多哈嘅國際美食十分多元化,想搵正宗嘅卡塔爾菜式都唔係容易。不過當地餐廳提供嘅豐盛家常燉菜,以至精緻嘅甜品,都絕對唔可以錯過。

    多個世紀以嚟,卡塔爾美食受黎凡特 (Levant)、北非、印度次大陸同貝都因 (Bedouin) 遊牧文化影響,令菜式融入慢煮烹飪技巧同唔同香料,入口味道極之豐富。多哈嘅食物絕對係旅程嘅重點,所以我哋為你選出當地人至愛嘅卡塔爾菜式,仲話埋你知喺邊度可以食到。

    1

    瓦利瑪餐廳嘅燉肉

    美味家常菜式

    阿拉伯經典燉肉 Saloona,通常係家庭晚餐必有菜式。你可以用任何材料去煮,不過通常就會用牛肉、羊肉或者係魚,搭配時令蔬菜、蒜頭同薑去煮。食燉肉嘅時候一定要用麵包去配湯一齊食,包你食到舔舔脷。

    瓦利瑪餐廳 (Walima) 裝潢現代光鮮,用上淡色做主調,帶有富中東風格嘅色彩繽紛吊燈,並供應加入現代元素嘅燉肉同其他卡塔爾菜式。

    地點: Mondrian Doha, West Bay Lagoon, Doha 24685, Qatar

    開放時間: 營業時間:每天 18:00 至 00:00

    電話: +974 4045 5999

    地圖

    相片由 jeffreyw 提供 (CC BY 2.0) 經修改

    2

    水煙園嘅葡萄葉卷

    適合任何時候食用嘅美味小食

    葡萄葉卷 (Warak enab) 係常見嘅中東美食,但卡塔爾嘅版本特別好吃。葡萄葉卷 (Warak enab) 通常用上牛肉或羊肉碎、飯、蒜頭、胡椒同荽茜製成。食嘅時候記得同新鮮檸檬片一齊食。

    水煙園 (Shisha Garden) 位於希加勒酒店嘅庭院入面,絕對係逃離喧鬧多哈市中心嘅好地方。翠綠嘅草坪同輕盈嘅瀑布,營造出寫意而寧靜嘅氛圍。除咗品嚐葡萄葉卷等小食,你仲可以飲返杯咖啡同食水煙。

    地點: La Cigale Hotel, 60 Suhaim Bin Hamad St, Doha, Qatar

    開放時間: 營業時間:每日 07:30 至 1:00 (營業時間隨季節改變)

    電話: +974 4428 8702

    地圖
    3

    賈斯拉傳統美食店嘅粉絲奄列

    食材配搭古怪但味道出奇好

    粉絲同煎蛋,明明兩者大纜都扯唔埋,但食落去又出奇地好食。粉絲奄列 (Balaleet) 係一款好流行嘅麵食,以糖、藏紅花同玫瑰水調味,再加上奄列,食落又鹹又甜好特別。粉絲奄列通常喺開齋節 (Eid-al-Fitr) 時當做早餐。

    賈斯拉傳統美食店 (Al Jasra Traditional Food) 位於瓦奇夫市場 (Souq Waqif) 隱蔽嘅後街。呢間餐廳由 4 位卡塔爾婦女間營,佢哋每日用家族食譜烹製粉絲奄列。全店飾有傳統卡塔爾紡織品,帶俾人一種舒適溫馨嘅感覺。

    地點: Ali Bin Abdullah St, Souq Waqif, Doha, Qatar

    開放時間: 營業時間:每日 08:30 至 22:00 (星期五 08:30 至 10:30;12:30 至 22:00)

    電話: +974 5529 8871

    地圖

    相片由 Droodkin 提供 (CC BY-SA 4.0) 經修改

    4

    阿爾曼恰布餐廳嘅肉飯

    喺氣派堂皇嘅環境下品嚐卡塔爾美食

    肉飯 (Majboos) 係卡塔爾名菜,嚟到多哈旅行一定要食。肉飯通常用羊肉或雞肉慢煮而成,食落去味道豐富。食嘅時候搭配沙律同自家製番茄醬份外滋味。

    基本上所有多哈嘅卡塔爾餐廳都會提供呢道菜式,但要揀最好嘅餐廳就當然要揀阿爾曼恰布餐廳 (Al Manchab)。呢間餐廳裝潢時尚,佢哋嘅慢煮肉飯聞落香噴噴,仲有迷迭香做點綴。餐廳帶有令人窩心嘅裝飾同舒適嘅座位,四圍仲掛有全家福,營造出家嘅感覺,令你好似喺卡塔爾人屋企入面用餐。

    地點: Al Hazm Mall, Markhiya St, Doha, Qatar

    開放時間: 營業時間:星期日至星期四 09:00 至 23:00;星期五 13:00 至 23:00

    電話: +974 3301 2286

    地圖
    5

    伊塞爾咖啡廳嘅雞粥

    齋戒月嘅流行簡單菜式

    雞粥 (Madrouba) 係一款可以任何時候食嘅鹹味粥。菜式用上牛奶、牛油、小荳蔻同雞肉 (有時會用豆) 煮上幾個鐘直至變成糊狀。每個地方都有佢哋自己獨特嘅食譜,但食嘅時候通常會配上荳蔻酥油或炸洋蔥。

    院落同小巷錯綜複雜嘅艾華卡拉傳統市集 (Souq Al Wakrah),絕對係品嚐呢款傳統美食嘅好地方。伊塞爾咖啡廳 (Easair Cafe) 位於海濱附近嘅清涼泥土建築入面,提供各種卡塔爾小食同佳餚,包括令人垂涎嘅雞粥。

    地點: Souq Al Wakrah, Al Wakrah Seafront, Doha, Qatar

    開放時間: 營業時間:每日 07:30 到 23:30

    電話: +974 4488 5199

    地圖

    相片由 AmnaMF 提供 (CC BY-SA 4.0) 經修改

    6

    阿爾薩米家庭餐廳嘅釀翠玉瓜 (Kousa mahshi)

    一餐就滿足哂你每日蔬菜攝取量

    釀翠玉瓜 (Kousa mahshi) 係一道中東翠玉瓜菜式,裡面釀入羊肉碎同雜菜碎再以香芹同薄荷調味。多哈唔少餐廳都有為素食者提供用上鷹嘴豆製成嘅素食版本。食嘅時候記得要蘸番茄醬同乳酪,份外滋味。

    阿爾薩米家庭餐廳 (Al Shami Home Restaurant) 為你帶來獨特用餐體驗。餐廳打造成一個傳統嘅柏柏爾 (Berber) 帳篷,天花板吊起紡織物,仲有一個大理石噴泉添!佢哋提供嘅釀翠玉瓜十分地道,風味十足,而且份量好大。

    地點: Salwa Rd, Doha, Qatar

    開放時間: 營業時間:每日 07:00 至 00:00

    電話: +974 4450 1117

    地圖
    7

    柴哈里卜咖啡廳嘅炸糖丸

    卡塔爾式冬甩

    炸糖丸 (Luqaimat) 係卡塔爾常見甜品,製作過程係將啲丸油炸再浸入糖漿,食時味道似帶有荳蔻同藏紅花味道嘅冬甩。完美嘅炸糖丸應該食落外脆內軟。

    柴哈里卜咖啡廳 (Chai Halib) 供應傳統棗味以至 Snickers 朱古力味嘅炸糖丸,口味嘅應有盡有,令人眼花撩亂。咖啡廳嘅室內設計參考傳統阿拉伯茶室,食炸糖丸嘅時候,不妨搭配多杯香濃嘅阿拉伯咖啡。

    地點: Mall of Qatar, Street 605, Al Gharaffa, Doha, Qatar

    開放時間: 營業時間:星期六至星期三 09:00 至 23:00;星期四 09:00 至 00:00;星期五 13:00 至 00:00

    電話: +974 5000 1799

    地圖

    相片由 Denise Krebs 提供 (CC BY 2.0) 經修改

    8

    卡拉基咖啡廳嘅麵包布甸

    經典中東美食

    麵包布甸 (Umm Ali) 源自埃及,但卡塔爾版本同埃及版本亦同樣美味。呢款麵包布甸混合提子乾、堅果碎同甜奶再焗至頂層金黃酥脆,最後撒上肉桂即可食用。Umm Ali 麵包布甸可以稱得上為卡塔爾最甜嘅甜品。

    雖然卡拉基咖啡廳 (Karaki) 專售卡拉克甜茶 (Karak tea),但佢哋出品嘅甜品同糕點都一樣咁出名。咖啡廳嘅麵包布甸入口好 creamy 好有口感,咬落去仲有好多乾果,而且帶有撲鼻嘅香料香味。

    地點: Andalucia Way, Building B12 Medina Centrale, The Pearl, Doha, Qatar

    開放時間: 每日 09:00 到 01:00 (直到星期日嘅午夜)

    電話: +974 4437 8477

    地圖
    9

    Hawn Cafe 嘅 Khanfaroosh

    芳香撲鼻嘅油炸甜品

    Khanfaroosh 係一種介乎於餅乾同蛋糕之間嘅甜品。先用玫瑰水同藏紅花製成圓型麵粉團,然後喺油炸之後再撒少少糖粉或者少少蜜糖喺上面就大功告成。玫瑰水會令佢哋散發出淡淡花香以及帶出精緻嘅味道。

    Hawn Café 嘅菜式數目雖然少,但幾乎樣樣都係極品。佢哋嘅 Khanfaroosh 亦唔例外,外面炸到非常酥脆,然後完全浸入蜜糖之中。喺咖啡廳內高高嘅拱形窗旁邊揀個位置坐落嚟,點一盤當地小食同一杯薄荷茶,然後欣賞周圍嘅景色啦。

    地點: Al Hazm, Markhiya St, Doha, Qatar

    開放時間: 每日 16:00 到 00:00

    電話: +974 4496 7026

    地圖

    相片由 boulanger.IE 提供 (CC BY 2.0) 經修改

    10

    Shay Al Shoomos 嘅 Rogag

    充滿你喜愛食材嘅煎餅

    你可以喺 Rogag 入面睇到印度對卡塔爾美食嘅影響。佢由一層類似 dosa、薄薄嘅麵糊製成,可以放入唔同肉類、蛋或者蔬菜。佢係一種傳統早餐菜式,但係喺一日裡面任何時候食都相當美味,加入芝士同蜜糖就非常適合鍾意食甜嘢嘅人喇。

    Shay Al Shoomos 嘅 Rogag 有唔同配料選擇,而百里香雞蛋味就特別好食。呢間位於瓦奇夫市場嘅舒適餐廳總係門庭若市,而你亦可以喺上菜之前,睇到開放式廚房入面廚師準備新鮮食材嘅過程 。叫一壺甜茶,品嚐完美嘅卡塔爾早餐啦。

    地點: Souq Waqif, Al Souq St, Doha, Qatar

    開放時間: 每日 08:00 到 13:00 同 18:00 到 23:00

    電話: +974 5551 5561

    地圖
    11

    Al Aker Souq Waqif 嘅芝士 Kunafa

    一款甜味滿滿嘅甜品

    Kunafa 係一款非常甜嘅傳統甜品,喺中東地區相當受歡迎,而且佢一啲改良咗嘅做法亦成功進入咗歐洲人嘅餐桌。據講佢係喺齋戒月期間發明嘅,甚至其實係一種由埃及醫生開俾飢餓嘅穆斯林國家統治者嘅食物。由於佢係由大量嘅糖同融化咗嘅芝士製成,所以呢個故事都相當可信。

    雖然佢傳統上係一款開齋飯小食,但係其實你一年四季都可以品嚐到佢嘅滋味。如果身處多哈又想品嚐呢款甜品,其中一個好地方就係位於瓦奇夫市場中心嘅 Al Aker Sweets。如果你想再甜啲,就要試試佢哋嘅 Nutella kunafa 喇。

    地點: Al Souq Street, Doha, Qatar

    開放時間: 每日 09:00 到 00:00

    電話: +974 7092 7288

    查看附近住宿
    地圖
    Victoria Hughes | 特約撰稿人

    開始計劃行程

    Maps