我哋嘅羅馬旅遊懶人包羅列出你需要嘅基本資料,幫你 Plan 定意大利行程,向各大人氣熱點進發!無論你去旅行去得幾密,都要留意以下問題:當地天氣係點?點樣由機場去酒店?需要邊種貨幣同插頭?我哋會為你提供所有答案,同場加映最佳旅遊時機、交通資訊、各類基本資料,同埋實用旅遊貼士,

    一切盡在呢份羅馬旅遊懶人包之中。睇完呢份簡短易明嘅指南之後,你嘅羅馬旅程應該就準備得七七八八架喇!

    1

    遊覽羅馬嘅最佳時機 (天氣方面)

    羅馬屬於地中海氣候,平均溫度由冬天嘅 3ºC 到夏天嘅 30ºC。

    • 降雨量最多嘅月份係 11 月同 12 月,
    • 又以每年 6 月至 9 月日照最強
    • 6 月至 8 月嘅夏天係當地嘅旅遊旺季,到時酒店同機票價格都會相應上漲。
    • 最佳遊覽月份:5 月同 9 月,因為到時嘅溫度喺 20ºC 左右,而且好少落雨。
    2

    羅馬基本資訊

    • 主要語言:意大利文
    • 插頭類型:Type C、F 同 L 插頭
    • 電壓:220-240 V
    • 貨幣:歐元 (EUR)
    • 國際電話代碼:+39 6
    3

    城市交通

    菲烏米奇諾機場

    菲烏米奇諾機場 (Leonardo da Vinci-Fiumicino) 係羅馬嘅主要機場,大部分國內同國際航班都會喺呢度升降;而機場位置四通八達,大約一個鐘 (甚至都唔使) 就可以去到市中心。

    火車係又快又平嘅交通選擇,李奧納多快車 (The Leonardo Express) 只需要 30 分鐘就可以直達特米尼 (Termini) 火車站,費用大約係 EUR15;而 FL1 地區火車仲平,票價唔使 EUR10,仲會喺提布提納 (Tiburtina) 同奥斯汀斯 (Ostiense) 停站,而呢兩個站裡面都會搵到地鐵同好多巴士。另外,你仲可以搭旅遊巴嚟到特米尼火車站,車程係長啲,勝在車費平啲。搭的士去羅馬市區一律收費 EUR48。

    錢皮諾 G.B. 機場帕斯提內機場

    除非你搭歐洲廉航嚟啦,否則都好少機會用到羅馬嘅第二機場—錢皮諾機場 (Ciampino) 架喇。而如果你真係喺呢度落機,有兩種選擇可以直達羅馬市中心:一係搭的士去奧勒良城牆 (Aurelian Walls) 內嘅任何地方,一律收費 EUR30;一係者搭旅遊巴去特米尼火車站,價格大約係 EUR5,車程 30 分鐘左右。

    羅馬火車站

    國際歐洲之星 (International Eurostar) 火車會喺羅馬總站停站。意大利首都羅馬係國內高速列車系統嘅中央樞紐;正因為咁,要喺米蘭、那不勒斯、博洛尼亞同威尼斯等國內其他地方去羅馬,都簡單輕鬆。要記住嘅係:羅馬有兩個主要火車站,分別係位於古城中心邊緣嘅羅馬總站 (Roma Termini),同埋城市東部嘅羅馬提布提納站 (Roma Tiburtina),兩者都有地鐵同巴士接駁。

    相片由 DV 提供 (CC BY-SA 3.0) 經修改

    4

    市內交通

    旅遊貼士

    羅馬市內所有交通都係由 ATAC 運輸局營運,採用統一票務系統 BIT 票,喺 90 分鐘之內使用、又或者搭一程地鐵,都只需要 EUR2;而售票機仲有得買 24、48 同 72 個鐘嘅通行證添!如果你就近冇地鐵站,但又想買車飛,就要留意吓邊間店舖或者報攤上面有個大大隻嘅「T」字標誌喇!

    相片由 Mattes 提供 (CC BY-SA 3.0) 經修改

    5

    市內地鐵係點運作嘅呢?

    羅馬有兩條地鐵線一定要識,佢哋分別係 A 線同 B 線,會喺特米尼 (Termini) 火車站交匯。遊客可以搭 A 線去梵蒂岡同埋西班牙階梯 (Spanish Steps),而搭 B 線就去到羅馬鬥獸場 (Colosseum)。地鐵一般會營運到 00:00 之前,而星期五同六晚就會開到 01:30。

    6

    搭巴士同電車出遊

    巴士同電車網絡係保持羅馬運作嘅關鍵,喺冇地鐵直達嘅古城中心尤其方便。好多巴士站都設有電子螢幕,顯示巴士到站嘅實時資訊,而市中心為數更多。上車之前,記得要買張車飛先,搭綠色電車嘅做法亦都一樣。

    7

    羅馬共享汽車

    羅馬人係共享汽車嘅大師!只要一個 App,你就可以喺街度拎架車嚟用,再泊返喺任何地方都得,做法簡單:去羅馬之前,你要先喺網上註冊,之後就可以隨心所欲,俾錢借車。其中,Enjoy 公司有紅色 Fiat 500 可以 Book,而 Car2go 就專營智能汽車。

    相片由 Mariordo 提供 (CC BY-SA 4.0) 經修改

    8

    羅馬的士

    市政府核許嘅的士係白色嘅,車身有 SPQR 城市徽章同許可證號碼,而車頂亦都有的士標誌,

    • 全部跟咪錶收費。
    • 特米尼 (Termini) 火車站長期泊咗幾百架的士,而城中指定嘅的士站都唔少,
    • 你仲可以喺街邊截的士添。
    • 如果想 Call 車,可以提早叫酒店幫你打定電話,或者 Download「My Taxi」之類嘅熱門 App 又得;
    • 而 Uber 等等嘅 Call 車 App 喺羅馬都好好用架!
    9

    搭當地火車遊羅馬

    羅馬嘅郊區鐵路網絡比市內鐵路網絡仲大,由通往郊區嘅幾條線路,同埋往來周邊城鎮嘅區域火車組成。如果你想去海邊或者蒂沃利 (Tivoli)、弗拉斯卡蒂 (Frascati)、岡多菲堡 (Castel Gandolfo) 等等嘅市外景點,就點都有機會搭郊區火車!

    相片由 Rob Dammers 提供 (CC BY 2.0) 經修改

    開始計劃行程

    Maps