峇里四處都有文化瑰寶,同埋具有標誌性嘅地標風景,絕對值得一去!峇里昔日係由 8 個王國組成;今時今日,你可以嚟呢 8 個地方參觀唔同嘅寺廟、古跡同自然風景。

    我哋為你準備好峇里觀光玩樂清單,快啲跟住我哋張 Checklist,發掘峇里最迷人嘅一面啦!向東面出發,你會參觀到神聖嘅百沙基母廟同宏偉嘅皇家水上宮殿;如果你鍾意自然景色,咁就要去位於內陸嘅稻田影相留念。峇里活動多多,又可以睇靚景,又可以欣賞異國文化表演,個個都一定會玩得盡興!

    1

    海神廟

    海神廟 (Tanah Lot) 係峇里最具代表性嘅寺廟之一,坐落於海面一塊巨型岩石上方,寺底長年受海浪拍打,但都依然屹立。喺藍天白雲嘅襯托下,寺廟景色賞心悅目,不過點都唔及日落時分嘅景色震撼。夕陽西下,海神廟嘅剪影絕對係峇里明信片上面最靚嘅一道風光!

    海神廟向大海守護神致敬,同時亦係峇里主要海廟之一,岸邊領地設有細間啲嘅神殿,同埋專為遊客而設嘅休閒設施,例如商舖、定期舉辦舞蹈表演嘅文化公園等。你亦可以揀間餐廳坐低,喺美景相伴下,享受迷人嘅日落晚餐。

    地點: Jalan Raya Tanah Lot, Beraban, Kediri, Tabanan, Bali 82121, Indonesia

    開放時間: 每日 07:00 至 19:00

    地圖
    • 伴侶
    • 歷史文化`
    • 拍照
    • 經濟實惠
    2

    烏魯瓦圖神廟

    烏魯瓦圖神廟 (Uluwatu) 可謂峇里最重要嘅海廟之一,位於峇里西南部武吉半島 (Bukit) 嘅高聳崖邊。日頭你可以由寺廟外牆同懸崖邊緣眺望優美如畫嘅海景,好彩嘅話,仲可能會見到喺附近森林棲息嘅長尾獼猴添!

    接近傍晚時分,不妨耐心等待日落西山,捕捉壯麗景色,又或者預約觀賞附近露天圓形劇場嘅演出,喺充滿異國情調嘅夕陽同海洋靚景之下,欣賞卡恰 (Kecak) 火舞。烏魯瓦圖神廟本身、以至懸崖底下嘅海域都被列為峇里最優越、最具國際知名度嘅滑浪熱點之一。

    地點: Jalan Raya Uluwatu, Pecatu, Badung, Bali 80361, Indonesia

    開放時間: 每日 09:00 到 18:00

    地圖
    • 歷史文化`
    • 拍照
    3

    百沙基母廟

    百沙基母廟 (Besakih Temple) 被視為峇里嘅「母廟」,坐落喺峇里最高山峰阿貢山 (Mount Agung) 嘅西南山坡上,同時亦係峇里最大型嘅寺廟建築群,坐擁 18 座屬於唔同種姓嘅獨立聖所;而位於中央嘅建築群由三座主寺組成,分別供奉印度教三位一體嘅神明,亦即係濕婆 (Shiva)、梵天 (Brahma) 同毘濕奴 (Vishnu)。

    百沙基母廟喺 1995 年獲提名為世界文化遺產,不過至今仲未得到正式認可。呢度每年舉辦至少 70 次儀式或宗教慶典,皆因每座神殿都有個別嘅週年紀念日。想嚟參觀嘅話,最好就係趁一大朝早、又或者夜晚建築群最為清靜嘅時候造訪。

    地點: Besakih, Rendang, Karangasem, Bali 80863, Indonesia

    開放時間: 每日 08:00 至 17:00

    地圖
    • 伴侶
    • 家庭
    • 歷史文化`
    • 拍照
    • 經濟實惠
    4

    德哥拉朗梯田

    德哥拉朗 (Tegallalang) 梯田位於烏布 (Ubud) 心臟地帶以北,坐擁烏布一絕嘅景觀。沿住德哥拉朗公路 (Jalan Raya Tegallalang) 嘅主要幹道行,有路邊攤檔同藝術商店林立,售賣琳琅滿目嘅商品同古玩,同時亦有好多間餐廳仔,供應午餐或晚餐,俾你一邊食嘢,一邊飽覽鬱蔥山谷嘅無敵靚景。

    德哥拉朗梯田沿住山坡一直向下延伸,連接山谷嘅另一邊。除咗由高處鳥瞰梯田景色之外,你亦可以順住田中小徑蜿蜒下行,親身接觸當地農民,近距離欣賞稻田嘅自然景色。

    地點: Jalan Raya Tegallalang, Tegallalang, Gianyar, Bali 80561, Indonesia

    地圖
    • 拍照
    5

    烏布猴子森林

    烏布猴子森林既係天然森林保護區,亦係灰色長尾獼猴嘅群居地,官方名稱叫做巴東泰格爾聖猴森林 (Sacred Monkey Forest of Padangtegal),喺烏布市極具人氣,而且實施社區為本嘅管理方式,所以保存得相當完好。森林距離烏布鎮中心只有幾步之遙,可以輕鬆徒步抵達。

    嚟到森林裡面,野生馬騮會捉住藤蔓,喺樹冠之間靈活晃盪,又或者懶洋洋咁癱喺路邊,甚至喺你面前享受香蕉大餐,活潑得意!而你亦可以沿住鋪好咗嘅行人路,喺涼爽天氣下漫步茂密嘅肉荳蔻森林。另一方面,猴子森林仲有一座座古色古香嘅寺廟,廟前嘅守護雕像生滿青苔,望落的確有啲詭異 (笑)!

    地點: Jalan Monkey Forest, Ubud, Gianyar, Bali 80571, Indonesia

    開放時間: 每日 08:30 至 17:30

    電話: +62 (0)361 971304

    地圖
    6

    烏布藝術市集

    烏布藝術市集係烏布 (Ubud) 市中心嘅地標之一,地理位置方便,正正位於烏布皇宮對面,匯集無數由當地商人經營嘅小店,售賣五花八門嘅商品,有靚靚絲巾、薄身恤衫、手織手袋、籃、帽、雕像、風箏,仲有包羅萬有嘅本地手工製品。

    烏布藝術市集嘅大部分貨品都嚟自附近村落,包括彭格賽坎 (Pengosekan)、德哥拉朗 (Tegallalang)、帕揚甘 (Payangan) 同埔里亞坦 (Peliatan)。嚟到呢度,記得使出殺手鐧,盡情講價!覺得眼前景色熟口熟面?無他,皆因荷里活電影《再單身遊記 (Eat Pray Love)》其中一幕喺正烏布藝術市集取景,女星茱莉亞羅拔絲 (Julia Roberts) 漫步穿梭於喧嘩熱鬧嘅真實攤檔之間,盡顯都會女性魅力。

    地點: Jalan Raya Ubud, Ubud, Gianyar, Bali 80571, Indonesia

    開放時間: 每日 08:00 至 17:00

    地圖
    • 購物
    7

    金塔馬尼

    金塔馬尼 (Kintamani) 係峇里中部嘅一條山村,同時亦係峇里第二高峰巴杜爾山 (Mount Batur) 同巴杜爾火山口湖所在之地。呢條村位處東峇里嘅卡朗加沙縣 (Karangasem),係個熱門觀光勝地,以一個又一個觀景點作為賣點,當中包括地名有「優美中途站」之意嘅佩內洛坎 (Penelokan)。佩內洛坎係睇盡 360 度迷人全景嘅最佳位置,可以眺望到巴杜爾山崎嶇嘅黑色岩坡,同埋黑色熔岩。

    自 1800 年以來,呢座活火山已經爆發過大約 24 次,每次都令周圍嘅景觀改頭換面,卻又大受行山人士歡迎,山脊上嘅旭日靚景簡直令人矚目傾心!

    地點: Songan, Kintamani, Bangli, Bali 80652, Indonesia

    • 遊歷
    8

    峇里野生動物園及海洋公園

    峇里野生動物園及海洋公園 (Bali Safari & Marine Park) 係島上最大型嘅動物主題公園,園區盡可能重現動物嘅自然棲息地,仲飼養咗超過 60 個物種添!園內嘅遊覽巴士會帶你「環遊世界」,認識嚟自各大洲嘅動物,而你亦可以觀賞定期喺開放式舞台上演嘅精彩動物才藝表演。水棲動物有自己專屬嘅園區,裡面嘅水族館展出各種富有異國情調嘅魚類,例如食人魚等等。

    搭巴士遊覽完動物園之後,一家大細仲可以去附近嘅水上樂園盡情狂歡,又或者去遊樂園玩轉各式各樣嘅機動遊戲。同場加映:小編誠意推薦你去埋園內嘅峇里劇院,觀賞定時上映嘅峇里阿貢 (Bali Agung) Modern Show。

    地點: Jalan Profesor Ida Bagus Mantra Km 19.8, Serongga, Gianyar, Bali 80551, Indonesia

    開放時間: 每日 09:00 至 17:00

    電話: +62 (0)361 950000

    地圖
    • 家庭
    • 拍照
    • 遊歷

    相片由 shankar 提供 (CC BY 2.0) 經修改

    9

    加德威梯田

    加德威 (Jatiluwih) 梯田坐擁峇里廣為人知嘅稻田靚景,田野幅員廣闊,位於塔巴南縣 (Tabanan) 氣候涼爽嘅加德威高地村莊,遠離島上南部海灘度假區嘅人潮,不折不扣係個寫意避世天堂,

    仲獲提名為聯合國教科文組織世界文化遺產添!加德威梯田佔地 600 公頃,沿住連綿不絕嘅帕德馬薩 (Batukaru) 山脈延伸開去,由名為「蘇巴克 (subak)」嘅傳統合作社灌溉系統負責打理;而呢間合作社歷史悠久,於 9 世紀成立,更加係峇里打入「文化景觀」遺產名錄嘅主要原因之一。

    地點: Jalan Jatiluwih, Penebel, Tabanan, Bali 82152, Indonesia

    開放時間: 每日 08:30 至 18:00

    地圖
    • 拍照
    • 經濟實惠
    10

    象洞

    象洞 (Goa Gajah) 係峇里最重要嘅考古遺址之一,前身相信係修道場地,特色包括寺廟前嘅石頭遺址,又以中央冥想洞穴為焦點;而寺內庭院仲有個極富異國情調嘅沐浴池同雕塑噴泉。將「Goa Gajah」呢個名翻譯成「象洞」,可能有啲誤導,因為呢度根本就冇大象 (笑)!

    望向建築群南端,有優美嘅稻田同流向帕特諾河 (Petanu River) 嘅小溪,而呢度亦都係另一個充滿當地傳說嘅地方,仲有好多浸喺水度嘅有趣石頭文物添!象洞喺 Bedulu 村西面,距離烏布 (Ubud) 市中心以東大約 6 公里。

    地點: Jalan Raya Goa Gajah, Pejeng Kawan, Tampaksiring, Gianyar, Bali 80582, Indonesia

    開放時間: 每日 08:00 至 16:00

    地圖
    • 歷史文化`

    相片由 Cakhairia 提供 (CC BY-SA 3.0) 經修改

    11

    峇里滑浪

    峇里嘅滑浪勝地絕對係令島上旅遊業發展蓬勃嘅元素之一,以島嶼南部海岸為起點,風高浪急,同寧靜優美嘅海灘相映成趣,漸漸成為而家鼎鼎大名嘅滑浪遊樂場。島上第一批滑浪客喺 1930 年代發現難以置信嘅巨浪;由嗰陣時開始,就越嚟越多人專誠過嚟「乘風破浪」喇!

    縱觀峇里嘅滑浪客,既有經驗豐富嘅滑浪好手,亦有初試啼聲嘅滑浪新手。專業滑浪客可以去武吉半島 (Bukit Peninsula) 南部嘅珊瑚礁外圍大展身手;而初哥就可以喺潟湖裡面試下切入較為平緩嘅海浪。峇里係學滑浪嘅好地方,又可以租滑浪板,又有滑浪學校,設備完善。

    • 遊歷
    12

    峇里海鮮同黃昏晚餐

    嚟到峇里,特別係身處西岸,你可以一邊欣賞夕陽西下,一邊喺海鮮餐廳用膳。海神廟 (Tanah Lot Temple) 嘅餐廳會呈獻「美景當前」嘅難忘體驗;金巴蘭灣 (Jimbaran Bay) 同埋當地幾間所謂嘅「海鮮 Cafe」都係島上值得一試嘅食肆,店外嘅日落景致靚到暈,而你仲可以品嚐用當地叁巴 (sambal) 辣椒醬調味嘅燒鯛魚添!

    克冬迦南 (Kedonganan) 就係一條沿海村莊,位於金巴蘭灣以北、圖班 (Tuban) 機場跑道以南;村內嘅餐廳比較高檔,店家佈局可以俾你腳踏幼沙、飽覽海景。大部分食肆都由晏晝營業至深夜,有啲仲有傳統峇里舞蹈即席上演架!

    • 品嚐美食
    13

    庫塔、雷吉安同水明漾嘅 Party

    峇里嘅夜蒲勝地主要集中喺庫塔 (Kuta)、雷吉安 (Legian) 同水明漾 (Seminyak) 一帶,各適其適,無論你有咩背景、風格同預算,都可以玩得盡興!呢度既有海灘俱樂部,俾你由日落 Chill 到凌晨,亦都有夜店請嚟 DJ 駐場打碟;而你仲可以去屋頂酒吧坐下,去劇院睇場 Show,又或者簡簡單單,喺黃昏登上遊輪食晚餐。入黑之後,峇里嘅精彩活動先至連場上演,任你盡享!

    喺峇里島上 3 個相連嘅海灘度假區裡面,開滿咗各種各樣嘅酒吧、酒館同埋夜店,各有特色,難怪吸引深宵夜蒲客一嚟再嚟,打造出日落之後把酒談心、大擦美食、隨歌熱舞嘅核心地帶。

    • 晚間娛樂
    14

    探索峇里海灘

    峇里擁有各式各樣嘅海灘,每個都大受歡迎,既有小島南部庫塔 (Kuta)、努沙杜瓦 (Nusa Dua) 同埋沙努 (Sanur) 等等有棕櫚樹影婆娑嘅白色沙灘,又有由懸崖保護嘅「隱世」海岸,好似烏魯瓦圖 (Uluwatu)、巴東巴東 (Padang Padang)、夢幻沙灘 (Dreamland) 同埋賓林 (Bingin) 咁。講到峇里嘅海灘,又點少得北部同西部海岸線上面引人注目嘅黑色沙灘?而海島中間都仲有啲人煙罕至、氣氛慵懶嘅小海灣。

    峇里海灘曾經係滑浪選手專屬嘅地方,而家已經旅客物色世外桃源嘅必到之地,設有一流酒店同優質設施;而你都可以喺峇里探索自己鍾意嘅海岸,喺武吉 (Bukit) 半島南部,仲有啲「絕密秘境級」嘅海灘等緊你架!

    • 伴侶
    • 家庭
    • 拍照
    15

    峇里嘅《巴龍與格裡斯劍舞》

    《巴龍與格裡斯劍舞 (Barong and Kris Dance)》係島上極具代表性嘅舞蹈劇,描繪 12 世紀善惡對決嘅經典故事。巴龍以野獸形態展現仁慈精神,保護王國免受寡婦女巫 Rangda 嘅復仇怒火傷害。

    兩位男表演者會舞動巴龍嘅華麗戲服,其他配角舞者就扮演馬騮、牧師同村民。島上各個村莊嘅劇場都有節目每日上演,最受歡迎嘅莫過於吉安雅 (Gianyar) 嘅 Batubulan 劇場,同埋登巴薩 (Denpasar) 市郊嘅劇院。成場 Show 都由當地人主理,有村民粉墨登場,加埋甘美朗 (gamelan) 樂團現場伴奏,氣氛一流!

    • 歷史文化`
    • 拍照
    16

    珍布拉娜嘅佩古塔坦巨樹

    佩古塔坦 (Bunut Bolong) 喺一棵巨型嘅空心榕樹,位於峇里西部嘅珍布拉娜 (Jembrana),都算得上係獨一無二嘅自然地標!喺區內 Manggisari 村民嘅心目中,呢棵已經有幾百年歷史嘅大榕樹「神聖不可侵犯」;當地有好多故仔流傳,話嘗試斬呢棵樹嘅人統統會遭遇不測!

    大樹嘅樹底有個自然形成嘅大窿,同穿梭其中嘅大街一樣咁闊;喺大窿兩邊,分別擺放左一啲黃色同白色嘅寺廟神龕。

    地點: Manggissari, Pekutatan, Jembrana, Bali 82262, Indonesia

    地圖
    • 歷史文化`
    • 拍照
    17

    峇里「利岡舞」

    「利岡舞 (Legong)」係極具視覺張力嘅峇里宮廷表演,被視為島上最神聖嘅經典,出名之處在於舞姿對舞者嘅體力要求極高,動作節奏快,要體態極之柔軟嘅年輕女表演者,先跳得出箇中神韻。

    呢種舞嘅舞步源遠流長,代代相傳,經過精心編排,設計出最精緻嘅細節,令人目不暇給!嚟到峇里,你可以喺幾個地方欣賞「利岡舞」表演,最受歡迎嘅場地包括普瑞薩倫皇宮 (Puri Saren Royal Palace;又名「烏布皇宮 (Ubud Royal Palace)」)、阿貢拉伊藝術博物館 (ARMA) 同埋烏布普拉薩拉斯瓦蒂神廟 (Pura Saraswati Temple)。

    • 拍照
    • 晚間娛樂

    相片由 Tiomax80 提供 (CC BY 2.0) 經修改

    Ari Gunadi | 旅遊常客

    開始計劃行程

    Maps