多哈十大最好玩嘅活動

穆罕默德·伊本·阿卜杜勒·瓦哈卜阿訇酋長清真寺由內到外都令人目不暇給。佢係一座壯觀嘅建築，值得擁有卡塔爾國家清真寺嘅稱號。佢嘅建築旨在反映卡塔爾較為古老同傳統嘅房屋，由明亮嘅白色牆壁至你腳下嘅地氈，每一個你見到嘅地方都反映出經典嘅伊斯蘭建築同設計特色。

嗰度可以欣賞到西灣嘅天際線，由於你好難唔俾佢所震撼到，所以就請確保有帶備相機，用嚟拍攝遠處壯麗嘅摩天大樓景色喇。注意，由於呢個係一個仍然使用中嘅禮拜場所，所以請穿著適當服飾。

濱海大道係一條迷人嘅海濱長廊，沿多哈灣延伸 7 公里。呢條寬闊嘅長廊可以令你欣賞到海邊同城市天際線嘅美景，係當地家庭同遊客都相當鍾意去嘅聚會地點。

你可以喺黎明時分嚟濱海大道漫步，睇住金光映照中央商業區嘅高樓大廈，又或者喺繁忙嘅傍晚時分過嚟，睇下喺海灣之中漂浮嘅傳統木製單桅帆船。一路上會有好多咖啡館同餐廳，俾你一邊放鬆一邊欣賞美景。

瓦奇夫市場嘅店舖分佈喺濱海大道附近 4 個街區，嗰度係一個充滿活力嘅百年市場，亦曾經係貝都因人買賣駱駝以及其他商品嘅交易中心。至於嗰啲唔係嚟市場買駱駝嘅人，亦可以搵到好多其他奪目嘅商品，由金飾到色彩繽紛嘅布料以至阿拉丁風格嘅青銅燈，嗰度都應有盡有。

記得要空住肚去，俾自己試下附近本地小食攤售賣嘅嘢食，又或者停落嚟飲杯咖啡或茶歇一歇，同時觀察下市場中入面嘅熱鬧情況。

伊斯蘭藝術博物館擁有令人驚嘆嘅建築以及大量藝術同手工藝品，去嗰度參觀係喺多哈最好嘅活動之一，嗰度亦都係市內其中一個最著名嘅景點。博物館坐落喺多哈灣嘅濱海大道之上，收藏住從 14 世紀到現代嘅伊斯蘭世界陶器、手稿、金屬製品、紡織品同其他精美藝術品。

由於入面有餐廳而且中庭每個月都會舉辦免費室內音樂會，遊客好易就會喺度待上幾個鐘。博物館亦會喺星期四及星期六 14:00 提供英文同阿拉伯文嘅免費導賞服務。入場費大約係 50 里亞爾，而 16 歲以下嘅小朋友可以免費入場。

阿爾發塔係多哈最高嘅建築物，而家係一間豪華酒店同會議場所。由呢座 300 米高嘅摩天大樓上面欣賞璀璨城市景觀嘅最佳方法，就係去酒店嘅旋轉餐廳 Three Sixty 用餐。

另一個方法，就係去健身俱樂部享受「高高在上」嘅水療護理，並使用佢嘅健身室同懸臂式游泳池，咁你就可以喺 19 樓欣賞到極好嘅風景。阿爾發塔位於該市嘅多哈體育城，毗鄰多哈嘅頂級體育設施同購物中心。

購物人士一走入 Villaggio Mall 可能會以為自己突然去咗意大利，因為嗰度有威尼斯風格嘅運河同貢多拉坐。由於所有店舖同設施都喺有冷氣嘅商場入面，所以你唔洗驚比沙漠熱浪熱溶，就可以盡情睇最新時尚款式、享用唔同嘅午餐選項，又或者喺 Gondolania 主題樂園大玩特玩。

呢個購物中心入面有幾個高級品牌，包括 Louis Vuitton、Christian Dior 同 Gucci，但係如果你「彈藥」唔算多，亦都有價值比較相宜嘅店舖可以逛。

雖然現代卡塔爾對獵鷹嘅實際需求唔大，但係飼養同訓練呢啲雄偉鳥類嘅傳統依仍保留咗落嚟，並且已經被聯合國教科文組織列為重要嘅文化習俗。見到男人同男仔一邊喺市內嘅街道同市集穿梭，一邊自豪咁將珍貴嘅獵鷹放喺手臂上面，並唔係唔尋常嘅景象。

而去鄰近瓦奇夫市場嘅獵鷹市場，你就可以一探呢個獵鷹世界。係嗰度，你可以見到出售各種獵鷹用具嘅店舖，又或者參觀佢每個月嘅拍賣會，見證一啲較為優秀嘅獵鷹點樣可以賣到幾萬美金一隻。

想去海灘嘅旅客可以係伊斯蘭藝術博物館附近嘅碼頭，登上豪華雙體船前往香蕉島 (Banana Island)。你可以期待一下喺泳池旁邊好悠閒咁過一日、去划獨木舟、坐香蕉船、滑水梯，以及進行其他親子水上運動同娛樂活動。

香蕉島由多哈香蕉島安納塔拉度假酒店 (Banana Island Resort Doha by Anantara) 經營，一日通門票大約係 350 里亞爾，門票包坐船、去游泳池同海灘、同埋可以喺度假村嘅餐廳同玩休閒活動嘅時候用入面嘅積分。

多哈嘅卡塔拉文化村擁有宏偉嘅希臘羅馬圓形劇場，而且全年都會有好多表演同節慶，係一站式嘅藝術文化勝地。卡塔拉建於卡塔爾之珠附近嘅人工土地之上，設計擁有好似迷宮咁嘅小巷同埋鴿子塔，重現昔日嘅傳統生活面貌。

遊客可以係呢度探索唔同嘅店舖同畫廊、喺咖啡店同餐廳食吓嘢，又或者喺海灘上面放鬆一吓，度過一整日。最好就係喺涼爽嘅傍晚時間去，因為到時沿住長廊會有食品攤位同市場攤販擺檔。

卡塔爾之珠坐落喺一個佔地 4 平方公里嘅人造島上面，係一個摩登嘅區域，嗰度有好多唔同嘅體育、娛樂同購物場所俾你去探索。好多人嚟呢度只係為咗睇吓碼頭嘅時髦遊艇，又或者去其中一個海灘玩吓水上運動。

而對於小朋友同追求刺激嘅成年人嚟講，嗰度有個充滿活力嘅室內游樂場 Megapolis，裡面有保齡球場、逃脫室以及唔同嘅街機遊戲俾你玩。嗰度嘅餐廳提供咗各種美食，由 Alison Nelson’s Chocolate Bar 出品嘅手工甜品，以至 Yasmine Palace 炮製嘅安達盧西亞風味皇室美食都有。