眾所周知,阿姆斯特丹氣氛輕快,意識開放,專為同志而設嘅住宿、酒吧同節慶比比皆是!無可否認,好多人都係為咗呢度嘅大麻文化、同埋「聲名遠播」嘅紅燈區而嚟朝聖;之不過,呢座城市其實仲有好多適合各個年齡層嘅獨特觀光景點,任你選擇。

    阿姆斯特丹嘅博物館密度可以話稱霸全球,市內設有超過 40 間展館,涉獵主題極為廣泛,由性愛博物館以至手袋博物館都有。講到遊覽阿姆斯特丹嘅最好方式,一定係踩單車莫屬,尤其喺中央火車站 (Centraal Station) 同水壩廣場 (Dam Square) 附近,路況特別好。下次去荷蘭首都阿姆斯特丹旅行嗰陣,如果可以試盡呢啲好玩活動,咁就不枉此行喇!

    阿姆斯特丹最好玩嘅活動係乜嘢?

    1

    喺水壩廣場展開一日行程

    公共廣場上嘅街頭表演

    水壩公共廣場 (Dam Square) 係阿姆斯特丹王宮 (Koninklijk Palace) 前面嘅露天空間,歷史可以追溯至公元 13 世紀,鵝卵石路兩邊餐館同酒吧林立,附近亦不乏旅遊名勝,計有杜莎夫人蠟像館 (Madame Tussauds Wax Museum)、阿姆斯特丹舊證券交易所 (Beurs van Berlage Hall) 同新教堂 (New Church) 等。水壩廣場嘅中央場地不時會舉辦街頭表演同音樂會,每年夏季更係車水馬龍!不過,身處人群之中,記得提高警覺,免得淪為扒手嘅「獵食」對象。

    地點: Dam, 1012 JS Amsterdam, Netherlands

    • 歷史文化`
    • 拍照
    • 經濟實惠
    2

    阿姆斯特丹國家博物館

    「珍藏系列」展出逾 400 幅畫作

    阿姆斯特丹國家博物館 (Rijksmuseum) 建於 1800 年,係荷蘭嘅國立藝術同歷史博物館,珍貴館藏超過 100 萬件。場館採用文藝復興時期嘅哥德式風格建造,而喺梵高博物館 (Van Gogh Museum) 東面約 300 米仲起咗一座名為博物館廣場 (Museumplein) 嘅花園庭院。阿姆斯特丹國家博物館現正翻新,「珍藏系列 (The Masterpieces Collection)」展出常設展覽嘅超過 400 幅重要畫作,重點推介作品包括林布蘭特 (Rembrandt) 嘅《夜巡 (The Night Watch)》、維梅爾 (Johannes Vermeer) 嘅《倒牛奶的女僕 (The Kitchen Maid)》,仲有果衍 (Jan van Goyen) 嘅《冬天 (Winter)》。館方有提供唔同語言嘅導賞服務,方便世界各地旅客。

    地點: Museumstraat 1, 1071 XX Amsterdam, Netherlands

    開放時間: 每日 09:00 至 17:00

    電話: +31 20 674 7000

    • 伴侶
    • 歷史文化`
    • 拍照
    3

    必睇景點:安妮‧弗蘭克之家

    一睹安妮‧弗蘭克日記真跡

    二戰期間,安妮‧弗蘭克之家 (Anne Frank House) 曾經係安妮‧弗蘭克 (Anne Frank) 嘅棲身居所,而著名嘅《安妮日記》亦都係喺呢度誕生。時至今日,博物館以展覽記錄安妮一家嘅生活,肯定令你眼界大開!安妮‧弗蘭克之家建於公元 17 世紀,距離水壩廣場 (Dam Square) 以東 800 米,係阿姆斯特丹備受歡迎嘅博物館,吸引對「猶太大屠殺」歷史好奇嘅人嚟一探究竟。館內嘅日記陳列室 (Diary Room) 展出咗安妮嘅日記真跡,而佢間房就貼滿咗明信片同名人嘅相。成人票價約每位 €10,兒童 (10-17 歲) 票價約每位 €5。

    地點: Prinsengracht 263-267, 1016 GV Amsterdam, Netherlands

    開放時間: 4 月至 11 月:每日 09:00 至 22:00。11 月至 4 月:星期一至五 09:00 至 19:00;星期六 09:00 至 21:00。

    電話: +31 20 556 7105

    • 歷史文化`
    • 拍照
    4

    荷蘭小鬆餅試真啲

    由糖同牛油製成嘅香甜小鬆餅

    荷蘭小鬆餅 (Poffertjes) 其實係細細舊嘅班戟,用酵母同蕎麥粉製成麵糊,再將麵糊倒入鐵製烤盤上面半球狀嘅凹模,焗好之後撒啲糖,再喺面頭掃一層牛油就食得,入口熱辣辣,口感軟綿,超級滿足!阿姆斯特丹大多數超市都可以買到預先整好嘅荷蘭小鬆餅;之但係,要食到新鮮出爐嘅味道,就梗係要幫襯阿姆斯特丹市場、或者廣場上大大小小嘅街邊攤檔,一啖一個,邊走邊食。溫馨提示:小心糖粉沾滿件衫同嘴角喎 (笑~)!

    • 品嚐美食

    相片由 Tijs Zwinkels 提供 (CC BY-SA 2.0) 經修改

    5

    參加運河遊船觀光團

    沿住運河遊船河,睇盡阿姆斯特丹靚景

    阿姆斯特丹嘅運河圈 (Canal Ring) 由超過 165 條運河組成,形成獨一無二嘅靚景,喺 1999 年仲被列入聯合國教科文組織世界文化遺產名錄添!淨係呢個理由,都足以令你無法抗拒運河遊船觀光團—無論係食郵輪晚餐,定係參加國家博物館 (Rijksmuseum) 藝術之旅,同樣樂趣紛呈。大多數遊船河行程會由阿姆斯特丹市中心出發;如果你選擇參加夜晚船河,就可以睇埋運河沿岸房屋同大橋嘅華燈夜景,點點燈火有如童話燭光,浪漫難擋!

    • 伴侶
    • 家庭
    • 拍照

    相片由 spaceman117 提供 (CC BY 3.0) 經修改

    6

    凡德爾公園寫意樂悠

    夏季歌舞嘉年華

    阿姆斯特丹凡德爾公園 (Vondelpark) 坐擁 120 英畝綠化空間,周圍都係茂密草坪、池塘、遊樂場,仲有步行徑,絕對比得上紐約嘅中央公園 (Central Park)!園內 6 大遊樂區啱哂家庭樂,你可以租滑板或者單車玩吓,再喺大池塘附近輕鬆野餐,樂得其所。夏季嘅凡德爾公園零舍熱鬧,中央露天劇院 (Openluchttheater) 嘅節日慶典一浪接一浪,樂趣源源不絕!

    地點: 荷蘭阿姆斯特丹

    • 伴侶
    • 家庭
    • 經濟實惠
    7

    參觀咖啡店

    食件大麻 Brownie,隨心 High 番轉

    阿姆斯特丹對食用大麻態度開放,當地有幾百間持牌 Coffeeshop,專賣混入大麻烘焗嘅 Brownie,難怪唔少旅客都為之著迷!阿姆斯特丹市中心大麻「名店」林立,當中嘅 DampkringCoffeeshop SmokeyThe Bulldog The First 都係營運歷史最悠久嘅「老字號」。

    • 品嚐美食
    • 非一般行程

    相片由 Dominic Milton Trott 提供 (CC BY 2.0) 經修改

    8

    九街購物天堂

    阿姆斯特丹購物區嘅古董店

    九街 (De Negen Straatjes) 至潮至 In,由森特姆市 (Centrum) 9 條小街巷組成,街上林立幾十間獨一無二嘅精品店、古董店、珠寶店同手工藝店,花多眼亂;而大家都會選擇踩單車或者步行,喺呢條購物大道 Shopping。如果你係攝影發燒友,就一定要去國王運河街 (Keizersgracht Street) 參觀阿姆斯特丹首個攝影博物館—馬賽大宅 (Huis Marseille)!

    地點: Wolvenstraat 9, 1016 EM Amsterdam, Netherlands

    • 購物

    相片由 Rodrigo Pereira da S… 提供 (CC BY-SA 3.0) 經修改

    9

    美食空間嘅人氣小食

    喺美食廣場試勻國際名物

    美食空間 (Foodhallen) 係阿姆斯特丹舊西區 (Oud-West) 嘅室內美食廣場,有全球各地數之不盡嘅地道美食任你點!呢個廣場位於德哈倫文娛購物中心 (De Hallen cultural complex),由公元 17 世紀嘅電車倉庫改建而成,裡面有超過 30 個攤檔。其中,Viet View 嘅即製春卷、De Ballenbar 嘅荷蘭肉丸 (bitterballen),仲有 Petit Gâteau 嘅巴黎美食都千祈唔好錯過!

    地點: Bellamyplein 51, 1053 AT Amsterdam, Netherlands

    開放時間: 星期一至四及星期日 11:00 至 23:30;星期五至六 11:00 至 01:00

    • 家庭
    • 購物
    • 品嚐美食

    相片由 Franklin Heijnen 提供 (CC BY-SA 2.0) 經修改

    10

    以德瓦倫為行程劃上句號

    老教堂廣場女性乳房青銅浮雕

    德瓦倫 (De Wallen) 係阿姆斯特丹大名鼎鼎嘅紅燈區,亦係當地最古舊嘅社區之一,區內城牆刻劃住豐富嘅歷史寶藏,而家反而化身色情區、宗教區、住宅區同商業區之間嘅藩籬。只要你抱住探新求知嘅精神遊覽,呢度就會帶俾你無限魅力同樂趣—其中,性博物館 (Erotic Museum) 同埋各種性用品商店引入注目,而呢啲舖頭喺當地實在見慣不怪,平凡至極!要注意嘅係,當地人唔多中意人哋舉起相機拍攝,所以要小心避免喺紅窗建築附近影相。老教堂廣場 (Oudekerksplein) 綴滿獨一無二嘅特色雕塑,主題圍繞性工作者,作品包括一尊描繪女仔手遮乳房嘅青銅浮雕,正正擺放喺鵝卵石行人路上。

    地點: 荷蘭阿姆斯特丹德瓦倫

    • 晚間娛樂
    • 非一般行程

    相片由 Ben Bender 提供 (CC BY-SA 3.0) 經修改

    Penny Wong | 旅遊常客

    開始計劃行程

    Maps