那不勒斯位於意大利半島東南海岸,耀眼非常,市內舊城中心始建於青銅時代,獲聯合國教科文組織列為世界文化遺產,而龐貝 (Pompeii) 同赫庫蘭尼姆 (Herculaneum) 等等獨一無二嘅考古遺址就喺正市外。

    身處那不勒斯,你仲可以感受吓意式 dolce vita 美好生活風情添!呢度四季如春,海灣靚絕全球,Pizza、葡萄酒等等美食佳釀誘惑味蕾,再加上意大利典型嘅活潑生活方式,一定會令你嘅假期精彩難忘。

    那不勒斯最好玩嘅活動係乜嘢?

    1

    喺平民表決廣場展開一日行程

    遊覽那不勒斯人氣聚腳點

    • 伴侶
    • 家庭
    • 歷史文化`
    • 拍照
    • 經濟實惠

    平民表決廣場 (Piazza del Plebiscito) 位於那不勒斯 (Naples) 港口以西,歷史悠久,建於 19 世紀初,毗鄰皇宮 (Royal Palace),四周環繞住壯麗型格嘅莊園 (palazzos)、教堂同那不勒斯省督宮 (Prefecture Palace),規模冠絕全市,吸引好多人嚟呢度聚首一堂。廣場周圍有好多酒吧同餐廳,當中包括鼎鼎大名嘅 Gran Caffè Gambrinus 咖啡店,環境舒適,最啱坐低食啲嘢,飲當地人最鍾意嘅 Caffè Stretto 咖啡,再起步探索鄰近嘅那不勒斯舊城區。

    地點: 那不勒斯港西南 500 米

    地圖
    2

    參觀聖塞韋羅小教堂博物館

    行吓那不勒斯最古怪嘅博物館之一

    • 伴侶
    • 家庭
    • 歷史文化`

    聖塞韋羅小教堂博物館 (Museo Cappella Sansevero) 精彩震撼,算係那不勒斯 (Naples) 數一數二,珍藏咗 18 世紀意大利藝術家令人印象深刻、同時略為不安嘅作品,當中包括獨特而宏偉嘅大理石雕像《蒙紗的基督 (Veiled Christ)》,同埋神秘怪誕嘅《解剖機器 (Anatomical Machines)》等等。雖然場館入面唔准影相,但係參觀人數依然喺那不勒斯名列前茅,大家都睇到津津有味。聖塞韋羅小教堂博物館位於那不勒斯港以北 800 米。

    地點: 那不勒斯港以北 800 米

    開放時間: 每日 09:00 至 19:00

    地圖
    3

    喺托萊多大街 Shopping

    沿住那不勒斯數一數二嘅熱鬧購物街閒遊

    • 伴侶
    • 家庭
    • 豪華住宿

    托萊多大街 (Via Toledo) 位於但丁廣場 (Piazza Dante) 北面、近平民表決廣場 (Piazza del Plebiscito) 南面之間,係那不勒斯 (Naples) 中心地帶最繁華嘅購物街之一,既有平價手信店,亦有高檔名牌時裝店,貨色可以話一應俱全,勝在 High Class 名店嘅索價都普遍低過米蘭同羅馬。呢條熱鬧嘅商業街長達 1 公里,兩邊商舖無數,仲有好多酒吧同餐廳穿插其中,俾你稍事休息,再繼續「血拚」!

    地點: 托萊多大街嘅起點位於平民表決廣場東北角以北 60 米外

    地圖

    相片由 Mstyslav Chernov 提供 (CC BY-SA 3.0) 經修改

    4

    狂擦 Pizza

    品嚐正宗那不勒斯菜

    • 伴侶
    • 家庭
    • 品嚐美食

    原來,喺羅馬麵包上面搽番茄醬整 Pizza 嘅做法,係到咗 18 世紀先獲得正式認可架!那不勒斯 (Naples) 貴為 Pizza 嘅發源地,Neapolitan Style Pizza 絕對係必試名物,一場嚟到又點可以唔食返件?呢款 Pizza 一定要採用聖馬札諾 (San Marzano) 番茄同正宗嘅 Mozzarella di Bufala Campana 意式水牛芝士炮製,仲列入咗聯合國教科文組織非物質文化遺產添。唔使問都知—那不勒斯周圍肯定搵到出色嘅 Pizza 店,而我哋誠意推薦 Salita Santa Anna di Palazzo 嘅 Pizzeria Brandi,佢位於平民表決廣場 (Piazza del Plebiscito) 北面,相傳係拿坡里經典 Pizza Margherita 喺 1889 年誕生嘅地方,不過「係」定「唔係」都無從考究嚕!

    地點: 平民表決廣場西北 120 米

    電話: +39 (0)081 416928

    地圖
    5

    漫遊史巴卡拿坡里街至那不勒斯舊城區

    喺那不勒斯舊區散步

    • 伴侶
    • 家庭
    • 歷史文化`
    • 拍照
    • 豪華住宿

    史巴卡拿坡里街 (Spaccanapoli) 由新耶穌廣場 (Piazza del Gesù Nuovo) 延伸至主教座堂街 (Via Duomo),屬於那不勒斯 (Naples) 舊城中心最古老嘅地帶,位處那不勒斯港口以北 600 米,猶如一條 5 米闊嘅平坦走廊,兩邊排滿高聳嘅舊式房屋、精品店、酒吧同餐廳,相當好行!呢個歷史悠久嘅街區喺那不勒斯都算典型,到處都有華麗宮殿、宗教建築,同埋熱鬧到夜深嘅廣場仔,縱橫交錯,猶如迷宮一樣。如果想體驗那不勒斯嘅地道風情同生活節奏,冇第二個地方比呢度更加啱你心水架喇!

    地點: 平民表決廣場以北 1.1 公里

    地圖
    6

    探索龐貝考古公園

    遊歷消失咗嘅獨特城市

    • 伴侶
    • 家庭
    • 歷史文化`
    • 拍照
    • 經濟實惠

    龐貝考古公園 (Pompeii Archaeological Park) 既係那不勒斯 (Naples) 嘅地標,亦都係聯合國教科文組織世界文化遺產,距離那不勒斯舊城區東南部 30 分鐘車程,早在公元前 79 年維蘇威火山 (Mount Vesuvio) 爆發之後,就被 4 至 6 米厚嘅火山灰淹沒…而時間亦都喺嗰刻凝止。想全方位參觀呢個龐然遺跡,都有幾個方法嘅:你可以請導遊帶你行、參加導賞團,又或者按照自己嘅節奏慢慢睇,只要去售票處租返部導覽機就得架喇!

    地點: 那不勒斯港以東 25 公里

    電話: +39 (0)081 8575 347

    地圖
    7

    喺波西利波市集行街

    由街頭市集一窺地道風情

    • 伴侶
    • 家庭
    • 經濟實惠

    逢星期四朝早,那不勒斯 (Naples) 舊城區西南 4 公里處嘅維吉里奧大道 (Viale Virgilio) 都會架設起波西利波露天市集 (Posillipo Market),售賣各種時尚服裝、鞋、家居用品同二手衫,全部都抵到爛!波西利波市集坐落於那不勒斯嘅迷人地帶,行幾分鐘就去到公園;身在場內,你既可以遠眺海灣同卡普里島 (Capri Island) 嘅全景,又可以同當地人輕鬆交流,見識吓意大利南部嘅熱情,同埋響亮嘅叫賣聲,相當過癮。

    地點: 那不勒斯港西南 4 公里

    地圖
    8

    探索那不勒斯地下遺址

    用雙腳尋探 2,500 年嘅歷史

    • 歷史文化`

    那不勒斯地下遺址 (Naples Underground) 喺正舊城區橫街窄巷嘅底下 40 米,會以獨特方式帶你穿梭歷史,遊歷希臘羅馬水道橋、羅馬劇院等名勝。事實上,那不勒斯地下遺址係一連串縱橫交錯嘅隧道,穿插喺此城坐落嘅火山岩裡面,令人嘆為觀止;而遺址喺地面有好多個出入口,遍佈舊城中心,又以聖加埃塔諾廣場 (Piazza San Gaetano) 嘅入口最出名,仲可以俾遊客親身一覽第二次世界大戰嘅防空洞添!

    地點: 那不勒斯港以北 1 公里處嘅聖加埃塔諾廣場

    開放時間: 每日 10:00 至 18:00

    電話: +39 (0)081 019 0933

    地圖
    9

    大擦意粉,飲杯坎帕尼亞葡萄酒

    品嚐那不勒斯地道美食

    • 伴侶
    • 品嚐美食
    • 豪華住宿

    環繞那不勒斯港 (Port of Naples) 嘅舊城區 (Old Town) 有好多一流小食店任你揀,你實可以嘆到正宗那不勒斯美食!當地特色菜包括蜆肉意粉 (spaghetti alle vongole) 同蕃茄醬水牛芝士焗薯仔丸子 (gnocchi alla sorrentina),

    一般人氣餐廳都有供應,而我哋誠意推介 Vico Lungo Teatro Nuovo 嘅 Trattoria Da Nennella,同埋聖盧西亞街 (Via Santa Lucia) 嘅 Il Ristorantino dell'Avvocato。想令「尋味」體驗更上一層樓,就梗係要配埋當地嘅葡萄酒一齊食啦!鍾意飲紅酒,可以試吓 Lacryma Christi del Vesuvio;而白酒就首推 Fiano di Avellino。

    10

    喺貝里尼廣場附近結束一日行程

    天黑之後,漫遊那不勒斯舊城區

    • 伴侶

    無論晝夜,貝里尼廣場 (Piazza Bellini) 都係人氣景點,佢位於港口以北 1 公里外,場內以至附近街道都開滿古樸嘅酒吧同餐廳,而且大部分仲配置埋露台,俾你坐低 hea 吓,靜觀路人來來往往。4 世紀希臘城牆遺址、石板街、再加上舊城區嘅老式建築,都令廣場充滿電影感,難怪吸引咁多學生嚟呢度聚腳,度過寫意而平靜嘅夜晚。事實上,貝里尼廣場啱哂你同當地人交流,近距離見識城市入夜後嘅熱鬧風情,不妨先去場上嘅 Bar Lemmelemme 淺酌一杯熱吓身,然後去文琴佐貝里尼街 (Via Vincenzo Bellini) 正到爆嘅 Jazz club Bourbon Street 再飲過吖!

    地點: 那不勒斯舊城區 (那不勒斯港以北 1 公里)

    地圖
    Stephan Audiger | 旅遊常客

    開始計劃行程

    Maps