庫塔 22 大最佳玩樂活動

庫塔海灘 (Kuta Beach) 喺細賞峇里著名日落靚景嘅好地方，位於島嶼嘅西南海岸，遊客全年都可以喺度曬日光浴、滑浪、游水同踢沙灘足球。

庫塔嘅主要海灘大街有 Jalan Kartika Plaza 同 Jalan Pantai Kuta，兩旁林立數之不盡嘅度假村、酒店、娛樂場所、商舖，仲有各式餐廳酒吧。想 Shopping 嘅話，可以去 Discovery 購物中心，又可以行下色彩繽紛嘅庫塔藝術市場 (Kuta Art Market)。想喺峇里滑浪？無論你係初哥定係滑浪好手，庫塔海灘嘅浪況都啱哂你！

Waterbom 水上樂園裡面設有刺激好玩嘅滑水道，同埋適合細路哥既水上運動，遍佈 38,000 平方米嘅熱帶花園同泳池四周。呢座水上樂園位於 Jalan Kartika 廣場，喺正 Discovery 購物中心對面街，

規模喺峇里數一數二，遊樂設施包括 Climax「直插式」滑水梯、Superbowl、Boomerang、Smashdown 同 Race Track 等等，一定會俾你各種驚險體驗。玩到餓喇，不妨去 Waterbom 水上樂園內嘅餐廳醫醫肚，享用印尼、日本同墨西哥菜，大擦一餐！

庫塔劇場 (Kuta Theater) 每晚都有舞台表演上演，由著住峇里舞蹈戲服嘅演員粉墨登場，色彩繽紛，令人眼花繚亂。呢場 Show 叫做《信仰之光 (Lights of Faith)》，講述傳統友誼面對現代主義挑戰嘅故仔。喺緊張驚險嘅夢幻場景之間，充滿住歡樂滑稽嘅時刻，仲會加插魔術元素，例如「刀鋸美人」，仲有大量嘅轉移、消失、懸浮同移動場面。

馬戲團水上樂園 (Circus Waterpark) 位於圖班 (Tuban) 嘅 Jalan Kediri 大街，氣氛休閒，距離伍拉賴國際機場 (Ngurah Rai International Airport) 大約 10 分鐘路程，裡面設有幾十條滑水梯同埋一條漂流河，而園內嘅兒童樂園有齊噴泉、水砲同迷你火車，小朋友肯定玩得開心！

想尋求刺激？你可以將 target 鎖定喺「Speed Slider」同「Wave Slides」等等嘅滑水梯，包你腎上腺素急升！馬戲團水上樂園仲有短期紋身 Corner、腳底按摩中心、影相服務區同埋餐廳，各適其適。儲物櫃同毛巾都會收費；如果你想搵個陰涼啲嘅私人地方抖返下，仲可以俾錢租用涼亭。

峇里嘅 3D 錯覺藝術博物館 (DMZ) 得意好玩，展出咗 120 幅真人尺寸畫作，俾你試下成為「畫中人」。影相嗰陣，呢啲作品可以營造 3D 立體效果。只要 Set 好相機、就啱角度擺埋 Pose，你就可以玩盡館內唔同主題嘅展品，扮下俾大白鯊追殺、穿越危險堤道之類，玩幾個鐘都玩唔哂！3D 錯覺藝術博物館位於 Jalan Nakula 大街，即係 Jalan Dewi Sri 街同庫塔 (Kuta) 日落大道嘅交界。

5GX 反轉笨豬跳 (5GX Bali Reverse Bungy) 位於雷吉安 (Legian)，可以俾你體驗「反轉笨豬跳」，包你腎上腺素激增！只要喺座位坐好，扣埋安全帶，你就可以用 200 公里時速衝上半空，嗰種快感難以形容！正如廣告口號，5GX 係你「喺峇里爽到震 (Get high in Bali)」嘅唯一合法途徑 (笑)！遊戲票價視乎有幾多人一齊展開呢段驚心動魄嘅旅程，每次最多 3 位。

峇里顛倒世界 (Upside Down World Bali) 設有 7 間經過特別設計嘅客房，房內裝飾同埋傢俱都刻意釘喺天花板，可以俾你同另一半或者老友玩返一日，擺出最傻最蠢嘅 Pose 影相，再欣賞下自己喺相裡面抵抗地心吸力嘅「英姿」！顛倒世界啱哂一家大細；如果你喺度 Selfie，夢幻效果可能唔多明顯。不過，場內嘅工作人員都非常 Nice，好樂意幫你影相，仲會教迷失方向嘅你走出展室添！

維哈拉德哈瑪那亞廟 (Vihara Dharmayana) 係庫塔 (Kuta) 最古老嘅佛教寺廟之一，建於 1876 年，主建築保養完善，呈現錯綜複雜嘅遠東風情，色彩鮮豔。寺內庭院幽麗平靜，瀰漫住嚟自祭壇嘅香火煙霧。維哈拉德哈瑪那亞廟隱身喺一條巷仔裡面，距離庫塔主要沿海地帶以東大約 1 公里。

峇里嘅水底滑板車體驗喺努沙切寧安 (Nusa Ceningan) 海岸附近上演，距離峇里東南大約 30 分鐘船程，你可以揸住潛水用滑板車，探索水底花園。呢款單座位 Walrus S-1 滑板車配備小型摩打同埋伸展式轉向襟翼，行駛時速可以達到 2 公里架！喺專業潛水員嘅幫助下，你會路經珊瑚花園，同異國海洋物種一齊暢泳；而體驗所用嘅呼吸裝備就好似太空頭盔咁，保證你喺全段旅程都視野清晰。

想同當地人踢返場沙灘足球比賽？咁就要去庫塔 (Kuta) 喇！通常，硬石酒店 (Hard Rock Hotel)、Discovery 購物中心同埋海灘沿岸嘅其他路段喺 16:00 左右就會 Set 好門柱，你可以喺日落之前參加一、兩場友誼賽，話唔定仲會因而識到幾個新朋友，為呢段峇里度假之旅更添姿彩！

一家大細同行，最安全好玩嘅活動，莫過於喺海灘放風箏！想知喺邊度買到風箏？話都冇咁易！區內周圍都有小店同攤販，售賣設計時尚既風箏，款式包括彩虹帆船同飛狐；而你亦都可以學當地人咁，放吓峇里傳統風箏，有 Bebean (魚形)、Janggan (鳥形) 同 Pecukan (葉形) 型號，別具特色。買到啱心水既風箏之後，一於出發物色庫塔海灘 (Kuta Beach) 上面空曠而大風嘅地方，俾你嘅風箏翱翔天際！

庫塔海灘 (Kuta Beach) 最出名嘅係「及腰水深」同「洶湧巨浪」，無論你係滑浪好手定初哥，都一樣玩得盡興！想學習基本滑浪知識？你可以去林立海灘各處嘅知名滑浪學校 (包括 Odysseys、Rip Curl Surf School 或者 Bali Surfer Girls Surf School)，報名上堂。下次返嚟，只要練習一下，你就可以探索峇里數之不盡嘅隱世滑浪海灘喇！

峇里機場左浪區 (Airport Lefts) 及機場右浪區 (Airport Rights) 係圖班 (Tuban) 嘅熱門滑浪勝地，位於庫塔海灘 (Kuta Beach) 主要區域以南大約 4 公里，意思係指伍拉賴國際機場 (Ngurah Rai International Airport) 著陸區最西端兩側形成嘅海浪。滑浪初哥可以喺岸邊挑戰比較易滑嘅海浪；而高達 1.5 米嘅巨浪就要搭船去到珊瑚礁，先會遇到喇！

峇里爆炸紀念碑 (Bali Bombing Memorial；又名「Ground Zero」) 係為永遠悼念 2002 年雷吉安 (Legian) 炸彈恐襲案嘅罹難者而建，位於庫塔 (Kuta) 同雷吉安交界，喺正雷吉安大街被炸毀壞嘅 Paddy's Pub 遺址上面。呢間酒吧後來搬遷到 Jalan Legian 大街，仲改咗名做 Paddy's: Reloaded。

峇里爆炸紀念碑由砂岩精雕細刻而成，鑲有一塊大型牌匾，印咗受害者嘅姓名同國籍。紀念碑由當地政府修建，夜晚會著燈；而每年 10 月 12 日，呢度都會舉辦悼念受害者嘅儀式。

Discovery 海濱中心 (Discovery Esplanade) 係一個岸邊露天劇場，屬於庫塔 (Kuta) Discovery 購物中心嘅一部分，成日都會舉辦年度慶祝活動，仲有 DJ Live Show、音樂會同埋產品發佈會上演添！另一方面，呢度亦係喺庫塔海灘 (Kuta Beach) 欣賞日落靚景嘅好地方。視乎全年唔同時段而定，你可以喺 Discovery 海濱中心欣賞同參加嘅節目包括 Kecak (火舞) 表演、體育比賽同美食節，樂趣紛呈！

庫塔海灘步行街 (Jalan Pantai Kuta) 係庫塔 (Kuta) 嘅大街之一，單向通行，緊接雷吉安 (Legian) 嘅主要夜生活同購物熱點 Jalan Legian 街尾，以 Bemo Corner 十字路口為起點。你可以喺度搵到手信小店、Spa 水療中心同埋藝術亭；而街道中段仲有更多嘅 Spa、美容院、藝術紀念品亭、租電單車舖同找換店。不妨先去庫塔廣場 (Kuta Square) 購物廊行下，然後再向庫塔海灘步行街嘅海濱路段進發！

庫塔海龜保護區 (Kuta Sea Turtle Conservation Site) 係一個海龜孵化場暨教育設施，位於 Balawista 救生塔旁邊，自 2011 年起已經同峇里海龜協會 (Bali Sea Turtle Society) 合力孵化咗 10,000 幾隻幼龜！每逢繁殖季節 (6 月至 7 月)，呢度通常就要做足準備，因為數以千計海龜會嚟到庫塔沙灘 (Kuta Beach) 周圍嘅臨時保育場孵蛋。中心裡面嘅海龜雕像引人注目，既係庫塔嘅象徵，亦係影相「打卡」勝地！過嚟之前，記得 Check 下館方網站公佈嘅時間表，順道參加「小海龜競跑」。

新庫塔高爾夫球場 (New Kuta Golf in Bali) 係峇里風景最優美、又最具挑戰性嘅 18 洞錦標賽球場。呢個球場嘅綠嶺地帶由白色石灰岩懸崖開闢出嚟，俯瞰印度洋，風光不殊！場內最具代表性嘅第 15 洞綽號係「The Cliff Hanger」，皆因呢度可以望勻哂印度洋同巴蘭杠海灘 (Balangan Beach) 嘅絕色靚景。

新庫塔高爾夫球場俱樂部裡面設有高爾夫專門店、接待室、用膳區、儲物櫃，仲有可以舉辦錦標賽宴會嘅高級會議室；而場內嘅 The Links 餐廳主打印尼菜同國際美食，一定唔會餓親你！打球打到攰攰哋？新庫塔高爾夫球場酒店裡面嘅 Spa 水療中心有提供峇里式按摩同護療服務，幫你鬆一鬆。

峇里上有 2 條罌粟巷 (Poppies Lane)，係去庫塔 (Kuta) 同埋雷吉安 (Legian) 海灘嘅捷徑，因為有一系列廉價住宿林立而大受歡迎。如果你想喺峇里人氣最旺嘅 2 個海灘度假區中間，搵間平價賓館、民宿或「Losmen (旅店)」，呢度就特別啱你！由罌粟巷出發，輕輕鬆鬆行 15 分鐘就去到庫塔海灘、甚至係雷吉安五光十色嘅夜蒲熱點，夠哂方便。罌粟巷以 Poppies Bali 餐廳命名，而呢間餐廳自 1970 年代初期開始營業，相信係由之前嘅加州餐館老闆所發展。

庫塔海灘嘅寺廟位於大路沿線，你可以喺朝早同埋日落之後見到峇里人祈禱同埋祭獻，而最多人參訪嘅庫塔寺廟包括 Kalangan Majelangu 廟、Batu Bolong 廟同埋培拿它蘭廟 (Pura Penataran)。

每逢神聖日子，或者有儀式嗰陣，Kalangan Majelangu 廟都會好繁忙。其中，美樂思儀式 (Melasti) 喺涅皮節 (Nyepi；即係峇里安寧日) 前 3 至 4 日舉行，當地人會聚集喺庫塔海灘上，向印尼印度教嘅萬物之神 (Sanghyang Widhi) 祈福獻祭。