我哋嘅卡塔爾旅遊懶人包為你提供卡塔爾之旅嘅基本資料,等你可以計劃點喺充滿活力又現代化十足嘅多哈盡情玩樂。即使你成日四處旅行,但都可能會有以下問題:一年中嘅最佳旅遊時間係幾時?我點安排由機場去酒店嘅接送服務?點樣去遊覽城市係最好?我哋已經為你準備好哂答案,仲有關於貨幣同文化嘅資訊,以及一啲實用旅行貼士。

    一切盡在呢份卡塔爾旅遊懶人包之中。睇完呢份簡短易明嘅指南之後,你嘅卡塔爾旅程應該就準備得七七八八喇!

    1

    去卡塔爾嘅最佳時機 (天氣方面)

    卡塔爾屬亞熱帶沙漠氣候,夏季極之炎熱,全年降雨量好少。

    平均溫度由 1 月嘅 17°C 到 7 月嘅 36°C,而 5 月到 9 月係最熱嘅月份中,最高溫度超過 40°C 並不罕見。

    卡塔爾嘅遊客大部分時間都可以享受充足嘅陽光,就算係 2 月嘅「多雨」季節,平均都只有 2.1 天會落雨。遊覽多哈嘅最佳時朿喺 11 月到 3 月嘅清涼季節,個陣嘅氣溫界乎 14°C 到 30°C 之間。

    2

    卡塔爾嘅基本資訊

    • 主要語言:阿拉伯語 (官方語言),英語亦普遍
    • 插頭類型:G (同英國一樣)
    • 電力:240 V
    • 貨幣:里亞爾 (QR 或 QAR)
    • 國際電話區號:+974
    • 緊急電話號碼:999
    3

    卡塔爾法律與習俗須知

    卡塔爾人友善又好客,不過遊客應注意當地宗教信仰同習俗,確保不會犯禁或者違反法律。

    宗教與法律

    卡塔爾喺伊斯蘭國家,而當地嘅法律同傳統都體現呢一點。進口毒品、電子煙、酒精、色情品同豬肉同屬違法,而喺公眾場所飲醉酒或者飲酒都係違法。酒精飲料只會僅喺持牌餐廳同酒吧向非穆斯林遊客提供。齋戒月期間,請勿喺公共場所飲酒或進食。

    文化禮節

    男女都應穿著得體,並保持覆蓋肩膀同膝頭,亦建議女性喺公共場合唔好穿著緊身衣物。泳衣同比基尼只能喺酒店泳池內穿著。卡塔爾禁止同性戀行為以及男女公開展示親密關係,例如拖手同接吻。

    4

    市內交通

    哈馬德國際機場

    哈馬德國際機場距離多哈市區東南面約 15 公里。自 2014 年開始運作以嚟,呢個現代化嘅機場係連接歐洲同亞洲嘅繁忙交通樞紐,每年客流量約有 3500 萬,為 50 幾間航空公司提供服務。前往多哈市區嘅交通方式有以下幾種:

    • 搭的士出市中心大約需要 30 分鐘,機場的士由國營 Mowasalat 公司嘅 Karwa 品牌經營。如果想搭機場的士,請按指示牌去到埗大堂左側嘅的士亭。的士車費為 QAR25 起跳,05:00 至 21:00 期間為每公里 QAR1.20,21:00 至 05:00 期間為每公里 QAR1.80。
    • 多哈有 3 條機場巴士路線服務,票價範圍為 QAR2.50 到 QAR7 不等。如果想坐巴士,就一定要用 Karwa 智能卡俾車錢,你可以去到埗大堂一樓嘅巴士亭自動售票機購買。
    • 想租車既話,有幾間本地同國際租車公司俾你揀,你可以去到埗大堂一樓,嗰到有超過 20 個代理商嘅櫃檯。
    • 多哈地鐵亦有機場站,可直達市中心。

    相片由 Arne Müseler 提供 (CC BY-SA 3.0) 經修改

    5

    多哈交通

    旅遊貼士

    多哈唔算喺廣闊嘅城市,所以坐的士唔洗坐好遠,就可以輕鬆去哂所有景點。沙漠嘅高溫會令人覺步行長距離或者踩好耐單車都好煩躁,不過 7 公里長嘅海濱長廊絕對喺散步或者踩單車嘅勝地。巴士服務無其他城市咁發達,不過價錢合理而又現代化,而多哈嘅新地鐵系統已經喺 2019 年 5 月開始運作,未來幾年會繼續擴展。

    6

    的士

    • 由國營 Mowasalat 公司經營嘅 Karwa 品牌提供最多的士選擇,亦係唯一由機場開出嘅的士服務。
    • 如果你想預約的士,你可以叫酒店幫你 Call 車,或者喺市內搵下周圍嘅的士站。
    • 你都可以致電 +974 4458 8888 預約的士 (需額外支付 QAR4)。
    • 車資最低 QAR10 起跳,日頭跳一次錶為 QAR1.60,夜間或市外跳一次錶為 QAR1.90。
    • 只能以里亞爾現金付款。
    • 提供的士服務應用程式嘅 Uber 同 Careem 都可以喺多哈使用。

    相片由 errorval01 提供 (CC BY 2.0) 經修改

    7

    地鐵

    • 多哈嘅地鐵服務於 2019 年 5 月開始有限度服務。呢啲火車喺世界上最快嘅無人駕駛火車,能夠達到時速 100 公里。
    • 單程標準艙嘅地鐵票價由 QAR2 起。
    • 到達多哈前,請先睇睇新聞同相關網站,了解多哈地鐵服務更新,地鐵服務會喺卡塔爾舉辦 2022 年 FIFA 世界杯之前嘅幾年中逐步擴展。
    8

    租用汽車及豪華房車

    • 本地同國際品牌嘅多間營運商均提供租車服務。
    • 租車需要用信用卡付款,並出示護照同有效嘅駕駛執照。
    • 呢到都會提供專車接送服務,係商務旅客嘅熱門選擇。呢度有各種汽車同司機選擇,由標準豪華房車到貴賓豪華服務都可以揀,亦都可以按小時或日數預訂。
    • 豪華房車服務可以經 Mowasalat 或私人營運商預訂。你可以致電直接預訂,或向酒店尋求幫助。

    相片由 UNCTAD 提供 (CC BY-SA 2.0) 經修改

    9

    巴士

    • Mowasalat 公共巴士服務經營城市內外多條路線,
    • 車票價格為 QAR3 到 QAR4 (多哈內) 及 QAR4 到 QAR9 (多哈外)。
    • 旅客必須用 Karwa 智能卡俾錢,呢張卡可以喺機場、多哈巴士站、卡塔爾購物中心 (Qatar Mall)、卡塔爾之珠同多間商戶嘅自動售貨機購買。
    • 呢款卡有 3 類:普通可充值卡 (QAR30)、購買後 24 小時內最多可乘搭 2 次嘅有限制卡 (QAR10),以及喺購買後 24 小時內可無限次使用嘅無限卡 (QAR20)。
    • 如果你好善忘,上車前無買無帶智能卡,咁就會被收取 QAR10 嘅「無卡費」啦。

    小道消息貼士:雖然唔係明文規定,但係巴士前排座位通常留俾婦女同小朋友坐。

    10

    卡塔爾值得期待嘅年度盛事

    志向國際風箏節

    • 節目簡介:包含放風箏、食品、藝術同文化活動嘅多彩節日。
    • 時間:三月初
    • 地點:志向公園 (Aspire Park)

    卡塔爾國際藝術節

    • 節目簡介:設有藝術展覽同現場繪畫研討會,帶一眾藝術家、藝術迷、收藏家同投資者聚首一堂。
    • 時間:10 月下旬/11 月上旬
    • 地點:卡塔拉文化村 (Katara Cultural Village)

    沙哈尼亞駱駝比賽 (Al-Shahaniya Camel Race)

    • 節目簡介:一系列激烈嘅駱駝比賽,一眾遙控騎師爭奪決賽冠軍,贏得 HH 埃米爾嘅寶劍。
    • 時間:11 月至 4 月期間嘅每個星期五
    • 地點:沙哈尼亞賽道 (Al-Shahaniya racing track),距離多哈市中心約一小時

    開始計劃行程

    繼續探索

    中東

    Maps