維羅納 10 大最好玩活動

維羅納最出名嘅係乜嘢?

    講到維羅納,好多人第一時間都會諗起莎士比亞神劇《羅密歐與茱麗葉》。其實,呢個地方仲有其他特色架!維羅納位於阿迪傑河 (Adige River) 岸畔,係古羅馬地標嘅所在地,部分古蹟保存完好,夏季期間會定期化身歌劇同現代音樂會場地;而個別羅馬式宮殿同壯麗教堂就保留咗文藝復興初期嘅壁畫,好值得欣賞。

    維羅納面積相對較細,唔需要太多時間,已經足夠行完好多熱門景點。以下集齊維羅納一日遊活動,包括參觀宏偉地標、大嘆美味餐飲,仲有遊覽維羅納周圍嘅風景名勝,行程豐富!

    維羅納最好玩嘅活動係乜嘢?

    1

    由布拉廣場展開一日行程

    位於維羅納嘅優美中央公園

    布拉廣場 (Piazza Bra) 嘅規模冠絕維羅納 (Verona),係市內嘅中央公園,坐擁茂密嘅花園同挺直嘅大樹,仲有一座噴泉,同埋「意大利國父」國王維托里奧·埃馬努埃萊二世 (Vittorio Emanuele II) 嘅雕像。不妨搵個位坐低,慢慢欣賞維羅納嘅壯麗建築物同歷史地標吖!廣場背靠氣勢磅礡嘅維羅納圓形競技場 (Verona Arena),同時亦都鄰近維羅納市政廳 (Palazzo Barbieri),記得去埋西北一帶設有露天茶座嘅典雅 Café,一邊嘆杯靚咖啡,一邊飽覽無敵靚景喎。

    地點: Piazza Bra, Verona, Italy

    開放時間: 24 小時

    地圖
    • 伴侶
    • 家庭
    • 歷史文化`

    相片由 Paul Arps 提供 (CC BY 2.0) 經修改

    2

    遊覽維羅納圓形競技場

    喺市內嘅羅馬競技場睇歌劇

    維羅納圓形競技場 (Verona Arena) 係羅馬帝國最大型嘅圓形劇場之一,喺正布拉廣場 (Piazza Bra) 隔籬,建於一世紀,宏偉碩大,到而家仲有上演大型歌劇,當中大部分都係夜晚演出嘅。想喺日頭參觀維羅納圓形競技場?只要俾大約 EUR10,你就可以入場飽覽佢嘅建築特色,順便 Check 埋最新節目表,即日買飛都仲得!石階上嘅觀眾席票價大約 EUR18;而競技場中間有背墊嘅座位會舒服啲,票價最高可以去到足足 EUR226。

    地點: Piazza Bra, Verona, Italy

    開放時間: 星期一 13:30 至 19:30;星期二至日 08:30 至 19:30

    電話: +39 (0)45 800 5151

    地圖
    • 伴侶
    • 家庭
    • 歷史文化`
    3

    沿住馬齊尼大街掃貨

    連接維羅納兩個主要廣場嘅步行街

    馬齊尼大街 (Via Mazzini) 由大理石鋪成,係一條狹窄嘅步行街,連接維羅納 (Verona) 兩個主要廣場:布拉廣場 (Piazza Bra) 同百草廣場 (Piazza delle Erbe),可以俾你順道去勻兩度。呢條街全長半公里,同時亦係維羅納嘅主要購物勝地,開滿一排排時尚專門店同精品店,有售 Gucci、Zara、Swarovski、Stradivarius 同 Michael Kors 呢類名牌時裝同首飾。無論買唔買到「戰利品」都好,一定要去馬齊尼大街行番轉,先可以話自己嚟過維羅納架!行到馬齊尼大街盡頭,你仲會搵到茱麗葉故居 (Juliet's House) 添。

    地點: 意大利維羅納馬齊尼大街

    開放時間: 24小時 (大多數鋪頭每日 09:00 開始營業)

    地圖
    • 伴侶
    • 家庭
    • 經濟實惠
    • 豪華住宿
    4

    去百草廣場行鮮貨市集

    去熱鬧嘅露天市集買手信

    百草廣場 (Piazza delle Erbe) 係維羅納 (Verona) 最主要嘅市鎮廣場,距離新門 (Porta Nuova) 火車站大約 10 分鐘的士車程。要數全場最矚目嘅焦點,莫過於裡面一座 14 世紀嘅維羅納聖母雕像同噴泉!呢兩座地標俾好多座古老嘅多層建築物環抱,體現咗維羅納嘅歷史魅力同城鎮生活面貌。廣場上亦都開咗唔少意大利餐館 (osterias) 同酒吧,當中有啲設有露天雅座,你可以坐低嗌杯咖啡、啤酒或者 Gelato 雪糕,一路望住人來人往嘅街道,一路享受人生。唔講唔知—百草廣場仲係好受歡迎嘅購物勝地嚟架!喺設計師帽飾名牌 Borsalino 專門店前面,架設咗一系列嘅帳篷攤位,一眾「購物狂」記得要嚟掃平貨喇。

    地點: Piazza Erbe, Verona, Italy

    開放時間: 星期三至一 24 小時開放 (逢星期二休息)

    電話: +39 348 444 0705

    地圖
    • 伴侶
    • 家庭
    5

    攀登蘭貝爾堤塔

    飽覽維羅納醉人全景

    蘭貝爾堤塔 (Torre dei Lamberti) 大約有 84 米高,堪稱維羅納 (Verona) 最高嘅塔樓之一,可以俯瞰百草廣場 (Piazza delle Erbe)。呢座 12 世紀塔樓中間有個巨型時鐘,上面有兩個古老鐘鈴,其中一個每小時敲響一次。只要俾大約 EUR6,你就可以入場參觀隔籬嘅理性宮 (Palazzo della Ragione),之後沿住迴形樓梯攀登蘭貝爾堤塔;雖然攻頂要行成二百幾級樓梯,但居高臨下嘅靚景非常震撼,幾辛苦都值得!不過,如果你行程緊迫,都可以改搭電梯嘅。

    地點: Piazza dei Signori, Via della Costa, 1, Verona, Italy

    開放時間: 星期一至五 10:00 至 18:00;星期六至日 11:00 至 19:00

    電話: +39 (0)45 927 3027

    地圖
    • 伴侶
    • 家庭
    • 歷史文化`
    • 拍照
    6

    必睇景點:茱麗葉故居

    細閱寫俾茱麗葉嘅情書

    茱麗葉故居 (Juliet’s House) 重現莎士比亞經典名著《羅密歐與朱麗葉》裡面露台情深嘅一幕,帶你走入文學大師嘅浪漫悲劇世界!由百草廣場 (Piazza delle Erbe) 沿住卡佩羅大街 (Via Capello) 向東南行幾分鐘,就會嚟到茱麗葉故居。大多數人一抵達呢座 13 世紀哥德式房屋,都會湧去屋外嘅庭院,爭住同茱麗葉青銅雕像合照;有啲人亦會摸吓雕像,希望好運同愛情降臨。難得一場嚟到,梗係要親身參觀埋博物館 (入場費約 EUR6),重憶羅密歐與朱麗葉嘅動人愛情故事啦—你仲會有機會扮演朱麗葉,企喺大名鼎鼎嘅石露台上面添!

    地點: Via Cappello, 23, Verona, Italy

    開放時間: 每日 08:30 至 18:30

    電話: +39 (0)45 803 4303

    地圖
    • 伴侶
    • 家庭
    • 歷史文化`
    • 拍照
    7

    喺 La Griglia 鋸扒

    喺維羅納小餐館享用精緻牛扒

    牛扒喺意大利文裡面叫做「bistecca」,亦都係維羅納 (Verona) 最出名嘅菜式之一。如果想嘆塊靚扒伴美酒,不妨喺鎮上數之不盡嘅家庭小餐館之中任揀一間,坐低擦餐勁!而 La Griglia 就係唔錯嘅選擇。由維羅納圓形競技場 (Verona Arena) 盡頭出發,沿住 Via Leoncino 向東行大約一分鐘,你就會嚟到 La Griglia 總店;而佢嘅分店亦都遍佈維羅納市內各地。入到店內,梗係要先點一客佛羅倫斯 T 骨牛扒或者「Costate」骨扒 (售價大約 EUR20),之後再以 Nutella Tiramisu 結束完美嘅一餐啦!餐廳鄰近維羅納圓形競技場,睇完歌劇之後嚟食嘢就啱哂。

    地點: Via Leoncino, 29, Verona, Italy

    開放時間: 每日 12:00 至 15:00 及 18:30 至 00:00

    電話: +39 (0)45 803 1212

    地圖
    • 伴侶
    • 家庭
    • 品嚐美食
    • 豪華住宿
    8

    喺 Antica Bottega del Vino 嘆葡萄酒

    威尼斯小食 (cicchetti) 伴以經典葡萄美酒

    Antica Bottega del Vino 係一間位於馬齊尼大街 (Via Mazzini) 盡頭附近 Via Scudo di Francia 大道上嘅古典葡萄酒吧,店內酒款包羅萬有,其中梗係唔少得意大利最頂級嘅葡萄酒品牌!畢安奇葡萄酒 (Bianchi) 同布馳維蒂奇諾 (Verdicchio Bucci) 等等嘅白酒每杯 EUR6 起;而羅西葡萄酒 (Rossi) 同艾格尼拉伯嘉 (La Poja Allegrini) 呢類紅酒就每杯 EUR20 起。呢間酒吧平時已經人頭湧湧,一到星期六日更加座無虛席,嚟之前記得 Book 定位先。你亦都可以碰吓運氣,請酒吧職員帶你去樓下嘅「葡萄酒聖殿」參觀—呢個地下酒窖珍藏咗成千上萬枝珍稀佳釀,通通擺放喺堆疊整齊嘅酒箱同酒架之中,蔚為奇觀!

    地點: Via Scudo di Francia, 3, Verona, Italy

    開放時間: 每日 11:00 至 00:00

    電話: +39 (0)45 800 4535

    地圖
    • 伴侶
    • 品嚐美食
    • 豪華住宿
    9

    必睇景點:羅馬劇院

    由山頂城堡飽覽維羅納絕世無雙嘅全景

    羅馬劇院 (Teatro Romano) 係個一世紀露天劇院嘅遺址,歷史仲耐過維羅納圓形競技場 (Verona Arena),但至今仍然保存得好好,仲會定期舉辦夏季音樂會添!呢個圓形劇場坐落於阿迪傑河 (Adige) 東岸嘅山坡上,山頂有座專門珍藏古羅馬文物嘅考古博物館,館外嘅小庭院遠眺對面河岸維羅納嘅城市風光,入場費由 EUR1 起。如果想更加「居高臨下」咁睇盡靚景,不妨由羅馬劇院行樓梯上去聖彼得城堡廣場 (Piazzale Castel San Pietro castle) 吖!唔想行到「氣來氣喘」,都可以搭纜車上去,車費大約 EUR2。

    地點: Rigaste Redentore, 2, Verona, Italy

    開放時間: 每日 08:30 至 18:30

    電話: +39 (0)45 800 0360

    地圖
    • 伴侶
    • 家庭
    • 歷史文化`

    相片由 Anatoliy Smaga 提供 (CC BY-SA 4.0) 經修改

    10

    喺阿迪傑河畔休閒結束一日行程

    由河畔靚景作伴,細味 Terrace Bar al Ponte 嘅雞尾酒

    Terrace Bar Al Ponte 係維羅納嘅一流河畔酒吧,坐擁佩雅托橋 (Ponte Pietra) 嘅醉人美景。參觀完羅馬劇院 (Roman Theatre)、又或者去維羅納圓形競技場 (Verona Arena) 睇完歌劇之後,嚟呢度 hea 吓就最好不過。之不過,呢間舖頭地方有限,露台亦都略嫌狹窄,嚟之前記得要 Book 定位先!入黑之後,Terrace Bar al Ponte 搖身一變,成為情侶拍拖嘅浪漫場地,你可以帶埋另一半嚟,喺潺潺水聲同璀璨燈光嘅襯托下,品嚐特色橙味開胃酒 Aperol Spritz 同西班牙惹味 Tapas 小食。

    地點: Via Ponte Pietra, 26, Verona, Italy

    開放時間: 每日 09:00 至翌日 02:00

    電話: +39 (0)45 927 5032

    地圖
    • 伴侶
    • 家庭
    Ari Gunadi | 旅遊常客

    開始計劃行程

    Maps