卡塔爾正在急速發展,好多好玩有趣嘅主題公園相繼落成,為一家大細帶嚟唔同親子景點。多哈除咗有懷舊景點之外,仲設有唔同先進遊樂園,為家庭旅客帶嚟更多有趣選擇。

    如果你計劃帶小朋友去卡塔爾旅行時喺主題公園玩樂,佢哋一定會喺公園入面玩得盡興。我哋喺下面列出咗卡塔爾最佳主題公園,有啲有室內雪場,亦有啲設有機動遊戲。

    1

    Gondolania

    喺中東感受歐洲風情

    • 家庭

    大型嘅 Gondolania 主題公園坐落喺有冷氣嘅 Villaggio Mall 之內,確保你隨時都可以享受到當中有益身心嘅娛樂設施。公園名稱嘅由來,係根據裡面一個可愛嘅威尼斯風格遊樂設施而命名,佢會穿過一條人工運河,就好似將古老嘅意大利建築搬咗嚟中東一樣。

    啱小朋友玩嘅包括摩天輪、恐龍樂園同碰碰車,而大個啲嘅小朋友同大人就可以玩吓刺激嘅過山車、滑浪飛船同跳樓機喇。Gondolania 樂園入面仲有各式美食、4D 電影院、10 柱保齡球場、溜冰同雷射槍戰設施,保證個個都能夠盡興。

    地點: Villaggio Mall, Aspire Park Rd, Doha, Qatar

    開放時間: 星期六至三 09:00 至 23:00;星期四 09:00 至 00:00;星期五 09:00 至 11:30、12:30 至 00:00

    電話: +974 4403 9800

    地圖
    2

    Aqua Park Qatar

    喺呢個動感十足嘅水上樂園抵抗熱浪

    • 家庭

    Aqua Park Qatar 係多哈逃避卡塔爾熱浪嘅好去處。由於卡塔爾嘅乾旱氣候出咗名熱到難受,因此呢個清涼嘅人造綠洲就相當值得去。

    呢個水上樂園大約有 5 個足球場咁大,同一時間可以容納多達 3,000 人。而且佢為婦女同一家大細特設唔同嘅入場日子同時段。樂園入面有眾多刺激嘅遊樂同水上活動,挑戰大膽嘅你,包括大浪池、管道滑梯、快速線同滑浪場設施等等。無咁刺激嘅選擇就包括非洲村落、碰碰船、漂流河、潟湖游泳池同海盜灣等等。

    地點: Salwa Road Exit 29 Abu Nakhla, Doha, Qatar

    開放時間: 開放時間因季節而有所唔同 (冬季暫停開放)

    電話: +974 4490 5878

    地圖
    3

    Virtuocity

    卡塔爾嘅遊戲聖地

    • 家庭

    作為區內首個專門嘅遊戲中心,Virtuocity 吸引咗多哈大批嘅遊戲愛好者嚟到。佢嘅中心係一個具未來感嘅競技場,國內最好嘅電競選手都會喺度激烈對戰,展示精準嘅技術,一決勝負。超過 200 部嘅高規格個人電腦可以俾我哋呢啲凡人喺錦標賽之間嘅空檔時間娛樂一吓;另外亦有按鐘俾錢嘅套餐服務,適合專業同休閒遊戲玩家使用。

    如果想接受現實世界嘅挑戰,就叫埋你啲朋友去 Enigma Escape Room 啦。喺呢度,你嘅解謎能力會喺呢個 60 分鐘嘅刺激遊戲入面被推至極限。Virtuocity 另一個人氣設施就係佢嘅全動賽車模擬器喇。

    地點: Doha Festival City, Umm Salal Muhammed, Qatar

    開放時間: 星期六至三 10:00 至 22:00;星期四 10:00 至 00:00;星期五 13:00 至 00:00

    電話: +974 4042 0444

    地圖
    4

    Jungle Zone

    歡迎嚟到叢林

    • 家庭

    多哈 Hyatt Plaza 入面嘅 Jungle Zone 係一個充滿動感並且以叢林為主題嘅樂園,當中設有好多刺激活動。整個室內區域都經過精心裝飾,去模仿茂密嘅熱帶雨林,當中更加入咗卡通動植物元素。刺激嘅遊樂設施包括 Splash Falls、Funcano Rollercoaster 以及 Candy Bouncers。另外,碰碰船、賽車場同嘉年華遊戲等嘅往常熱門設施就吸引咗較為年輕嘅一群。

    以亞馬遜同熱帶等獨特主題設計嘅派對房,係舉辦一個難忘兒童生日會嘅理想場所。如果想令你嘅私人派對更添趣味,亦可以要求佢哋安排為你度身訂造嘅現場娛樂活動,例如臉部彩繪、魔術表演、雜技又或者雜耍表演。

    地點: Al Waab St, Doha, Qatar

    開放時間: 星期日至五 10:00 至 14:00 (逢星期六暫停開放)

    電話: +974 4499 9699

    地圖
    5

    Circus Land

    位於多哈嘅馬戲團風格樂園

    • 家庭

    Circus Land 呢個多哈熱門景點雖然歷史悠久,但係並無失去佢充滿樂趣嘅魅力。呢個以馬戲團為主題嘅大型樂園有好多適合唔同年齡小朋友玩嘅遊樂設施,包括旋轉木馬、Red Baron 過山車、碰碰車、彈床同埋充氣滑梯等等。

    樓高 4 層嘅柔軟遊樂區係可以俾小朋友安全咁蹦蹦跳嘅地方,而大人就可以去玩一系列嘅電子遊戲同模擬器。佢嘅大型美食廣場更加有盡國際知名連鎖店,可以確保每個人都食得好、食得飽,而如果你想睇場戲輕鬆吓,呢度亦有一個高科技電影院。

    地點: Landmark Mall Al Markhiya St, Qatar

    開放時間: 星期六至三 09:00 至 22:00;星期四 09:00 到 23:00;星期五 14:00 到 23:00 (逢星期日休息)

    電話: +974 4487 6111

    地圖
    6

    憤怒鳥世界

    憤怒鳥迷夢想成真

    • 家庭

    憤怒鳥世界係呢個全球熱爆遊戲嘅愛好者嘅必去地方。自從呢個益智嘅遊戲喺 2009 年推出以來,憤怒鳥就引發咗大人同小朋友嘅無限想像,隨後更加推出咗兩部荷里活大片。

    呢個主題樂園以一系列刺激嘅遊樂設施以及「寓學習於娛樂」嘅活動,為你呈獻呢個瘋狂嘅奇幻卡通世界。樂園有大約一個足球場咁大,當中有大概 35 個遊樂設施,包括室內同室外遊樂區,以及大量零售同食品店舖。

    地點: Doha Festival City, Umm Salal Muhammed, Qatar

    開放時間: 星期六至星期三 10:00 到 22:00,星期四至星期五 10:00 到 00:00 (逢星期日休息)

    電話: +974 4042 0444

    地圖
    7

    Snow Dunes

    阿拉伯式冬日仙境

    • 家庭

    Snow Dunes 係卡塔爾首個室內冰雪中心。中東固然係唔會成日見到雪啦,所以呢個大約一個足球場咁大嘅建築需要被冷卻到冰點以下,再用 17 部最先進嘅噴雪槍噴出蓬鬆雪花。結果會係點?就係營造咗一個可以為一家大細帶嚟歡樂嘅阿拉伯式冬日仙境喇。

    儘管佢可能無辦法同威士拿相提並論,但係 Snow Dunes 之中亦有大量有趣嘅下坡活動,例如佢嘅雪丘滑梯速度就可以超過每小時 50 公里。雖然嗰度無真正嘅滑雪場,但係小朋友可以玩有趣嘅旋轉木馬、滑梯同雪橇。

    地點: Doha Festival City, Umm Salal Muhammed, Qatar

    開放時間: 星期六至星期三 10:00 到 22:00,星期四 10:00 到 00:00,星期五 13:00 到 00:00 (逢星期日休息)

    電話: +974 4042 0444

    地圖
    8

    KidZania

    為小朋友而設、充滿樂趣嘅現實世界教育

    • 家庭

    顧名思義,KidZania 係一個專門為 4 至 14 歲小朋友而設嘅主題公園。同佢喺多哈嘅眾多競爭對手唔同,Kidzania 並唔係主打刺激嘅遊樂設施。呢個新穎嘅樂園旨在對小朋友進行成人世界嘅教育。

    小朋友可以參加多達 60 個有關現實世界各種職業嘅活動,由醫生到消防員應有盡有,而且具有教育意義同互動性。小朋友甚至可以兌現支票、開銀行戶口、存款、提款同埋將積蓄用喺特別獎賞之上,學到點樣理財。當小朋友深入學習緊呢啲知識嘅時候,大人就可以喺外面飲杯咖啡同埋享受下免費無線上網服務喇。

    地點: Aspire Park, Doha, Qatar

    開放時間: 星期一至星期五 14:00 至 22:00,星期六 10:00 至 22:00 (星期日休息)

    電話: 974 4482 6222

    地圖
    9

    Bounce Inc

    彈彈跳、開心笑

    • 家庭

    Bounce Inc 席捲全球,而家呢間連鎖店亦已經登陸卡塔爾喇。同多哈其他主題公園唔同,Bounce Inc 注重健康生活,非常受年輕人歡迎。但咁並唔係話小朋友就會唔鍾意佢,因為佢中間嘅區域亦有好多啱小朋友玩嘅活動,例如 Big Bag 同埋相互連接嘅自由跳躍彈床。

    灌籃挑戰、高性能彈床、垂直跑回彈牆同埋懸崖跳台等設施,可以為好動嘅成年人帶嚟無限刺激。喺無嚴重風險嘅情況之下,俾自己享受一下飛躍道呢種生活方式啦。

    地點: 2nd floor, Tawar Mall Doha, Al Markhiya Street, Al Duhail South, Doha, Qatar

    開放時間: 星期六至三 10:00 至 22:00;星期四至五 10:00 至 00:00 (逢星期日休息)

    電話: +974 4408 6500

    地圖
    10

    Baladna Park

    快樂農莊遊

    • 家庭

    卡塔爾嘅 Baladna Park 因為擁有啱小朋友玩嘅遊樂設施同埋佢哋嘅農莊風格而相當受當地家庭歡迎。Baladna 擁有整個中東地區其中一個最大嘅乳牛及牲畜飼養場,令小朋友可以親眼睇到生產過程。嗰度有一個高科技嘅旋轉擠奶廳,能夠精確咁顯示所有步驟,隔離亦有一個小動物樂園,俾小朋友見下佢哋鐘意嘅農莊動物。

    當佢哋喺較凍月份開放嘅時候,室外場地就會充滿節日氣氛。如果勇於挑戰刺激活動,就可以玩吓下坡嘅越野車道同埋滑索,另外嗰度綠樹成蔭嘅花園就為父母提供一個放鬆身心嘅好地方。同時,主舞台上更會定期上演一系列文化同音樂活動。

    地點: 卡塔爾 Baladna Farm

    開放時間: 星期日至四 10:00 至 19:00;星期五 12:00 至 20:00;星期六 10:00 至 20:00

    電話: +974 4035 8833

    地圖
    Harry Stewart | 特約撰稿人

    開始計劃行程

    Maps