羅馬絕對係購物天堂,鵝卵石街上到處都係當地攤販,出售新鮮農產品、二手貨同古董,買嚟做手信一流!咁啱得咁嘺,全羅馬最好行嘅市集都係定期架設嘅跳蚤市場;而其他市集就每逢週末以一排排攤位、又或者一組組帳篷嘅形式「開檔」。

    我哋喺度整理咗羅馬同周邊地區最正嘅跳蚤市場同街頭市集,幫你搜羅手信,同時試吓你「殺價」有幾叻!同場加映羅馬最好玩嘅每週農貿市集,場內攤檔賣嘅都係奇特產品同意大利招牌特產,氣氛熱鬧,肯定會帶俾你獨一無二嘅 Shopping 體驗。

    1

    鮮花廣場

    穿過羅馬「花田」,盡情購物

    不如就等鮮花廣場 (Piazza Campo de’ Fiori) 為你帶嚟感官刺激啦!每朝,呢度都會迫滿本地人同遊客,喺新古典主義建築物環繞嘅廣場上,有各式各樣嘅帳篷攤檔擺賣;而被處決嘅意大利哲學家喬達諾·布魯諾 (Giordano Bruno) 嘅雕像就屹立喺廣場中央。身處場內,五花八門嘅紀念品映入眼簾,當中包括 T 恤同細樽裝烈酒等;但係大多數攤檔都係賣鮮花、異國蔬菜生果、鮮肉、魚同芝士為主。同羅馬其他市集相比,呢度嘅「旅遊味」似乎有啲重,不過都算係唔錯嘅起步點,不妨按兵不動,睇吓人哋點樣討價還價,再一試身手!溫馨提示:市集只係接受歐羅現金付款。

    地點: Piazza Campo de' Fiori, Rome, Italy

    開放時間: 星期一至六 07:30 至 15:00

    • 購物
    • 拍照
    • 經濟實惠

    相片由 Myrabella 提供 (CC BY-SA 3.0) 經修改

    2

    波特賽門

    深入尋寶

    波特賽門 (Porta Portese) 跳蚤市場規模屬羅馬市內數一數二,主打古物,有賣二手衫同古董,全部都係品質優良而稀有嘅意大利原裝正貨;你亦都可能會見到嚟自中國嘅舊瓷器,又或者由中東入口嘅古老珠寶首飾,商品選擇繁多,而且價格相宜!市集另外開設咗專區,售賣意大利當地出產嘅全新貨品,例如大褸同手袋等等,都幾好行架!波特賽門跳蚤市場佔地廣闊,記住唔好流於一般貨色—只要深入探索,你一定會搵到真正「平靚正」嘅好物!呢度感覺冇咁似遊客區,不過最好都係早啲嚟到,避開人潮啦!溫馨提示:身處市集,敬請提防扒手。

    地點: Piazza di Porta Portese, Rome, Italy

    開放時間: 星期二 05:00 至 17:00,星期四 05:00 至 15:00,星期五和六 05:00 至 17:00

    • 購物
    • 拍照
    • 經濟實惠
    3

    郵票市場

    喺羅馬特色市場發掘罕貴嘅舊印刷品

    顧名思義,郵票市場 (Mercato delle Stampe) 就係集郵達人嘅天堂!呢個市集位於 Largo della Fontanella di Borghese 露天廣場,又名為「佛坦內拉伯畢塞 (Fontanella Borghese)」,唔單止係買賣郵票嘅地方,仲有好多深灰色方形嘅本地收藏家常設攤位,陳列各種舊版印刷品同書籍。喺芸芸珍藏裡面,你話唔定會發現一啲舊雜誌、漫畫,甚至係古羅馬地圖同古典樂譜;而部分素描同畫作都值得睇吓—有啱心水嘅產品,你仲可以直接同藝術家或者收藏家講價添!

    地點: Largo della Fontanella di Borghese, Rome, Italy

    開放時間: 每日 07:00 至 13:00

    地圖
    • 購物
    • 拍照
    • 經濟實惠
    4

    博爾蓋托·弗拉米尼奧

    喺星期日跳蚤市場講價買 Chanel 古董

    博爾蓋托·弗拉米尼奧 (Borghetto Flaminio) 係羅馬人流較少嘅星期日跳蚤市場之一,由 Flaminio 火車站向南行,再沿 Via Flaminia 行一陣就到。只要俾大約 EUR1.50 入場費,你就可以盡情遊覽市場各處,去唔同嘅攤位探索,殺價一番!場內攤位主打二手商品同古董紀念品,其中有啲係名牌「高仿」,又以枱面裝飾、名牌手袋同女裝特別受歡迎。就算你唔諗住買嘢,都值得過嚟行下—尤其喺星期日,市場都算係寫意有趣嘅散步好去處嚟架!至於住宿方面,不妨考慮喺弗拉米尼奧 (Flaminio) 區嘅酒店落腳。

    地點: Via Flaminia, 32, Rome, Italy

    開放時間: 星期日 10:00 至 19:00

    地圖
    • 購物
    • 經濟實惠
    5

    泰斯塔喬市場

    學羅馬人咁「吃玩買」

    泰斯塔喬市場 (Mercato di Testaccio) 而家已經改名做新泰斯塔喬市場 (Nuovo Mercato di Testaccio),距離遊客區比較遠,正好俾你學羅馬當地人咁吃、喝、Shopping!如果你住喺市中心,不妨善用附近幾個地鐵站通行,盡享便利。

    場內唔少攤檔都以新鮮農產品為特色,亦有好多攤檔專售各種惹味街頭小食,消費由 EUR3 起,夠你試盡林林總總嘅薄餅、醃肉、芝士、意粉同麵包,仲有多不勝數嘅酒吧供應靚酒,歡迎試飲,啱口味先買!行到攰攰哋?係時候喺餐枱旁邊歇腳,一邊品嚐啱啱買返嚟嘅美食,一邊望吓行人來來往往。

    地點: Via Beniamino Franklin, Rome, Italy

    開放時間: 星期一至六 07:00 至15:30

    地圖
    • 購物
    • 品嚐美食
    6

    坎帕尼亞阿米卡

    喺週末農夫市場搜羅新鮮食材

    呢個氣氛親切嘅街坊市集位於馬克西姆斯馬戲團 (Circus Maximus) 北面冇幾遠,係羅馬嘅正宗農夫市場之一,當地人叫佢做馬克西姆斯馬戲團坎帕尼亞阿米卡市場 (Mercato Campagna Amica al Circo Massimo)。坎帕尼亞阿米卡市場雲集好多個本地供應商,淨係喺週末營業,以貼地價格售賣新鮮生果、蔬菜、香草、盆栽、果醬同凍肉。就算你唔使好似當地人咁去街市買餸,都可以駐足靜觀小販努力工作,眼前景象別有一番風光!與此同時,你仲可以買份自製 Gelato 軟雪糕 (每份大約 EUR3)、新鮮果汁、又或者熟透車厘子等小食,過吓口癮。

    地點: Via di S. Teodoro, 74, Rome, Italy

    開放時間: 星期六至日 08:00 至 15:00

    地圖
    • 購物
    • 品嚐美食
    • 經濟實惠
    7

    米爾維奧橋街市

    豐富古董珍藏任你睇

    想體驗時光倒流?不妨去橫跨台伯河 (Tiber) 嘅羅馬古老大橋行吓!每月第二個星期日,米爾維奧橋市場 (Mercatino di Ponte Milvio;又名 Milvian Bridge Market) 正正喺呢道橋上架設,深受古董發燒友推崇,綠樹成蔭嘅河畔開滿成排成排嘅攤檔,主打羅馬小雕像、枱燈、古老大鐘同威尼斯鏡等各式古董,絕對可以令你嘅客廳佈置煥然一新。部分攤檔賣嘅畫作雖然唔係真跡,但都滿載古典風格,值得欣賞!

    地點: Ponte Milvio, Rome, Italy

    開放時間: 每月第二個星期日 09:00 至 19:00

    地圖
    • 購物
    • 歷史文化`
    • 拍照
    8

    埃斯奎利諾市場

    參觀羅馬市內各國移民採購新鮮農產品嘅熱點

    意大利唔少歷史悠久嘅市場都經過重建翻新,而羅馬嘅埃斯奎利諾市場 (Mercato Esquilino) 就係其中之一。呢個市集以前叫做維托里奧廣場 (Piazza Vittorio),命名自旁邊嘅城市公園,而家改咗名叫「新埃斯奎利諾市場 (Nuovo Mercato Esquilino)」,變得更加現代化,而且所有小販同攤檔都集中一處。重建之後,市場仍然散發住歷史魅力,到處都見到色彩鮮豔嘅新鮮農產品、充滿異國情調嘅生果蔬菜、香料、肉類同魚類,仲有各式各樣嘅意大利芝士,全部都以「貼地」價格出售,吸引羅馬市內嘅各國移民嚟幫襯,搜羅原籍中國以至中東小販售賣嘅家鄉食材。

    埃斯奎利諾區內嘅酒店相對平價,而 Termini 火車站就喺正呢度,交通方便!

    地點: Via Filippo Turati, 160, Rome, Italy

    開放時間: 星期一至六 05:00 至 15:00

    地圖
    • 購物
    • 歷史文化`
    • 經濟實惠
    9

    凱旋市場

    喺梵蒂岡附近搜購當地新鮮食品

    凱旋市場 (Mercato Trionfale) 位於一棟大型獨立建築內,距離梵蒂岡博物館大門以北只有幾分鐘步程,而且晨早就開檔,專賣新鮮食品,不妨喺參觀博物館之前嚟行吓,體驗「遊客 feel」冇咁重嘅市集氣氛。當地攤販主打新鮮雜貨、芝士同葡萄酒 (小販會將你買嘅份量倒入即棄酒樽裡面,方便攜帶),價格公道。如果你住嘅公寓或者酒店設有迷你廚房,而你打算自己煮返餐,呢度就係採購食材嘅好地方—新鮮即製嘅意粉每公斤都係 EUR20 起咋!

    地點: Via la Goletta, 1, Rome, Italy

    開放時間: 星期一至五 07:00 至 14:00

    地圖
    • 購物
    • 拍照
    • 經濟實惠
    10

    桑尼歐大街市場 (Mercato di Via Sannio)

    喺羅馬測試你嘅講價功力

    呢個路邊市場係練習「討價還價」嘅好地方,喺正 San Giovanni 火車站外,而同名大教堂就喺後面。場內大多數小販都係賣手信同衫褲,只要堅持搵吓,一定會買到價廉物美嘅好嘢!溫馨提示:呢度嘅小販出咗名死纏難打,都幾難搞,唔熟路嘅遊客甚至會覺得佢地好粗魯!不過,只要你對出價堅持底線,都不難用理想價錢奪得心頭好嘅。

    地點: Via Sannio, Rome, Italy

    開放時間: 星期一至六 08:00 至 14:00

    地圖
    • 購物
    • 經濟實惠
    Ari Gunadi | 旅遊常客

    開始計劃行程

    Maps