羅馬古城特色多多,市內到處都係舉世聞名嘅歷史遺跡,玩足一個星期都未必發掘得晒!講係咁講,如果你行程緊迫,都可以「重點遊覽」我哋推介嘅幾個羅馬名勝嘅。呢啲景點極具藝術、歷史同文化價值,備受全球旅客矚目,仲擠身旅遊達人嘅「一生必遊勝地」名單添!

    1

    羅馬鬥獸場

    探索鬥獸場嘅角鬥士地下室

    羅馬鬥獸場 (Colosseum) 始建於公元前 80 年,係當時羅馬帝國最大型嘅圓形競技場,至今仍然提醒後人昔日富麗堂皇而野性殘暴嘅社會面貌。羅馬鬥獸場距離梵蒂岡 (Vatican) 東南短短 20 分鐘路程,曾經係著名角鬥、野獸狩獵同野獸搏鬥嘅場所;

    時至今日,你可以參加導賞團,遊走於廣闊嘅場館之間,探索運送野生動物嘅隧道同通道,甚至踏足角鬥士專用嘅地下室!另一方面,鬥獸場內仲有一個小型展覽區,詳細介紹佢嘅悠久歷史,講解而家進行緊嘅修復工作。

    地圖
    • 歷史文化`
    • 拍照
    2

    聖彼得大教堂

    接受聖彼得大教堂嘅教宗祝福

    聖彼得大教堂 (St. Peter's Basilica) 係梵蒂岡市中心最知名嘅建築,被視係全球最神聖嘅基督教聖地之一,有開放俾公眾參觀,但就設有嚴格嘅衣著規定,著短褲或者露膊衫都唔夠莊重架!呢座教堂滿載文藝復興風格,位於羅馬鬥獸場 (Colosseum) 以西 4 公里,

    你可以先喺廣場上拍攝堂舍同拱頂嘅瑰麗風貌,再考慮吓行 320 級樓梯,嚟到圓頂之巔,飽覽廣場同羅馬嘅都市全景。

    地圖
    • 歷史文化`
    • 拍照
    3

    特雷維噴泉

    拋銀仔入特雷維噴泉,祈求好運

    特雷維噴泉 (Trevi Fountain) 位於市中心嘅特雷維廣場 (Piazza di Trevi) 上,係羅馬最大型嘅巴洛克式水景,以宏偉嘅波利宮 (Palazzo Poli) 作為背景,屹立咗羅馬神祇涅普頓 (Neptune) 同其他神話人物嘅雕像,你又點可以唔去睇吓呢?

    一場嚟到,不妨同特雷維噴泉嘅其他遊客一齊體驗拋銀仔嘅悠久傳統,祈求好運吖!玩到攰攰哋,廣場周圍仲有好多食肆選擇,包括餐廳、Pizza 店,而噴泉旁邊仲有商舖同小食亭,專賣咖啡、蛋糕同雪糕添。

    地圖
    • 歷史文化`
    • 拍照
    • 經濟實惠
    4

    羅馬廣場

    沿住羅馬廣場漫步,猶如置身古代

    羅馬廣場 (Roman Forum) 坐落於羅馬帕拉蒂尼山 (Palatine) 同卡皮托里尼山 (Capitoline) 之間嘅山谷,佔地廣闊,到處都有羅馬古老神廟同大教堂遺址,仲有巨形拱門、高聳圓柱、紀念碑、雕刻花園、水池同溫泉,喺度漫步夠哂悠然自得。

    講到羅馬廣場內嘅神廟遺址,又點走得甩維納斯同羅馬 (Venus and Roma) 神廟、凱撒 (Caesar) 神廟、維斯帕先同提圖斯 (Vespasian and Titus) 神廟,仲有羅慕路斯 (Romulus) 神廟呢?其中,薩圖爾諾農神廟 (Temple of Saturn) 地位最高,可惜淨係得正面門廊有保留落嚟,繼續雄據天際線。羅馬廣場面積廣達 4 公頃,踩住 Segway 電動滑板車遊歷山谷,都咪話唔過癮!

    地圖
    • 歷史文化`
    • 拍照
    • 經濟實惠
    5

    萬神殿

    喺萬神殿見識拉斐爾之墓

    萬神殿 (Pantheon) 係羅馬最迷人嘅地標之一,歷史悠久,喺羅通達廣場 (Piazza della Rotonda) 上屹立將近 2,000 年,裡面設有華麗嘅教堂仔,而意大利好多重要偉人嘅古墓都喺呢度架,其中包括拉斐爾 (Raphael) 同埋國王維托里奧·埃馬努埃萊 (King Vittorio Emanuele)。

    萬神殿內部飾有巨型大理石圓柱,祭壇就由文藝復興時期嘅雕塑點綴;穹頂天花用精緻考究嘅金藍配色馬賽克磚裝飾,地板就鋪滿色彩艷麗嘅大理石。另一方面,萬神殿噴泉 (Fontana del Pantheon) 喺正萬神殿出面,佢嘅方尖碑昂然矗立,氣勢不凡!

    地圖
    • 歷史文化`
    • 拍照
    6

    納沃納廣場

    納沃納廣場

    納沃納廣場 (Piazza Navona) 曾經係羅馬嘅主要市集廣場,而家嘅人氣同「迷人指數」都冠絕全國,遊客可以喺呢度大擦美食,盡情欣賞古典巴洛克式建築。其中,俯瞰廣場嘅聖依搦斯殉道堂 (The Church of Sant'Agnese) 特別宏偉,而周圍嘅噴泉亦不相伯仲,例如中間豎立住埃及方尖碑嘅四河噴泉 (Fountain of the Four Rivers) 就好引人注目喇!

    納沃納廣場嘅鵝卵石街道位於萬神殿 (Pantheon) 嘅西邊,好多電影同文學作品都喺呢度取材架,當中包括 Eugene Levy 執導嘅電影《Once Upon a Crime》,同埋丹·布朗 (Dan Brown) 嘅小說《天使與魔鬼 (Angels & Demons)》。

    地圖
    • 購物
    • 歷史文化`
    • 品嚐美食
    7

    鮮花廣場

    喺鮮花廣場買新鮮生果同烘焙食品

    晨早起床,不妨去行吓羅馬數一數二熱鬧嘅鮮花廣場 (Campo de' Fiori) 露天市集吖?呢個廣場位於帕里奧內區 (Parione),上面開滿一排排嘅攤檔,專賣色彩鮮豔嘅新鮮生果、蔬菜,同埋芬芳撲鼻嘅鮮花,空氣中同時瀰漫住熱辣出爐麵包嘅香氣,朝早嚟散個步,認真心曠神怡!

    鮮花廣場日頭係露天市集,日落之後搖身一變,成為羅馬多姿多彩嘅夜生活勝地,有小型夜店、休閒酒吧同餐廳營業至深夜,有啲舖頭仲配置埋俯瞰廣場嘅枱凳,可以俾你眺望廣場上面道明會修士布魯諾 (Giordano Bruno) 嘅青銅雕像添。

    地圖
    • 購物
    • 品嚐美食
    • 晚間娛樂

    相片由 Myrabella 提供 (CC BY-SA 3.0) 經修改

    8

    聖天使城堡

    經天使橋橫跨台伯河,向聖天使城堡進發

    聖天使城堡 (Castel Sant'Angelo) 係一座古老堡壘,位於梵蒂岡城 (Vatican City) 以東,仲曾經係羅馬最高嘅建築添!呢座城堡早於公元 2 世紀由哈德良皇帝 (Emperor Hadrian) 建造,作為家族陵墓,而家已經變成博物館,由納沃納廣場 (Piazza Navona) 橫過鵝卵石鋪成嘅天使橋 (Aeilian Bridge),就可以嚟到。

    城堡裡面有裝飾奢華嘅教宗室、瑰麗嘅大廳、走廊同珍寶庫;參觀哂之後,上埋屋頂 Café 飲住咖啡睇靚景,先至夠寫意!順帶一提,踏足歷史悠久嘅天使橋上,聖天使城堡嘅風姿、以至城市迷人面貌同樣盡收眼底。日落時分,景色格外繽紛。

    地圖
    • 歷史文化`
    • 拍照
    9

    梵蒂岡博物館

    喺梵蒂岡博物館欣賞拉斐爾、米開蘭基羅等元組級大師嘅作品

    如果將梵蒂岡博物館 (Vatican Museums) 各個館址合併,規模旋即冠絕全球!位於梵蒂岡城 (Vatican City) 北部邊界嘅梵蒂岡博物館 (Vatican Museums) 設有 50 幾個展廊,珍藏咗達文西 (Da Vinci)、拉斐爾 (Raphael)、貝里尼 (Bellini)、提齊安諾維伽略 (Titian) 同卡拉瓦喬 (Caravaggio) 等文藝復興時期大師嘅部分曠世傑作,

    而且每個月最後一個星期日仲可以免費入場,俾你參觀埋西斯汀教堂 (Sistine Chapel),欣賞出自米開蘭基羅手筆嘅壯麗天花壁畫。離開梵蒂岡博物館之前,不妨沿住鼎鼎大名嘅布拉曼德 (Bramante) 雙向螺旋樓梯漫步,感受吓箇中嘅震憾氣勢吖!

    地圖
    • 歷史文化`
    • 拍照

    相片由 HarshLight 提供 (CC BY 2.0) 經修改

    10

    威尼斯廣場

    喺威尼斯廣場宏偉嘅祖國祭壇拾級而上

    威尼斯廣場 (Piazza Venezia) 係靠近台伯河 (Tiber) 東側嘅公共空間,位於羅馬鬥獸場 (Colosseum) 西北 1 公里,毗鄰保祿二世 (Pietro Barbo) 建造嘅同名宮殿,因而得到呢個名稱。廣場裡面有好多片綠化空間,周圍環繞住華麗嘅圓頂宮殿同歷史遺跡;

    附近仲有用純白大理石打造嘅「祖國祭壇 (Altare della Patria)」,亦即係維克托伊曼紐爾二世國家記念碑 (Monument of Victor Emmanuell II),歌頌意大利統一後第一任國王維克托伊曼紐爾二世。嚟到祭壇,你可以參觀底層嘅意大利復興中央博物館 (Museum of Italian Reunification),亦都可以爬上長長嘅樓梯,居高臨下,睇盡廣場嘅風景。

    • 歷史文化`
    • 拍照

    開始計劃行程

    Maps