卡塔爾係個一流購物天堂,提供其他國家甚少見到嘅獨特商品。多間獨一無二嘅購物中心,吸引唔同高級時裝同奢侈品牌駐場。想搵一啲富有當地色彩嘅禮物同手信?咁活力十足嘅露天市場 (傳統市集) 絕對係你嘅首選之地。

    瓦吉夫傳統市集 (Souq Waqif) 係多哈最大同最古老嘅市集,提供唔同款式嘅手信。市集內嘅小巷蜿蜒,售有傳統手工藝品、紡織品、香料同香水等,商品款式應有盡有。我哋已為你列出卡塔爾最有趣嘅手信,記得睇到心水手信時要殺價一番。討價還價係當地購物文化,所以你絕對可以安心殺價。

    1

    Al-Sadu 編織

    用古代刺繡裝飾家居

    Al-Sadu 係卡塔爾買到嘅傳統紀念品之一,呢種手工編織物料由駱駝毛同山羊毛製成。Al-Sadu 嘅編織技術屬於貝都因游牧民族,佢哋數千年以嚟都一直用呢種刺繡技術製造帳篷、地氈、毛氈同咕臣。

    傳統紡織品係黑色、白色、啡色、米色同紅色,具備獨特幾何設計同圖案,象徵部落深厚嘅文化底蘊同沙漠環境。你可以喺瓦吉夫傳統市集一看當地婦女編織嘅過程。位於海濱大道 (Corniche) 末端嘅露天市集,售有各式各樣 Al-Sadu 紡織物。

    • 購物
    • 歷史文化`
    2

    達拉咖啡壺

    阿拉伯人熱情好客象徵

    達拉 (Dllah) 係由黃銅或銀製成嘅傳統阿拉伯咖啡壺,展現出阿拉伯人嘅好客之道。喺卡塔爾多個世紀嘅咖啡傳統入面,呢隻咖啡壺用作沖泡一款名為卡瓦 (Qahwa) 嘅阿拉伯咖啡迎接來賓,咖啡混合咗荳蔻,入口香濃帶辣。咖啡搭配匹配嘅迷你金屬杯 Finjaan 奉上。

    達拉唔單止實用性十足,仲帶有幾何雕刻甚至寶石點綴。無論你係唔係咖啡迷,地道嘅咖啡壺都係家居必備奪目裝飾擺設,必定可以為屋企增添異國風情。傳統市集、大多數酒店禮品店同市中心購物中心 (City Centre) 同皇家廣場 (Royal Plaza) 等商場嘅手信店都可以搵到咖啡壺。

    • 購物

    相片由 Abdulla Al Muhairi 提供 (CC BY 2.0) 經修改

    3

    羊绒披肩、披肩同頸巾

    用色彩繽紛嘅紡織物包圍自己

    我哋經常買啲精美但未必成日用到嘅手信。不過披肩同頸巾就唔同喇!呢啲溫暖而精緻嘅服飾由上等羊絨製成,非常適合旅行或者露營時穿著,甚至可以成為你海灘玩樂同出席晚宴嘅配飾。

    卡塔爾嘅羊绒披肩比其他地方平,而且有多種唔同顏色、圖案同品質。披肩折埋之後就變得輕盈小巧,十分方便,絕對係手信首選。有咁多顏色可以揀,真係叫人睇到眼花撩亂,心大心細。位於多哈阿勒卡里街 (Al Khaleej Street) 嘅孟買絲綢中心 (Bombay Silk Centre) 同喺本馬哈茂德 (Bin Mehmood) 嘅東方地氈公司 (Oriental Carpet Company),都係當地人購買優質羊绒披肩嘅心水地方。傳統市集嘅產品價錢就平啲。

    • 購物
    4

    阿拉伯甜品

    當地糖果、棗、果仁同蜜糖萬萬不能錯過

    卡塔爾以多款一流阿拉伯甜品聞名。你可以喺露天市集、購物中心同咖啡廳,品嚐卡塔爾同中東各式各樣獨有嘅傳統甜品同糖果。必食款式有用提子糖蜜製成嘅開心果餡玫瑰味糖果,表面鋪滿芝麻嘅甜點,同埋大受歡迎嘅果仁蜜餅 (Baklava)。

    天然蜂蜜、當地種植嘅棗同各種堅果隨處可見。紅棗有唔同顏色、大小同甜度;紅棗喺卡塔爾具有特殊文化意義,因為齋戒月期間開齋最先入口嘅食物就係紅棗。鍾意食甜嘢嘅你,一定要一邊細味表面鋪有朱古力嘅紅棗、開心果、堅果餡紅棗同椰子紅棗卷,一邊品嚐阿拉伯咖啡。位於多哈 Salwa Road 嘅艾克甜品店 (Al Aker Sweets) 簡直係甜品天堂。想買罕有款式嘅盒裝紅棗?咁就要去位於瓦吉夫傳統市集 (Souq Waqif) 嘅法爾埃爾克海特乾棗店 (Fal Elkhair Dried Dates Shop)

    • 家庭
    • 購物
    5

    沉香香品

    將卡塔爾嘅香味帶返屋企

    沉香係卡塔爾嘅傳統香品。家中、車上,甚至市集、酒店同購物中心,無論去到邊,你都會聞到香木燃燒時嘅芳香。沉香獲譽為「眾神之木」,提取自罕有沉香樹嘅木心樹脂製成。

    沉香產品款式多多,常見嘅款式有燃燒用嘅木片同埋潤膚油,不過建議大家要買就買沉香香水。當你試聞唔同阿拉伯香水時,撲鼻嘅香韻真係令人為之入迷。瓦吉夫傳統市集嘅阿杰馬爾香水店 (Ajmal Perfumes) 供應當地製造嘅香水。當地其他購物中心,例如市中心購物商場 (City Centre)、凱悅廣場 (Hyatt Plaza) 同皇家廣場 (Royal Plaza) 都可以搵到香水店。

    • 購物

    相片由 Agarwood For Life™ 提供 (CC BY 2.0) 經修改

    6

    阿拉伯文個人名字吊墜

    簡單嘅卡塔爾紀念品

    想要件好嘅紀念品紀念卡塔爾之旅?咁個人化阿拉伯文名吊墜絕對係個好選擇。多哈各地有好多珠寶商都會以銀或金製作呢款吊墜,價錢唔貴。卡塔爾係世界嘅珍珠之都。你仲可以喺當地搵到由琥珀、白金、銀同鉑金製成嘅珠寶,有啲甚至帶有半寶石。

    多數珠寶匠人可以幫你打造專屬款式。位於瓦吉夫傳統市集旁嘅黃金市集 (Gold Souq) 相當值得一去,店內所售嘅黃金珠寶都帶有政府印章,純度同質素有保證。

    • 伴侶
    • 購物
    • 豪華住宿
    7

    焚香同傳統香爐

    香甜嘅卡塔爾焚香令家居香氣十足

    除咗可以喺卡塔爾購買當地嘅香水之外,你仲可以買各種焚香同帶點綴嘅傳統香爐。唔同款式嘅焚香任君選擇,大家一定要花時間搵出自己鍾意嘅焚香。

    乳香氣味濃郁而令人心神曠怡,難怪成為熱門選擇。香丸 (Bakhoor) 混合沉香、龍涎香油、檀香油、花粉,燕麥和白麝香製成,外形呈球狀,聞上嚟香氣撲鼻,都好值得試下。你唔鍾意燒香嘅話,都可以買個香爐擺喺屋企做紀念品。統統都可以喺中央市集 (Central Market) 後面嘅瓦吉夫傳統市集同阿曼傳統市集 (Omani Souq) 搵到。

    • 購物

    相片由 Mishma Abraham 提供 (CC BY 2.0) 經修改

    8

    帶裝飾嘅水煙管

    用正宗卡塔爾水煙管裝飾家居

    水煙管高身之餘又帶有精緻奪目點綴,可以擺喺走廊或客廳增添個人風格。水煙管亦好適合用作聯誼。食水煙係中東標誌性嘅消遣活動,而且水煙同卡塔爾當地文化息息相關。水煙管又名為 Hookah,經常出現喺家居、餐廳、聚會同水煙吧。

    你可以喺卡塔爾各地買到各種裝飾用嘅迷你水煙管同真正嘅水煙管。無論你食唔食水煙都好,帶點綴嘅水煙管絕對係一件地道嘅美麗紀念品,你甚至可以為自己或摯愛自訂個人化水煙管作為紀念品。瓦吉夫傳統市集售有多款商品。大多數提供食物同香水嘅商店都有水煙管出售。

    • 購物
    9

    裝飾用木箱

    漂亮實用嘅傳統木箱

    裝飾用阿拉伯木箱絕對係卡塔爾不可錯過嘅紀念品。木箱唔單止方便攜帶,仲可以放喺屋企存放珠寶同其他小飾物,絕對係完美嘅禮物之選。

    木箱手工精美,設有唔同形狀同大小。傳統木箱飾有複雜圖紋,設計特別。如果你想搵啲更加特別嘅款式,咁黃銅製嘅箱甚至嵌有金屬或珍珠嘅駱駝骨箱,就一定啱你心意。你可以喺瓦吉夫傳統市集、Suhaim Bin Hamad 街嘅東方地氈公司 (Oriental Carpet Company),同埋多哈市中心購物中心 (City-Center Doha) 同皇家廣場 (Royal Plaza) 搵到佢哋。臨飛前一刻想買嘅話,可以喺哈瑪國際機場 (Hamad International Airport) 嘅卡塔爾免稅店 (Qatar Duty-Free) 購買。

    • 購物
    10

    阿拉伯燈

    房間散發陣陣浪漫氣息

    華麗嘅阿拉伯燈為任何個人空間增添一絲夢幻氣息。阿拉伯燈帶有鮮艷玻璃、精美圖案同優雅形狀,而且有多款獨特設計款式可供選擇。

    小吊燈比較抵買,而且容易拎走。鵝頸枱燈帶有金屬底座,設計優美,真係令人愛不釋手。你買咗邊款燈都好,包裝時要格外小心,唔好整爛佢哋。最好就將佢哋放入手提行李入面。瓦吉夫傳統市集 (Souq Waqif)提供多款標誌性阿拉伯燈。

    • 購物
    Jacqui de Klerk | 特約撰稿人

    開始計劃行程

    Maps