要數峇里發展得最好、最高檔嘅海灘,當然唔少得水明漾 (Seminyak),當地嘅頂尖景點同輕鬆氣氛都令人為之著迷!雖然水明漾冇烏布 (Ubud) 咁多名勝同活動,但都有啲好去處係適合一家大細嘅;一場嚟到,梗係唔好錯過密室逃脫遊戲啦。

    昔日,水明漾樸實不華;而家呢度已經搖身一變,成為峇里最現代化嘅地區。你可以喺繁華閃爍嘅街道上面,搵到大大小小嘅精品店同高級餐廳,仲可以參觀佩提天蓋特廟 (Petitenget Temple) 等傳統地標添。身處峇里,如果你打算喺炎炎夏日走訪島上嘅優美海灘,輕輕鬆鬆曬吓日光浴,咁水明漾絕對係你嘅首選目的地!

    1

    水明漾海灘

    水明漾海灘 (Seminyak Beach) 位於峇里南區西岸,北面係庫塔 (Kuta),南面就係烏瑪拉絲 (Umalas)。呢片海灘日頭比較寧靜,陽光充沛,清風送爽,最啱約埋朋友嚟 hea 下,放風箏、曬太陽或者游水。不過,落水之前,記得睇吓海灘救生員有冇掛出「禁止游泳」嘅紅旗喎!海灘某啲區域可以俾你滑浪,而喺水明漾海灘租用滑浪板嘅價錢同庫塔差唔多。

    地點: Kuta, Badung, Bali, Indonesia

    地圖
    • 伴侶
    • 家庭
    • 拍照
    • 經濟實惠
    • 單人旅客
    • 團體
    2

    佩提天蓋特廟

    佩提天蓋特廟 (Petitenget Temple) 係水明漾市中心嘅文化地標,已經有幾百年歷史,本地方言叫佢做 Pura Petitenget。呢間寺廟絕對係必遊景點,最熱鬧嘅時候就係每隔 210 日慶祝一次嘅建廟週年紀念。事實上,同海灘平排嗰條大街嘅街名,正正同神廟一模一樣!而佩提天蓋特海灘距離神廟只有幾步之遙,係睇日落嘅最佳景點,好多遊客同本地人都會坐喺海灘,觀賞日落晚霞靚景,非常寫意架!

    中央庭院旁邊仲有另一座寺廟,叫做 Masceti Ulun Tanjung 廟,成日都有當地村民過嚟祈福,祈求神明保佑,遠離飢荒同疾病。

    地點: Jalan Petitenget, Kerobokan, North Kuta, Badung, Bali, Indonesia

    地圖
    • 伴侶
    • 家庭
    • 歷史文化`
    • 拍照
    • 經濟實惠
    3

    雙六海灘

    雙六海灘 (Double Six Beach) 係一條半公里長嘅白金色沙灘,亦係水明漾海灘 (Seminyak Beach) 嘅一部分,連接雷吉安 (Legian) 最北端嘅藍海海灘 (Blue Ocean Beach),同埋水明漾最南端海濱嘅歐貝羅伊度假村 (Oberoi Bali resort;簡稱「歐貝羅伊海灘」)。而雙六大街又叫做阿朱娜大街 (Jalan Arjuna),其中一段路同海灘並排,係雷吉安嘅主要海濱街道之一,街上時尚型格嘅酒吧同餐廳林立。

    地點: Jalan Double Six, Seminyak, Kuta, Badung, Bali, Indonesia

    地圖
    • 家庭
    • 拍照

    相片由 Jnzl's Photos 提供 (CC BY 2.0) 經修改

    4

    峇里圖騰密室逃脫挑戰

    難得去到水明漾 (Seminyak),想喺室內玩下刺激活動?不妨約埋三五知己,試玩峇里圖騰密室逃脫挑戰 (Totem Room Escape Challenge Bali) 啦!呢度每間房最多可以容納 6 個人;遊戲一開始,成 Team 人就會行入設計錯綜複雜嘅虛擬世界或遊戲室,要利用邏輯推理思維,喺限時內拆解一系列謎題,爭分奪秒,攪盡腦汁,務求成功走出密室!

    地點: Jalan Kayu Aya No.18C, Seminyak, Kuta, Badung, Bali 80361, Indonesia

    開放時間: 每日 10:00 至 22:00

    電話: +62 (0)361 4740071

    地圖
    • 家庭
    • 團體
    5

    峇里 3D 錯覺藝術博物館 (DMZ)

    3D 錯覺藝術博物館 (DMZ) 係峇里精彩絕倫嘅互動美術館,館內佈置咗大量生動迫真嘅彩繪 3D 錯視畫,仲有真人尺寸壁畫,俾你盡情擺 Pose,利用互動背景同錯視角度扮鬼扮馬,影返啲得意搞鬼嘅相。館內共有 120 幅獨一無二嘅藝術品,分為 14 個類別,喺 3 層展覽廳內展出,夠你慢慢參觀,玩足一日。鍾意創意藝術嘅你,千祈唔好錯過呀!

    地點: Jalan Nakula No.33X, Legian, Kuta, Badung, Bali 80361, Indonesia

    開放時間: 每日 09:00 至 22:00

    電話: +62 (0)361 8496220

    地圖
    • 家庭
    • 拍照
    6

    迴聲海灘

    迴聲海灘 (Echo Beach) 係峇里最受歡迎嘅滑浪熱點之一,本來叫做 Pantai Batu Mejan,以附近一間地位崇高嘅峇里印度教海神廟而命名。大概係因為同名海灘餐廳嘅關係,而家好多人都淨係識「迴聲海灘」,唔記得咗呢度嘅原名嚕!

    迴聲海灘憑著高難度礁岩滑浪點、180 度海景同日落靚景,成為呢一帶人氣最高嘅海灘之一;灘上仲有好多海鮮餐廳,景觀一流,供應滋味菜式,為你送上味覺同視覺嘅雙重享受。迴聲海灘乾淨企理,氣氛寫意悠閒,你可以喺咁靚嘅環境之中 chill 下,肚餓就去餐廳食返餐生猛海鮮。咁正嘅景點,你點可以唔嚟玩返轉?

    地點: Jalan Pura Batu Mejan, Canggu, Kuta Utara, Badung, Bali 80361, Indonesia

    地圖
    • 伴侶
    • 家庭
    • 拍照
    • 經濟實惠
    7

    峇里 Escape Room

    峇里 Escape Room 位於水明漾 (Seminyak) 日落大道街尾,鍾意玩密室逃脫遊戲嘅話,唔好錯過呢個景點呀!遊戲玩法係每隊 2 至 6 人,挑戰 4 間場景迫真嘅密室,善用線索,一齊解開多個謎題。只要喺限時內逃離密室,就完成任務架喇!遊戲目的係提高解難能力,發揮團隊精神,除咗啱哂一家大細,亦都係企業培訓員工嘅理想選擇。

    地點: Jalan Sunset Road No.88, Seminyak, Kuta, Badung, Bali 80361, Indonesia

    開放時間: 每日 10:00 至 22:00

    電話: +62 (0)361 9347141

    地圖
    • 家庭
    • 團體
    8

    峇里比賽藝術空間

    比賽藝術空間 (Biasa ArtSpace) 係與眾不同嘅藝術中心。自 2005 年起,呢間美術館一直為爪哇同峇里才華洋溢嘅當代年輕藝術家大力推廣作品,亦非常支持培育創意、概念同前衛藝術發展,館內大多數展品都出自初試啼聲嘅新晉藝術家手筆,滿載新意!

    地點: Jalan Raya Seminyak No.34, Seminyak, Badung, Bali 80361, Indonesia

    開放時間: 每日 09:00 至 21:00

    電話: +62 (0)361 730945

    地圖
    • 購物
    9

    騎馬

    想深入欣賞峇里自然風光?不妨沿住南部海灘騎馬,穿越科洛布坎 (Kerobokan) 綠油油嘅梯田!喺專業導遊帶領下,幾個鐘就可以騎到坎古 (Canggu);沿途之上,導遊仲會盡力保障你嘅安全添。

    騎馬服務由呢區嘅幾間馬房提供,佢哋有唔同品種同 Size 嘅馬匹,因應你嘅騎術水平幫你揀最啱你嘅坐騎,務求為你帶嚟開心愉快嘅騎馬體驗。臨近黃昏,同 Honey 一齊騎馬遊覽峇里,就更加浪漫啦!

    • 伴侶
    • 家庭
    • 遊歷
    • 團體
    10

    水明漾嘅 SPA 服務

    峇里已經成為亞洲頂級 SPA 度假勝地之一,而水明漾 (Seminyak) 嘅 SPA 選擇更加係多不勝數,令人眼花繚亂!一場嚟到峇里,冇理由唔試下舒筋活絡嘅峇里式按摩同草藥按摩架?專業按摩師亦可以根據你嘅需要,度身訂做有心思又啱哂你嘅護理服務。每間 SPA 設施都有提供獨特嘅護理療程,不妨用少少時間試吓邊間最啱自己。

    水明漾大街 (Jalan Raya Seminyak)、昆提街 (Jalan Raya Kunti) 同拉科斯瑪納街 (Jalan Raya Laksmana) 有幾間好出名嘅 SPA 中心,當中包括摩洛哥主題嘅 Prana Spa、Chill Reflexology、Espace Spa 同 Jari Menari 按摩中心。Jari Menari 字面意思係「跳舞嘅手指」,呢間按摩中心清一色聘請男按摩師,佢哋嘅四手按摩非常出名,仲攞過獎添,值得一試!

    • 伴侶
    • 單人旅客
    11

    水明漾海灘滑浪

    有返咁上下經驗嘅滑浪好手,想搵個無咁多人嘅幽靜海灘大展身手?水明漾 (Seminyak) 有幾個海灘都啱哂你要求!呢邊嘅海灘比庫塔 (Kuta) 更加乾淨,海邊小販攤位亦冇咁多,

    但係海浪嘅洶湧程度就比庫塔勁一倍,又以清晨時分最大浪,早啲起身過嚟滑浪就最啱!其中,佩提天蓋特海灘 (Petitenget Beach) 風高浪急,較近岸邊嘅地方唔止適合初哥練習,就連小朋友都可以開心暢玩 (當然要有家長陪同啦)!水明漾區內亦有幾個滑浪營地同學校,選擇一啲都唔少。

    • 遊歷
    12

    阿瑪拉酒店嘅峇里料理烹飪班

    水明漾阿瑪拉酒店 (The Amala) 嘅烹飪班深入淺出,教你煮峇里料理,啱哂平時鍾意煮返幾味、想學下整地道印尼菜嘅你。烹飪班只係度假村嘅其中一款興趣班,歡迎酒店住客同非住客參加,上堂地點喺度假村嘅 Bamboo 餐廳,而導師就係峇里土生土長嘅酒店廚師,會教你烹調正宗峇里菜式嘅技巧同貼士,你仲可以從中感受到廚師對本地美食嗰份 passion 添!有別於其他烹飪班,學員會直接嚟酒店上堂,唔使跟住導師去街場買餸,只要著條圍裙,就可以開始學煮嘢食,夠哂簡單方便!

    地點: The Amala, Jalan Kunti I No.108, Seminyak, Kuta, Bali 80361, Indonesia

    電話: +62 (0)361 3001013

    地圖
    13

    貝拉瓦海灘

    貝拉瓦海灘 (Berawa Beach) 位於坎古提布貝內 (Tibubeneng Canggu) 嘅 Banjar Brawa,距離水明漾 (Seminyak) 大約 5 公里。呢片淺啡色海灘好乾淨,清風送爽,仲坐擁坎古海岸線最大嘅潟湖,

    堪稱滑浪勝地,最正就係人流唔多,你想點玩都得,唔怕阻著人!另一方面,貝拉瓦海灘環境寧靜,係打坐冥想、做瑜伽同騎馬嘅好地方。滑浪之餘,你仲可以觀察下漁民嘅日常生活,望住佢哋坐傳統漁船出海打魚。而呢度附近有好多酒吧同悠閒餐廳,不妨坐低飲杯嘢,靜靜哋欣賞日落餘暉。

    地點: Jalan Pantai Berawa, Tibubeneng, Kuta Utara, Badung, Bali 80361, Indonesia

    • 伴侶
    • 家庭
    • 拍照
    • 經濟實惠
    • 遊歷
    14

    佩提天蓋特海灘

    佩提天蓋特海灘 (Petitenget Beach) 嘅名稱取自附近一間寺廟,位置便利,位處寧靜街區之中,亦係峇里人流較少、較為清靜嘅海灘。呢片海灘上面滿佈灰色嘅沙,俾人一種神秘感覺;周圍環境寧靜,想避開人潮嘅泳客可以嚟呢度偷閒半日,游下水、曬下太陽、慢跑下、打坐冥想,又或者趁日落之前,沿住海濱散步。

    地點: Jalan Kayu Aya, Kerobokan, Kuta Utara, Seminyak, Kuta, Badung, Bali 80361, Indonesia

    地圖
    • 伴侶
    • 家庭
    • 拍照
    • 經濟實惠
    • 遊歷
    15

    Primo 峇里朱古力工廠

    Primo 峇里朱古力工廠採用本地出產嘅可可豆,生產純正高質嘅手工朱古力。呢間小型工廠位於水明漾 (Seminyak) 以北嘅科洛布坎 (Kerobokan),由熱愛朱古力嘅意大利人 Pepe 創辦。呢位仁兄一直向峇里中部高地嘅可可豆農入貨,合作無間!

    行入小型工廠,你首先會聞到濃郁香甜嘅朱古力香氣;而 Pepe 親自設計咗一部精磨機,配備特別功能,處理單一來源、季節限定嘅原生可可豆。可可豆喺低溫之下低速研磨,透過「冷加工」過程確保朱古力味道處於最佳水平,同時抑制酸度。朱古力廠好歡迎訪客試食新鮮炮製嘅成品,而你仲可以買到唔同口味嘅朱古力 Bar 同純朱古力豆添,點可以唔掃貨做手信?溫馨提示:參觀朱古力工廠要事先預約。

    地點: Jalan Bumbak Dauh No.130, Kerobokan, Kuta Utara, Badung, Bali 80361, Indonesia

    開放時間: 星期一至六 09:00 至 18:00 (星期日休息)

    電話: +62 (0)812-3611-4454

    • 家庭
    • 購物
    • 品嚐美食
    16

    Nyaman Gallery

    Nyaman Gallery 打造舒適親切嘅藝術空間,館內嘅當代藝術品豐富多樣,出自峇里同印尼新晉藝術家嘅手筆。呢間美術館位於水明漾 (Seminyak) 巴桑卡薩街 (Jalan Basangkasa),有精心策展一系列展覽,宣傳國際藝術家嘅作品。室內燈光柔和,不經修飾嘅磚牆掛滿油畫同攝影作品。另一方面,展館幾個角落展出咗可以穿戴嘅藝術品,亦有一啲充滿異國風情嘅裝飾,買嚟佈置別墅或者屋企客廳,就最 Perfect 啦!

    地點: Jalan Raya Basangkasa No.88, Seminyak, Badung, Bali 80361, Indonesia

    開放時間: 每日 09:00 至 21:00

    電話: +62 (0)361 736226

    地圖
    • 購物
    Ari Gunadi | 旅遊常客

    開始計劃行程

    Maps