東京 34 大最佳夜生活體驗

赤坂 Blitz 現場音樂廳佔地偌大，望落好似飛機停泊庫，實際上卻係國際同本地頂級樂隊嘅一流表演場地，好多日本知名樂隊、以至備受推崇嘅獨立樂隊都曾經喺呢度為多達 1,900 位 Fans 演出。呢個場館直通赤坂站，對於搭地鐵嘅遊客嚟講非常方便，所以比其他音樂廳更加受歡迎。音樂會門票通常一早賣哂；不過，你或者都可以透過酒店禮賓部買飛嘅！

Body & Soul 由最早喺東京開設爵士樂酒吧嘅先驅之一関京子創立，規模唔大，但就係氣氛親切嘅 Jazz Club，一直致力發掘全球最優秀嘅爵士樂新星同天才嚟到表演，仲因而變得大名鼎鼎添！只要坐正喺前排座位，你就可以親身體驗 Live Jazz 表演嘅真正力量！好多頂級音樂家游走過市內嘅其他音樂廳之後，最終都係選擇長駐 Body and Soul。呢間俱樂部有提供各種飲品同食物，唔怕餓親。店家入場費大約係 3,500 円。

東京 Blue Note 算得上係城中最出名嘅爵士樂殿堂，曾經請到 Dizzy Gilespie 同 Sarah Vaughn 等知名藝人登台表演，同舉世知名嘅紐約同名爵士樂機構大有關係，水準當然亦都一樣咁高。今時今日，好似 Tony Bennet、Natalie Cole、John Legend 等等全球最出色嘅音樂家仍然非常賞識 Blue Note。酒吧空間唔算大，令到表演氣氛更加親密，而店名所指嘅「藍燈舞台」就營造出濃厚嘅爵士樂氣氛。幽暗燈光、美味食物加上高檔音樂，一定會令你印象深刻。店家入場費通常由 7,000 円起。

銀座嘅歌舞伎座劇院係東京嘅傳統表演藝術中心，亦係京都以外最出名嘅歌舞伎表演場地；呢間劇院建於 1889 年，幾個世代以嚟都展示住傳統歌舞伎嘅最好一面，

節目一般歷時 3 至 5 個鐘，分為幾個部分。如果你唔識日文，可能冇辦法賞盡細節；不過，舞台上極具風格嘅服裝、細膩典雅嘅動作，都已經係一大奇觀啦！全場節目嘅門票價格由 2,000 円到 20,000 円不等，而你亦可以買索價大約 1,500 円嘅單幕門票，用超值實惠嘅價錢獲享呢種古老藝術嘅入門體驗。

東京寶塚劇院係寶塚歌劇院嘅所在地，舞台表演融合歌唱、舞蹈同話劇，啱哂一家大細觀賞。呢間劇院成立於 1934 年，引入嶄新表演噱頭，由後生女喺西式風格作品裡面扮演哂所有角色，曾經上演好多部音樂劇，向《歌劇魅影 (Phantom of the Opera)》同《悲慘世界 (Les Misérables)》等等嘅經典西方作品致敬。

呢個大型娛樂中心裡面設有七個規模各異嘅展覽廳同音樂廳，圍繞宏偉嘅玻璃中庭而建，成日都有妙趣節目上演，熱門活動包括流行音樂會、百老匯音樂劇、芭蕾舞團巡迴演出，以及「東京國際電影節」等等嘅年度盛事。會議中心同有樂町站相連。

只要你對日本文學有興趣，就一定會愛上 Lupin 酒吧—單係貼滿日本知名作家相片嘅牆身，就夠哂引人入勝啦！Lupin 酒吧歷史悠久，是許多著名日本作家的至愛，包括永井荷風和太宰治。酒吧餐單簡約，堅持淨係供應威士忌同雞尾酒，以一流酒品奉客，絕對係去銀座遊覽途中歇下腳嘅好地方。溫馨提示：呢間由古至今都「人氣爆燈」嘅酒吧貫徹始終，淨收現金。

Big Echo 係全國最大型嘅卡拉 OK 連鎖店之一，滿載日本流行風格，每組客人都獲分配獨立冷氣房，裡面配備電視螢幕、梳化同卡拉 OK 套裝，你嘅「演出」絕對不為外人所見，自然唔怕「面懵」啦！一班女侍應來來往往，為你送上美食同飲品；而你只需要撳一下掣，侍應就會即刻嚟為你服務。Big Echo 嘅銀座分店有 Hello Kitty 主題房，因而遠近馳名。如果你要飲少少酒壯膽，先可以開始高歌，仲可以揀無限暢飲套餐添！

仲唔嚟 Crocodile 音樂俱樂部坐下，睇下全東京最優秀嘅業餘同專業棟篤笑表演？「東京喜劇舖 (東京コメディストア)」每個月嘅第四個星期五都會喺呢度演出，先有各種棟篤笑節目，再嚟熱鬧搞笑嘅即興環節；成個星期嘅任何一日，你都會機會遇到當地搖滾樂隊喺度登台添！Crocodile 每晚 18:00 開始營業，喜劇節目就由 20:00 開始，入場費各有不同，一般從 2,000 円起。

Den Aquaroom 酒吧以大型水族缸為焦點，你可以一邊靜賞天使魚游過，一邊飲啖雞尾酒，又或者喺紅綠燈魚身邊品嚐 Tequila。點都好，Den Aquaroom 都係青山區最具視覺衝擊力嘅雞尾酒吧之一，設計靈感嚟自海洋，型格潮爆，落地式魚缸喺正豪華酒廊隔籬，正好俾遊客輕鬆身心，淺酌幾杯—事實上，呢度仲係幾唔錯嘅約會勝地添！呢間前衛酒吧兼餐廳鄰近表參道站。

位於調色板城嘅巨型摩天輪高 115 米，係你遍覽台場周圍城市景觀嘅最佳選擇—安坐車箱入面，你一眼就睇哂市內各處、以至海港四周嘅景色，遼遠壯麗！呢座摩天輪喺日本稱為「大觀覽車」，需要 16 分鐘先轉完一圈，極受當地家庭歡迎；而摩天輪上面掛咗 120 盞燈，可以點起 16 種燈光模式，璀璨奪目。

這個觀景點在台場大受歡迎，位於極富太空感和象徵意義的富士電視台大廈 25 樓。球形觀景台懸於 123 米高處，係附近地區最高嘅觀景點，入場費 550 円。如果你想了解更多有關日本電視嘅資料，富士大廈仲有舉辦導賞團，帶你參觀廣播工作室。

電信中心嘅 21 樓設有展望台，仲喺靠近玻璃窗嘅位置擺放咗枱仔同座椅，感覺好似休息室，可以俾訪客更加舒適咁賞景，減少「暈浪」感。夜幕低垂，展望台洋溢浪漫氣氛，啱哂你同 Honey 度過溫馨一晚。

呢度嘅景色非常壯觀，你可以清晰望見彩虹橋、富士電視台大樓、東京晴空塔同東京鐵塔等地標，盡賞都市光芒四射。

東京 City View 及展望台位於六本木新城 52 樓，可以 360 度飽覽城市全景。呢個展望台高掛喺海拔 250 米嘅位置，周圍無遮無擋，視野遼闊暢通，啱哂你幫人稱「日版埃菲爾鐵塔」嘅東京鐵塔影相！

東京 City View 喺週末開放至 01:00，可以俾你喺六本木「夜蒲」之際歇一歇腳，而且仲設有戶外露台，提供同落地玻璃房截然不同嘅體驗。呢度嘅入場費係 1500 円，學生同小朋友享有折扣優惠。不妨提前買飛，嚟到大廈就唔使再排隊啦！

為咗改變六本木俗套嘅節奏，SuperDeluxe 先鋒派酒廊有時都會舉辦一啲妙趣活動，節目包括夜間黑電影、前衛藝術表演同 DJ Jam 歌，好受設計師、作家同攝影師等等嘅創意達人歡迎。

六本木嘅 Muse 俱樂部設有好多間主題房室，氣氛各有不同，全部都自帶梳化，環繞大型主吧檯；另外仲有卡拉 OK 房、飛鏢室同 2 個大型舞池，有 DJ 駐場，播放大熱鐵克諾音樂同狂舞歌曲。Muse 俱樂部氣氛友善，雖然營業時間比較夜，但都吸引唔少人玩足一晚。店家入場費通常由 3,500 円起，包埋免費飲品券。

呢條文化村曾經請到當地以至國際炙手可熱嘅好多位音樂家嚟舉辦 Live Concert，另外仲設有戲院，俾你欣賞附帶英文字幕嘅日本大熱好戲。

Womb 夜店係澀谷極受歡迎嘅 Dance Club，由紐約知名 Twilo 俱樂部嘅創立人設計，成日都迫滿哂東京潮爆嘅後生仔！呢間夜店總共 3 層樓高，裡面設有酒吧、舞池同貴賓室，經常請到世界級 DJ 同日本最有料嘅新晉藝人同場展示實力。如果你想搵倫敦或者柏林最正 Techno 音樂俱樂部獨有嘅重低音節拍同型格客群，咁 Womb 睇嚟都係你嘅首選喇！

Bellovisto 酒吧位於澀谷藍塔東急酒店 40 樓，係一間浪漫嘅雞尾酒廊，可以俾你飲下嘢，放鬆身心，欣賞日本夜景。大多數嘅夜晚，呢度都有 Live 鋼琴表演，增添別緻氣氛。酒吧訂有 Smart Casual 穿著規定，男士唔可以著短褲或者無袖衫入場。

東京 Opera City 嘅大型音樂廳同美術館有定期舉辦活動，以國內外頂尖表演人才吸引訪客湧至，歌劇演奏、芭蕾舞同管弦樂團古典音樂不斷上演，絕對啱哂你品味！東京 Opera City 距離京王新線的初台站只有幾步之隔，交通方便。

東京都廳大廈總共有 48 層，樓高 200 幾米，係新宿區內令人印象深刻嘅地標。而都廳展望台分為上、下兩層，可以 360 度俯瞰東京市景—遇啱天氣晴朗，你仲可以望到富士山咁遠架！到咗夜晚，呢度就成為「夜蒲」之旅嘅最佳起點。講你都唔信—東京都廳大廈展望室竟然免費入場，遊客可以由大江戶線嘅都廳前站直接過嚟。

Pit Inn 爵士樂俱樂部堪稱 Live Music 殿堂，成日請到城中最出色嘅音樂新星登台，亦都有國際資深專業音樂人，奏出熱門 Jazz tune。貴為全日本最古老嘅 Jazz House 之一，Pit Inn 嘅宗旨係提供高質音樂表演場地。

現場音樂會每晚 20:00 開始；星期六、日加設日間表演場次，由 14:00 就響起悅耳旋律。店家入場費 3,000 円，包 1 杯飲品。Pit Inn 爵士樂俱樂部同新宿三丁目站只係相隔幾步之遙。

Vagabond (バガボンド) 居酒屋堪稱傳奇現場音樂樞紐，深受東京嘅國際文化影響，仲曾經喺《紐約時報》大獲好評添！呢間型格時尚嘅居酒屋底層設有休閒酒廊，二樓就演奏 Live Jazz；館內牆身採用美術館形式嘅藝術裝飾，不拘一格，而且飲品價格實惠，相當驚喜！

貴為日本規模最大嘅啤酒品牌，麒麟啤酒公司而家就喺上野 Kirin City (キリンシティ) 啤酒館為啤酒擁躉送上嶄新嘅「隊啤」體驗！顧名思義，呢間酒吧主打啤酒，店員都經過專業培訓，熟習「斟酒三部曲」，肯定會為你奉上一杯完美啤酒—呢項技術需時都幾耐下，每杯要斟成 3 至 5 分鐘！不過，既然係生活中嘅小確幸，都值得用少少時間等待吖！順帶一提：餐單上面仲有專門配搭麒麟啤酒嘅菜餚，不妨一試。

Kirin City (キリンシティ) 係一大班人 Gathering 嘅好地方，館內餐單融合咗西式同日式美食，休閒氣氛令人人都覺得賓至如歸。

朝日 Super Dry 音樂廳外觀別樹一幟，出自著名設計師菲利普斯塔克 (Philippe Starck) 嘅手筆，樓頂綴有大型金色裝飾，令人不禁為斯塔克嘅創作構思而驚訝，思索再三。橫跨建築物嘅內部，相同型體都係成日出現喺意想不到嘅時刻，但就從來都唔解釋自己嘅存在意義。

行入呢棟摩天大樓，第一層同第二層係 Flamme d'Or 酒吧，供應只此一家嘅朝日新鮮啤酒；你亦都可以搭乘電梯去到 22 樓嘅朝日天空之房，喺美妙景致下，飲返啖冰爽啤酒。

嚟到金魚歌舞俱樂部，梗係唔少得奢華閃爍嘅服飾，仲有由「女扮男裝」同「男扮女裝」表演帶嚟嘅歡聲笑語啦！活力四射嘅舞蹈，加上大量諷刺喜劇元素，令呢度嘅舞台表演喺六本木大受歡迎。

節目每晚 2 場，時間分別係 19:30 及 22:00，內容歷時 60 分鐘，滿載「大 Show」等級嘅曲目、色彩繽紛嘅服裝同埋有趣短劇。金魚歌舞俱樂部位於大捷大廈裡面，距離六本木站只係幾步之遙。

六本木香和劇場主打晚宴歌舞表演，喺變裝幽默鬧劇之中，融入激動人心嘅戲劇性元素，為訪客奉上美食同現場娛樂，難怪深受日本當地人以至遊客推崇。

這裡的舞台表演結合明治時代主題和空中雜技等現代驚喜，場次分別係 19:30 同 22:30，星期五 01:30 加開一場深夜演出。