峇里 10 大美食

峇里必試美食

    印尼由數以千計嘅小島組成,多姿多采嘅文化為峇里帶嚟唔同款式嘅美食。嚟到峇里旅行,又點可以錯過當地最受歡迎嘅菜式?

    我哋為你挑選出嘅峇里最正美食,包括豆角沙律 (lawar,以豆角同肉碎炮製嘅沙律)、香燻鴨 (bebek betutu)、沙爹 (sate lilit,峇里式沙爹串燒),以及島上最出名嘅烤全乳豬 (babi guling)。鍾意食甜嘢?峇里嘅小食、蛋糕同甜品同樣出色,必定要試!

    1

    沙爹款式

    沙爹 (sate) 係一種醃製烤肉串燒,配搭辣醬一齊食,特別惹味!通常,沙爹都係用雞、山羊、羊、牛同豬嘅肉粒或者肉片製成,有啲就會魚、豆腐、蛋同碎肉炮製。

    峇里式沙爹串燒叫做 sate lilit,材料包括免治牛肉、雞肉、魚肉、豬肉甚至海龜肉,仲會加入椰子、椰奶同埋好多種蔬菜香料,之後串落竹簽、甘蔗或檸檬草莖上面,擺喺炭爐烤熟就得,無論蘸唔蘸醬食,都一樣咁好味!

    • 品嚐美食
    2

    雞飯同雜菜飯

    峇里式雞飯 (nasi ayam) 同雜菜飯 (nasi campur) 都可以喺島上嘅小型食店 (warungs) 搵到,製作方法係用白飯配搭各式各樣嘅峇里式美食奉客,好似燒乳豬 (babi guling) 同香燻肉 (betutu,即係辣味雞或鴨肉) 都係常見配料,再加埋蔬菜同少少峇里式叁峇辣醬 (sambal matah),就夠哂惹味喇。

    有時,雞飯同雜菜飯會配埋湯上枱,咁已經係圓滿嘅一餐喇!如果你唔食得辣,可以要求店家唔落叁峇醬。

    • 品嚐美食

    相片由 Eny Santiati 提供 (CC BY-SA 4.0) 經修改

    3

    香燻鴨肉同雞肉

    香燻肉 (betutu) 相當於「慢煮版」嘅烤全乳豬 (babi guling),係峇里好出名嘅地道菜式,做法認真,啱哂唔食豬嘅人:先將傳統香料塞滿全雞 (ayam) 或者全鴨 (bebek),然後再用香蕉葉同香蕉樹皮包實啲肉,經過 6 至 7 個鐘嘅烘烤或者炭焗,肉質豐腴又 Juicy,仲鬆軟到一咬就「離骨」添!

    • 品嚐美食

    相片由 m4sh.3d 提供 (CC BY-SA 2.0) 經修改

    4

    烤全乳豬

    烤全乳豬 (Babi guling;guling 喺印尼文有「轉動」嘅意思) 幾時都咁人氣爆燈!乳豬仔裡面塞滿好多傳統香料同木薯葉等蔬菜,再喺炭火上面慢慢轉動,以扦烤方式煮熟,

    呈現迷人嘅金黃色,一啖咬落,皮脆肉軟嘅 Juicy 口感不禁令人回味,食唔停口!本來,烤全乳豬係一道只會喺特別慶祝活動同儀式聚餐上出現嘅菜式,但係而家已經漸漸普及,好多小型食店同餐廳都有提供。

    • 品嚐美食

    相片由 momo 提供 (CC BY 2.0) 經修改

    5

    豆腐同豆餅

    豆腐 (tahu) 同豆餅 (tempeh) 食法多多,又可以當零食,又可以做主菜伴碟,煎、釀同炸都咁好味,難怪成日同印尼各款美食「同場出現」,配飯特別正宗!數到最惹味嘅豆腐小食,莫過於煎豆腐同釀豆腐,通常都會配搭類似春捲嘅餡料,滋味豐富。

    • 品嚐美食

    相片由 Ramzy Muliawan 提供 (CC BY-SA 3.0) 經修改

    6

    金巴蘭海鮮

    嚟到金巴蘭灣 (Jimbaran Bay) 嘅穆阿亞海灘 (Muaya Beach),梗係要去海濱 Cafe 擦返餐,品嚐超好味嘅燒海鮮啦!蝦、蜆、蟹、魷魚、龍蝦以至各式魚類等等,全部都可以試勻哂!呢度嘅海鮮咁惹味,秘訣在於每間食店都會用自家秘製嘅燒烤醬同調味料調配出獨門叁巴醬,炮製「金巴蘭風格海鮮」,入口辛辣又酸甜,百聞不如一「試」,食完就感受到金巴蘭美食嘅魅力架喇!

    • 品嚐美食
    7

    Pepes 同 Tum

    Pepes 係印尼巽他人 (Sundanese) 嘅煮食方式,精粹在於用香蕉葉包住食材,捲成細長型,再用幼竹枝封實兩邊,然後蒸、烚或者烤熟就得。Pepes 最常見嘅煮法係製作「pepes ikan」烤魚,不過相同煮法都可以用嚟炮製肉類、雞肉、豆腐或蔬菜。

    Tum 同 Pepes 相似,但係就只會將香蕉葉包埋對折,再連住其中一端,然後蒸熟,常見材料有混合咗香料嘅免治豬肉。對於上面嘅兩道菜式,香蕉葉都係靈魂所在,大大增添峇里正宗風味。

    • 品嚐美食

    相片由 Gunkarta 提供 (CC BY-SA 3.0) 經修改

    8

    傳統蛋糕同甜點

    印尼傳統蛋糕統稱為 jajanan pasar (傳統市集蛋糕),最初只會喺儀式上出現,但係而家已經變得普及,成為大家下午茶嘅至愛。Jajanan pasar 主要成份有米粉、糯米、糖、椰子同熱帶水果,款式多多。

    而峇里最常見嘅甜點有糯米糕 (wajik)、蒸椰米蛋糕 (pancong,即係米粉椰奶蛋糕)、椰絲糖漿糯米丸 (jaja batun bedil,即係糯米糰配椰糖漿)、水果椰漿飯 (bubuh injin,即係黑糯米飯)、椰子香蕉 (pisang rai,即係蒸香蕉),最後梗係唔少得椰絲球 (kelepon,米糕配椰子絲同椰糖漿) 啦!

    • 品嚐美食

    相片由 Dietrich Ayala 提供 (CC BY 2.0) 經修改

    9

    印尼炒飯

    印尼炒飯 (Nasi goreng) 係印尼最出名嘅必食菜式之一,會用預先煮熟嘅白飯配搭炒蛋、牛肉粒、雞絲、蝦、鳀魚、羊肉、蟹、青豆、洋蔥同青蔥爆炒,再撈埋甜醬油 (kecap manis) 同辣椒醬煮成,最後加蕃茄片、青瓜片、炸蔥、魚或蝦餅 (krupuk) 同四色腌菜 (acar) 伴碟。

    • 品嚐美食

    相片由 Lord Mountbatten 提供 (CC BY-SA 3.0) 經修改

    10

    豆角沙律

    豆角沙律 (lawar) 係一種傳統菜式,混合咗肉碎、蔬菜、椰子碎同香料;有啲地區嘅豆角沙律甚至會加入新鮮動物血液,再拌入肉類同香料,加強味道。豆角沙律保存得唔耐,最好即整即食,口味主要分為紅白兩款;而白款冇加肉類或者動物血液,啱哂素食者。

    • 品嚐美食
    Ari Gunadi | 旅遊常客

    開始計劃行程

    Maps