就算想隨心所欲遊羅馬,都唔一定要大出血嘅!我哋專誠整理咗一啲旅遊構思,幫精打細算嘅遊客玩盡「永恆之城」,當中唔少活動嘅消費都唔高,只要靈活變通,你話唔定仲可以免費遊覽平時要買飛入場嘅主要景點添!

    對於一眾「窮遊客」嚟講,羅馬有唔少優惠俾你揀,涵蓋市內數之不盡嘅市立博物館,為你呈獻歷史建築同埋文藝復興時期嘅驚世傑作;而你亦都可以行吓市中心嘅綠洲,試吓完全擺脫喧囂嘅感覺。以上活動費用全免,你就算預算有限,都可以展開難忘旅程啦!

    1

    羅馬嘅公眾博物館 (指定時間)

    免費欣賞羅馬嘅藝術同歷史

    喺指定時間,你可以免費參觀羅馬嘅宏偉公眾博物館同歷史遺跡!適逢羅馬建市日 (4 月 21 日),羅馬市政府會開放市內十幾間國家博物館,俾旅客遊覽,例子包括拿破崙博物館 (Napoleon Museum) 以至羅馬現代與當代藝術博物館 (Museum of Modern and Contemporary Art),應有盡有;羅馬鬥獸場 (Colosseum)、帕拉蒂尼山 (Palatine Hill) 同羅馬廣場 (Roman Forum) 等重要景點就通常會喺每個月嘅第一個星期日免費開放;而梵蒂岡博物館 (Vatican Museums) 每個月嘅最後一個星期日亦都免收入場費,好值得順道參觀架!

    • 歷史文化`
    • 經濟實惠

    相片由 HarshLight 提供 (CC BY 2.0) 經修改

    2

    萬神殿

    保存完好兼向公眾開放嘅古老地標

    萬神殿 (Pantheon) 被視為係唯一保存完好、而且至今仍然充當朝拜聖地嘅古老建築,欣賞完佢令人驚嘆嘅構造同箇中特色之後,你就會知道—神殿中間有窿嘅圓頂絕對係建築亮點!呢個窿係神殿入面嘅主要自然光源,而最正嘅 Lightshow 仲會喺每年 4 月 21 日嘅羅馬建市日上演添—當日正午時分,驕陽喺正頭頂,呈直角咁將陽光照射落去一格格大理石地板上面,蔚為奇觀。

    地點: Piazza della Rotonda, 00186 Rome, Italy

    開放時間: 星期一至六 09:00 至 19:15;星期日 09:00 至 17:45 (公共假期開放至 12:45)

    電話: +39 06 6830 0230

    • 歷史文化`
    • 拍照
    • 經濟實惠
    3

    聖彼得大教堂

    把握親眼見到教宗嘅機會

    聖彼得大教堂 (Basilica di San Pietro) 喺正梵蒂岡博物館 (Vatican Museums) 隔離,佢嘅圓頂碩大魁宏,高聳入雲嘅柱身上刻咗耶穌同 12 門徒嘅雕像。遊客要有張飛先入到去大教堂架!不過,原來呢張飛係免費嘅,難怪排隊嘅人龍打哂蛇餅啦,都係早啲嚟好啲。俾多少少附加費,你仲可以租部語音導賞機,細聽得意而實用嘅資訊,兼爬埋上去教堂嘅壯麗圓頂添!至於想見教宗一面喇喎,咁就可以試吓喺星期三嚟參觀,到時嘅票務程序都係差唔多啫。

    地點: Citta del Vaticano 1, 00120 Vatican City, Italy

    開放時間: 星期一至六 09:00 - 18:00;每個月最後一個星期日 09:00 - 14:00

    電話: +39 06 6988 4676

    • 歷史文化`
    • 拍照
    • 經濟實惠
    4

    納沃納廣場

    可能係羅馬最靚嘅廣場

    呢片繁華嘅公共空間位於羅馬市中心,話唔定係你喺市內睇到嘅最迷人嘅場景之一!呢度由朝到晚都有人嘆世界,享受優悠時光,而你不妨成為其中一員吖?同旅伴坐喺納沃納廣場 (Piazza Navona) 中心嘅瑰麗巴洛克風格四河噴泉 (Fountain of the Four Rivers) 周圍,就會有街頭藝人同魔術師喺你面前傾力演出;而聖阿涅塞教堂 (Church of Sant’Agnese) 仲可以當做係影靚相嘅神級 Backdrop 添!廣場周圍都有露台 Café,飽覽到絕色靚景,不過收費唔平咁囉…

    地點: Piazza Navona, 00186 Rome, Italy

    • 拍照
    • 經濟實惠
    5

    西班牙階梯

    羅馬充滿活力嘅公眾聚腳點

    呢條 18 世紀巴洛克風格樓梯由古典燈柱所環繞,喺聖三一教堂 (Trinità dei Monti) 向下延展,同特雷維噴泉 (Trevi Fountain) 相隔幾步之遙啫,而寬闊嘅樓梯底下面有個小型雕塑噴泉,叫做「破船噴泉 (Fontana della Barcaccia)」,都幾得意架!好多遊客都鍾意喺階梯同噴泉周圍聚腳,欣賞市內靚景,感受休閒氣氛。你可能會問:呢度點解會叫做西班牙階梯 (Spanish Steps) 嘅呢?理由好簡單,皆因呢啲階梯所通往嘅廣場,咁啱係根據隔籬嘅西班牙羅馬教廷大使館 (Spanish Embassy to the Holy See) 命名嘅囉!

    地點: Piazza di Spagna, 00187 Rome, Italy

    • 歷史文化`
    • 拍照
    • 經濟實惠
    6

    特雷維噴泉

    世界上最靚嘅噴泉,仲可以免費參觀添

    特雷維噴泉 (Trevi Fountain) 大約闊 50 米,用咗大量嘅羅馬眾神、人魚海神同馬匹雕像裝飾,設計獨特,蔚為奇觀;而佢背面就係宏偉瑰麗嘅波利宮 (Palazzo Poli) 喇。特雷維噴泉入場費全免,除非你想玩吓嗰樣傳統活動啦—將 3 個銀仔 (美金、歐元都得) 向後過肩拋入噴泉裡面,就可以為自己帶嚟好運、愛情,又或者至少多一次羅馬之旅;當然,如果掟唔中就冇計喇 (笑~)。

    地點: Piazza di Trevi, 00187 Rome, Italy

    • 拍照
    • 經濟實惠
    7

    鮑格才別墅

    羅馬最大嘅公共公園

    你搵緊綠化空間,但求暫時逃離羅馬嘅都會繁囂?不妨去鮑格才別墅 (Villa Borghese) 散吓步吖!呢度有蜿蜒嘅步行徑,穿梭翠綠公園之間,亦都有地方俾你簡簡單單咁 hea 返一兩個鐘。公園嘅中心建築係鮑格才美術館 (Borghese Gallery),裡面珍藏咗文藝復興時期嘅一啲重要藝術作品,而且每個月嘅第一個星期日仲免費開放添 (不過通常要俾 EUR2 留位費)!

    地點: Piazzale Napoleone I, 00197 Rome, Italy

    開放時間: 星期二至日 09:00 至 19:00 (星期一休息);星期四另加 19:00 至 21:00 開放時段

    • 伴侶
    • 拍照
    • 經濟實惠
    8

    漫步亞壁古道

    穿越羅馬鄉村嘅風景名勝

    呢條道路歷史悠久,曾經將羅馬連接到阿普利亞 (Apulia) 地區嘅布林迪西 (Brindisi),主要用石頭同灰漿建造,而且大部分保存完好,而家仲成為咗免費旅遊景點,周圍嘅鄉村深受行山人士同越野單車好手推崇架!由羅馬市中心向南揸大概 20 分鐘車,就會嚟到亞壁古道公園 (Parco Regionale Appia Antica),可以沿住古道睇盡優美風景、昔日遺址、地下墓穴、陵墓以至 12 世紀石塔,行程豐富。

    地點: Parco Regionale Appia Antica, Via Appia Antica, 42, 00178 Rome, Italy

    電話: +39 06 513 5316

    • 拍照
    • 經濟實惠

    相片由 Paul Hermans 提供 (CC BY-SA 3.0) 經修改

    9

    探索特拉斯提弗列

    羅馬最古樸迷人嘅街區之一

    沿住台伯河 (Tiber) 西岸呢個以鵝卵石鋪砌嘅可愛街區散步,零舍寫意!踏足風景如畫嘅巷仔,你會直達活力四射嘅廣場;入黑之後,廣場添注獨特情調,氣氛正到暈。不妨橫過西斯都石橋 (Ponte Sisto),開始探索呢區,行勻哂奧勒良城牆 (Aurelian Walls) 所環繞嘅迷你廣場、附設鐘樓嘅大教堂等等,甚至乎喺植物園消磨成個下晝,先再迎接令人心醉嘅黃昏。

    地點: Piazza Trilussa, 00153 Rome, Italy

    • 伴侶
    • 拍照
    • 經濟實惠
    10

    喺鮮花廣場掃平貨

    羅馬充滿活力嘅農貿市場

    呢個市集同納沃納廣場 (Piazza Novana) 隔幾步路啫,喺正橫跨台伯河 (Tiber) 至特拉斯提弗列 (Trastevere) 街區嘅西斯都橋 (Ponte Sisto) 前面,周圍由新古典主義建築所環繞;而已故意大利哲學家焦爾達諾·布魯諾 (Giordano Bruno) 嘅雕像就屹立喺廣場中央,俯視住鮮花廣場 (Campo de’ Fiori) 嘅眾多攤販。呢度有賣生果、鮮花同蔬菜等等嘅新鮮農產品,亦有各種小食同雜貨,大部分仲相當抵買添!

    地點: Piazza Campo de' Fiori, Rome, Italy

    開放時間: 星期一至六 07:30 至 15:00

    • 購物
    • 經濟實惠
    Ari Gunadi | 旅遊常客

    開始計劃行程

    Maps