要數努沙杜瓦 (Nusa Dua) 最出名嘅活動,當然唔少得去平靜清澈嘅 Pantai Mengiat 海灘同格格海灘 (Geger Beach) 玩水啦!你可以喺海灘上游水、浮潛,甚至滑浪都得,活動各適其適,實有一款啱玩。努沙杜瓦五星級度假村同酒店林立,呢度嘅海灘更加係峇里最隱世嘅景點之一。

    除咗海灘,區內仲設有幾間畫廊,展示嚟自亞洲同太平洋群島嘅珍貴藝術品,好值得觀賞架!努沙杜瓦四處都有寺廟,每個月嘅特定日子舉辦獨特儀式同慶祝活動,繽紛多彩。無論你係沙灘友定藝術達人,都可以睇睇我哋嘅努沙杜瓦指南,Plan 下行程。

    1

    峇里努沙杜瓦劇場《天譚舞蹈》表演

    努沙杜瓦劇場 (Bali Nusa Dua Theatre) 嘅《天譚舞蹈 (Devdan Show)》表演長 90 分鐘,可以俾你欣賞到印尼唔同島嶼嘅舞蹈。成場 Show 由一對細路仔女講解同主演,故事講述佢咃喺神奇寶盒裡面發現代表各個島嶼同文化嘅物件。舞技精湛嘅 Dancer 跳出精彩舞步,雜技演員就無間斷上演雜技演出,展示印尼峇里 (Bali)、蘇門答臘島 (Sumatera)、爪哇島 (Java)、婆羅洲 (Borneo) 同巴布亞 (Papua) 嘅多元文化。道具設計旨在為觀眾帶嚟視覺上嘅震撼,仲結合咗最先進嘅燈光音響系統、旋轉舞台、煙火同人造雨等等元素添!

    地點: Komplek ITDC Nusa Dua, Benoa, Kuta Selatan, Badung, Bali 80363, Indonesia

    開放時間: 星期一、星期三、星期五至星期六 19:30 至 21:00。

    電話: +63 (0)361 770 197

    地圖
    • 晚間娛樂
    2

    潘達瓦海灘

    潘達瓦海灘 (Pandawa Beach) 全長 1 公里,隱身喺石灰岩懸崖後面,距離努沙杜瓦 (Nusa Dua) 中心區域西南大約 8 公里,絕對係暫離煩囂嘅好地方!身處海灘,你可以欣賞一覽無遺嘅海景同巨型石灰岩懸崖;而石拱上面飾有大型雕像,每一尊分別刻有摩訶婆羅多 (Mahabharata) 史詩嘅「般度五子 (Five Pandawas)」。雖然潘達瓦海灘位置相當隱蔽,但係餐廳同水上運動裝備租用店統統齊備,設施完善。

    地點: 印尼峇里潘達瓦海灘

    地圖
    • 伴侶
    • 家庭
    • 拍照
    3

    努沙杜瓦 Water Blow 觀浪點

    努沙杜瓦 (Nusa Dua) Water Blow 設有瞭望台,可以俾你望住印度洋嘅大浪不斷撞擊鋸齒狀嘅石灰岩邊,絕對係「打卡」勝地,你甚至有機會捕捉大浪捲起到 30 米嘅畫面添!不過,影相嗰陣記住小心,唔好俾浪花整濕攝影器材喎。身處 Water Blow,你幾乎一定會濕身,帶定套衫嚟換就啱架喇 (笑)!

    地點: Benoa, South Kuta, Badung, Bali 80363, Indonesia

    地圖
    • 拍照
    4

    蒙吉特海灘 (努沙杜瓦海灘)

    努沙杜瓦海灘 (Nusa Dua Beach) 又稱為蒙吉特海灘 (Pantai Mengiat),擁有幼滑白沙同平靜海面,而且大部分時間遊客都唔多,仲有一道 500 米長嘅珊瑚礁,可以充當屏障,保護岸邊免受印度洋嘅洶湧波濤衝擊。一場嚟到峇里,梗係要去島上嘅 Water Blow 觀浪點行下,喺岩石峭壁上近距離感受海浪嘅威力啦!蒙吉特海灘正正就係峇里幾條人氣豪華度假村嘅所在地,

    村內設有鋪砌平整嘅小徑,直通海灘,所以成日都有人喺度慢跑同踩單車。你可以喺蒙吉特海灘嘅海岸線附近游水同浮潛;當地漁民會由海灘坐傳統木船出海捕魚,而區內亦都有旅行社開辦玻璃底船觀光同釣魚團,活動豐富!

    地點: Nusa Dua, Benoa, Kuta Selatan, Badung, Bali, Indonesia

    地圖
    • 家庭
    • 拍照
    5

    格格廟

    格格廟 (Pura Geger Temple) 係努沙杜瓦 (Nusa Dua) 嘅重要文化地標之一,喺懸崖上面拔地而起,俯瞰同名嘅格格海灘 (Geger Beach),以高聳嘅外觀映襯住迷人海景;遇著風和日麗,朝早仲會望到海灣同阿貢火山添!

    格格廟只會喺儀式期間對外開放,其餘時間都唔開門;而朝聖信徒就會喺峇里日曆月圓之時去格格廟,參加 Purnama Kanem (第 6 個月圓日) 舉行嘅重要慶祝活動。

    地點: Jalan Pura Geger, Sawangan, South Kuta, Badung, Bali 80363, Indonesia

    地圖
    • 歷史文化`
    • 拍照
    6

    神鷹廣場

    神鷹廣場文化公園 (Garuda Wisnu Kencana Cultural Park) 位於努沙杜瓦海灘 (Nusa Dua Beach) 以西大約 12.5 公里,主要焦點係一座巨型雕像,重現仁慈嘅印度教神毘濕奴 (Vishnu) 坐喺神鷹迦樓羅 (garuda) 上面嘅情景。呢尊雕像高 121 米,坐落於 46 米高嘅石座之上,係東南亞最高嘅地標之一;而神鷹廣場會定期舉辦各種文化表演、展覽同世界級活動,精彩豐富!

    地點: Jalan Raya Uluwatu, Ungasan, Badung, Bali 80364, Indonesia

    開放時間: 每日 08:00 至 21:00

    地圖
    • 歷史文化`
    • 拍照
    7

    太平洋博物館

    太平洋博物館 (Museum Pasifika) 展出 25 個國家共 200 幾位藝術家創作嘅歷史文物同藝術作品,當中包括印尼知名藝術界人物嘅大作,包括峇里畫家 Nyoman Gunarsa,同埋爪哇藝術家 Raden Saleh 嘅心血結晶。

    呢間博物館總共設有 11 間唔同主題嘅展覽廳:1 至 5 號展覽廳分別展出印尼、意大利、荷蘭、法國同印歐藝術品;其餘展覽廳就會舉辦臨時展覽,同時展出東南亞展品。其中,採用樹皮布 (tapa) 製成嘅大洋洲同太平洋作品,以及嚟自中國同日本嘅畫作都別具異國風情,千祈咪錯過!

    地點: Complex Bali Tourism Development Corporation (BTDC) Area Block P, Kuta Selatan, Benoa, Badung, Bali 80361, Indonesia

    開放時間: 每日 10:00 至 18:00

    電話: +62 (0)361 774 935

    地圖
    • 伴侶
    • 家庭
    • 歷史文化`
    • 拍照
    8

    峇里國家高爾夫俱樂部

    峇里國家高爾夫俱樂部 (Bali National Golf Club) 位於峇里旅遊發展綜合建築 (Bali Tourism Development Complex) 南邊,佔地廣闊,由 Robin Nelson 同 Rodney Wright 設計,屬於 18 洞規格,沿途分成 3 種打波場景,別樹一幟;其他場內設施包括利百特高爾夫學院 (Leadbetter Golf Academy, LGA Bali) 同更衣室,場內嘅高爾夫專門店仲有賣專業裝備,貨色齊全!峇里國家高爾夫俱樂部亦設有練習場同果嶺,正式打 Golf 之前,不妨去熱下身先!

    地點: Kawasan Wisata, Nusa Dua, Benoa, Kuta Selatan, Badung, Bali 80363, Indonesia

    開放時間: 每日 06:00 至 19:00

    電話: +62 (0)361 771 791

    地圖
    • 豪華住宿
    9

    Puja Mandala 拜聖地

    Puja Mandala 拜聖地由印尼 5 個主要宗教朝拜場所組成,位於山頂,設有佛寺、印度教寺廟、天主教堂、新教教堂同清真寺,氣氛和諧。

    每個宗教場所都各有特色:清真寺展出一個古老祈禱鼓同一卷手寫古蘭經;而佛寺就裝潢華麗,有大白象同菩薩雕像守衛大門。Puja Mandala 拜聖地成日都成為婚禮場地,仲會喺唔同宗教嘅重要日子舉辦活動添!

    地點: Jalan Nusa Dua, Kuta Selatan, Benoa, Badung, Bali 80361, Indonesia

    地圖
    • 伴侶
    • 家庭
    • 歷史文化`
    • 拍照
    • 經濟實惠
    • 非一般行程
    10

    努沙杜瓦 Spa 水療中心

    努沙杜瓦 (Nusa Dua) 嘅 Spa 水療中心數之不盡,由提供保健服務套餐嘅豪華度假村,到伍拉賴旁路 (Jalan Bypass Ngurah Rai) 上面一間間嘅 Spa 小店等等,各適其適。其中,Heavenly Spa by Westin™ 提供唔同嘅水療選擇,場內仲設有蒸汽室、喜馬拉雅鹽桑拿,水力按摩同凍水泳池等現代化設施;

    情侶可以選擇去拉古娜 SPA (The Laguna Spa) 嘅情侶別墅過夜,喺水療套房裡面享受服務,欣賞私人海灘嘅景色;而招牌情侶浪漫水療套餐 (Couples’ Romantic Spa Retreat) 包括 90 分鐘峇里式按摩同 30 分鐘面部或者足部按摩,之後仲有朱古力生果串同無酒精雞尾酒供應,幫你充一充電!

    • 伴侶
    • 豪華住宿
    11

    滑浪

    由格格 (Geger) 搭船去到 Sawangan,就可以喺島上最波濤起伏嘅海面盡情滑浪!努沙杜瓦 (Nusa Dua) 東面 2 個小島之間嘅巨浪可以高達 4 米,所以成日吸引唔少滑浪客嚟挑戰自我;如果你係滑浪初哥,就要小心暗湧;而且,大浪區距離海灘相當遠,要多加留神。10 月至 4 月係努沙杜瓦嘅最佳滑浪月份。

    地圖
    • 遊歷
    12

    峇里努沙杜瓦威斯汀渡假村嘅威斯汀家庭兒童俱樂部

    威斯汀家庭兒童俱樂部 (Westin Family KidsClub) 位於度假村東北面,坐落喺寧靜花園嘅一隅,四周種滿熱帶海灘樹木,為 4 至 12 歲小朋友營造互動好玩嘅環境,而且仲有專人全面看管,父母們就可以安心俾仔女喺度玩盡各種有趣遊戲啦!一班百厭星可以任玩面部彩繪,親手整風箏,釣魚同埋觀星 (星期一 20:00 到 21:00),由朝玩到晚!如果天氣不似預期,唔啱戶外活動,咁就不妨參加威斯汀家庭兒童俱樂部組織嘅電影之夜,同小朋友一齊欣賞好戲。

    地點: Kawasan Pariwisata Nusa Dua, BTDC Lot N-3, Nusa Dua, Bali, 80363, Indonesia

    電話: +62 (0)361 771 906

    地圖
    • 家庭
    13

    武吉潘達瓦高爾夫鄉村俱樂部

    武吉潘達瓦高爾夫鄉村俱樂部 (Bukit Pandawa Golf & Country Club) 坐落喺努沙杜瓦 (Nusa Dua) 一個懸崖上,佔地 1.5 平方公里,呈獻尊尚高爾夫體驗,場內設有 18 個錦標賽標準 3 桿短洞,其中 10 個仲可以飽覽印度洋嘅迷人全景添!全場共有 54 桿,一場 Golf 大約兩個鐘就打完,不過具體時間視乎個人能力而定。武吉潘達瓦高爾夫鄉村俱樂部嘅場地設施包括球僮服務、會所兼貨色齊全嘅高爾夫專門店,同埋一間主打各國佳餚嘅餐廳。

    地點: Jalan Gunung Payung, Banjar Panti Giri, Desa Kutuh, Pandawa, Kuta Selatan, Kutuh, Badung, Bali 80361, Indonesia

    開放時間: 每日 06:00 到 18:00

    電話: +62 (0)811 3811 2828

    地圖
    14

    峇里努沙杜瓦嘉年華

    努沙杜瓦嘉年華 (Nusa Dua Fiesta) 每年十月舉辦,有齊林林總總嘅藝術展覽、文化表演同體育盛事,由印尼旅遊開發公司主辦,喺努沙杜瓦好多個唔同場地上演。你可以投身參與源源不絕嘅街頭巡遊同現場表演,節目包括火舞、烹飪課同人體彩繪班,實行俾你盡情玩轉週末;大會仲會請嚟重量級國際巨星、敲擊樂手同本地藝術家,現場演奏各國音樂添!

    地點: 印尼峇里努沙杜瓦海灘

    電話: +62 (0)813 537 81600

    地圖
    15

    努沙杜瓦寺廟

    努沙杜瓦 (Nusa Dusa) 嘅寺廟建築設計令人嘆為觀止,仲珍藏咗唔少風格獨特嘅文物!由布阿盧村 (Bualu Village) 前往 Jalan Pantai Mengiat 大街嘅路上,你會沿經德沙岩廟 (Pura Desa)、普薩岩廟 (Pura Puseh) 同 Catus Pata 三座寺廟;而努沙杜瓦同蒙吉特 (Bengiat) 海灘沿岸亦都有幾座大受歡迎嘅印度教寺廟,包括 Pura Segara Nata、Pura Dalem Segara 等;南努沙杜瓦大道 (Jalan Nusa Dua Selatan) 上嗰幾間隱世寺廟神秘清幽,都值得一遊架!不過,如果要數努沙杜瓦最不容錯過嘅寺廟,就一定非格格廟 (Geger Temple) 莫屬。呢座神殿位於懸崖上面,俯瞰印度洋嘅無敵靚景,身處其中特別心曠神怡。

    地點: 印尼峇里努沙杜瓦

    • 歷史文化`
    • 拍照
    Ari Gunadi | 旅遊常客

    開始計劃行程

    Maps