烏布 (Ubud) 必遊名勝包括古老嘅寺廟、雄偉嘅歷史皇宮,綠坡同埋梯田。烏布係一座充滿文化地標嘅峇里小鎮,位於吉安亞爾縣 (Gianyar) 郊區地帶,世界上唔少知名工匠同收藏家都嚟過呢度,尋覓工作靈感。

    烏布市嘅烏布大馬路 (Jalan Raya Ubud) 兩邊有好多博物館同畫廊;揸一陣車駛出鎮中心,你仲可以欣賞到截然不同嘅自然景觀同景點,著名地標有登格萊根瀑布 (Tegenungan Waterfall)、烏布猴子森林,同埋風光秀麗嘅德哥拉朗梯田 (Tegallalang),通通都係必遊勝地!

    1

    烏布猴子森林

    • 家庭
    • 歷史文化`
    • 拍照
    • 經濟實惠

    烏布猴子森林位於烏布 (Ubud) 市中心嘅邊陲,有 700 幾隻長尾獼猴喺入面棲息。呢個自然保護區喺峇里非常出名,位置同交通都好方便,並且實行社區為本管理方式,日常管理由巴東泰格爾村 (Padangtegal) 負責。區內森林唔單止係科研基地,仲係當地嘅精神文化聖地,林內有好多神廟,吸引唔少當地村民嚟拜神祈福。烏布猴子森林又叫做巴東泰格爾聖猴森林 (Sacred Monkey Forest of Padangtegal),官方名稱係 Mandala Wisata Wenara Wana。

    地點: Jalan Monkey Forest, Ubud, Gianyar, Bali 80571, Indonesia

    開放時間: 每日 08:30 至 17:30

    電話: +62 (0)361 971 304

    地圖
    2

    德哥拉朗梯田

    • 拍照
    • 經濟實惠
    • 遊歷

    德哥拉朗 (Tegallang) 梯田係好出名嘅觀光中途站,遊客去烏布途中,都會特登停低,喺呢片仙境打卡 Selfie。峇里保留咗歷史長達幾百年嘅傳統合作社灌溉系統 (當地稱為「蘇巴克 (subak)」),孕育出東南亞最優美嘅梯田景觀。

    德哥拉朗梯田附近,就係散發古樸優雅氣氛嘅帕庫對 (Pakudui) 村莊,你可以喺呢度搵到各式各樣嘅木製裝飾品,同埋好多神話人物嘅雕刻。德哥拉朗周圍有唔少賣手信嘅攤檔,上車繼續向烏布市中心進發之前,不妨喺度買返啲紀念品!

    地點: Jalan Raya Tegallalang, Tegallalang, Gianyar, Bali 80561, Indonesia

    地圖
    3

    象洞

    • 歷史文化`

    象洞 (Goa Gajah) 係峇里上最令人讚嘆嘅考古遺址之一,全個建築群位於貝杜魯村 (Bedulu) 以西 300 米,距離烏布 (Ubud) 市中心東南大約 5 公里,憑藉一系列歷史遺跡而聞名。

    行入象洞之後,沿住樓梯拾級而下,你就會參觀到滿佈文物嘅庭院,同埋源於 11 世紀嘅主洞穴。洞穴入口有一尊瞪大雙眼嘅卡拉神雕像,裡面就有好多岩壁雕刻,仲有打坐冥想嘅地方添!另一方面,象洞內有一座印度教寺廟同一個公共水池,水池喺 1954 年發掘出土,池邊綴以石雕同噴泉,令人大開眼界。

    地點: Bedulu Village, Jalan Raya Goa Gajah, Ubud, Bali, Indonesia

    地圖
    4

    烏布皇宮

    • 歷史文化`

    烏布皇宮 (Puri Saren Agung) 唔單止係烏布皇室嘅宮殿,更加係烏布最著名嘅地標之一。皇宮由國王 Tjokorda Putu Kandel (1800-1823) 下令修建,佢嘅繼承人細心保護宮內一景一物,成功保存咗呢座峇里式建築,同埋人見人愛嘅花園。

    而呢度亦都係島上欣賞傳統舞蹈表演嘅主要場地之一,所以峇里嘅藝術發燒友都對皇宮相當熟悉。烏布皇宮嘅表演舞台背景搭建咗華麗嘅傳統大門同守護神雕像,當地人叫呢個獨特建築設計做「安庫─安庫 (angkul-angkul)」。每晚,敲擊樂隊都會演奏印尼甘美朗 (gamelan) 音樂,觀眾都聽到如痴如醉架!

    地點: Jalan Raya Ubud No.8, Ubud, Gianyar, Bali 80571, Indonesia

    開放時間: 每日 08:00 至 19:00

    地圖
    5

    坎普安山脊步道

    • 家庭
    • 拍照
    • 經濟實惠
    • 遊歷

    厭倦咗熱鬧煩囂嘅烏布公路 (Jalan Raya Ubud),想遠離通街都係嘅時尚精品店、旅館同餐廳?不妨去坎普安山脊步道 (Campuhan Ridge Walk) 行山,做下運動丫!呢條步道全長 9 公里,起點係風景秀麗嘅根隆利巴廟 (Gunung Lebah Temple),經過沃斯河 (Sungai Wos River) 嘅茂密山谷,再轉向帕優甘 (Payogan) 山丘。平時,步道人流唔算多,你大部分時間都可以霸哂成條路 (笑),沿途只會偶然遇到其他登山友同緩跑客。坎普安山脊步道都算易行,而且費用全免,難怪吸引唔少人一嚟再嚟,徒步向中央高地嘅烏布小鎮進發。

    地點: Jalan Raya Campuhan, Sayan, Ubud, Gianyar, Bali 80571, Indonesia

    地圖

    相片由 Jnzl's Photos 提供 (CC BY 2.0) 經修改

    6

    烏布藝術市集

    • 購物
    • 拍照
    • 經濟實惠

    烏布藝術市集絕對係買手信嘅好地方,貨色包羅萬有,靚靚絲巾、薄身恤衫、雕像、風箏、手織手袋、竹籃同帽都應有盡有,仲有好多其他手工製品添!烏布藝術市集位於烏布皇宮對面,當地人叫呢個市集做 Pasar Seni Ubud,

    裡面賣嘅貨品喺島上其他地方都隨處可見,當中包括印咗「峇里」字樣嘅沙灘裝同恤衫、絣織裙 (ikat)、峇里風格油畫、木雕同織籃。烏布藝術市集嘅大部分貨品都嚟自附近村落,包括彭格賽坎 (Pengosekan)、德哥拉朗 (Tegallalang)、帕揚甘 (Payangan) 同埔里亞坦 (Peliatan)。

    地點: Jalan Raya Ubud, Ubud, Gianyar, Bali 80571, Indonesia

    開放時間: 每日 08:00 至 17:00

    地圖

    相片由 VasenkaPhotography 提供 (CC BY 2.0) 經修改

    7

    布蘭科文藝復興博物館

    • 歷史文化`
    • 拍照

    布蘭科文藝復興博物館 (Blanco Renaissance Museum) 係菲律賓藝術大師唐安東尼奧布蘭科 (Don Antonio Blanco) 嘅屋企兼工作室,起喺山頂上面,俯瞰坎普安 (Campuhan) 嘅茂密山谷;而館內收藏咗大量油畫、拼貼畫、插圖詩,仲有布蘭科嘅光刻藝術品,主題係…佢情有獨鍾嘅峇里裸女。

    布蘭科文藝復興博物館全日都有導賞團;好彩嘅話,你仲會撞到 Blanco 屋企人親自帶團講解添!呢座博物館係唔錯嘅中途站,展品極具創意,充滿啟發性,館外仲有綠油油嘅花園同 Cafe,方便你喺「烏布之旅」途中坐低 hea 下。

    地點: Jalan Raya Campuhan, Sayan, Ubud, Gianyar, Bali 80571, Indonesia

    開放時間: 每日 09:00 至 17:00

    電話: +62 (0)361 975 502

    地圖

    相片由 Taguelmoust 提供 (CC BY-SA 3.0) 經修改

    8

    妙音天女神廟

    • 歷史文化`
    • 拍照
    • 經濟實惠

    妙音天女神廟 (Pura Taman Saraswati) 除咗係一座壯麗嘅水上寺廟,仲係烏布鎮嘅重要景點,遊覽烏布果陣,記得 Mark 低呢度啊!呢間神廟採用峇里寺廟嘅傳統建築風格,擁有優美嘅門廊同蓮花池。成個池塘嘅粉紅色蓮花盛開嗰陣,真係靚到暈架,難怪呢間廟會成為打卡熱點啦!妙音天女神廟免費參觀,但就同峇里其他寺廟一樣,要求訪客入鄉隨俗,入廟之前要喺腰間綁腰帶同戴沙龍。每晚,神廟嘅圓形劇場都會舉辦傳統舞蹈表演,千祈咪錯過!遊客可以由烏布公路主幹道側邊嘅卡姜街 (Jalan Kajeng) 入去妙音天女神廟。

    地點: Jalan Kajeng, Ubud, Gianyar, Bali 80571, Indonesia

    地圖
    9

    峇里鳥園

    • 伴侶
    • 家庭
    • 拍照

    峇里鳥園係佔地 20,000 平方米嘅熱帶花園,經過精心佈置,裡面嘅鳥舍飼養咗 250 種近 1,000 隻珍奇雀鳥,大部分嚟自印尼群島、南美洲、非洲大草原同澳洲。呢座鳥園位於巴杜布蘭村 (Batubulan),距離烏布 (Ubud) 以南大約 11 公里,好啱一家大細嚟參觀。

    峇里鳥園全日都有餵雀環節,歡迎訪客參加,難怪吸引咁多愛雀人士嚟朝聖啦!公園裡面仲養咗幾種爬蟲動物,當中包括科莫多巨蜥;而園內嘅圓形劇場亦係舉辦峇里著名卡恰火舞 (kecak) 表演嘅場地。

    地點: Jalan Serma Cok Ngurah Gambir, Singapadu, Batubulan, Sukawati, Gianyar, Bali 80582, Indonesia

    開放時間: 每日 09:00 至 17:30

    電話: +62 (0)361 299 352

    地圖
    10

    登格萊根瀑布

    • 伴侶
    • 家庭
    • 拍照
    • 經濟實惠

    登格萊根瀑布 (Tegenungan Waterfall) 位於烏布 (Ubud) 同峇里首府登巴薩 (Denpasar) 中間,由烏布去瀑布嘅車程 30 分鐘,沿途風景怡人,車窗兩邊都望到鄉村裡面一大片綠油油嘅稻田,令人心曠神怡。

    瀑布入口除咗售票亭,仲有舖頭賣藝術品同手信,亦有當地人俗稱「warungs」嘅小食攤檔,售賣小食同凍飲;由入口處行大約 5 分鐘,就可以直達瀑布。登格萊根瀑布全年幾乎任何時間都水量澎湃,茂密樹葉映襯瀑布水流,美不勝收。

    地點: Jalan Ir.Sutami, Kemenuh, Sukawati, Sukawati, Gianyar, Bali 80581, Indonesia

    地圖
    11

    峇里阿貢 Show

    • 伴侶
    • 家庭
    • 晚間娛樂

    峇里阿貢 Show (Bali Agung Show) 係糅合峇里傳奇故事嘅戲劇表演,輕快舞蹈加上鮮艷舞台服裝,配合扣人心弦嘅音樂編曲同現代燈光音響效果,就打造出一場精彩絕倫嘅藝術表演喇!呢個節目喺峇里野生動物園 (Bali Safari Park) 嘅峇里劇院 (Bali Theatre) 公演,劇院為戲劇藝術表演注入現代元素,上演傳統同現代舞蹈,仲邀請到 150 位峇里表演者,演出現代木偶戲添!

    地點: Jalan By Pass Ngurah Rai, Jalan Prof. Dr. Ida Bagus Mantra No.Km.19,8, Serongga, Gianyar, Bali 80551, Indonesia

    開放時間: 星期二至日 14:30 至 15:30 (星期一休息)

    電話: +62 (0)361 950 000

    地圖
    12

    烏布峇里觀鳥徑

    • 拍照
    • 遊歷

    烏布峇里觀鳥徑 (Bali Bird Walk) 會帶遊客去烏布田野青葱嘅郊區觀鳥,生機盎然!呢條觀鳥徑由著名鳥類學家維克多·梅森 (Victor Mason) 喺 1990 年創辦,而佢出版過好多本關於峇里珍奇鳥類同蝴蝶嘅書架!只要參加一日遊導賞團,你就可以行勻哂高地最優美嘅自然步道,同時透過教育內容學到自然保育意識,非常有意義,啱哂大人細路參加。

    烏布峇里觀鳥徑仲有提供其他步行觀光團 (應客人要求舉辦),包括全程 5 公里穿梭烏布周邊地區嘅導賞團、峇里南部紅樹林觀光團、峇里中部森林湖泊觀光團等等;你亦可以去巴都考山 (Mount Batukaru) 高地觀光,行程仲包括喺加德威 (Jatiluwih) 梯田食午餐添!

    地點: Jalan Tjampuhan, Ubud, Gianyar, Bali 80571, Indonesia

    開放時間: 星期一至二、星期五至六 09:00 至 12:30 (星期三、星期四和星期日休息)

    電話: +62 (0)361 975 009

    地圖
    13

    峇里動物園

    • 家庭

    峇里動物園 (Bali Zoo) 佔地超過 80,000 平方米,係一片茂密嘅熱帶花園,位於西亞巴杜村 (Singapadu),除咗種滿各式各樣嘅熱帶植物之外,仲飼養咗好多種哺乳類動物、鳥類同爬行類動物,環境舒適,氣氛輕鬆活潑,周圍行吓,人都開心哂!另一方面,園內仲有提供一系列體驗活動,小朋友可以試吓騎馬仔、同動物一齊影吓靚相、參加戶外探險活動等等。峇里動物園絕對係一家大細由峇里南端去烏布途中嘅歇腳點,方便又順路!

    地點: Jalan Raya Singapadu, Sukawati, Gianyar, Bali 80582, Indonesia

    開放時間: 每日 09:00 至 17:00

    電話: +62 (0)361 294 357

    地圖
    14

    巴圖安村

    • 歷史文化`

    巴圖安村 (Batuan Village) 完美結合咗傳統峇里建築同自然環境,村內居民喺日常生活中堅守傳統習俗同儀式。只要親眼見證,你都會俾佢哋呢份熱情同執著感動到!巴圖安村大部分村民都係傳統工匠或者藝術家,叫呢度做「藝術村」名副其實。

    巴圖安 (batuan) 或者巴圖蘭 (baturan ) 嘅意思分別係「好似石頭咁堅硬」同埋「用餐石」,其實都係講緊一個古老巨石傳統。好耐之前,村民會將豎起嘅石頭劃成聚會同祭禮場所,而成條村裡面到處都見到呢啲立石。如果你想了解昔日峇里嘅面貌,好多峇里人都會建議你參觀巴圖安村。

    地點: Batuan, Sukawati, Gianyar, Bali, Indonesia

    地圖
    15

    峇里 Casa Luna 烹飪學校

    • 品嚐美食
    • 團體

    Casa Luna 烹飪學校係烏布嘅人氣烹飪中心,位於蜜月旅館 (Honeymoon Guesthouse),學校創辦人 Janet de Neefe 出版過一系列回憶錄同烹飪書,仲係一年一度舉行嘅「烏布作家讀者節」創始人添!呢個峇里特色烹飪班主要由 Janet 親自教授,有一位助手喺現場幫手;主題內容日日唔同,例如星期日教學生整燻鴨、星期一整鮮魚,星期五就教簡單易整嘅新手菜式。蜜月旅館住客參加任何烹飪課程,可享九折優惠。

    地點: Honeymoon Guesthouse, Jalan Bisma No.5, Ubud, Gianyar, Bali 80571, Indonesia

    電話: +62 (0)361 973 282

    地圖

    相片由 Isabel Sommerfeld 提供 (CC BY 2.0) 經修改

    16

    卡維山

    • 歷史文化`
    • 拍照

    卡維山 (Gunung Kawi) 係 11 世紀峇里吉安雅 (Gianyar) 攝政時期興建嘅印度教寺廟建築群,要行 300 級石階落到風景秀麗嘅峽谷,先可以嚟到!呢度別有洞天,岩壁上刻咗 10 座紀念碑,每座高 7 米,其中 4 座建於西側,5 座位於河邊以東,而第 10 座就喺正峽谷南面對岸。

    事實上,呢啲紀念碑係國王妃嬪同皇親國戚嘅紀念壇。卡維山聖所會舉辦宗教儀式,當地人亦定期嚟呢度向神明、古代君王同皇族家眷拜祭致敬。

    地點: Banjar Penaka, Tampaksiring, Gianyar, Bali 80552, Indonesia

    地圖

    相片由 _paVan_ 提供 (CC BY 2.0) 經修改

    17

    卡維山神廟

    • 歷史文化`
    • 拍照
    • 經濟實惠

    卡維山神廟 (Gunung Kawi Sebatu Temple) 係峇里最靚嘅寺廟之一,但亦都數一數二冷門,實在匪夷所思!呢間寺廟別名係 Pura Tirta Dawa Gunung Kawi Sebatu,青翠花園裡面開闢咗一個蓮花池,池塘養咗唔少鯉魚;而水池環繞住古老神廟,池水仲係天然溫泉水嚟架!卡維山神廟建築群坐落於德哥拉朗 (Tegallalang) 嘅西巴圖 (Sebatu) 高地村莊,距離烏布市中心東北大約 12 公里。

    地點: Sebatu, Tegallalang, Gianyar, Bali 80511, Indonesia

    地圖
    18

    魯基桑美術館

    • 歷史文化`

    魯基桑美術館 (Museum Puri Lukisan) 嘅字面意思係「繪畫宮殿」,而佢係峇里歷史最悠久嘅藝術博物館嚟架!呢間博物館成立於 1956 年,由 6 幢建築物組成,展示傳統峇里繪畫同木雕,著名展品包括 Leo Haks 收藏系列嘅戰前峇里油畫、藝術家 I Gusti Nyoman Lempad 嘅大師級作品,同埋皮影人偶繪畫系列。魯基桑美術館嘅第四幢建築物名為「創始人畫廊 (Founders Gallery)」,專門介紹博物館嘅歷史,仲會舉辧臨時展覽,展出本地藝術家作品添!

    地點: Jalan Raya Ubud, Ubud, Gianyar, Bali 80571, Indonesia

    開放時間: 每日 09:00 至 18:00

    電話: +62 (0)361 971 159

    地圖
    19

    盧丹那博物館

    • 歷史文化`

    盧丹那博物館 (Museum Rudana) 展出千挑萬選嘅傳統同當代峇里繪畫佳作,引人入勝!呢間 2 層高嘅博物館由峇里藝術收藏家 Nyoman Rudana 於 1995 年創辦,館內展出現代印尼藝術珍品,包括著名藝術家 Affandi、Gunarsa 同 Wianta 嘅心血結晶,仲有才華橫溢嘅年輕藝術家 Boyke Aditya、Nyoman Erawan 同 Made Budhiana 嘅作品。另一方面,盧丹那博物館亦保存咗已故畫家 Antonio Blanco 嘅幾件藝術品,不容錯過!

    地點: Jalan Cok Rai Pudak 44, Ubud, Peliatan, Gianyar, Bali 80571, Indonesia

    開放時間: 每日 09:00 至 17:00

    電話: +62 (0)361 975 779

    地圖
    20

    內卡美術館

    內卡美術館 (Neka Art Museum) 係藝術畫廊兼博物館,由峇里藝術發燒友 Wayan Suteja Neka 一手創辦,建於 1976 年,至 1982 年由文化教育部主持揭幕儀式。呢間博物館由 6 幢建築物組成,展出一系列繪畫同雕塑作品。參觀畫廊之後,不妨去充滿峇里風情嘅花園行一轉!內卡美術館位於凱德瓦當村 (Kedewatan) 嘅坎普安大街 (Jalan Raya Campuhan),距離烏布市中心西北大約 2.5 公里。

    地點: Jalan Raya Campuhan, Kedewatan Village, Ubud, Gianyar, Bali 80571, Indonesia

    開放時間: 星期一至六 09:00 至 17:00;星期日 12:00 至 17:00

    電話: +62 (0)361 975 074

    地圖
    21

    烏布根隆利巴廟

    • 伴侶
    • 家庭
    • 歷史文化`
    • 拍照
    • 經濟實惠

    根隆利巴廟 (Pura Gunung Lebah Temple) 係烏布 (Ubud) 市中心地標之一,位於烏布主街嘅西端,寺名喺古老峇里方言嘅字面意思係「山谷寺廟」,歷史可以追溯到 8 世紀,同巴杜爾神廟 (Batur Temple) 有密切嘅靈性關係。無他,皆因根隆利巴廟正正係供奉巴杜爾女神!成個寺廟群裡面有 3 個庭院,另加好多個休息亭,俾信眾坐下抖下,非常貼心;而甘美朗館 (gamelan pavilion) 仲會公演傳統舞蹈添!

    參觀根隆利巴廟嘅最佳時間,就係俗稱「神明奉獻 (Piodalan)」嘅寺廟成立週年紀念日。根據峇里 Pakuwon 曆法,一年有 210 日,所以「神明奉獻」慶典每 210 日舉行一次,每次都喺名為「辛塔周 (Wuku Sinta)」嘅星期三上演;而呢一日亦適逢峇里慶祝巴格威西節 (Pagerwesi Day),場面熱鬧!

    地點: Jalan Raya Ubud No.23, Sayan, Ubud, Gianyar, Bali 80571, Indonesia

    地圖
    22

    培拿它蘭薩希廟

    • 歷史文化`
    • 拍照
    • 經濟實惠

    培拿它蘭薩希廟 (Pura Penataran Sasih) 又叫做「月亮神廟」,因為寺內收藏咗古代青銅定音鼓「培京之月 (Moon of Pejeng)」。「培京之月」大約 2 米長,歷史可以追溯至公元前 300 年,係東南亞最大嘅青銅定音鼓。而培拿它蘭薩希廟係印度教寺廟,源於 1266 年,仲曾經係培京皇朝嘅國家寺廟嚟架!

    廟內嘅主庭院正中央放咗一尊象頭神 (Ganesh) 石雕坐像,入口前面有一個現代計時碼表,同埋幾尊印度教雕塑。培拿它蘭薩希廟位於烏布 (Ubud) 以東大約 6.5 公里。

    地點: Jalan Raya Tampaksiring, Pejeng, Tampaksiring, Gianyar, Bali 80571, Indonesia

    地圖

    相片由 Michael Gunther 提供 (CC BY-SA 4.0) 經修改

    23

    莎海安提加廟

    • 伴侶
    • 家庭
    • 歷史文化`
    • 拍照
    • 經濟實惠

    莎海安提加廟 (Pura Samuan Tiga) 係烏達亞那‧瓦爾瑪德瓦 (Udayana Warmadewa) 皇朝嘅皇家寺廟,被視為天神、神靈同聖人會面嘅重要場所。每年四月左右,適逢名為 Purnama Kadasa 嘅第十個滿月,呢度會舉辦峇里著名嘅印度教儀式 Siat Sampian,場面非常熱鬧。

    莎海安提加廟依水而建,旁邊就係潘得河 (Pande River) 同特珍丁河 (Tegending River),周圍種滿神聖嘅榕樹同牛奶樹。神廟裡面有 7 個庭院,由牆壁同大閘分隔開,相互之間有樓梯連接最入面嘅庭院,而呢度被視為 3 位聖靈嘅會堂,地位神聖,高人一等!

    地點: Jalan Raya Bedulu, Blahbatuh, Gianyar, Bali 80581, Indonesia

    地圖
    24

    桑格猴子森林

    桑格猴子森林 (Sangeh Monkey Forest) 係灰色長尾食蟹獼猴嘅天然庇護所,佔地 6 萬平方米,位於同名村莊嘅肥沃林地上,森林裡面嘅巨型原始肉荳蔻樹足足有 40 米高架!

    猴子森林一直被視為聖地,獼猴棲息喺樹林深處或者修建神廟 (Pura Bukit Sari) 裡面。呢座荒廢咗嘅神廟建於 17 世紀,遺址隱藏喺森林深處。桑格猴子森林位於峇里首都登巴薩 (Denpasar) 以北大約 20 公里。

    地點: Jalan Brahmana, Sangeh, Badung, Bali 80353, Indonesia

    開放時間: 每日 08:00 至 17:00

    地圖
    25

    面具及布偶塞提雅達瑪大屋

    • 家庭
    • 歷史文化`
    • 拍照
    • 經濟實惠

    面具及布偶塞提雅達瑪大屋 (Setia Darma House of Mask & Puppets) 係一間別具特色嘅博物館,旨在保護印尼最多姿多彩嘅文化遺產。所以,好多峇里中部觀光團都會將呢度放入文化教育行程之中。美術館收藏咗嚟自印尼群島、非洲、中國、拉丁美洲同歐洲大約 1,300 個面具,同埋超過 5,000 個木偶,展品分別喺 4 個傳統爪哇風格古董展館內展出。

    地點: Jalan Tegal Bingin, Mas, Ubud, Kemenuh, Gianyar, Bali 80582, Indonesia

    開放時間: 每日 08:00 至 16:00

    電話: +62 (0)361 898 7493

    26

    塔曼努沙文化公園

    • 伴侶
    • 家庭
    • 歷史文化`
    • 拍照

    塔曼努沙文化公園 (Taman Nusa Cultural Park) 係吉安雅 (Gianyar) 嘅露天博物館,佔地 10 萬平方米,擁有超過 60 間重新打造嘅正宗傳統房屋,館內矗立咗前領導人嘅雕像,仲有婆羅浮屠寺 (Borobudur Temple) 等印尼地標建築物嘅複製品。

    喺博物館走一轉,了解下印尼眾多少數族裔嘅生活方式同文化,包你大開眼界!塔曼努沙文化公園位於吉安雅嘅斯丹 (Sidan) 村,距離烏布 (Ubud) 市中心以東大約 45 分鐘車程。

    地點: Jalan Taman Bali, Banjar Blahpane Kelod, Sidan, Gianyar, Bali 80582, Indonesia

    開放時間: 每日 09:00 至 17:00

    電話: +62 (0)361 952 952

    地圖
    27

    聖泉廟

    • 歷史文化`
    • 拍照

    聖泉廟 (Pura Tirta Empul) 係峇里舉足輕重嘅寺廟群,出名在擁有聖水湧流嘅山泉。寺廟外圍嘅淨化浴池、水池同魚塘全靠呢個山泉供水,水流最終會匯入圖卡德‧帕克努薩河 (Tukad Pakerisan River)。寺內中央庭院設有一個淨化浴池,池內有 13 個精雕細琢嘅噴水口。好多遊客都會想試下淨化沐浴儀式;不過,呢啲儀式唔單止有好多繁文縟節,而且只限朝聖者同信眾參加架咋!

    同峇里所有寺廟一樣,訪客入廟要著裝整齊,先可以入廟參觀,以示尊重。溫馨提示:女士 M 到嗰幾日,係唔准入任何寺廟或聖地架!姊妹們又唔使灰,你哋都可以照樣參觀寺外嘅景點。

    地點: Jalan Tirta, Manukaya, Tampaksiring, Gianyar, Bali 80552, Indonesia

    開放時間: 每日 09:00 至 17:00

    地圖
    28

    耶普魯浮雕

    • 伴侶
    • 家庭
    • 歷史文化`
    • 拍照
    • 經濟實惠

    建於 14 世紀嘅耶普魯浮雕 (Yeh Pulu) 歷史遺址位於帕特諾河 (Petanu River) 同帕克努薩河 (Pakerisan River) 之間,全個古老建築群嘅岩石雕刻都描繪住「wayang」 (皮影人偶) 故事角色同平民百姓,重現峇里早期鄉村生活嘅面貌。耶普魯浮雕以北大約 200 米有一個神聖浴池,雕刻咗唔少自然主義浮雕,其中最矚目嘅就係象頭神 (Ganesh) 浮雕,而騎兵、苦行僧同一尊女性坐像浮雕亦都同樣吸睛。

    地點: Jalan Yeh Pulu Blahbatuh, Bedulu, Gianyar, Bali 80581, Indonesia

    地圖
    29

    阿爾瑪美術館

    • 歷史文化`
    • 拍照
    • 經濟實惠

    烏布阿爾瑪美術館 (Agung Rai Museum of Art) 集畫廊、文化中心同住宿於一身,由峇里企業家兼藝術收藏家 Anak Agung Gde Rai 創立,兩座主要大樓裡面有展覽廳、書店同圖書館,舉辦各類話劇表演、藝術班同文化工作坊;

    常設展覽就有展出峇里、印尼同外國藝術家嘅繪畫珍品,最具代表性嘅珍藏包括歷史追溯到 1930 至 1940 年代巴圖安 (Batuan) 藝術家嘅大師級作品、19 世紀爪哇藝術家 Raden Saleh 同 Syarif Bustaman 嘅大作,以及卡瑪桑派 (Kamasan) 嘅一系列樹皮畫。

    地點: Jalan Raya Pengosekan Ubud, Ubud, Gianyar, Bali 80571, Indonesia

    開放時間: 每日 09:00 至 18:00

    電話: +62(0)361 976 659

    地圖
    30

    雕塑宮博物館

    • 歷史文化`

    雕塑宮博物館 (Gedong Arca) 展出超過 3,000 件考古出土文物,當中包括工藝品、石器工具,仲有舊石器時代同前印度教青銅時代嘅刀峰,最矚目嘅展品非「培京之月 (Moon of Pejeng)」莫屬。呢個青銅定音鼓係全球體積最大嘅青銅時代文物之一,據聞早喺公元前 300 年左右製造,歷史悠久!雕塑宮博物館位於烏布市中心以東大約 6 公里,免費入場。

    地點: Jalan Raya Tampaksiring, Bedulu, Blahbatuh, Gianyar, Bali 80581, Indonesia

    開放時間: 星期一至五 07:30 至 16:00 (週末休息)

    電話: +62 (0)361 942 354

    地圖
    31

    巴亞德峇里生態探險

    • 遊歷

    峇里生態探險 (Bali Eco Adventure) 係一個村莊生態旅遊計劃,由德哥拉朗村 (Tegallalang) 嘅巴亞德 (Bayad) 社區倡導創立,場地距離烏布主要樞紐以北大約 13 公里。登山團沿途可以欣賞稻田美景,同埋峇里中部嘅山谷景觀,難怪大受自然發燒友同遊客歡迎啦!你仲可以跟住導遊穿越茂密森林同本地種植園,行入山腳下面建於 11 世紀嘅迷宮山洞。鍾意觀光探險嘅話,就唔好錯過喇!

    地點: Jalan Sentanu No. 9.Bayad, Tegallalang, Gianyar, Bali 80561, Indonesia

    電話: +62 (0)851 0087 3603

    地圖
    32

    Jambangan 峇里料理教室

    • 伴侶
    • 家庭
    • 品嚐美食

    Jambangan 峇里料理教室係當地嘅烹飪中心,位於風景旖旎嘅德哥拉朗 (Tegallalang) 高地村莊。上堂之前,第一件事梗係去街市買餸啦!導師會帶你認識同選購熱帶草藥、香料,仲有傳統峇里料理所用嘅異國食材添!Jambangan 峇里料理教室嘅賣點係小班授課,學生可以落手落腳學整菜式,有更多機會同老師互動。落堂之後,每人都會有一本食譜同證書留念。又食又拎,認真抵玩!

    地點: Jalan Kelabang Moding, Ubud, Tegallalang, Gianyar, Bali 80571, Indonesia

    電話: +62 (0)813 3834 4388

    地圖
    33

    烏布 Lempad House

    • 歷史文化`
    • 拍照

    Lempad House (Lempad of Bali House) 係烏布嘅歷史遺跡,古色古香,本來係屬於已故峇里藝術家兼建築師 I Gusti Nyoman Lempad 嘅峇里民房。呢位建築師好出名,烏布好多皇宮同寺廟都係佢設計㗎。Lempad 仲係畫家添!當地民間傳說啟發咗佢創出別樹一格嘅線條畫,而佢嘅作品至今仍然對峇里藝術發展有深遠影響。Lempad House 免費入場。

    地點: Jalan Dewisita, Ubud, Gianyar, Bali 80571, Indonesia

    電話: +62 (0)361 973 302

    地圖
    34

    峇里洛邦烹飪體驗

    • 家庭
    • 團體

    峇里洛邦烹飪體驗 (Lobong Culinary Experience) 場地位於凱德瓦當 (Kedewatan) 高地村莊,有開辦峇里料理烹飪課程同文化之旅,俾學員親手整峇里傳統菜式,同時深入了解當地飲食文化。上堂地點喺一間保存完好嘅峇里傳統民宅,而導師就係和藹可親嘅屋主本人喇!

    另外,洛邦烹飪體驗亦都有舉辦遠足團,帶你遊覽村莊周圍嘅稻田,登門拜訪當地祭師嘅屋企,學習峇里占星術。洛邦烹飪體驗場地距離烏布市中心西北 15 分鐘車程以內,交通方便。

    地點: Jalan Raya Kedewatan, Kedewatan, Ubud, Gianyar, Bali 80571, Indonesia

    電話: +62 (0)812 365 1778

    地圖
    35

    峇里梅森叢林越野車

    • 遊歷

    想玩刺激活動?不妨租用梅森叢林越野車 (Mason Jungle Buggies),坐住重型全地形車,喺德哥拉朗 (Tegallang) 嘅茂密高地沿住叢林路線驅車飛馳,享受極速快感!你可以任揀單座或者雙座越野車,而全部車款都配備 570cc 引擎,兼具四驅車性能。越野路線全長大約 4.5 公里,起點同終點都係附近嘅 Koko Bambu 餐廳。溫馨提示:司機必須持有有效駕駛執照,而乘客必須年滿 12 歲。

    地點: Jalan Raya Taro Tegallalang, Taro, Tegallalang, Gianyar, Bali 80561, Indonesia

    開放時間: 每日 09:00 至 17:00

    電話: +62 (0)361 721 480

    地圖
    36

    Paon 峇里料理教室

    • 家庭
    • 團體

    Paon 峇里料理教室課程輕鬆有趣,啱哂美食達人嚟偷師兼玩下,有興趣學整傳統峇里料理嘅人更加唔好錯過喇!課程導師係一對本地夫婦 Wayan 同 Puspa,上堂地點喺佢哋位於峇里高地村莊拉普拉潘 (Laplapan) 嘅愛巢。上堂之前,學員先要去烏布 (Ubud) 街市買餸,搵齊本地香草、肉類同蔬菜,然後就可以跟住導遊去參觀拉普拉潘稻田。返到 Paon 峇里料理教室,係時候正式開始學習點整正宗峇里菜式,包括由串燒肉混合椰子碎同香料炮製嘅沙嗲烤串 (sate lembat),同埋唔少得嘅峇里風味湯品!

    地點: Jalan Raya Laplapan, Petulu, Ubud, Petulu, Bali, 80552, Indonesia

    開放時間: 每日 07:00 至 22:00

    電話: +62 (0)813 3793 9095

    地圖
    37

    坦帕克西林總統府

    • 歷史文化`
    • 拍照

    坦帕克西林總統府 (Tampaksiring Presidential Palace) 建於山頂之上,佔地 700 米,俯瞰山下嘅坦帕克西林村 (Tampaksiring)。1957 年,總統蘇卡諾 (Ir. Soekarno) 倡議興建印尼獨立後嘅第一座總統府,而呢座總統府至今依然辦公運作,成個建築群由 5 幢主要建築組成,其中 2 幢由於地勢所限而俾山溝隔開,所以當局搭建咗長 40 公里嘅橋樑連接大樓,同埋叫做「pendopo」嘅會議室。有興趣參觀坦帕克西林總統府?訪客必須提交正式申請,先可以入去裡面架!當然,你亦都可以喺正門外面,欣賞下大樓外觀。

    地點: Jalan Dr. Ir.Soekarno, Manukaya, Tampaksiring, Gianyar, Bali 80552, Indonesia

    開放時間: 星期一至五 07:30 至 16:00 (週末休息)

    電話: +62 (0)361 901 400

    地圖
    Ari Gunadi | 旅遊常客

    開始計劃行程

    Maps