 06:00 至 23:00

    電話: +974 4470 7000

    地圖
    • 家庭
    • 歷史文化`

    相片由 UNCTAD 提供 (CC BY-SA 2.0) 經修改

    6

    蘇巴拉堡

    參觀聯合國教科文組織世界遺產,一窺卡塔爾歷史

    蘇巴拉堡 (Al Zubara Fort) 位於一個如今已荒廢嘅同名城鎮附近,呢座大型堡壘主要由 3 座巨型圓塔同 1 座長方形塔樓組成。呢座堡壘由謝赫阿卜杜拉 (Sheikh Abdullah bin Jassim Al Thani) 於 1938 年建造,用作海岸軍駐地;而家已經成為博物館,定期舉辦展覽,介紹呢個地區嘅歷史。

    呢個荒廢嘅小鎮同保衛小鎮嘅堡壘坐落於卡塔爾半島嘅西北海岸,距離首都約 105 公里,已名列聯合國教科文組織世界遺產,好值得安排一日遊去觀光一番。不過要注意,嗰度可以遮蔭嘅地方唔多,記得要帶定零食同充足嘅水,最好避免喺中午同下午最熱嘅時候到達啦。

    地點: 卡塔爾 Madinat Ash Shamal 嘅蘇巴拉堡

    開放時間: 每日 07:30 至 17:00

    電話: +974 4442 4771

    地圖
    • 歷史文化`
    • 拍照

    相片由 Vincent van Zeijst 提供 (CC BY-SA 2.0) 經修改

    7

    巴爾贊塔

    名稱巧妙嘅 19 世紀塔樓,日夜魅力非凡

    巴爾贊塔 (Barzan Towers) 嘅歷史可追溯至 19 世紀末,當時豎立喺呢度就係為咗保護附近山谷所收集嘅珍貴雨水。巴爾贊 (Barzan) 嘅意思係「高處」,呢個名啱晒呢兩座超過 16 米高嘅瞭望塔啦。塔樓亦用於觀測月亮,幫助準確確定齋戒月嘅開始日期。

    塔樓位於多哈以北只有 15 公里距離,而且全日開放,隨時都可以去玩。塔樓嘅梯級同支柱建築非常宏偉,去到塔頂仲可以睇盡靚景,絕對係遊客打卡勝地。呢度附近有唔同嘅店舖,如果行行吓覺得口痕,隨時隨地都搵到嘢食㗎。

    地點: 卡塔爾穆罕默德 (Muhammed)

    電話: +974 4452 5555

    地圖
    • 拍照
    8

    艾爾瓦札巴碉堡

    細味卡塔爾 18 世紀碉堡嘅歷史

    艾爾瓦札巴碉堡 (Al Wajbah Fort) 可以追溯到 18 世紀末,係卡塔爾最悠久嘅歷史名勝之一。碉堡曾經係卡塔爾人民同鄂圖曼 (Ottoman) 軍隊嘅激戰場地,對當地人有特別意義,亦都喚起咗無數人嘅強烈民族自豪感。呢座碉堡由厚牆由 4 座極高嘅瞭望塔設計而成,入面有唔少武器陳列展示,俾遊客深入認識歷史。

    艾爾瓦札巴碉堡位於多哈以西約 15 公里,公眾可以免費入場。對比周圍平坦嘅建築,高聳嘅瞭望塔特別令人矚目,更加係你嚟到卡塔爾最無得彈嘅打卡熱點之一。

    地點: Dukhan Road, Al Wajba, Al Rayyan

    開放時間: 星期一至星期四 08:00 至 17:00 (逢星期五至星期六暫停開放)

    電話: +974 4406 9921

    地圖
    • 歷史文化`
    • 拍照
    • 經濟實惠
    9

    卡塔爾國家圖書館

    殿堂級國家圖書館多個免費活動任你參加

    卡塔爾國家圖書館 (Qatar National Library) 唔單止係一間國家圖書館,而且仲係一間研究同公共圖書館。圖書館裡面收藏咗超過 1 百萬本書,仲有大量數碼資源。會籍開放給所有卡塔爾居民,亦歡迎遊客參加。

    圖書館位於多哈教育城,而最大推介唔止係藏書豐富,更會每個月都舉辦多達 80 個對外開放嘅免費活動。活動種類豐富,包括編織班同藝術展覽等。卡塔爾愛樂樂團 (Qatar Philharmonic Orchestra) 每個月都會舉行免費公演。圖書館網站上會詳列每個月嘅所有活動。

    地點: Education City, Al Luqta St, Doha, Qatar

    開放時間: 星期六至星期四 08:00 至 20:00;星期五 16:00 至 20:00

    電話: +974 4454 6039

    地圖
    • 家庭

    相片由 Jeremy Wood 提供 (CC BY-SA 2.0) 經修改

    10

    鴿子塔

    不容錯過嘅獨特而有趣鴿子景點

    卡塔爾嘅鴿子塔 (Pigeon Towers) 毫無疑問係全國最獨特同有趣嘅景點之一。無論係遊客定當地人,佢地都好鍾意嚟打卡,而鴿子塔本身都有佢嘅實際用途。呢度係成千上萬隻鴿子嘅棲息地,而鴿子塔原意亦係想收集鴿子嘅排泄物,俾當地農民當作肥料使用。

    鴿子塔位於卡塔拉文化村 (Katara Cultural Village) 嘅卡塔拉清真寺 (Katara Mosque) 旁邊,採用傳統嘅伊斯蘭建築風格設計。單單係文化村就已經非常值得一遊,而且亦都可以作為行程其中一站,同時參觀附近嘅景點,例如係圓形劇場、會議中心,甚至係海灘。

    地點: 卡塔爾多哈嘅卡塔拉文化村

    電話: +974 4484 0000

    地圖
    • 拍照

    相片由 Creative Commons Qatar 提供 (CC BY 2.0) 經修改

    Shane Mac Donnchaidh | 特約撰稿人

    開始計劃行程

    Maps