威尼斯 11 大最好玩活動

威尼斯最出名嘅係乜嘢?

    威尼斯係世界上最華麗、最浪漫嘅城市之一,絕對事出有因—呢度嘅天際線由一排排宏偉嘅歷史宮殿同高聳嘅教堂塔樓組成,仲有源遠流長嘅傳統貢多拉船,喺潟湖上泛起漣漪。

    夜晚坐住貢多拉船,緩緩泛舟大運河 (Grand Canal) 上,又或者喺威尼斯橋下攬攬鍚錫,都係好多情侶、夫婦嚟到威尼斯必做嘅活動。威尼斯之所以得到「水之都 (City of Water)」嘅美譽,主要係因為市內靚景不絕,當中包括聖馬可廣場 (St. Mark's Square),仲有唔同嘅街區任你探索添!

    威尼斯最好玩嘅活動係乜嘢?

    1

    喺聖馬可廣場展開一日行程

    喺聖馬可廣場欣賞威尼斯嘅經典城市景觀

    聖馬可廣場 (Piazza San Marco) 雖然唔係全威尼斯 (Venice) 唯一一個廣場,但係佢嘅壯麗程度絕對算得上全球數一數二,而聖馬克大教堂 (St. Mark’s Basilica)、鐘樓同總督府 (Doge’s Palace) 都喺附近。聖馬可廣場周圍設有唔少露台 Café 同餐廳,你可以喺度嘆返杯 cappuccino 泡沫咖啡或者葡萄酒,細賞迷人景致。唔好對呢度嘅意大利菜期望太高喇…一來品質唔係最 Top,二來都偏貴 (兩個人就要大約 EUR50 喇)!如果你想體驗當地風土民情,去 Caffe Florian 坐吓就啱哂,皆因佢係全世界最古老嘅 Café 之一。溫馨提示:就算廣場上面嘅白鴿有幾可愛,都千祈唔好餵佢哋,如果唔係可能會被罰款架!

    地點: Piazza San Marco, Venice, Italy

    開放時間: 24 小時

    電話: +39 (0)6 0427 40436

    地圖
    • 家庭
    • 品嚐美食
    2

    攀上聖馬可鐘樓

    欣賞威尼斯嘅壯麗全景

    聖馬可大教堂 (St. Mark’s Basilica) 嘅鐘樓 (Campanile) 雄霸廣場天際線,高達 90 米,可以俾你俯瞰威尼斯 (Venice) 嘅城市景觀同潟湖風光。如果想避開遊客人潮,晨咁早就要嚟到架喇 (夏季通常更加大排長龍)!只需 EUR8,你就可以搭 Lift 直達鐘樓頂層;而塔頂每個鐘頭搭正會響起 5 下鐘聲,震耳欲聾,記得撳實對耳仔喎。溫馨提示:塔頂會比地面低幾度架,不妨著多件衫保暖。

    地點: Piazza San Marco, Venice, Italy

    開放時間: 每日 09:45 至 19:00

    電話: +39 (0)41 270 8311

    地圖
    • 家庭
    3

    必睇景點:總督府

    威尼斯哥德式建築同有如天堂嘅房室,令人驚嘆

    總督宮 (Doge’s Palace) 入面嘅房室多到好似迷宮咁,全部都以漆金面板同文藝復興時期嘅藝術品裝飾,極盡華美。由聖馬可廣場 (St. Mark's Square) 出發,你可以經海濱附近嘅入口,行入呢座威尼斯哥德式宮殿。宮內嘅地方法官寓所裝飾住由提齊安諾維伽略 (Titian) 所繪製嘅宏偉世界地圖;而大議會會議廳 (Great Chamber) 裡面仲珍藏咗全世界最大型嘅油畫—丁托列托 (Tintoretto) 所繪製嘅《Il Paradiso》添!參觀完軍械庫同監獄之後,不妨橫過鼎鼎大名嘅嘆息橋 (Ponte dei Sospiri),結束精彩旅程吖!如果參加埋歷時 1 個鐘嘅「秘密行程」英文導賞團,只需大約 EUR20 就可入去私人會議廳參觀。

    地點: Piazza San Marco, Venice, Italy

    開放時間: 每日 08:30 至 18:00 (4 月至 10 月);08:30 至 16:30 (11 月至 3 月)

    電話: +39 (0)41 271 5911

    地圖
    • 家庭
    • 歷史文化`
    4

    坐貢多拉船

    坐貢多拉船遊覽大運河

    對於大部分人嚟講,坐貢多拉船可能略厭老土,之但係大家又會成日用船夫同運河做背景,自拍、合照,大影特影架喎 (笑~)…事實上,坐貢多拉船絕對唔平,就算講完價,40 分鐘嘅旅程收費都唔會低過 EUR80 (如果一家人或者一班朋友共乘,一隻貢多拉船最多可以容納 6 個人),夜晚船費仲高達 EUR100 添!運河周圍有唔少上船地點,當中又以總督府 (Doge’s Palace) 岸邊,同里阿爾托橋 (Rialto Bridge) 附近嘅 Riva del Vin 最具人氣。上船之前,記得同船伕傾好價錢同船程時間喎!

    地點: Traghetto di Riva del Vin, Venice, Italy

    開放時間: 每日 10:00 至 19:00

    地圖
    • 伴侶
    • 家庭
    5

    喺里阿爾托橋大買特買

    大運河上獨一無二嘅購物大道

    里阿爾托橋 (Rialto Bridge) 係威尼斯 (Venice) 嘅行人天橋地標之一,橫跨大運河 (Grand Canal),橋上可以飽覽城市絕美風光,最特別嘅就係門廊兩邊林立嘅精品小店,有賣各式時尚產品同小飾物,當中仲包括威尼斯吹玻璃同珠寶添!而橋底嘅里阿爾托露天市場(Mercati di Rialto) 都相當熱鬧,不妨順道去行吓街。呢座橋人氣爆燈,成日都人頭湧湧;坐上貢多拉船或者水上的士,大橋最靚一面旋即任你睇盡,入夜之後更為璀璨。想避開遊客人潮?咁就要早啲嚟到喇!

    地點: Sestiere San Polo, Venice, Italy

    開放時間: 24 小時

    電話: +39 (0)41 250 1801

    地圖
    • 伴侶
    • 家庭
    • 歷史文化`
    6

    喺 Trattoria da Romano 試盡威尼斯美食

    全威尼斯最好味嘅傳統 Risotto 燴飯

    嚟到威尼斯 (Venice) 都唔試吓傳統美食,絕對係你嘅損失!想搵又夠地道、又好氣氛嘅地方?一於由威尼斯搭 12 號水上的士,去一轉漁夫之城布拉諾島 (Burano) 啦!布拉諾最出名嘅就係威尼斯傳統海鮮菜式,當中嘅 Risi e Bisi 豌豆燴飯更加不容錯過,又以傳統家族經營餐廳 Trattoria da Romano 出品嘅 Risi di go (鮮魚 Risotto 燴飯) 品質冠絕全威尼斯,而店內亦有供應布拉諾其他傳統特色佳餚,餐點價格由 EUR36 起。溫馨提示:記得要留意海鮮菜單上面嘅「Per etto (每一百克)」標價,皆因呢度嘅海鮮多數都會按重量計算售價架!

    地點: Via Baldassarre Galuppi, 221, Burano, Venice, Italy

    開放時間: 星期一至六 12:00 至 15:00 同 18:00 至 23:30;星期日 12:00 至 15:00 (逢星期二休息)

    電話: +39 (0)41 730030

    地圖
    • 伴侶
    • 家庭
    • 品嚐美食

    相片由 Petteri Sulonen 提供 (CC BY 2.0) 經修改

    7

    必睇景點:聖喬治馬焦雷島

    冇遮冇擋,睇盡威尼斯壯麗全景,唔使同人逼!

    想避開威尼斯 (Venice) 嘅旅客人潮?聖喬治馬焦雷島 (San Giorgio Maggiore) 係超正嘅一日遊勝地,喺聖馬可廣場 (Piazza San Marco) 搭 2 號水上的士,只需 5 分鐘就會嚟到。島上嘅天際線由附設鐘樓嘅 16 世紀同名大教堂所雄霸,俾 EUR6 就可以搭纜車上到頂層。唔少人都認為聖喬治馬焦雷鐘樓望出去嘅景色仲靚過聖馬可鐘樓 (St. Mark Campanile)!同聖馬可鐘樓相比,聖喬治馬焦雷鐘樓嘅 9 個大鐘所處位置比較低,響起嚟特別大聲—所以最好避免喺正午時分過嚟,因為到時響起嗰 12 下鐘聲…都咪話唔刺耳 (笑~)。

    地點: Isola San Giorgio Maggiore, Venice, Italy

    開放時間: 每日 09:00 至 18:45

    電話: +39 (0)41 522 7827

    地圖
    • 伴侶
    • 家庭
    • 歷史文化`
    8

    喺 Vineria all'Amarone 嘆葡萄酒同威尼斯小食 (Cicchetti)

    意大利葡萄美酒任你揀

    身處威尼斯 (Venice),鍾意飲葡萄酒嘅你想嘆醇厚芳香嘅靚酒,絕對唔使長途跋涉揸車去普羅賽克 (Prosecco) 或者維羅納 (Verona) 呢啲內陸地區,喺市中心一樣試得到。其中,Vineria all'Amarone 係里阿爾托 (Rialto) 最正嘅葡萄酒吧之一,有供應各款當地精選佳釀,特別係喺瓦爾波利切拉 (Valpolicella) 出產嘅葡萄酒,最值得一試。睇埋酒單,呢度推出咗 4 種品酒套餐,每份大約 EUR40 起,有得試勻 5 款店主精選,滋味圓滿。

    地點: Calle Sbianchesini, Venice, Italy

    開放時間: 星期四至二 10:00 至 23:00

    電話: +39 (0)41 523 1184

    地圖
    • 伴侶
    • 家庭
    • 品嚐美食
    9

    探索多爾索杜羅

    親眼見證貢多拉船嘅建造過程

    多爾索杜羅 (Dorsoduro) 係威尼斯 (Venice) 嘅六個主要街區之一,比其他地方更具都市風格,連「觀光味」都冇咁濃,仲雲集咗學院美術館 (Galleria dell’Accademia)、海關現代藝術館 (Punta della Dogana) 同佩姬古根漢美術館 (Peggy Guggenheim) 等等冠絕威尼斯嘅博物館添!多爾索杜羅位於聖馬可廣場 (San Marco's Piazza) 西面,搭 10 分鐘船橫渡大運河 (Grand Canal) 就嚟到。沿著風景秀麗嘅扎特爾長廊 (Promenade of Zattere) 漫步,你仲可以去埋聖特羅瓦索造船廠 (Squero di San Trovaso),眺望運河另一邊嘅貢多拉船係點樣建造、點樣維修添!

    地點: Sestiere di Dorsoduro, Venice, Italy

    電話: +39 (0)41 2424

    地圖
    • 伴侶
    • 家庭
    10

    喺 Riviera 望住海濱靚景食晚餐

    一邊欣賞威尼斯海濱靚景,一邊大嘆 Fine Dining,浪漫究極

    喺海濱食餐 Fine Dining,絕對會為你嘅威尼斯 (Venice) 旅程劃上完美句號!聖馬可廣場 (Piazza San Marco) 旁邊嘅海濱長廊有唔少食肆;想一邊全方位飽覽潟湖風光,一邊睇埋朱代卡島 (Giudecca) 嘅日落晚霞,Riviera 絕對係最佳選擇。安坐餐枱旁邊,你就會望到遼遠秀麗嘅長船碼頭,仲可以試勻各種威尼斯傳統同現代美食;其中嘅 7 道菜精選 Menu 有埋廚師推介菜式,售價大約係 EUR100 起,值得一試。無論你食咗啲乜,都千祈唔好錯過店家令人回味再三嘅 Cercami sù Tiramisu 喎!

    地點: Fondamenta Zattere Al Ponte Longo, Venice, Italy

    開放時間: 星期五至二 12:30 至 15:00 及 19:00 至 22:30

    電話: +39 (0)041 522 7621

    地圖
    • 伴侶
    • 家庭
    • 品嚐美食
    • 豪華住宿
    11

    喺威尼斯參觀「紅髮神父」維瓦爾第舊居,結束一日美好行程

    聖瑪利亞痛苦之母堂嘅古典管弦樂團

    欣賞完威尼斯 (Venice) 最秀麗嘅風景,又點可以錯過當地最出色嘅樂聲呢?威尼斯係意大利著名巴洛克大師級作曲家兼小提琴家維瓦爾第 (Vivaldi) 嘅出生地,不時有各式各樣嘅音樂會同管弦樂節目上演,當中唔少都會喺教堂同宮殿入面舉行,例如普里佐尼宮 (Palazzo delle Prigioni)、巴巴里哥皇宮 (Palazzo Barbarigo Minotto) 同聖維達教堂 (Chiesa di San Vidal) 等等。之不過,呢啲地方點及得上維瓦爾第曾經喺裡面生活同工作過嘅聖瑪利亞痛苦之母堂 (Chiesa Santa Maria della Pieta)?呢座教堂又有「維瓦爾第教堂 (Vivaldi’s Church)」之稱,距總督府 (Doge’s Palace) 以東 350 米,表演門票大約係 EUR23 起。

    地點: Calle della Pietà, 3701, Venice, Italy

    開放時間: 每日 20:30 開始

    電話: +39 (0)41 5222 171

    地圖
    • 伴侶
    • 家庭
    Ari Gunadi | 旅遊常客

    開始計劃行程

    Maps