米蘭係意大利最時尚嘅城市之一,亦都係意國部分主要時裝品牌嘅發源地,又以市中心嘅維托里奧·埃馬努埃萊二世廣場 (Galleria Vittorio Emanuele II) 貨色最齊全—而且,呢度咁啱仲係全世界歷史最悠久嘅購物商場,點可以唔嚟「朝聖」?事實上,米蘭又唔止得時裝嘅,

    佢嘅豐富歷史、藝術同文化都屬意大利數一數二,透過宏偉地標完美體現,當中包括富麗堂皇嘅大教堂 (Duomo),同埋一間又一間華麗無雙嘅聖殿。玩到餓餓哋?米蘭嘅美食傳統都好唔錯架!總而言之,米蘭優點多多,係咪好值得去玩番轉先?

    米蘭最好玩嘅活動係乜嘢?

    1

    由主教座堂廣場展開一日行程

    喺壯麗嘅廣場欣賞米蘭嘅喧囂

    主教座堂廣場 (Piazza del Duomo) 嘅宏偉氣勢冠絕米蘭,亦都係市內最大型哥德式大教堂嘅所在地,不妨先坐喺 Café 度盡情 hea 一陣,再去參觀壯闊魁宏嘅主教座堂 (Duomo),睇盡堂外 135 個尖頂同無數個雕像吖!攀上教堂天台,你仲可以飽覽迷人嘅城市風光添—大教堂裡面有升降機,載你上去 70 米高嘅天台,費用大約係 EUR13。歷年以嚟,眾多雕塑家為主教座堂出心出力,留低曠世裝飾;喺哥德式浮雕之間,不時出現網球拍、拳擊手套之類嘅怪誕元素,都咪話唔過癮!

    地點: 意大利米蘭主教座堂廣場

    開放時間: 每日 09:00 至 19:00

    電話: +39 02 7202 2656

    地圖
    • 歷史文化`
    • 拍照
    • 經濟實惠
    2

    喺維托里奧·埃馬努埃萊二世廣場 Shopping

    喺全球最古老購物中心嘅玻璃天花拱廊裡面漫步

    維托里奧·埃馬努埃萊二世廣場 (Galleria Vittorio Emanuele II) 足以證明米蘭係全球數一數二嘅時尚之都!呢座玻璃天花購物拱廊夢幻奇妙,連接住主教座堂 (Duomo) 同埋斯卡拉歌劇院 (Teatro alla Scala) 嘅廣場,兩邊開滿 Café 同高檔時裝店,當中包括 Gucci、Louis Vuitton 同 Prada 門市。喺廣場展開「血拚」旅程之前,不如嘆杯咖啡先—企喺吧枱隔籬飲 Cappuccino,就似足米蘭人喇!只要俾多少少附加費,你仲可以坐喺露台上面,睇盡城市風景添。

    地點: 意大利米蘭主教座堂廣場

    電話: +39 02 8846 3700

    地圖
    • 購物
    • 歷史文化`
    • 拍照
    • 豪華住宿
    3

    喺斯福爾扎古堡嘅城牆散步

    米蘭嘅 15 世紀城堡兼博物館

    斯福爾扎古堡 (Castello Sforzesco 或 Sforza Castle) 係就係叫做「城堡」,但望落其實似附設廣闊庭院嘅碉堡多啲,建築群裡面有圖書館同幾間博物館,部分場館珍藏咗米開蘭基羅 (Michelangelo) 同達文西 (da Vinci) 嘅作品,仲有古埃及嘅藝術品同手工藝品添!

    城堡距離主教座堂 (Duomo) 西北大約 800 米,免費開放俾遊客參觀;而博物館嘅入場費大約係 EUR5 (每個月第一個星期日、同埋 14 號之後嘅第一同第三個星期二免費)。

    地點: 意大利米蘭城堡廣場

    開放時間: 星期二至日 07:00 至 19:30

    電話: +39 02 8846 3700

    地圖
    • 歷史文化`
    • 拍照
    • 經濟實惠
    4

    探索布雷拉區

    去星期日市集掃平貨

    布雷拉區 (Brera) 係米蘭舊城區內最迷人嘅地帶之一,風情如畫,雲集美術學院同美術館,難怪藝術氣息咁濃厚啦!

    每個月第三個星期日,檔販會喺菲奧里奇里街 (Via Fiori Chiari) 嘅布雷拉跳蚤市場聚首一堂,賣吓藝術品同古董;而布雷拉嘅橫街窄巷兩邊開滿時尚小店,有 Café,亦都有特色專門店。日落之後,舖頭燈火通明,形成獨一無二嘅散步徑,氣氛一流。

    地點: Via Brera, Milan, Italy

    地圖
    • 購物
    • 歷史文化`
    • 拍照
    • 品嚐美食
    5

    喺 Il Marchesino 餐廳食米蘭燴飯

    嘆返碟米蘭特色燴飯

    意大利北部嘅 Risotto 固然出名,但原來米蘭「只此一家」嘅番紅花風味燴飯都係必試名物嚟架喎!米蘭每位大廚都有獨一無二嘅自家烹調手法;而要煮到啱啱好夠咬口 (al dente) 嘅「Risotto alla Milanese」米蘭燴飯,就要落適量嘅豬油同巴馬臣芝士平衡鹹味,再加一撮番紅花,帶出金黃芬芳嘅「色香味」。

    想食到米蘭最正宗嘅燴飯,不妨去斯卡拉 (Scala) 歌劇院旁邊嘅 Il Marchesino 高級餐廳,品嚐佢哋鼎鼎大名嘅「Risotto alla Milanese d'oro」米蘭黃金燴飯吖—呢道菜式係用真金箔裝飾添架!

    地點: Via Filodrammatici, Milan, Italy

    開放時間: 星期一至六 08:00 至 22:30

    電話: +39 02 7209 4338

    地圖
    • 伴侶
    • 品嚐美食

    相片由 Khryz Garcia 提供 (CC BY-SA 2.0) 經修改

    6

    必睇景點:達文西科技博物館

    近距離欣賞達文西古靈精怪嘅飛行器

    達文西國家科學科技博物館 (Leonardo da Vinci National Museum of Science and Technology) 係米蘭最具啟發性同吸引力嘅歷史遺跡之一,外型望落似文藝復興時代嘅修道院,裡面竟然擺滿各式各樣嘅互動展品,教育意義深重,

    值得睇、值得了解嘅事物層出不窮,當中包括用 3D 技術真實重現嘅達文西機械設計,亦有關於航空、粒子物理學、運動學嘅展品,仲有介紹星系嘅多媒體展覽添!講到最受小朋友歡迎嘅「明星」,又點少得一比一大細嘅二戰潛艇呢?展館全票價格由 EUR10 起。

    地點: Via San Vittore, Milan, Italy

    開放時間: 星期二至五 09:30 至 17:00;星期六至日 09:30 至 18:30

    電話: +39 02 485551

    地圖
    • 家庭
    • 歷史文化`
    • 拍照
    7

    解讀達文西《最後的晚餐》嘅奧秘

    喺思寵聖母教堂欣賞著名壁畫

    呢座文藝復興教堂位於米蘭市中心,出名在堂內修道院珍藏咗達文西 (Leonardo da Vinci) 嘅壁畫《最後的晚餐 (The Last Supper)》。教堂距離卡多納 (Cadorna) 車站 5 分鐘腳程,免費入場,但係裡面嘅飯堂就收 EUR16 起嘅入場費,仲要提前 Book 定添。

    入到飯堂,你會有 15 分鐘,分組細賞鼎鼎大名嘅《最後的晚餐》;而好多人都受到驚悚小說《達文西密碼 (The Da Vinci Code)》啟發,專誠嚟呢度,試吓解開名畫背後隱藏嘅訊息架!

    地點: Via Giuseppe Antonio Sassi, Milan, Italy

    開放時間: 每日 07:00 至 12:00 以及 16:00 至 19:30

    電話: +39 02 467 6111

    地圖
    • 歷史文化`
    • 拍照
    8

    去 Deseo 餐廳飲開胃酒

    午後飲返杯,體驗真正嘅米蘭 Style

    Aperitivo 苦艾開胃酒係意大利人珍而重之嘅經典飯前傳統—試過一次,就代表你真係嚟過米蘭喇!呢個傳統始於 18 世紀嘅都靈 (Turin),亦即係苦艾酒 (vermouth) 嘅發源地。之不過,由於米蘭市中心嘅優質酒吧實在數之不盡,所以又成為咗現代 No. 1 嘅 Aperitivo 勝地。

    其中,普林尼街 (Via Plinio) 嘅 Bar Basso 喺米蘭人氣最旺,市內經典雞尾酒 Negroni Sbagliato 就係呢間舖頭嘅出品,只需 EUR10,一杯靚酒配搭威尼斯小食 (cicchetti) 旋即為你奉上!想群埋米蘭至 In 嘅後生一族?咁就要去森皮奧內大街 (Corso Sempione) 嗰間 Deseo 行返轉,飲杯傳說中嘅 Aperol Spritz,再用大約 EUR11 嘅實惠價錢,食餐豐富無限量嘅 Buffet 喇。

    地點: 意大利米蘭 (市中心附近)

    開放時間: 各大店家嘅營業時間都唔同,而 Aperitivo 通常喺 18:00 至 21:00 供應。

    • 伴侶
    • 品嚐美食
    • 豪華住宿
    9

    喺 Terrazza Gallia 餐廳睇住靚景食飯

    坐喺天台嘆 Cocktail,欣賞米蘭獨一無二嘅天際線

    Terrazza Gallia 天台餐廳酒廊位於 Excelsior Hotel Gallia 酒店 7 樓,坐擁只此一家嘅都會風光,俯瞰住奧斯塔公爵廣場 (Piazza Duca d’Aosta),同埋貌似大教堂嘅米蘭中央車站 (Milano Centrale Railway Station),氣氛 Chill 極,一啲都唔似米蘭嘅「大路」旅遊熱點。

    不妨先嘆返杯 Aperitivo 開胃酒,試吓經典 Il Milanese,又或者店家嘅招牌「往利佛諾的尾班車 (Ultimo Treno per Livorno)」,再去裝潢優雅嘅餐廳食 Dinner,度過寫意一夜吖!

    地點: Piazza Duca d'Aosta, 9, Milan, Italy

    開放時間: 每日 11:00 至 01:00

    電話: +39 02 6785 3514

    地圖
    • 伴侶
    • 拍照
    • 品嚐美食
    • 豪華住宿
    10

    最後一站去斯卡拉歌劇院睇 Opera

    喺米蘭傳奇歌劇院體驗一流音響效果

    米蘭斯卡拉歌劇院 (Teatro alla Scala) 建於 18 世紀,演出節目包括意大利歌劇、管弦樂音樂會同古典芭蕾舞;院外牆身可能唔及米蘭其他地標咁耀眼,但係演奏廳嘅內部裝修一定會令你驚艷!其中,俯瞰舞台嘅包廂座位分佈喺 4 個樓層,全部都有大量鍍金裝飾,配搭紫紅色簾幕,富麗堂皇。溫馨提示:部分座位視野可能冇咁好,而後排座位大多數都冇靠背。正廳 (Platea) 同包廂 (Palchi) 座位就有 Best View 喇,只係票價不菲啫,每張飛最少 EUR150!

    睇 Show 之前,不如先去參觀博物館同劇院,然後喺業餘戲劇劇院 (Biglietteria Filodrammatici) 售票處買即日門票,Book 定睇夜間表演吖~

    地點: Via Filodrammatici 2, Milan, Italy

    開放時間: 表演節目約 20:00 開始 (博物館每日 09:00 至 17:30 開放)

    電話: +39 02 88791

    地圖
    • 伴侶
    • 歷史文化`
    • 晚間娛樂
    • 豪華住宿

    相片由 Jean-Christophe BENOIST 提供 (CC BY 3.0) 經修改

    Ari Gunadi | 旅遊常客

    開始計劃行程

    Maps