多哈十大最佳夜間玩樂活動

睇一眼多哈嘅天際線，你會見到一個充滿摩天大廈嘅現代化城市。但係如果喺瓦奇夫市場嘅小巷穿梭，你又會覺得自己時光倒流，回到過去。呢啲迷人嘅街道入面，蘊藏住歷史悠久嘅阿拉伯式建築傑作、傳統街邊小攤同高級餐廳。

瓦奇夫市場會喺熱浪退卻、迎來涼風嘅夜晚甦醒。喺呢度，你可以買到當地嘅手工藝品、睇街頭表演、參觀獵鷹市場同拜訪美術館。如果你想有更深刻嘅文化體驗，我哋就建議你花幾個鐘，好好探索一下瓦奇夫市場周圍嘅橫街窄巷。

Shisha Terrace 位於四季酒店頂層，可以一覽無遺城市同大海嘅景致。呢個輕鬆舒適嘅酒吧享有美麗嘅景色同熱情嘅服務。你亦可以喺歷史悠久嘅瓦奇夫市場內搵到好多傳統嘅水煙場所。Le Gourmet 同 The Corner Café 就係其中兩個區內最受歡迎嘅水煙場所喇。但係如果你想享受更高級嘅水煙體驗，你可以去市內其中一間五星級酒店。

無人確實知道水煙嘅起源。有啲歷史學家話佢係先喺印度發明，然後至傳到波斯。其他人就話實際上係相反。但無論佢嘅歷史如何，水煙喺阿拉伯文化之中仍然扮演住一個重要角色。喺多哈旅遊期間，你可能亦都會想去水煙吧，好似當地人咁放鬆吓。

如果你好鍾意日落景色，咁喺遊覽多哈嘅時候就要去坐下船喇。剛起航嘅時候，你可能要忍受一下熾熱嘅天氣，但係一旦入夜，你就會興幸自己身處喺一隻傳統單桅帆船之上。大多數河上游輪嘅航程係大約兩個鐘，並會準時出發，令你能夠欣賞日落。

如果想享受傳統嘅郵輪體驗，可以去濱海大道，嗰度嘅木製單桅帆船會以繽紛嘅燈光照亮水面。而如果想享受更加高級嘅精緻用餐體驗，可以去卡塔爾之珠，嗰度有好多配備咗璃窗、冷氣同開放式甲板嘅遊艇，當中更加會有寬敞舒適嘅座椅。

如果你正喺度尋找一流嘅夜生活體驗，可以去多哈老城希爾頓逸林酒店設計經典嘅 PURE Lounge 品嚐招牌雞尾酒，同時欣賞阿拉伯灣同西灣天際線嘅全景。喺拉賽蓋爾酒店嘅 15 樓，你會搵到 Sky View 頂樓天台酒吧。喺呢度，你可以一邊欣賞現場表演同 DJ 嘅音樂，一邊品嚐雞尾酒。

由於嗰度禁止喺公眾地方飲酒，所以大多數有提供酒精飲品嘅場所都位於酒店入面，而多哈嘅呢啲高級場所亦會營業至凌晨時份。如果你想呷一兩杯雞尾酒同時欣賞城市景致，就要預先訂好頂樓酒吧嘅位喇。

多哈有相當多運動酒吧，咁即係你點都唔會錯過任何國際體壇嘅最新消息。由於喺公眾地方飲酒係非法嘅，所以大多數運動酒吧都喺酒店入面，例如麗笙藍光酒店、喜來登酒店同假日酒店。

Champions 位於多哈市中心馬奎斯萬豪酒店之中，係一間屢獲殊榮嘅運動酒吧，裡面裝有好多平面電視，播放住世界各地所有嘅頂級體育賽事。如果你唔想錯過任何好似一級方程式、板球同國家橄欖球聯盟等體育運動嘅最新消息，Champions 就係同 DECC 地鐵站相連嘅熱門地點。

如果你想逃避人群同埋喺夜晚參與刺激活動，就可以去卡塔爾沙漠進行一次沙丘探險。與其騎喺駱駝背上穿越曠野，不如坐上四驅車，飛越沙丘。呢趟猶如過山車般嘅旅程會讓你欣賞到迷人嘅風景同珍珠白色嘅海灘。部分旅行社亦會俾你喺多哈以南大約 80 公里嘅 Khor Al Adaid 水域暢遊。

如果想要一場顛簸嘅旅程，唔洗怕點同你嘅司機講，因為佢哋會好樂意為你展示，喺閃爍嘅星空之下，沙漠之旅係可以有幾令人興奮。大部分夜間旅程會持續達 5 個鐘頭，並會喺 14:00 到 15:00 喺多哈出發。

卡塔爾之珠係一個佔地 4 平方公里嘅多哈人工島。呢個島之所以出名，係因為島上有較多富裕嘅多哈居民居住。島上嘅餐廳價格雖然偏高，但就提供住最上乘嘅精緻用餐選擇。除咗幾十間供應全球各地美食嘅海濱餐廳之外，你亦可以喺「Arabian Riviera」搵到精品店舖、超級跑車陳列室同埋海灘俱樂部。

即使你唔打算喺卡塔爾之珠用餐或者買名牌產品，但都應該參觀一吓令呢個島咁與眾不同嘅別墅、高尚住宅以及地中海風格碼頭。

雖然多哈嘅天際線無論從邊個角度睇都令人印象深刻，但係喺多哈濱海大道呢個市內嘅海濱長廊，你會搵到最值得拍攝落嚟嘅城市景致。濱海大道擁有好似伊斯蘭藝術博物館等後來開放嘅地標，係想享受涼爽夜晚嘅當地嘅受歡迎聚會場所。

由於擁有適合一家大細嘅綠色空間、精緻嘅用餐地點以及坐船遊覽等活動，佢亦成為咗多哈最受歡迎嘅旅遊景點之一。日落之後，架好相機，準備捕捉水面上若隱若現咁反映出摩天大樓輪廓嘅金色光芒啦。

多哈嘅天氣狀況通常喺秋天嘅下晏同夜晚都非常好。去多哈瑞吉酒店嘅 Oyster Bay 海灘俱樂部，喺白沙灘上面放鬆身心，又或參加香蕉船以至滑管浪等嘅水上運動啦。你更加可以喺同海岸相連的奧運規模泳池入面游水，放鬆一吓。

多哈嘅其他海灘俱樂部包括君悅酒店嘅 Flip Flops 海灘小屋，佢深受嗰啲想逃離遊客群嘅人士歡迎。喺四季酒店，你可以喺海濱小屋欣賞日落，又或者喺酒店美麗嘅園林花園之中漫步。