佛羅倫斯 5 大最佳影相熱點

值得向朋友「曬命」嘅佛羅倫斯靚相

    嘩~ 係意大利啊!呢度係全世界最浪漫嘅旅遊勝地,如果你咁啱同另一半一齊嚟,梗係要喺佛羅倫斯嘅浪漫酒店落腳啦,唔係佢實怨你一世 (笑~)!仲有喎,記住要「相機不離身」,因為呢個令人嘆為觀止嘅城市實在有太多嘢值得影低。以下速成指南會幫你精選佛羅倫斯嘅最佳影相勝地。

    1

    米開蘭基羅廣場 (Piazzale Michelangelo)

    身處米開蘭基羅廣場 (Piazzale Michelangelo),你會飽覽到佛羅倫斯 (Florence) 同周邊地區嘅景色。沿住聖尼科洛 (San Niccolò) 行上山,途中不時回眸,去到山頂嗰陣拎部相機出嚟,旋即可以影到佛羅倫斯嘅第一張「美照」!嚟到廣場,不妨去市集行吓,試吓各式冰涼飲品同雪糕吖。直望前方,山頂上嘅菲索列 (Fiesole) 會出現喺你眼前,而正中間仲有一座小鐘樓。只要搭 7 號巴士,尾站就係菲索列,而佢嘅右邊仲有大燈高掛嘅佛羅倫斯足球場。繼續右轉,橄欖樹叢映入眼簾,阿爾諾河 (Arno river) 由上游嘅法爾特羅納峰 (Monte Falterona) 川流不息,塑造成一幅如畫風光。向市中心轉身,你仲會見到佛羅倫斯天際線,壯麗遼遠,由聖十字聖殿 (Santa Croce) 嘅鐘樓、聖母大教堂 (il Duomo)聖母鐘樓 (Il Campanile)舊宮 (Palazzo Vecchio)老橋 (Ponte Vecchio) 交織而成。夕陽西下,正正係你以佛羅倫斯為背景自拍嘅完美時機喇!

    地點: Viale Michelangelo, Florence, Italy

    • 伴侶
    • 歷史文化`
    • 拍照
    2

    聖米尼亞托

    由米開蘭基羅廣場 (Piazzale Michelangelo) 出發,聖米尼亞托 (San Miniato) 輕鬆易到—沿住通往教堂嘅小路前行,冇幾耐就會見到樓梯,可以直達高地,飽覽佛羅倫斯 (Florence) 嘅壯麗景色。聖米尼亞托位置比米開蘭基羅廣場高,自然睇到更多城際風光!而我就習慣帶埋晚餐上嚟睇日落,暫離日常生活嘅煩囂,將扣人心弦嘅景色盡收眼底。如果你 Plan 緊閒日下晝嘅行程,聖米尼亞托的確係唔錯嘅選擇,當地嘅僧侶會喺特定日子 17:00 左右聚集喺教堂嘅地下室誦經,場面輕鬆平和。

    地點: Via delle Porte Sante, 34, Florence, Italy

    • 伴侶
    • 歷史文化`
    • 拍照

    相片由 Francesco Gasparetti 提供 (CC BY 2.0) 經修改

    3

    菲索列

    菲索列 (Fiesole) 嘅觀景點數之不盡,搭 7 號巴士嚟到米諾廣場 (Piazza Mino) 站,就可以輕鬆漫步遊遍。落車之後,菲索列大教堂 (Cathedral) 嘅主建築正正對住巴士站,過咗馬路,大教堂就喺你側邊,而左邊就有陡峭起伏嘅山丘;沿著山徑慢慢行上斜路,不時拎轉頭望下,菲索列峽谷環繞嘅壯麗景色旋即一覽無遺!登頂嗰一刻,你話唔定會「氣來氣喘」,但係大自然嘅鬼斧神工絕對會令你陶醉不已!喺晴朗嘅日子,鏡頭前嘅菲索列市中心就好似一個微型城市,美不勝收;就算遇著薄霧或者陰天,你都唔會想放低相機!無論換咗乜嘢背景,菲索列都展現出有如童話嘅優美。與此同時,米諾廣場另一面亦都係不可多得嘅拍攝勝地,順住威爾第街 (Via Giuseppe Verdi) 行上蜿蜒曲折嘅道路,你會見到部分上咗年紀嘅意大利人拎住沉甸甸嘅雜貨行過。一旦嚟到觀景點,你肯定會知—因為,周圍有班居民會一邊指住眺望佛羅倫斯嘅露台,一邊同你講:「如果我都住嗰到就好啦!」你可以繼續沿路攀登,期待前面更加令人讚嘆嘅景色;而我就會駐足好幾個鐘,影低眼前嘅絕色風光。

    • 伴侶
    • 歷史文化`
    • 拍照
    4

    佛羅倫斯大教堂

    聖母百花聖殿 (Santa Maria del Fiore) (又稱聖母大教堂 (il Duomo)) 唔止係 Keep Fit 嘅好地方,仲啱哂打卡添!想真正欣賞到如畫仙景,你要爬上 463 級樓梯,登上教堂嘅穹頂。雖然又要「做運動」,又要俾少少入場費,但係最終欣賞到絕世靚景,都算值回票價啦!立足於呢座建於文藝復興時期嘅瑰寶,群山景色全方位盡現眼前;觀光過後,不妨去吓區內最就近嘅 Pizza 店,試吓巨型卡頌 (Calzone)

    地點: Piazza del Duomo, Florence, Italy

    開放時間: 一般營業時間由 10:00 至 17:00

    • 伴侶
    • 歷史文化`
    • 拍照
    5

    佛羅倫斯嘅橋樑

    老橋 (Ponte Bridge) 風貌多彩,一定可以俾你影到夢寐以求嘅靚相!你既可以面向老橋,亦都可以轉身望住佛羅倫斯嘅連綿山丘,猶如大海波浪起伏有致。踏足老橋,東、西兩邊嘅風景同樣無與倫比;與此同時,老橋自身嘅景色亦都不容錯過!

    • 伴侶
    • 歷史文化`
    • 拍照

    開始計劃行程

    Maps