佛羅倫斯既有雄偉嘅教堂,亦有城牆包圍嘅宮殿,魅力非凡,年中都吸引唔少遊客架!環顧市內,雅致嘅花園散落喺一間又一間博物館附近,參觀展館、欣賞文藝復興時期傑作嘅時候,可以順便遊吓花園。阿諾河 (Arno) 貫流亞平寧山脈 (Apennines) 嘅山腳,穿過佛羅倫斯,河上有老橋 (Ponte Vecchio) 等等嘅石橋,風景如畫,亦方便遊客遊覽呢座地中海城市嘅兩邊。

    好耐好耐以前,有一位偉大嘅意大利文藝復興藝術家,創作咗數之不盡嘅大理石雕像,作品遍佈佛羅倫斯嘅公共場所同廣場上,行到邊都會見到,華麗奪目。身處佛羅倫斯,如果你唔係睇緊藝術、唔係行緊地標,咁通常都係因為入咗去活力四射嘅佛羅倫斯跳蚤市場,樂而忘返喇…以下列出佛羅倫斯 11 大景點、活動同必試體驗,希望可以幫你創造一段難忘旅程!

    佛羅倫斯最好玩嘅活動係乜嘢?

    1

    由大教堂廣場展開一日行程

    參觀佛羅倫斯嘅宏偉大教堂

    大教堂廣場 (Piazza Del Duomo) 係佛羅倫斯嘅主要公共廣場,以聖母百花聖殿 (Santa Maria del Fiore cathedral) 為中心地標,場內行人如鯽,有時尚餐廳同店舖林立喺保存完好嘅文藝復興風格建築物之間,第一眼就會帶俾你新舊融合嘅寫意感覺。大教堂嘅哥德式前廳飾有 3 個巨型青銅門,門簾仲鑲咗彩色大理石同浮雕,美輪美奐;入到教堂裡面,精美嘅馬賽克裝飾琳瑯滿目,令人嘆為觀止。教堂入場費全免。

    地點: Piazza del Duomo, Florence, Italy

    開放時間: (大教堂) 星期一至三 10:00 至 17:00;星期四 10:00 至 16:00;星期六 10:00 至 16:45;星期日 13:30 至 16:45

    電話: +39 (0)55 230 2885

    地圖
    • 伴侶
    • 家庭
    • 歷史文化`
    2

    攀上喬托鐘樓

    由塔樓頂層俯瞰佛羅倫斯市中心

    喬托鐘樓 (Giotto’s Campanile) 位於主教座堂 (Duomo) 旁邊,亦係佛羅倫斯天際線上最高聳嘅歷史建築之一,同隔籬嘅大教堂完美相襯,展現出佛羅倫斯最蔚為奇觀嘅哥德式建築典範。呢座鐘樓以亮白色為主調,中部以下嘅四面牆全部飾有數之不盡嘅雕塑,繽紛悅目。大多數遊客嚟到主教座堂,都會預鬆少少時間 (同埋帶定 EUR15 入場費),爬到 84 米高嘅塔頂,將市內全景盡收眼底。由塔底到塔頂,中間有成 400 級樓梯—不過,行到半路都仲可以留步 3 個中層,一路唞啖氣,一路睇靚景嘅!

    地點: Piazza del Duomo, Florence, Italy

    開放時間: 每日 08:15 至 18:50

    電話: +39 (0)55 230 2885

    地圖
    • 伴侶
    • 歷史文化`
    • 拍照
    3

    沿住老橋 Window Shopping

    橫跨佛羅倫斯地標阿諾河

    老橋 (Ponte Vecchio) 係佛羅倫斯最古老嘅橋樑之一,橫跨阿諾河 (Arno),連接城市兩半。企喺西邊嘅聖三一橋 (Saint Trinity Bridge) 上面,老橋如畫似詩嘅景色旋即盡收眼底;橫過老橋,沿路有唔少珠寶鐘錶小店,全日都人頭湧湧,衰在商品一般針對遊客定價,有少少「離地」。唔講唔知:老橋其實係你踏足佛羅倫斯市中心共和國廣場 (Piazza della Repubblica) 同阿諾河南岸皮蒂廣場 (Piazza dei Pitti) 嘅主要通道嚟架!

    地點: 意大利佛羅倫斯老橋

    地圖
    • 歷史文化`
    • 經濟實惠
    4

    必睇景點:參觀米開蘭基羅廣場

    欣賞對岸阿諾河嘅仙境天際線

    米開朗基羅廣場 (Piazzale Michelangelo) 係建於 19 世紀嘅山頂廣場,可以遠眺阿諾河對岸嘅佛羅倫斯全景。廣場中央,米開朗基羅全尺寸青銅雕塑複製品《大衛 (David)》面向城市昂立,而原作就喺市中心學院美術館 (Galleria dell'Accademia) 展出。由朱塞佩·波吉廣場 (Piazza Giuseppe Poggi) 一路行上波吉樓梯 (Poggi's Ramp),又或者沿住綠樹成蔭嘅米開朗基羅大道 (Viale Michelangiolo) 揸車,由市中心出發,大約 15 分鐘就會嚟到米開朗基羅廣場,可以免費入場參觀。

    地點: Viale Michelangiolo, Florence, Italy

    開放時間: 每日 09:30 至 13:00 及 15:00 至 19:00;星期日 15:00 至 19:00

    地圖
    • 伴侶
    • 家庭
    • 歷史文化`
    • 拍照
    5

    必睇景點:新聖母瑪利亞大教堂

    意大利驚世哥德式建築

    新聖母瑪利亞大教堂 (Santa Maria Novella) 建於 15 世紀,係佛羅倫斯最扣人心弦嘅哥德式教堂之一,立面設計完美展現意式哥德建築風格,牆身主要以大理石建成,綠白相間,色彩鮮艷。要參觀呢座宏偉嘅大教堂,入場費只需要 EUR7.50 起。行入中央拱門,有更多繽紛色彩映入眼簾,而你仲可以欣賞到意大利知名藝術家嘅傑作—當中最享負盛名嘅作品,肯定要數出自馬薩其奧 (Masaccio) 手筆嘅《聖三位一體 (Trinity)》。唔講唔知—有評論認為新聖母瑪利亞大教堂嘅壁畫裝飾遠勝主教座堂 (Duomo) 添架!

    地點: Piazza di Santa Maria Novella, Florence, Italy

    開放時間: 星期一至五 09:00 至 18:00

    電話: +39 055 219257

    地圖
    • 歷史文化`
    • 拍照
    6

    探索奧爾特拉諾區

    玩盡阿諾河外灘

    如果你已經玩轉佛羅倫斯中央都會,咁奧爾特拉諾區 (Oltrarno Quarter) 就係你必到嘅下一站!呢區除咗被視為佛羅倫斯最靚地帶,亦都係歷史文化搖籃,蘊藏住佛羅倫斯最瑰麗宏偉嘅古蹟,當中包括美輪美奐嘅彼提宮 (Palazzo Pitti) 同埋附近相連嘅波波里花園 (Boboli Gardens),由米開朗基羅廣場 (Piazzale Michelangelo) 出發,向西揸車大約 15 分鐘就到。你可以橫過老橋 (Ponte Vecchio) 等等幾座地標大橋,嚟到奧爾特拉諾區;而大部分路段都有綠樹遮陰,沿路散步都咪話唔寫意!

    地點: 意大利佛羅倫斯奧爾特拉諾區

    地圖
    • 經濟實惠
    7

    意式 Gelato 雪糕任君選擇

    優質 Gelato 口味眾多,梗有一款啱哂你

    嚟到佛羅倫斯,點可以唔食返杯馳名意式 Gelato 雪糕?之但係,要搵款至夾你嘅心水雪糕,都唔係咁易架,皆因每間雪糕店都有獨家口味,問你點揀!除咗雪糕之外,舖頭入面仲有得買質素無與倫比嘅 expresso 特濃咖啡。講你都唔信—市內最出色嘅 Gelato 雪糕店,大多數竟然唔係位於佛羅倫斯嘅主要舊城中心!要數我哋嘅推介之選,Cantina del Gelato 一定名列前茅,佢喺市內各地都有分店,其中一間開正喺老橋 (Ponte Vecchio) 附近;店內嘅雪糕口味多達 20 款,豐富創新,大膽鮮明,由熱帶水果到香料味都有,中杯份量售價大約 EUR3 起。

    地點: Via de’ Bardi 31, Florence, Italy

    開放時間: 每日 12:00 至 23:00

    電話: +39 055 050 16 17

    地圖
    • 家庭
    • 品嚐美食
    • 經濟實惠
    8

    去烏菲茲美術館欣賞名作

    探索藝術寶藏

    烏菲茲美術館 (Uffizi Gallery) 位於佛羅倫斯市中心嘅 16 世紀 Office Building 裡面,館內有好多一字排開嘅房間,收藏咗大量文藝復興時期嘅藝術作品,按照面世時間排序,當中仲有往日唔同時期嘅宗教文物代表作添!館藏之中,鼎鼎大名嘅經典作品琳瑯滿目,包括波提且利 (Botticelli) 嘅《維納斯的誕生 (The Birth of Venus)》、卡拉瓦喬 (Caravaggio) 嘅《美杜莎 (Medusa)》,同埋達文西 (da Vinci) 嘅《聖母領報 (Annunciation)》 等等。美術館門票大概由 EUR6.50 起,建議俾多少少錢參加導賞團,喺導遊帶領之下深入認識藏品—最重要嘅係…導賞團遊客可以直入展館,唔使同「水蛇春」咁長嘅人龍逼!

    地點: Piazzale degli Uffizi, 6, Florence, Italy

    開放時間: 星期二至日 08:15 至 18:50

    電話: +39 (0)55 294883

    地圖
    • 家庭
    • 歷史文化`
    9

    中央市場 Shopping 之旅

    去佛羅倫斯知名跳蚤市場任食任玩,交流文化

    佛羅倫斯中央市場 (Mercato Centrale) 行程豐富,係唔少人嘅必遊景點;場內美食攤檔一籮籮,新鮮地道嘅托斯卡尼 (Tuscany) 名物索價實惠,俾你盡情「吃玩買」,難怪人氣爆燈。選購任何商品之前,你都可以睇過試過,保證至啱心水;如果你夠早嚟到,仲可以睇住大師傅點樣炮製美食添!

    地點: Piazza del Mercato Centrale, Via dell'Ariento, Florence, Italy

    開放時間: 每日 10:00 至 00:00

    電話: +39 055 239 9798

    地圖
    • 伴侶
    • 家庭
    • 品嚐美食
    10

    品嚐 Trattoria dall'Oste Chianineria 嘅意大利牛扒 (Bistecca)

    佛羅倫斯頂級牛扒配托斯卡尼名酒

    玩盡人稱「托斯卡尼首都」嘅佛羅倫斯之後,不妨嚟杯經典基安蒂 (Chianti Classico)?呢啲嚟自托斯卡尼嘅紅酒嚴選桑嬌維塞 (Sangiovese) 葡萄釀製,同佛羅倫斯特色菜簡直係絕配;而丁骨牛扒 (T-bone Florentine Steak) 就係其中不容錯過嘅名菜之一,選用托斯卡尼飼養嘅契安尼娜 (Chianina) 牛上肩胛切成雪花牛扒,再用木火烤製,肉質嫩滑,入口即溶。佛羅倫斯唔少餐廳都有供應牛扒,但講到最好味之選,首推新聖母瑪利亞教堂 (Santa Maria Novella Church) 附近 Trattoria dall'Oste Chianineria 嘅出品。

    地點: Via Luigi Alamanni, 3/5r, Florence, Italy

    開放時間: 每日 11:00 至 22:30

    電話: +39 055 212048

    地圖
    • 伴侶
    • 品嚐美食
    11

    喺佛羅倫斯歌劇院睇場音樂會,為全日行程劃上句號

    身處現代化場館,欣賞古典歌舞連場

    佛羅倫斯歌劇院 (Opera di Firenze) 係佛羅倫斯郊區嘅現代化場館,亦係主辦全球歷史最悠久嘅音樂歌劇節—「佛羅倫斯五月音樂節 (Maggio Musicale Fiorentino)」嘅場地。每年「音樂節季」期間,歌劇院都會雲集意大利最優秀嘅管弦樂團、劇場導演同藝術家,傾力演出;當中劇目包括朱塞佩·威爾第 (Giuseppe Verdi) 改編莎士比亞嘅《馬克白 (Macbeth》通俗版本,每場共設四幕,門票由 EUR35 至 EUR200。由市中心新聖母瑪利亞教堂 (Santa Maria Maggiore) 搭 22 號巴士,只需 18 分鐘車程就會嚟到佛羅倫斯歌劇院,交通方便。

    地點: Piazza Vittorio Gui, 1, Florence, Italy

    開放時間: (售票處) 星期一至六 10:00 至 18:00;大多數演出由 15:00 或 20:00 開始

    電話: +39 (0)55 277 9309

    地圖
    • 伴侶
    • 晚間娛樂
    Ari Gunadi | 旅遊常客

    開始計劃行程

    Maps