阿馬爾菲海岸

意大利風景名勝自駕遊

    嚟到阿馬爾菲海岸 (Amalfi Coast),有一條全長 50 公里嘅海濱公路沿住意大利索倫托半島 (Sorrentine Peninsula) 綿延,吸引一眾藝術家、名人同皇室成員紛紛慕名而來,因而添上傳奇色彩!呢條崎嶇不平嘅海岸線將會帶你探索一系列壯麗嘅沿海城鎮同中世紀村莊,而旁邊就有高聳嘅懸崖緊貼。

    沿途之上,你會遇上清勁陣風同急彎,所以更加應該不時停低,眺望周圍嘅壯觀景色,品嚐新鮮海產同地中海美食,感受地道風情。另一方面,有唔少如詩如畫嘅城鎮亦都因為獨特嘅手工藝品而廣受歡迎,例如阿馬爾菲 (Amalfi) 造紙術、維耶特里 (Vietri) 陶瓷術,同樣係文化寶藏!

    1

    波西塔諾

    風景秀麗嘅小鎮

    齋睇靚相,要揀出意大利最迷人嘅沿海城鎮,波西塔諾 (Positano) 好可能係你嘅首選!呢個城市景致絢麗,色彩斑斕嘅別墅滿佈岩崖石壁,融入底下第勒尼安海 (Tyrrhenian Sea) 嘅澄藍柔浪之中。

    夕陽西下,波西塔諾又添上幾分「人間仙境」嘅氣質,粼粼波光閃閃生輝,散發耀眼光芒,難怪成功吸引米積加 (Mick Jagger) 同基思‧理查茲 (Keith Richards) 等音樂家,喺度攜手作咗隻歌。

    2

    普拉亞諾

    普拉亞諾毗鄰波西塔諾,爭妍鬥麗

    由阿馬爾菲海岸 (Amalfi Coast) 地標出發,普拉亞諾 (Praiano) 小鎮距離名氣更大嘅海濱姊妹城市波西塔諾 (Positano) 西北僅僅半個鐘車程,不妨順道玩勻兩地!普拉亞諾坐落於恬靜嘅卵石沙灘上,周圍都會見到唔同大細嘅岩石,驚豔靘景一啲都唔輸蝕;同普拉亞諾相比,佢勝在環境安恬、人煙稀少。

    市內裝修瑰麗嘅聖雅納略 (San Gennaro) 同聖盧卡 (San Luca) 教堂係你不容錯過嘅朝聖勝地—入夜之後,教堂牆身細膩精美嘅瓷磚更顯莊嚴,同時不失格調。轉個角度,當地酒吧同夜店林立,夜生活倍添色彩,而又無損成座城鎮嘅平和格調,相映成趣!

    3

    阿馬爾菲

    意大利澄麗海岸嘅同名小鎮

    阿馬爾菲 (Amalfi) 曾經係意大利最強大嘅海上共和國,至今仍然保留住古樸風貌,坐落於陡峭懸崖之下,面積比阿馬爾菲海岸 (Amalfi Coast) 沿岸大部分城鎮更加廣闊,街道上林立餐廳同商舖,交織成熙來攘往嘅廣場。

    鎮上嘅鵝卵石街歷史可以追溯至拜占庭帝國時代,不妨先喺街度行吓,再向建於公元 13 世紀嘅聖安德烈大教堂 (Sant'Andrea Cathedral) 進發,然後去海邊欣賞宏偉鐘樓!想一探阿馬爾菲嘅歷史,最好就係嚟到前身為中世紀造船廠嘅阿馬爾菲博物館 (Museo Arsenale Amalfi),又或者參觀鎮上著名嘅紙博物館,了解舊日造紙故事。

    4

    拉維洛

    傲視海岸風光嘅山頂城鎮

    拉維洛 (Ravello) 嘅音樂節舉世聞名,而每年夏季舉行嘅瓦格納音樂節 (Wagner Festival) 正正係以德國偉大作曲家命名。每逢節慶期間,鎮上都會舉辦一場場歌劇同音樂會,向古典音樂致敬,亦為小鎮活動日程增添「星級節目」。

    除咗藝術同文化,拉維洛仲獨攬第勒尼安海 (Tyrrhenian Sea) 海拔約 360 米高嘅全海景視野,喺鎮上別墅同懸崖花園就觀賞到最佳景致。當然,要數拉維洛最出色嘅觀景台,梗係建於公元 13 世紀嘅盧佛羅別墅 (Villa Rufolo)、同埋以翠綠花園聞名嘅中世紀辛波乃別墅 (Villa Cimbrone) 啦!

    5

    米諾利

    古羅馬至今尚存嘅古樸海濱度假勝地

    米諾利 (Minori) 係阿馬爾菲海岸 (Amalfi Coast) 嘅古樸海濱城鎮,滿溢悠閒靜謐嘅氛圍,同鄰近以懸崖峭壁聞名嘅普拉亞諾 (Positano) 有些少唔同,海岸附近興建咗好多間羅馬風別墅。另外,鎮上充斥住巴洛克式教堂同地標建築,當中包括建於公元 11 世紀、依偎海邊嘅雄獅噴泉 (Fountain of the Lions)。

    米諾利係當地人嘅熱門度假勝地,地道風情濃厚,而鎮上嘅羅馬別墅仲可以俯瞰澄靜海濱添!想一嚐傳統意粉?米諾利正正係你嘅理想目的地,當地無數嘅地道餐廳保留住源於中世紀嘅原始風味,絕對俾你大飽口福。

    6

    切塔拉

    迷人嘅金槍魚漁鄉

    切塔拉 (Cetara) 雖然只係細小嘅港口城市,卻號稱為「金槍魚之鄉」,坐落於阿馬爾菲海岸 (Amalfi Coast) 嘅 Mount Falesio 山腳,以前曾經係撒拉森人 (Saracen) 嘅聚居地,隱約留低海洋民族嘅文明足跡,帶動金槍魚同鯷魚加工等漁業蓬勃發展。

    如果你享受緊阿馬爾菲海岸嘅自由行旅程,不妨留步切塔拉玩返轉,絕對係體驗當地文化遺產、品嚐地中海美食 (例如醃製鳳尾魚 (colatura di alici)) 嘅寶貴機會!另一方面,切塔拉亦都不乏觀光景點,計有位於海灘上嘅總督塔 (Viceroy Tower) 同埋多座教堂,就連公元 9 世紀落成嘅聖彼得教堂 (St. Peter the Apostle) 都喺呢度架!

    7

    維耶特里

    以陶瓷遠近馳名嘅海濱城市

    喺阿馬爾菲海岸 (Amalfi Coast) 芸芸沿岸城鎮之中,維耶特里 (Vietri sul Mare) 憑住美麗如畫嘅景致同華麗不凡嘅陶瓷,得到唔少旅客青睞。維耶特里毗鄰薩勒諾港 (Port of Salerno),係區內公路旅行嘅終點—行到呢度,沿途美景經已盡收眼底。

    維耶特里嘅大街上充斥住各式各樣嘅陶瓷工作坊,每間都展現獨樹一幟嘅特色圖案同色彩,精湛技藝世代相傳!而呢度嘅餐飲美食同樣豐富,既有供應新鮮海鮮菜餚嘅地道家庭式餐館,亦有盡攬壯麗海景嘅高級餐廳。

    Ari Gunadi | 旅遊常客

    開始計劃行程

    Maps