阿姆斯特丹有唔少浪漫景點同活動,幾時都可以為情侶製造甜蜜時光!遊覽呢座荷蘭首都嘅最佳時節非春天莫屬,花田同城市公園到時都會開滿鬱金香、水仙同番紅花,你可以踩腳踏船沿住運河遊覽,或者參加夜間船河,睇埋運河沿岸房屋同大橋嘅華燈夜景,點點燈火有如童話燭光,浪漫難擋!

    阿姆斯特丹嘅文化底蘊豐富,喺博物館廣場 (Museumplein) 裡面嘅博物館同美術館展露無遺;醉心藝術嘅你,不妨去埋國家博物館 (Rijksmuseum) 同埋梵高博物館 (Van Gogh Museum),細賞荷蘭本土嘅海量傑作吖!鵝卵石路兩邊,排滿有幾百年歷史嘅屋仔、華麗嘅古老教堂,同埋一片綠油油嘅草地,景色如畫。而家即刻睇埋我哋嘅阿姆斯特丹最浪漫勝地名單,Plan 吓你嘅 Romantic 度假行程啦!

    1

    坐腳踏船遊覽運河

    沿住運河遊船河,睇盡阿姆斯特丹靚景

    阿姆斯特丹嘅運河圈 (Canal Ring) 由超過 165 條運河組成,形成獨一無二嘅靚景,最啱坐船遊覽。小情侶可以喺中央火車站 (Centraal Station) 租架腳踏船,慢慢踩去運河中心,泛舟於 17 世紀嘅水道上面,飽覽阿姆斯特丹歷史建築同山牆房屋交織而成嘅獨特景色。一場嚟到,記得要順道參觀王子運河 (Prinsengracht),睇埋阿姆斯特丹嘅得意船屋喎!

    • 伴侶
    • 家庭
    • 拍照
    2

    喺 Pathé Tuschinski 睇場戲

    喺豪華戲院睇新片上畫

    Pathé Tuschinski 極盡華麗,歷史可以追溯到 1921 年,融合咗裝飾藝術同新藝術風格等建築特色,主打阿姆斯特丹當代藝術電影。

    院內嘅主觀影廳安裝咗寬大嘅落地窗簾,天花板點綴藝術圖案,既係戲院,亦係歌劇、樂隊同芭蕾舞等經典表演嘅舞台。由倫勃朗廣場 (Rembrandtplein) 經由 Reguliersbreestraat 大街行 5 分鐘,就會嚟到 Pathé Tuschinski。

    地點: Reguliersbreestraat 26-34, 1017 CN Amsterdam, Netherlands

    開放時間: 每日 09:30 開放至表演結束

    電話: +31 (0)20 900 1458

    • 伴侶
    • 歷史文化`
    • 豪華住宿

    相片由 Fabio 提供 (CC BY-SA 2.0) 經修改

    3

    踩單車探索阿姆斯特丹

    租架雙人單車一齊旅行

    阿姆斯特丹係鼎鼎大名嘅「單車城市」,市內嘅蜿蜒運河同山牆房屋都由龐大嘅單車徑網絡連接。小情侶嚟到度假,不妨洗幾蚊歐元,租架雙人單車,一邊遊覽,一邊做吓運動啦!

    要數市內最受歡迎嘅單車徑,國家博物館 (Rijksmuseum) 裡面嘅徑道肯定榜上有名;而呢條單車徑仲會通往阿姆斯特丹博物館廣場 (博物館區) (Museumplein (Museum Quarter)) 正門添。

    • 伴侶
    • 遊歷
    • 單人旅客
    4

    Bimhuis

    22:00 準時睇即興 Jazz Show

    Bimhuis Café 位於 Piet Heinkade 3 嘅 Muziekgebouw 河濱綜合大樓 (Muziekgebouw Complex) 旁邊,係阿姆斯特丹最有影響力嘅音樂殿堂之一,每年上演 300 幾場現場爵士樂同即興音樂表演,精彩不絕!

    逢星期二,Bimhuis Café 都會喺 20:00 舉辦即興演奏會,22:00 就輪到 jam 歌環節,歡迎音樂新手以至爵士樂「鐵粉」參加!

    地點: Piet Heinkade 3, 1019 BR Amsterdam, Netherlands

    開放時間: 售票處:音樂會舉辦嘅夜晚由 18:30 開放到深夜 (如果係日間音樂會嘅話,售票處就會喺表演開始前 1 個鐘開放)

    電話: +31 (0)20 788 2150

    • 伴侶
    • 經濟實惠
    • 單人旅客

    相片由 Fred Romero 提供 (CC BY 2.0) 經修改

    5

    西教堂

    下晝欣賞 Westertoren 嘅鐘琴音樂會

    西教堂 (Westerkerk) 位於阿姆斯特丹王子運河 (Prinsengracht) 上面,成幢建築高 85 米,喺阿姆斯特丹市中心昂然聳立。行入呢座公元 17 世紀嘅教堂,你會喺入口上方見到華麗樂器,周圍仲飾有出自佛萊明 (Flemish) 油畫家 Gerard de Lairesse 手筆嘅畫板添!教堂為當地嘅新教徒 (Protestant) 社區提供服務,逢星期日 10:30 至 12:00 舉行宗教儀式。每逢星期二 12:00 至 13:00,西教堂往往人頭湧湧,皆因鐘琴音樂會喺正呢段時間上演吖嘛!

    地點: Prinsengracht 279, 1016 GW Amsterdam, Netherlands

    開放時間: 4 月至 11 月:每日 10:00 至 15:00。12 月至 3 月:星期一至五 10:00 至 15:00

    電話: +31 (0)20 624 7766

    • 伴侶
    • 歷史文化`
    • 拍照
    • 經濟實惠
    6

    凡德爾公園

    夏季歌舞嘉年華

    凡德爾公園 (Vondelpark) 坐擁 120 英畝綠化空間,周圍都係茂密草坪、池塘、遊樂場,仲有步行徑,絕對比得上紐約嘅中央公園 (Central Park)!園內 6 大遊樂區啱哂家庭樂,你可以租滑板或者單車玩吓,再喺大池塘附近輕鬆野餐,樂得其所。

    夏季嘅凡德爾公園零舍熱鬧,中央露天劇院 (Openluchttheater) 嘅節日慶典一浪接一浪,樂趣源源不絕!

    地點: 荷蘭阿姆斯特丹

    • 伴侶
    • 家庭
    • 經濟實惠
    7

    梵高博物館

    欣賞梵高嘅早期傑作

    梵高博物館 (Van Gogh Museum) 展出咗荷蘭藝術家梵高 (Vincent Van Gogh) 嘅作品,館藏冠絕全球!呢座博物館位於阿姆斯特丹嘅博物館廣場 (Museumplein),主要展覽喺里特韋爾大樓 (Rietveld) 舉行,展品包括《吃馬鈴薯的人 (The Potato Eaters)》(1885)、《含著香煙的骸骨 (Skull of a Skeleton with Burning Cigarette)》(1886),同埋《向日葵 (Sunflowers)》(1889);而你仲可以欣賞到梵高嘅素描、草稿、同埋剖白內心嘅信,從中窺探佢嘅藝術風格同生活私事。

    另一方面,梵高博物館設有名為「感受梵高 (Feeling Van Gogh)」嘅互動計劃,專為視障人士而設,展出咗 3D 複製版嘅《向日葵》,俾你觸摸同感受畫上嘅筆觸,非常特別!

    地點: Museumplein 6, 1071 DJ Amsterdam, Netherlands

    開放時間: 每日 09:00 至 17:00 (星期五 21:00 休館)

    電話: +31 (0)20 570 5200

    • 伴侶
    • 歷史文化`
    • 拍照
    8

    博倫斯特里克一日遊

    到訪位於利塞嘅庫肯霍夫花園

    博倫斯特里克 (Bollenstreek) 又叫做「花蕊區」,喺萊頓 (Leiden) 同哈倫 (Haarlem) 之間有超過 30 公里長嘅花田綿延,又以春天 (3 月至 5 月之間) 為最佳遊覽時節,到時成個區都開滿鮮艷花卉,包括鬱金香、水仙花同番紅花等,盡顯活力!大多數人都會選擇由阿姆斯特丹市中心搭火車去到萊頓,然後租架單車,踩大概 2 個鐘,就嚟到哈倫架喇。

    如果你咁啱 4 月中去阿姆斯特丹旅行,咁就一定要參觀埋庫肯霍夫花園 (Keukenhof Gardens),細賞 700 萬朵鬱金香盛開嘅靚景!

    地點: 喺哈倫同萊頓之間綿延 32 公里

    • 伴侶
    • 家庭
    • 拍照
    9

    喺優雅嘅餐廳享用晚餐

    十幾間米芝蓮星級餐廳任你揀,擦返餐勁

    經過一日浪漫嘅行程,冇嘢比得上喺浪漫嘅餐廳 Dinner 嚟得更好!貴為荷蘭首都,阿姆斯特丹市內都有成幾百間溫馨餐廳架,啱哂情侶;而其中 16 間達到米芝蓮星級,如果你預算充足,就絕對唔好錯過喇。

    講到我哋嘅好推介,以下呢幾間都值得一試:De Kas 會喺自設溫室裡面收割食材烹調;De School 嘅 7 道菜 menu 日日唔同,仲附設一間同名潮爆夜店添;想一邊大歎美食、一邊欣賞阿姆斯特丹全景嘅話,你仲可以去位於 A'DAM 塔 19 樓嘅 Moon 旋轉餐廳食餐勁。

    • 品嚐美食
    • 晚間娛樂
    • 豪華住宿

    相片由 Dorine Ruter 提供 (CC BY 2.0) 經修改

    10

    阿姆斯特丹音樂廳

    喺指定嘅下晝睇免費音樂會

    阿姆斯特丹音樂廳 (Concertgebouw) 極盡豪華,建於 19 世紀,建築風格盡顯新古典主義,又以出眾音效而聞名,吸引鋼琴大師、世界一流樂團同傳奇作曲家登台表演。而且,你仲可以喺阿姆斯特丹音樂廳睇免費午間音樂會添架!呢啲活動通常都揀喺星期三舉辦,節目包括皇家音樂廳交響樂團 (Royal Concertgebouw Orchestra) 喺主廳進行嘅公共綵排,同埋藝術新星喺獨奏廳表演嘅室樂等。

    地點: Concertgebouwplein 10, 1071 LN Amsterdam, Netherlands

    開放時間: 售票處:星期一至星期五 13:00 至 19:00;星期六至星期日 10:00 至 19:00

    電話: +31 (0)20 671 8345

    • 伴侶
    • 晚間娛樂
    • 經濟實惠
    • 豪華住宿

    相片由 Fred Romero 提供 (CC BY 2.0) 經修改

    Penny Wong | 旅遊常客

    開始計劃行程

    Maps