羅馬不乏浪漫景點,通常都會喺一眾歷史地標同迷人廣場嘅附近,由古樸嘅鵝卵石路串連,為成座城市提供 Romantic 嘅散步好去處。好似西斯都橋 (Ponte Sisto) 之類嘅古老石橋橫跨台伯河 (Tiber),除咗將羅馬兩岸連埋,撞正日落仲有機會睇到驚世靚景添!

    我哋專誠物色咗羅馬最浪漫嘅一啲景點,當中有部分係主要地標嚟架,你絕對唔可以錯過。不妨喺鮑格才別墅 (Villa Borghese) 嘅花園入面甜蜜漫步,睇場古典芭蕾,又或者喺絕世靚景襯托下食個燭光晚餐…各種專為情侶而設嘅活動應有盡有,要喺羅馬展開浪漫之旅梗係 Easy Job 啦!

    1

    一齊喺特雷維噴泉拋銀仔

    旅遊指定動作,迷信派浪漫主義者更加不容錯過

    嚟到羅馬,好多情侶都會去市內最大型嘅噴泉一遊。據講:只要將銀仔向後過肩拋入水池裡面,就有機會重遊呢座永恆之城架喇;而如果你同另一半想共偕連理,而且重視傳統文化,咁就掟埋第三個銀仔出去,祈求快啲攜手步入教堂啦!講咗咁多,都係唔想你錯過呢個用咗大量羅馬眾神、人魚海神同馬匹雕像裝飾嘅噴泉啫 (笑~)。

    地點: Piazza di Trevi, 00187 Rome, Italy

    • 拍照
    • 經濟實惠
    2

    越過西斯都橋

    羅馬橋上嘅夢幻漫步

    風景如畫嘅巷仔、可愛別緻嘅鵝卵石小路,統統都會引領你經過鮮花市場 (Campo de’ Fiori),嚟到西斯都橋 (Ponte Sisto)!呢條橋係羅馬市內橫跨台伯河 (Tiber) 嘅橋道之一,相當引人入勝,日間會為你呈獻梵蒂岡天際線嘅壯麗風光,俾你試吓認唔認到其他橋樑嘅身影,順道飽覽特拉斯提弗列 (Trastevere) 街區嘅迷人景色;嚟到黃昏,呢度更添浪漫,而石橋對面由新古典主義建築環繞嘅迷你廣場華燈初上,望落別有一番璀璨!

    地點: Piazza Trilussa, 00153 Rome, Italy

    • 伴侶
    • 歷史文化`
    • 拍照
    3

    坐馬車穿越羅馬

    穿越市中心嘅浪漫旅程

    坐馬車探索羅馬同地道宏偉地標,先最架勢!傳統馬車係昔日嘅主要交通工具,而家就會載你優悠觀光,重現當年幕幕古老場景。事實上,呢啲馬車相當別緻架,而且通常配有舒適嘅真皮座椅,尺寸啱哂情侶共乘,加埋一把寬闊嘅太陽傘,出面幾曬都有得遮陰啦!馬車經過以鵝卵石鋪成嘅羅馬街道,伴隨住「咔嗒咔嗒」嘅馬蹄聲,旋即令羅馬地標更加迷人、更加難忘。

    • 伴侶
    • 拍照
    4

    遊船穿越台伯河

    由另一角度欣賞羅馬風光

    客船沿住台伯河 (Tiber) 緩緩行駛,正正係羅馬嘅人氣觀光途徑之一!泛舟河上,你可以由唔同角度睇盡羅馬古老橋樑,當中包括西斯都橋 (Ponte Sisto) 地標,而沿途間中仲會有河鳥同你打招呼添。日落時分遊船河,欣賞聖彼得大教堂 (St. Peter's Basilica) 巨型圓頂喺黃昏都市天際線上嘅剪影,絕對係一段奇妙體驗!遊船至少每 30 分鐘喺各個碼頭開出一班,票價大概係 EUR18。

    • 伴侶
    • 拍照
    5

    參觀梵蒂岡博物館

    收藏咗文藝復興時期傑作嘅龐大畫廊

    藝文青遊世界,就梗係要沉醉喺全球數一數二嘅大型博物館裡面,加深自己對藝術嘅熱愛啦!你可以行勻哂 50 個畫廊,盡情欣賞達文西 (Da Vinci)、拉斐爾 (Raphael)、貝里尼 (Bellini) 等一眾藝術大師嘅曠世傑作,之後沿住皮奧克萊門蒂諾博物館 (Pio Clementino Museum) 內鼎鼎大名嘅布拉曼特「雙螺旋」(Bramante'double helix') 樓梯漫步,再向西斯廷教堂 (Sistine Chapel) 進發;而米開蘭基羅 (Michelangelo) 喺 16 世紀繪畫嘅天花板壁畫代表作就喺正呢度,當中嘅《創造亞當 (The Creation of Adam)》梗係不容錯過啦!

    地點: Viale Vaticano, 00165 Rome, Italy

    開放時間: 星期一至六 09:00 至 16:00 (逢星期日休館)

    電話: +39 06 6988 4676

    • 伴侶
    • 歷史文化`
    • 拍照

    相片由 HarshLight 提供 (CC BY 2.0) 經修改

    6

    喺鮑格才別墅尋找浪漫

    漫步迷人嘅園景花園

    貴為羅馬市內生機勃勃嘅綠色空間,鮑格才別墅 (Villa Borghese) 嘅花園為遊客締造咗遠離煩囂嘅寧謐淨土,俾你由都市繁忙步伐之中唞返吓。小徑蜿蜒貫穿成個公園,最啱浪漫散步,沿途仲有好多樹木遮陰嘅地方,可以停步欣賞風景。繁花之間,情侶喺窄小嘅空間依偎,話唔定係求婚嘅好時機;而你仲可以同另一半去山頂嘅品奇歐花園 (Pincio Gardens),由嗰度嘅觀景陽台俯瞰人民廣場 (Piazza del Popolo) 嘅全貌。

    地點: Piazzale Napoleone I, 00197 Rome, Italy

    • 伴侶
    • 拍照
    • 經濟實惠
    7

    喺阿芬丁山睇靚景

    羅馬最獨特景觀,盡在一個鑰匙窿之中

    貴為羅馬七大名山之一,阿芬丁山 (Aventine) 上面有專為紀念馬耳他騎士團 (Knights of Malta) 而建嘅廣場,周圍街區相當寧靜,仲有小樹林、花園同遺址遍佈其中,啱哂情侶一遊!一場嚟到,記得要搵嗰道鼎鼎大名嘅綠色大門,由鑰匙窿向外窺探,喺呢個恰到好處嘅獨特「畫框」入面,欣賞聖彼得大教堂 (St. Peter’s) 嘅雄偉圓頂喎!睇完靚景,不妨進一步探索阿芬丁山下西南面嘅泰斯塔喬 (Testaccio) 傳統社區,感受區內市集嘅熱鬧氣氛,再採購生果同鮮花等等嘅意大利新鮮農產品。

    地點: Aventine Hill, 00153 Rome, Italy

    • 伴侶
    • 拍照
    8

    喺羅馬歌劇院睇歌劇

    羅馬市中心嘅華麗歌劇院

    呢座美輪美奐嘅歌劇院建於 19 世紀,會定期上演賞心悅目嘅經典歌劇同芭蕾舞作品,亦都有舉辦現代音樂會;場內唔單止音響效果出色,內部裝修仲極盡堂皇,飾有精美嘅鍍金元素,配搭經典嘅紫紅色帷幕,奢華瑰麗。劇院中央嘅圓頂天花板懸掛咗一盞巨型吊燈,令文藝復興時期嘅壁畫蓬蓽生輝!羅馬歌劇院 (Teatro dell’Opera) 係冇意大利其他大多數歌劇院咁大,勝在氣氛親密,四層包箱嘅所有座位都可以好好咁望到舞台。

    地點: 7 Piazza Beniamino Gigli, 00184 Rome, Italy

    開放時間: 星期二至六 09:00 至 17:00;星期日 09:00 至 13:30 (表演時間各異)

    電話: +39 06 481601

    • 伴侶
    • 晚間娛樂

    相片由 Carlo Dani 提供 (CC BY-SA 4.0) 經修改

    9

    探索特拉斯提弗列

    羅馬市內嘅鵝卵石迷人街區

    羅馬有好多浪漫嘅散步熱點,而呢個位於台伯河 (Tiber) 西岸嘅鵝卵石街區零舍絢麗,對於情侶嚟講的確幾有情調架!喺鮮花廣場 (Campo de’ Fiori) 橫過西斯都橋 (Ponte Sisto),就會嚟到特拉斯提弗列 (Trastevere),區內嘅橫街窄巷穿梭於高高聳立嘅文藝復興建築之間,街道兩邊都有古樸嘅酒吧同 Café,小鎮風情扣人心弦!小路縱橫交錯,會引領你去到一個又一個廣場仔;其中,聖母廣場 (Piazza di Santa Maria) 就係例子之一,佢嘅中央噴泉仲喺正特拉斯提弗列聖母教堂 (Basilica of Our Lady in Trastevere) 前面添!

    地點: Piazza Trilussa, 00153 Rome, Italy

    • 伴侶
    • 拍照
    • 經濟實惠
    10

    享受屋頂燭光晚餐

    一邊欣賞永恆之城嘅「高」級靚景,一邊嘆美食

    嚟到羅馬,浪漫情調、美食佳餚、精緻雞尾酒肯定唔少得,仲有絕色靚景助興添!好多豪華酒店以至一流獨立餐廳都設有屋頂酒吧,其中又以 La Terrasse Cuisine & Lounge 大受歡迎,佢位於 Sofitel Villa Borghese 頂層,可以俾你睇盡梵蒂岡全景;而 Aroma Luxury Restaurant 亦都值得一去,食客一邊坐喺華麗嘅露台用餐,一邊欣賞羅馬鬥獸場嘅宏偉氣勢,都咪話唔難忘!

    • 伴侶
    • 拍照
    • 品嚐美食
    Ari Gunadi | 旅遊常客

    開始計劃行程

    Maps