講到威尼斯嘅浪漫活動,不外乎坐貢多拉船遊覽運河同水路,又或者挽手閒遊聖馬可廣場 (St Mark's Square)…之但係,你都可以揀返間得得意意嘅 Cafe,聽住樂手彈奏動人音樂,嘆返杯唔知點解咁貴嘅葡萄酒嘅!威尼斯有貢多拉船,有歌劇,有豪華嘅巴洛克式建築,每個廣場、每條橋、每條運河都散發住 Romantic 氣息,單係置身城中,已經夠哂浪漫啦。

    咁究竟威尼斯有咩浪漫活動?

    1

    雙人貢多拉船之旅

    仲有咩活動浪漫得過撐住架船,緩緩穿梭於瑰麗嘅巴洛克同文藝復興建築之間?你可以喺阿爾托橋 (Rialto) 或者學院橋 (Accademia) 等主要橋樑登上貢多拉船,搵個戴住平頂帽、著住間條裇衫嘅船夫,載你泛舟運河上。

    • 伴侶
    2

    搭船遊島

    登上電動船,你就可以橫越威尼斯潟湖 (Venetian Lagoon) 幾公里,去到附近純淨不染嘅島嶼架喇!喺布拉諾島 (Burano) 嘅街道漫步,一幢幢顏色柔和嘅房屋鱗次櫛比,仲有專賣 Lace 嘅店家,會接受遊客「討價還價」;而如果你想買充滿特色嘅彩色玻璃飾品,仲可以揀喺穆拉諾島 (Murano Island) 留宿添!

    • 伴侶
    3

    跟隨卡薩諾瓦嘅腳步

    卡薩諾瓦 (Casanova) 出哂名係全球最浪漫嘅情人之一,通過佢對眼欣賞威尼斯 (Venice),肯定別有一番風光!不妨去 Calle delle Do Spade 上嘅 Do Spade 酒吧飲返杯葡萄酒吖,卡薩諾瓦以前都好鍾意約情人喺附近嘅里阿爾托橋 (Rialto Bridge) 見面架~如果想參觀埋卡薩諾瓦越獄前被囚禁嘅地方,仲可以 Book 間近總督府 (Doge’s Palace) 嘅酒店落腳添。

    地圖
    • 伴侶
    4

    喺聖馬可廣場上睇日落

    喺威尼斯 (Venice) 浪漫嘅中央廣場上,可以望到聖馬可大教堂 (Basilica San Marco) 不同凡響嘅巨型圓頂,仲有美侖美奐嘅總督府 (Doge's Palace),靚到嘩嘩聲!不妨喺拱廊之間漫步,欣賞完街頭管弦樂團嘅演奏之後,去埋 Caffè Florian 嘅露台嘆杯茶吖?

    地點: Piazza San Marco, Venice, Italy

    • 伴侶
    • 拍照
    5

    聖方濟會榮耀聖母聖殿嘅威尼斯藝術

    如果你係威尼斯畫家提齊安諾維伽略 (Titian) 嘅 Fans,想一睹佢充滿激情嘅宗教傑作,就要去聖方濟會榮耀聖母聖殿 (Church of the Frari) 行番轉喇!呢座古老嘅哥德式教堂位於低調樸實嘅聖保羅 (San Polo) 地區,收藏咗文藝復興時期嘅藝術品;行去教堂途中,同 Honey 手拖住手,喺隱蔽嘅巷仔同寧靜嘅廣場上面漫步,浪漫到痺啊!

    地點: Calle del Scaleter, 3072, Venice, Italy

    電話: +39 041 272 8611

    • 伴侶
    • 歷史文化`

    相片由 london road 提供 (CC BY 2.0) 經修改

    6

    探索多爾索杜羅

    多爾索杜羅 (Dorsoduro) 毗鄰大運河,區內嘅運河同街道都比較狹窄,令成座城市化身小村莊一樣,寧靜嘅巷仔裡面好多浪漫嘅手信任你揀,例如威尼斯面具、穆拉諾 (Murano) 玻璃等等。想就腳啲嘅話,Book 返間位於多爾索杜羅區嘅酒店就啱哂喇!

    地點: 意大利威尼斯多爾索杜羅區

    • 伴侶
    7

    威尼斯橋樑上嘅大運河景色

    唔好喺酒店 Hea 到唔知時間喇!記得要喺日落時分嚟到宏偉嘅 16 世紀里阿爾托橋 (Rialto Bridge),欣賞斜陽照耀大運河 (Grand Canal) 嘅靚景,跟住穿梭拱道之間嘅商舖掃貨,搜羅手工禮物。想過返個浪漫嘅下晝?你仲可以穿過木砌嘅學院橋 (Accademia Bridge),去到對面嘅佩姬古根漢美術館 (Peggy Guggenheim),細賞當代藝術品添!

    地點: 意大利威尼斯里阿爾托橋

    • 伴侶
    • 拍照
    8

    托爾切洛島嘅慵懶午餐

    追隨作家海明威 (Ernest Hemingway) 昔日嘅足跡浪蕩一番之後,不妨搭水上巴士越過沼澤地,漂流到托爾切洛島 (Torcello) 吖?呢座小島離聖馬可廣場 (St Mark’s Square) 10 公里,係文青嘅靈感泉源;漫步島上,你會經過古老嘅拜占庭大教堂,仲可以去 Locanda Cipriani 酒店落腳,再喺設有涼棚遮蔭嘅露台上面,嘆返個意式田園午餐添!

    地點: 意大利威尼斯托爾切洛島

    • 伴侶
    • 品嚐美食
    9

    鐘樓望出去嘅景色

    聖馬可鐘樓 (St Mark’s Campanile) 高 99 米,矗立喺廣場上面,俯瞰到猶如迷宮嘅紅色屋頂,同埋一望無際嘅潟湖景色。遇啱天氣晴朗,搭 Lift 登上塔頂,就連多洛米蒂山脈 (Dolomites) 嘅壯闊風光都可以盡收眼底添!

    地點: 意大利威尼斯聖馬可廣場

    • 伴侶
    • 拍照
    10

    鳳凰歌劇院嘅表演

    鳳凰歌劇院 (Theatre La Fenice) 經過翻修,設有金色樓座,無論你係嚟睇浪漫嘅芭蕾舞表演定係歌劇,一坐低就經已神魂顛倒啦!不妨登上水上巴士,由大運河 (Grand Canal) 途經華麗宮殿,向劇院附近嘅百合聖母教堂站 (Santa Maria del Giglio) 進發,開始你嘅歌劇院 Romantic 之夜吖?

    地點: Campo San Fantin, 1965, Venice, Italy

    電話: +39 041 786654

    • 伴侶

    相片由 Benh LIEU SONG 提供 (CC BY-SA 2.0) 經修改

    Stephan Audiger | 旅遊常客

    開始計劃行程

    Maps