佛羅倫斯係合家歡旅行好去處,市內滿載文藝復興時期嘅寶藏,就連小朋友都會心往神馳!其中,市立博物館收藏咗伽利略 (Galileo)、達文西 (Da Vinci) 等偉人啟發後世嘅重大發現,展品涵蓋早期望遠鏡、溫度計,以至機械發明,肯定會令你屋企嘅「未來太空探險家」同「明日工程師」嘆為觀止,眼界大開。

    你嘅小朋友好動又跳跳紮?咁不妨去寬敞秀麗嘅 15 世紀花園,慢慢探索。另一方面,佛羅倫斯市內遍佈室外游泳池,遇啱夏天遊覽,就可以嚟呢度游吓水、曬吓太陽啦!呢份指南介紹咗托斯卡尼 (Tuscan) 首府佛羅倫斯嘅最佳親子活動,應該可以幫你 Plan 定下一段好玩繽紛嘅全家歷險之旅。

    1

    喺舊宮試著梅迪奇服飾

    著上皇家服裝,變身文藝復興時期貴族

    • 家庭
    • 歷史文化`
    • 拍照

    舊宮 (Palazzo Vecchio) 建於 13 世紀,既係由城牆包圍嘅佛羅倫斯宮殿,亦都係市政廳同市立博物館所在地,可以俯瞰領主廣場 (Piazza della Signoria),而且有開辦緊湊精彩嘅互動導賞團,啱哂一家大細!

    「大人版」嘅導賞團通常都係去參觀裝飾精美嘅房室,而小朋友就會行入梅迪奇 (Medici) 家族私人房室嘅秘密通道裡面,一探究竟。講到導賞團最好玩嗰 Part,就梗係換上美輪美奐嘅梅迪奇服飾,學文藝復興知名人像畫嘅主角擺 Pose 影相啦!

    地點: Piazza della Signoria, 50122 Firenze FI, Italy

    開放時間: 每日 09:00 至 19:00

    電話: +39 055 276 8325

    地圖
    2

    伽利略博物館之寶—早期望遠鏡

    小朋友學習天文歷史嘅好地方

    • 家庭
    • 歷史文化`

    伽利略博物館 (Museo Galileo) 嘅導賞團極具教育意義,肯定令小朋友大開眼界!館內有展出伽利略 (Galileo Galilei) 嘅早期發明、至今尚存嘅望遠鏡,同埋源自 15 世紀嘅科學儀器,仲有一系列地球儀,俾你了解舊時大家眼中嘅地球係點嘅樣。

    伽利略博物館都有開辦私人導賞團;不過,如果你嘅小朋友比較細個,參觀之前就最好同佢哋分享吓呢位天文學偉人嘅背景先喇!博物館成人票價 EUR10 起,6 至 18 歲兒童 EUR6,6 歲以下兒童免費。

    地點: Piazza dei Giudici, 1, 50122 Firenze FI, Italy

    開放時間: 星期三至一 09:30 至 18:00;星期二 09:30 至 13:00

    電話: +39 055 265311

    地圖

    相片由 Sailko 提供 (CC BY 3.0) 經修改

    3

    喺共和國廣場坐古董旋轉木馬

    佛羅倫斯嘅彩繪旋轉木馬

    • 家庭
    • 歷史文化`
    • 拍照

    共和國廣場 (Piazza della Republicca) 係佛羅倫斯 (Florence) 嘅繁華公共廣場,上面有一座古老旋轉木馬,至今依然運作良好,雖然外型細細,勝在顏色鮮豔,仲有成 20 匹木馬,加埋 2 部鍍金馬車添!呢座旋轉木馬通常都冇載客,只係孤伶伶咁空轉,俾遊客圍觀細賞。

    想坐上旋轉木馬,每人每次都要成 EUR1.50 架;之但係,可以影到一家大細開心玩嘅全家福,夠哂無價啦!廣場周圍設有長凳,俾你由最佳角度定格木馬旋轉嘅風姿。

    地點: Piazza della Repubblica, 50123 Firenze FI, Italy

    地圖
    4

    探索波波里花園嘅迷宮小路

    喺文藝復興時期嘅雕塑同噴泉之間漫步,如夢似幻

    • 伴侶
    • 家庭
    • 歷史文化`
    • 拍照

    波波里花園 (Giardino di Boboli) 建於 15 世紀,係佛羅倫斯皮蒂宮 (Pitti Palace) 嘅一部分,花草茂盛,修剪整齊,遍佈文藝復興時期嘅雕塑同華麗噴泉,仲可以俾你立足園內山坡,睇盡佛羅倫斯最靚嘅城市風光添!

    波波里花園嘅樹籬錯綜複雜,小徑柏樹成蔭,喺丘陵地帶之間蜿蜒,正好打造出一個大迷宮花園,入場費大約每人 EUR10,但係每個月第一個星期日通常都係免費嘅。

    地點: 意大利佛羅倫斯皮蒂廣場

    開放時間: 每日 08:15 至 18:30

    電話: +39 055 265 1838

    地圖

    相片由 Erik Drost 提供 (CC BY 2.0) 經修改

    5

    喺 Piscine Le Pavoniere 游水

    喺陽光下嬉水嘅最好去處

    • 家庭
    • 遊歷

    Piscine Le Pavoniere 係佛羅倫斯最受歡迎嘅室外游泳池之一,屬於卡西納公園 (Parco delle Cascine 或 Cascine Park) 綠洲嘅一部分,而後者歷史悠久,極具紀念意義,都好值得一遊架!同佛羅倫斯比較大型嘅泳池 (例如 Costoli 市政游泳池) 相比,Le Pavoniere 更加啱一家大細,

    皆因池水唔太深,小朋友間中可以上水,去場內嘅遊樂場玩,而大人既可以喺遮蔭處唞涼,亦都可以享用齊全設施,相當寫意。再加埋餐廳同 Cocktail 吧,包保你玩足一日都唔會嗌悶!泳池票價由 EUR3 起。

    地點: Viale della Catena, 2, 50144 Firenze FI, Italy

    開放時間: 每日 10:00 至 18:30

    電話: +39 334 521 0999

    地圖
    6

    喺史諦伯特博物館探吓裝甲騎士

    英國藝術品收藏家嘅全球頂級軍械庫

    • 家庭
    • 歷史文化`

    史諦伯特博物館 (Stibbert Museum) 展出咗弗雷德里克·史諦伯特 (Frederick Stibbert) 所收集嘅大量盔甲。呢位英國藝術品收藏家喺意大利出世,佢嘅博物館佈置成「貨色齊全」嘅玩具店咁,行入去嗰吓,分分鐘會嚇親你!各式各樣嘅古董武器同裝甲嚟自唔同嘅文明民族,有日本武士,亦有格林威治 (Greenwich) 裝甲,包括劍、防護服、裝甲板等等;

    而 Hall of The Ride 展廳仲擺放咗真人 Size 嘅裝甲騎兵—佢哋騎住馬,對住裝飾花巧嘅內牆擺 Pose,霸氣到令人嘆為觀止。

    地點: Via Federico Stibbert, 26, 50134 Firenze FI, Italy

    開放時間: 星期一至三 10:00 至 14:00;星期五至日 10:00 至 18:00 (逢星期二休館)

    電話: +39 055 475520

    地圖

    相片由 Elborgo 提供 (CC BY 3.0) 經修改

    7

    喺 Il Papiro 製作印刷品同紙工藝品

    佛羅倫斯嘅精美手工紙

    • 家庭
    • 購物

    Il Papiro 係佛羅倫斯 (Florence) 嘅一間紙品店,專售各式各樣嘅手工文具同大理石紋紙,店內職員親切友善,會帶小朋友四圍參觀,仲會邀請你一齊參加大理石紋染工作坊添!

    你可以先揀自己鍾意嘅顏色,再試吓混色配搭,用各種工具創造出唔同圖案,再將獨一無二嘅傑作帶返屋企珍藏。Il Papiro 喺佛羅倫斯有 2 間門市,總店位於加富爾路 (Via Cavour),細啲嗰間就喺正聖母百花聖殿 (Duomo) 後面。

    地點: Piazza del Duomo, 24-red, 50122 Firenze FI, Italy

    開放時間: 每日 10:00 至 19:00

    電話: +39 055 281628

    地圖
    8

    學整 Pizza 或者 Gelato 雪糕

    自家製經典意式美食

    • 家庭
    • 品嚐美食

    喺佛羅倫斯 (Florence) 參加烹飪堂,都可以係幾好玩嘅家庭活動嚟架!課堂上面,導師會先向大家介紹傳統嘅意大利食譜,再俾學員動手實踐,將各種配料混埋一齊,整涼透心嘅 Gelato 雪糕,又或者拉壓麵團,炮製地道 Pizza。

    事不宜遲,不如焗返個 Pizza 先?成個烹飪過程由專業級大廚帶你完成,有各式各樣嘅餡料任你揀,創造出最啱口味嘅自家 Pizza。粉團入爐之後,係時候學整人人都鍾意食嘅意式甜品喇!成果出爐,梗係要同屋企人分享—呢餐由你一手包辦嘅 Lunch 或者晚飯,肯定會成為全家畢生難忘嘅回憶。

    9

    去佛羅倫斯自然歷史博物館睇恐龍

    骸骨化石、動物標本…一應俱全

    • 家庭
    • 歷史文化`

    佛羅倫斯自然歷史博物館 (Museo di Storia Naturale di Firenze) 分為 6 個主要展區,遍佈市中心各處,其中嘅「地質及古生物學展館」距離聖母百花大教堂 (Santa Maria del Fiore) 只係幾分鐘腳程,小朋友可以喺呢度「與龍同行」,睇盡館方珍藏嘅恐龍同大象骸骨化石。

    講到另一個得意之選,又點可以唔提皮蒂宮 (Pitti Palace) 隔籬嘅「La Specola 動物學展館」?館內嘅「剝製術陳列館」展出咗嚟自世界各地嘅奇異鳥類同動物標本,仲有各式各樣造工精細嘅蠟製人體解剖模型,自問心血少的話…都係唔好睇呢 Part 喇。

    地點: Via Giorgio la Pira, 4, 50121 Firenze FI, Italy

    開放時間: 星期三至五 09:30 至 16:30;星期六至日 10:00 至 16:30 (逢星期三休館)

    電話: +39 055 275 6444

    地圖
    10

    喺達文西博物館玩文藝復興時期嘅機器

    你有冇見過 15 世紀嘅機械人呀?

    • 家庭
    • 歷史文化`

    達文西博物館 (Museo Leonardo Da Vinci) 展出咗幾百件珍品,向佛羅倫斯 (Florence)「文藝復興人 (Renaissance Man)」嘅成就致敬。呢座博物館位於佛羅倫斯,以「重新發現」同「重新創造」達文西最精彩嘅機械發明為宗旨,小朋友實唔信呢啲前衛展品早喺幾個世紀前就面世,其中嘅仿人型機械人「達文西機械人 (Leonardo’s Robot)」,同埋仿動物機械人「達文西機械獅子 (Leonardo’s Mechanical Lion)」同樣令人嘖嘖稱奇!

    除咗另有標註外,館內大多數展品都係互動式嘅,可以俾細路仔親身了解箇中嘅運作原理。

    地點: Via dei Servi, 66, 50122 Firenze FI, Italy

    開放時間: 每日 10:00 至 18:00

    電話: +39 055 282966

    地圖
    Ari Gunadi | 旅遊常客

    開始計劃行程

    Maps