卡塔爾係阿拉伯海灣沿岸比較「小巧」嘅國家之一,雖然面積細細,但係帶俾遊客嘅歷險活動同豪華享受就一啲都唔少!呢個國家將幾千年嘅中東文化同現代設施體驗融合為一,揮灑自如,務求令你嘅旅程畢生難忘。

    無論你係歷險達人、大豪客、海灘迷,定係運動發燒友,卡塔爾總有活動啱你心水同興趣。趁住呢度仲未成為熱爆旅遊勝地,你大可以早過朋友嚟到,先睹為快!仲未確定卡塔爾係咪你下次度假嘅目的地?以下係遊覽卡塔爾嘅最有力理由—睇完之後,你肯定唔會再猶疑不決。

    1

    全年氣候怡人

    由沙漠到海邊,卡塔爾長年陽光普照

    難得放假,想享受晴朗天氣?嚟到卡塔爾,日日都係 sunny day!呢度全年大多數時間嘅天氣都好好,冬季通常非常溫和,1 月算係最涼嘅月份,日間氣溫介乎 12°C 至 21°C 之間;而夏季就比較潮濕炎熱,7 月氣溫最高,可以達到 41.5°C 架!如果你咁啱喺卡塔爾見到落雨,嗰陣一定係冬天;而 2 月就係全年最潮濕嘅月份。

    有人可能會以為:卡塔爾位處中東地區,夏天實超熱啦!事實上,呢度嘅氣溫同赤道以上 25 至 30 緯度嘅海邊或者沙漠地方差唔多架咋。

    2

    傳統同現代美妙融合

    卡塔爾既頌揚悠久歷史,亦都展望未來

    卡塔爾歷史源遠流長,豐富多姿嘅舊日痕跡幾乎度度都見到,除咗建築物同博物館之外,仲有聯合國教科文組織世界文化遺址同市集添!之不過,咁都唔代表呢個國家淨係識緬懷過去架喎—望吓市內有幾多新式摩天大廈,都足以證明卡塔爾潮到爆啦!

    卡塔爾融合傳統同現代,全球其他地方都難以媲美,國內非常著重歷史承傳,同時又會為新移民同遊客提供現代化嘅便利設施、酒店同基建,唔同國家嘅文化、美食同埋生活方式可以講係共冶一爐。

    3

    戶外探險嘅好選擇

    卡塔爾令你腎上腺素飆升嘅刺激活動多鑼鑼

    卡塔爾絕對係尋求刺激度假體驗嘅理想去處!你可以喺阿拉伯灣上空跳傘或者水底潛水,亦都可以爬吓沙丘、探索吓古老堡壘。要數卡塔爾最受歡迎嘅戶外活動之一,肯定係沙漠越野探索之旅喇!旅客一坐上專屬嘅全地形車,就可向梅薩伊德 (Mesaieed) 沙漠進發。不過,如果想「貼地一鋪」,用當地最傳統嘅方式出遊嘅話,不妨捨棄全地形越野車,改騎駱駝吖!

    就算身處沙漠地帶,戶外歷險活動又唔一定要同「沙粒」扯上關係嘅;喺艾塔基拉 (Al Dhakira) 紅樹林撐艇,又或者沿住海岸玩風箏滑浪,其實都係卡塔爾人氣爆燈嘅行程嚟架。

    4

    精彩絕倫嘅博物館

    博物館由內而外同樣令人印象深刻

    卡塔爾嘅博物館唔單止珍藏罕見文物,就連外型都一樣咁引人入勝,同展品比較一啲都唔輸蝕架!

    其中,設計融入沙漠玫瑰風姿嘅卡塔爾國家博物館 (National Museum of Qatar) 正正係必遊景點之一;ALRIWAQ 就係美術博物館,最初用嚟做臨時展覽場地架咋,但係因為設計廣受歡迎,後來就索性保留做永久展覽空間嚕;而伊斯蘭藝術博物館 (Museum of Islamic Art) 由屢獲殊榮嘅建築師設計,外牆舖設咗石灰石,可以反射陽光,日頭閃爍生輝;謝赫費薩爾博物館 (Sheikh Faisal Museum) 就開設喺歷史悠久、保存完好嘅堡壘裡面,本身已經係充滿趣味嘅景點啦!

    5

    數之不盡嘅購物選擇

    由傳統市集以至購物中心,卡塔爾嘅「血拚」場地多姿多彩,為你「療癒身心」

    卡塔爾為當地人同遊客帶嚟種類繁多嘅購物選擇,尤其喺多哈,更加有時裝界最頂尖嘅名店,進駐一間又一間嘅豪華 Shopping Mall 裡面,淨係行勻卡塔爾購物中心 (Mall of Qatar) 嘅幾百家店舖、同埋近 500,000 平方米嘅零售娛樂空間,都夠你消磨成日喇!

    想感受地道購物體驗?卡塔爾嘅 souq (傳統露天市集) 就啱哂你,除咗試盡多哈地道美食之外,仲可以欣賞到當地製造嘅手工藝品,包括煮食煲、羊毛披肩,以至芬芳馥郁嘅香料同手工織籃,感覺就好似玩緊尋寶遊戲咁,你永遠都估唔到會遇上邊啲驚奇有趣嘅新發現。

    6

    享受物超所值嘅豪華體驗

    卡塔爾對奢華豪客固然魅力非凡;就算你得「窮遊」預算,其實都負擔得起精彩行程

    雖然卡塔爾有唔少豪華酒店同高檔購物餐飲選擇,但對於預算有限嘅遊客嚟講,呢個旅遊勝地又唔係完全遙不可及架喎,有啲豪華體驗仲連「窮遊客」都試得起添!事實上,卡塔爾嘅超值豪華住宿唔難搵:

    例如,好似洲際多哈城市酒店 (InterContinental Doha The City)多哈君悅酒店 (Grand Hyatt Doha)多哈文華東方酒店 (Mandarin Oriental Doha) 等等嘅多哈 5 星級住宿每晚房價有時會喺 SAR1,500 以下,非旺季仲可以低至 SAR500 添!

    7

    餐飲業蓬勃發展

    國際遊客同外籍人士對卡塔爾嘅新興餐飲業影響深遠

    想喺沙漠食壽司?喺海邊食炒飯?望住阿拉伯海灣靚景食三文治?你想點都得!卡塔爾嘅餐飲文化發展蓬勃,擁抱嚟自世界各地嘅風味,各國料理幾乎都可以喺呢度搵到。

    好多酒店同度假勝地都設有星級餐廳,而你亦可以「捐窿捐隙」,搵吓特色餐館仔,喺店家熱情招待下品嚐卡塔爾傳統佳餚。如果你一心想試正宗地道美食,仲會發現唔少菜式都有伊朗、印度同北非料理嘅影子添;而由海灣新鮮運到嘅海產更加係重點所在!

    8

    體驗沙漠嘅壯闊無邊

    卡塔爾沙丘壯觀,為你創造出無與倫比嘅「打卡」背景

    無論你想喺沙漠越野探索,定係純粹喺沙丘頂野餐,都好值得去卡塔爾西南部最遼闊嘅卡塔爾沙漠走一趟;而初嚟甫到嘅旅客就更加唔可以錯過呢個壯觀景點啦!面對一望無際嘅沙漠,你除咗會驚嘆之外,亦都不禁體會到自己有幾渺小。

    隨住光線不斷變化,沙丘唔同時間會展現出唔同嘅風貌,最完美嘅景致莫過於日出、日落同埋夜色—呢啲時候,卡塔爾沙漠嘅天空特別清朗。

    9

    喺人潮湧至之前,率先一睹隱世瑰寶

    咪俾人捷足先登—快過成日旅行嘅朋友一步,率先遊遍卡塔爾

    卡塔爾縱使充滿魅力,但咁耐以嚟都仲係好低調…之不過,隨住呢度喺 2022 年舉辦 FIFA 世界杯,情況好快就會改變,而世人嘅目光即將聚焦喺度。想成為發掘呢個隱世瑰寶嘅「先頭部隊」之一,而家就 Plan 吓你嘅卡塔爾行程啦!

    就算卡塔爾目前仲未有大批遊客蜂湧而至,都唔好以為佢有任何不足之處喎;事實上,卡塔爾嘅基礎設施出色,隨時 Ready 迎接獨具慧眼嘅旅客—呢度交通便捷,道路系統完善,再加埋現代化嘅地鐵系統,要喺國內觀光,幾時都咁輕而易舉。

    10

    2022 年 FIFA 世界杯

    到咗 2022 年,所有人嘅目光都會集中喺卡塔爾

    2022 年仲有耐先到?面對世局日新月異,時間一眨眼就過架喇。如果你想置身 2022 年 FIFA 世界杯熱潮之中,而家就要開始計劃!呢場國際盛事第一次喺回教為主嘅國家舉辦,亦都係第一次揀 11 月尾至 12 月中上演決賽週賽事,到時嘅冬季天氣肯定會令球員同球迷都倍感舒暢。

    卡塔爾目前密鑼緊鼓咁進行籌備工作,設計咗好多反映國家歷史同文化嘅新場館,仲奉行零浪費環保主義添!各個場地散佈喺卡塔爾嘅東部地區,又以多哈、阿爾科爾 (Al-Khor)、路薩爾 (Lusail),艾華卡拉 (Al-Wakrah) 同艾利恩 (Al-Rayyan) 為主。打算一次過去哂咁多個場地睇波嘅話,不妨順道探索卡塔爾同附近各個旅遊勝地吖!

    Holly Riddle | 特約撰稿人

    開始計劃行程

    透過 Hotels.com 預訂的好處

    旅遊提示

    新型肺炎提示:旅遊限制急速變化,目的地或設行前檢測及到埗檢疫等安排。

    請查閱行程的相關規定。
    返回頁首

    Maps