京都 22 間最佳餐廳

やげんぼり餐廳位於白川支流附近鵝卵石小徑上嘅一間古老茶館裡面，供應京都傳統美食同懷石料理，正正係京都市內最浪漫嘅用餐場所！日式佳餚以精美手工陶瓷餐具奉上，諸如朴葉味噌配搭橡木葉烤茸菇香蔥、鱉菜式，以至採用時令蔬菜入饌嘅涮涮鍋，統統任你品嚐。

未在餐廳規模細小，每日淨係得一節用餐時段，招待 10 位客人，但係就舉世聞名—說到底，既有米芝蓮 3 星佳餚為你奉上，還有甚麼好抱怨？廚師兼老闆石原仁司係京都名廚，烹飪水準卓越，供應京都正宗懷石料理。如果食客喺 18:00 上餐時間之後到達，就唔可以入座架喇！所以，記住準時嚟到，以免失望尷尬；而且仲一定要預約訂位，並且只能夠用現金付款。對於想品嚐精緻日式料理嘅美食達人嚟講，呢度嘅用餐體驗先至算係真正享受！

好多人慕名前往明日香餐廳，目的只為享受休閒氛圍，同埋享用精選定食—呢種定食套餐由主菜、一碗飯、一碗味噌湯加一碗日式漬物組成，一般比單點餐單食物更加抵食。講係咁講，明日香嘅餐單選擇當然唔止呢啲—你仲可品嚐京都風味麵食等菜式。想搵菜品眾多嘅家常餐廳？明日香近乎冇對手，絕對係你不二之選！

尾張屋四条店可以算係京都最古老嘅蕎麥麵店，當然來頭不小—呢間餐廳已經有 500 幾年嘅源遠歷史，一向精心炮製美味麵食，仲有更加引人注目嘅和菓子，呈奉俾皇帝、幕府將軍同京都寺廟備受尊敬嘅僧人。雖然尾張屋餐廳歷史悠久，但係店內出品嘅優質蕎麥麵依然價格合理，相當抵食。

佛沙羅館係一間環境非凡嘅泰國餐廳，坐落喺經過翻新嘅京都風格聯排別墅裡面，而呢座別墅已經有 85 年歷史，面向鴨川。店內裝修華美，配有天然板栗木製嘅櫃枱同煙燻竹隔板，仲有一張壁爐餐桌，由有 250 年歷史嘅房屋棟樑製成。一場嚟到，點可以唔試由經驗豐富嘅泰國廚師主理嘅有趣套餐？呢度嘅冬蔭功同泰式炒麵等泰式經典菜式統統令人期待！你可以預訂河畔開放式露台座位，喺鴨川流水映襯下，食物定當更添美味。

京都市內各處的百貨公司都設美食樓層，出售日式、西式和亞洲外賣食品，還有各款美味佳餚、糕點和朱古力，吸引唔少人嚟買便當或者其他外賣餸菜，而你仲可以買到清酒同葡萄酒添！百貨公司嘅食品款式層出不窮，店內有蓋購物空間唔會受到惡劣天氣影響，難怪成為京都小食好去處。

鱉係日本美食，而大市餐廳自 17 世紀以來一直主打鱉火鍋，專業得獨賣一味，淨係提供鱉嚐味餐單，用燉鱉肉做前菜，緊接經典嘅鱉火鍋，喺熱騰騰嘅古董陶罐裡面奉上。

百足屋係一間精緻嘅餐廳，位於經過精美翻新嘅別墅裡面，採用開放式設計，飾有令人驚艷嘅深色石頭門廳同庭院花園，營造出寧靜氛圍，俾食客享受「只此一家」嘅京都家常料理。餐單多種多樣，以時令食材入饌，有趣菜餚值得期待，諸如南瓜鰹魚魚生和生薑雞肉等，統統風味獨特。午餐便當價格實惠，而晚餐索價都唔係貴好多。晚市食客要著西裝外套用餐，並且提前訂位。

三嶋亭供應令人垂涎的牛肉、蔬菜和麵條，主打肉食，採用壽喜燒或涮涮鍋風味火鍋奉上。事實上，正因為店內肉類大受歡迎，餐廳迫不得已要喺底層自設肉檔，就連京都最精明嘅「師奶仔」都成日嚟幫襯！餐廳內部嘅木框架結構同拋光木地板營造出濃厚嘅懷舊氣氛，再加上身穿和服嘅女侍應捧住壽喜燒拼盤奉客，就更加古意盎然。部分榻榻米私人房仲可以飽覽庭院花園嘅澄美風光添！用餐必須訂位。

味がさね餐廳坐落於 150 年歷史嘅舊式房屋裡面，俯瞰住鴨川河，定當為你奉上難忘嘅用餐經歷。餐廳設有開放式座位同幾間私人用餐室，以拉麵為招牌菜之一，有各種肉湯俾你揀；事實上，味がさね嘅餐單極多樣化，仲有兒童套餐提供。由京都市中心嘅河原町站步行 5 分鐘，就可以直達。

參觀完二条城之後，鍾情美國同墨西哥美食嘅你可以到城樓稍北嘅 La Jolla 餐廳用餐，大啖北美美食，品嚐素食菜餚。呢間餐廳供應嘅南加州美食地道正宗，而 Margarita 雞尾酒嘅風味更加冠絕京都！

Kerala 印度餐廳提供多達 70 種印度傳統美食，當中包括 20 款咖哩同好多素食菜餚，又以印度烤肉特別好味。店內裝飾豐富，幾有印度風情，仲裝飾咗一啲華麗古董。午市超值套餐價格由 850 円起，備有英文餐單，而且職員都識講英文，遊客落單絕對唔成問題。

泉仙餐廳位於大德寺大院嘅質樸花園裡面，遠近馳名，供應精進鉄鉢料理，亦即係「豪華版」佛教禪宗素食菜餚。每道菜式都以層層縮細嘅碗具奉上，一個疊一個，就好似俄羅斯套娃咁。食客可以喺榻榻米房裡面享用小麥麵筋同豆皮等特色食品；好天嗰陣，你仲可以喺花園嘅矮餐枱用餐。泉仙喺春季同秋季期間大受歡迎，建議提早訂位。溫馨提示：呢間餐廳淨係供應午膳。

呢間小店位於大德寺東門外，自 15 世紀中期以來一直供應素食，主打精進料理，亦即係佛教素菜，正好俾你體驗由食物傳達嘅禪宗哲學。有別於好多其他嘅精進餐廳，大德寺一久於午市同早場晚市都有營業。

瓢亭餐廳已經有 300 年歷史，好似凝止咗時光咁樣，帶你體驗正宗京都懷石料理嘅繁複細節。呢間餐廳本來係茶館，170 年前由簡樸嘅茶道裡面昇華而出，轉營菜式眾多嘅精緻餐膳，食物經過巧手炮製，精緻上碟，再由舉止優雅嘅和服女侍奉上，服務冇得彈，就算價格高昂，卻可以俾到你畢生難忘嘅用餐享受。瓢亭獲頒授米芝蓮三星級殊榮，需要提前訂位，而且設有穿著規定。

呢間旅館已經有 400 年歷史，以釜風呂粘土蒸汽浴而聞名—大多數顧客都會選擇一試呢種極致輕鬆嘅活動，然後先著上棉質和服，去餐廳用膳。平八茶館主打平安時代傳統美食，以冬季限定的鴨火鍋而聞名；夏季時份，這裡則轉售山藥麥飯 (麦とろ) 便當飯盒，食材包括山地薯仔沙律配小麥飯。而餐廳全年都有供應細節繁複、優質精緻的懷石料理晚餐。山ばな 平八茶屋距離修學院站只係 5 分鐘步程，位於京都市美術館附近。記住一定要提前訂枱！

身處篩月，你可以沉醉於天龍寺周圍嘅寧靜環境入面，由經過特殊訓練嘅典座法師為你炮製正宗禪宗佛教餐膳。餐點由多道菜式組成，融合咗甜、酸、苦、鹹、清淡同溫熱 6 種基本口味，配搭細膩和諧。

菜餚包括芝麻豆腐配醬油、新鮮蔬菜、味噌湯同白飯。餐廳提供 3 款套餐，價格亦有分別，但係全部都包埋花園入場費。用餐必須訂位。

西山艸堂素食餐廳以湯豆腐聞名，先用海帶湯煮熟豆腐，然後伴醬油和蔥碎享用。呢度使用嘅豆腐來自嵐山著名豆腐店「森嘉」，而呢間舖頭自 1860 年代以來一直專注製作豆腐，經驗豐富。置身西山艸堂，遊客可以盡享傳統用餐體驗，坐喺榻榻米上面，飽覽花園美景。餐廳位於天龍寺範圍內。

身處嵯峨野餐廳鬱鬱蔥蔥的竹林綠蔭下，你可以享用到傳統的日式豆腐和蔬菜。餐廳以肉湯煮豆腐聞名，而店內嘅油炸豆腐配黑芝麻同天婦羅亦都好好味，另外仲有多款時令菜餚，任君選擇。著住和服嘅女侍應會喺矮身餐枱、私人榻榻米房或者竹園之間，為你送上細緻周到嘅服務。由嵐山站行一陣，就會嚟到餐廳。

吉兆嵐山店係一間著名嘅餐廳，由第三代廚師德岡邦夫經營，並且獲得米芝蓮三星殊榮。呢間餐廳位於一棟百年歷史建築裡面，淨係設有 7 間私人用餐室，每間都向住美輪美奐嘅日式花園。吉兆嘅懷石料理被譽為「畢生難得」嘅體驗，廣受推崇—所以，用餐記得要訂位！