我哋嘅阿姆斯特丹旅遊懶人包羅列出你需要嘅基本資料,幫你 Plan 定荷蘭行程,向各大人氣熱點進發!無論你去旅行去得幾密,都要留意以下問題:當地天氣係點?點樣由機場去酒店?需要邊種貨幣同插頭?我哋會為你提供所有答案,同場加映最佳旅遊時機、交通資訊、各類基本資料,同埋實用旅遊貼士,

    一切盡在呢份阿姆斯特丹旅遊懶人包之中。睇完呢份簡短易明嘅指南之後,你嘅阿姆斯特丹旅程應該就準備得七七八八架喇!

    1

    遊覽阿姆斯特丹嘅最佳時機 (天氣方面)

    阿姆斯特丹屬於內陸潮濕氣候,平均溫度由冬天嘅 3°C 至夏天嘅 18°C,

    • 全年降雨量均等,平均每個月有 10 日落雨;
    • 而 11 月至 3 月會落雪
    • 又以 6 月至 9 月為全年最溫暖嘅時間
    • 6 月至 8 月係遊訪阿姆斯特丹嘅旺季,酒店同機票價格都會相應調升。
    • 4 月至 5 月、同埋 9 月至 11 月都係嚟阿姆斯特丹旅行嘅最佳時機,到時天氣同溫度怡人,仲可以避開夏季人潮,而酒店同機票價格亦相對平啲。
    2

    阿姆斯特丹基本小知識

    • 語言:主要以荷蘭文為主。喺阿姆斯特丹,大多數人都識講英文
    • 插頭類型:C,E 同 F
    • 電壓:230 V
    • 貨幣:歐元 (EUR)
    • 國際電話代碼:+31 20
    • 緊急電話:112
    3

    城市交通

    阿姆斯特丹史基浦機場 (Amsterdam Airport Schiphol)

    阿姆斯特丹機場 (Amsterdam Airport) 又叫做史基浦機場,係荷蘭最大型、最繁忙嘅機場之一,位於市中心東南 11 公里,有 1 座客運大樓連 3 個離境大堂,共有 3 條跑道運作。機場客運大樓裡面有好多間餐廳、商舖,仲有免費 Wi-Fi 設施、銀行同外幣兌換服務等。你可以透過幾種交通方式,由機場直達阿姆斯特丹市中心:

    • 搭的士大約需要 15-20 分鐘,劃一價格 EUR39。的士站位於到境大堂外。
    • 你亦都可以搭 Uber,價錢通常比的士相宜。
    • 搭火車大約需要 15–20 分鐘,車費唔使 EUR4。你可以喺到境大堂櫃枱同自動售票機買車飛。火車站位於客運大樓下一層。
    • 搭巴士需時 30-35 分鐘,車費唔使 EUR4。巴士站位於到境大堂外,同火車站同一層。
    • 客運大樓內外亦都有租車公司。


    如果你搭火車去阿姆斯特丹嘅話

    阿姆斯特丹火車站又叫做中央火車站 (Centraal),坐落喺荷蘭首都嘅中心地帶,歷史可以追溯到 1889 年,係呢座城市嘅經典地標,站內有唔少餐飲同購物選擇,而阿姆斯特丹旅客中心 (Amsterdam Tourist Office) 亦都開設喺車站入面。阿姆斯特丹中央火車站有開辦往來法國、比利時同德國嘅高速火車線路;你仲可以喺站外搭地鐵、電車、巴士、輪渡同的士 (包括共乘的士) 直達酒店添!

    4

    阿姆斯特丹市內交通

    旅遊貼士

    阿姆斯特丹市中心佔地唔夠 3 平方公里,不妨徒步探索吖!好多地標同景點之間相隔幾步路架咋,當中包括喜力啤酒體驗館 (Heineken Experience)、皇宮 (Royal Palace) 同杜莎夫人蠟像館 (Madame Tussauds Wax Museum) 等。市中心仲有唔少餐飲、購物同夜生活娛樂場所選擇,樂趣滿分!想去遠啲嘅地方玩?阿姆斯特丹嘅公共同私人交通服務數之不盡,任得你揀,夠哂方便。

    5

    GVB – 公共交通網絡

    GVB (Gemeentelijk Vervoerbedrijf;即係「市政運輸公司」) 專營阿姆斯特丹嘅公共交通,旗下嘅巴士、地鐵、電車同渡輪網絡覆蓋成個城市,所有交通工具都採用統一票務系統,

    • 單程票價 EUR3,有效期係 1 個鐘;
    • 24 小時車飛索價 EUR7.50。
    • 4 歲以下兒童可以免費乘搭交通工具。
    • 溫馨提示:巴士同電車都唔接受現金付款架;遊客可以喺地鐵、電車同巴士站嘅自動售票機、以至市內各地嘅指定商舖 (例如 Primera、AKO、Vivant、Techador、Cigo 同 Bruna) 買車飛。
    6

    I amsterdam 城市卡

    如果你打算喺荷蘭首都阿姆斯特丹短暫停留,期間參觀市內嘅主要景點,咁買張 I amsterdam 城市卡就啱哂喇!I amsterdam 城市卡有效期分為 24、48、72 同 96 個鐘,可以俾你無限次乘搭公共交通工具,免費參觀 60 幾個博物館同景點,參加免費運河導賞團,仲可以喺指定劇院、商舖同餐廳享有折扣優惠添。24 小時通行卡票價係 EUR59 起,上網就買得到。

    7

    搭的士

    阿姆斯特丹街頭都截到的士,但就唔係度度可以停車囉,例如巴士站同電車站附近都係禁止停車架!之不過,的士站其實遍佈成個市中心,通常會設喺酒店外面同主要景點附近。持牌的士上面有藍色車牌,車頂燈顯示所屬公司嘅名稱;

    • 你亦可以直接 Call 的士,比較熱門嘅公司包括 Taxi Amsterdam (020 777 7777)、Staxi (020 705 8888) 同埋 Taxistad (020 208 0000) 等。
    • 持牌的士嘅車費受法律管制,最高起標價係 EUR2.98,每公里跳標唔超過 EUR2.19。搭完車之後,司機會開張收據俾你;
    • 一般的士都接受信用卡俾車費嘅,但最好都係喺上車之前問吓司機先喇!
    • 俾貼士嘅做法喺荷蘭唔算常見;如果你真係好滿意服務,不妨將張單四捨五入,將找續嘅錢打賞俾的士司機吖。
    8

    喺阿姆斯特丹踩單車

    荷蘭首都阿姆斯特丹係非常適合踩單車嘅城市,市中心有好多單車租賃店舖同公司,其中最受歡迎嘅有 Nieuwezijds Kolk 嘅 Yellow Bike、Piet Heinkade 嘅 AmsterBike,同埋 Bloemgracht 嘅 Bike City。租單車價格大概係一日 EUR15。

    9

    阿姆斯特丹值得期待嘅年度盛事

    覺醒節

    • 節目簡介:覺醒節 (Awakenings) 係荷蘭最大型嘅電子音樂節之一,喺市中心西北 2 公里外嘅翻新工業園區裡面舉行。
    • 幾時:10 月
    • 邊度:Gashouder Westergasfabriek


    國王節

    • 節目簡介:國王節 (King's Day) 係全球規模最大嘅街頭 Party 之一,旨在慶祝國王生日;成千上萬嘅民眾會著住橙色衫,喺阿姆斯特丹各地狂歡,跟住現場音樂跳舞,大嘆街頭小吃,喺戶外酒吧飲酒。
    • 幾時:4 月 27 日
    • 邊度:成個阿姆斯特丹


    阿姆斯特丹同志遊行

    • 節目簡介:阿姆斯特丹同志遊行 (Amsterdam Gay Pride) 係世界上最著名嘅 LGBT 慶祝活動之一,除咗有體育、音樂、舞蹈同街頭 Party 等節目外,節日嘅重頭戲就梗係運河巡遊啦!到時,五顏六色嘅船仔會喺運河上面飄浮,繽紛悅目。
    • 幾時:7 月尾
    • 邊度:成個阿姆斯特丹

    開始計劃行程

    Maps