嚟聖托里尼島其中一樣必做行程,莫過於 Post 旅行相上 Instagram 打卡—事實上,呢個小島之所以極速上位,都係全靠社交媒體助攻咋!聖托里尼由寂寂無名嘅海島,搖身變成「人生必遊景點」,好大程度上要歸功於呢度無與倫比嘅景色同醉人日落。呢座火山島位於愛琴海,最出名嘅地方就係建於陡峭懸崖上嘅古樸白屋、蔚藍嘅窗板,仲有屋頂同夏日晴空互相映照嘅明媚風光,

    仲有好多威水歷史,等你一一發掘:崎嶇不平嘅岩石地,承載住一間又一間源遠流長嘅教堂同修道院,仲有古老葡萄園,相映成趣。而如果你相信傳說,「亞特蘭蒂斯失落都市」正正就喺呢度!

    聖托里尼島最好玩嘅活動係乜嘢?

    1

    喺 Theotokopoulou 廣場展開一日行程

    飲杯咖啡,同當地人 hang out

    • 拍照
    • 經濟實惠

    Plateia Theotokopoulou 係聖托里尼島最大城鎮費拉 (Fira) 嘅主廣場,當地人最鍾意喺度聚會傾偈,去街市仔買吓新鮮農產品,又或者坐喺長凳度欣賞火山口景色。廣場後面屹立住雄偉嘅東正教大教堂 (Orthodox Metropolitan Cathedral),仲有幾間銀行﹑藥房﹑商舖﹑畫廊﹑Café 同餐廳。Theotokopoulou 廣場熱鬧繁華,尤其喺旺季期間更加人頭湧湧,場外有好多窄巷同樓梯,通往鎮上各處。

    地點: Ipapantis 307,Fira 847 00,Greece

    地圖
    2

    喺睡火山旁邊遊船

    輕鬆浸溫泉

    • 伴侶
    • 家庭
    • 拍照
    • 非一般行程

    聖托里尼島 (Santorini) 位於大致被水淹沒嘅巨型火山其中一側,而群島中心好似潟湖嘅水域其實係火山臼,景色靚到絕,強烈建議你 Book 船遊覽!由簡樸渡輪到豪華遊艇,呢度嘅船隻選擇繁多,導賞團除咗帶你欣賞聖托里尼島海岸線嘅風光,喺愛琴海度過一日之餘,仲會俾你喺火山噴口形成嘅溫泉裡面游水添!雖然呢度嘅泉水只係暖暖哋,仲帶有鐵鏽色,可能會整污糟泳衣,但都算係新穎體驗吖,唔試吓又點得?

    相片由 Steve Jurvetson 提供 (CC BY 2.0) 經修改

    3

    由費拉遠足到伊亞

    飲多啲水,搽多啲防曬 Cream,影多啲靚相

    • 家庭
    • 拍照
    • 經濟實惠
    • 遊歷

    費拉 (Fira) 同伊亞 (Oia) 之間步程 3 個鐘嘅健行徑會為你展現希臘最澄麗嘅島嶼風景,夠哂你喺 Instagram 打卡啦!步徑全程唔夠 10.5 公里,有啲位都幾難行,唔似喺公園散步咁輕鬆,勝在路線相對清晰,途中仲會經過幾個小村莊,就算你行山經驗唔多,都可以試吓。想避開全日最熱嘅時份,就最好喺凌晨或者下晝出發喇!

    4

    體驗皮爾戈斯嘅當地生活

    試食番茄草魚

    • 歷史文化`
    • 拍照
    • 品嚐美食
    • 經濟實惠
    • 非一般行程

    皮爾戈斯基里斯迪斯 (Pyrgos Kallistis) 係一條幽靜嘅小村莊,位於費拉 (Fira) 以南大約 7 公里,係聖托里尼島上少數尚未受旅遊業影響嘅地方之一,皆因佢屬於受保護地區。呢條村都幾好行架,既完美展現島上嘅傳統建築風格,又有狹窄巷仔蜿蜒於商舖﹑教堂﹑美術館﹑博物館同餐館之間。村內好多餐廳都有賣聖托里尼島嘅特產番茄草魚 (tomatokeftedes),用油浸番茄碎或者茄茸製成,口味清新。只要揀喺皮爾戈斯城堡 (Pyrgos Castle) 遺址周圍嘅頂樓酒吧同餐廳,就可以一路望向伊亞 (Oia),景色壯麗,尤其喺日落時份特別燦爛。

    地圖

    相片由 Edal Anton Lefterov 提供 (CC BY-SA 3.0) 經修改

    5

    欣賞埃里亞斯先知修道院嘅景色

    參觀聖托里尼島嘅制高點

    • 歷史文化`
    • 拍照
    • 經濟實惠

    埃里亞斯先知修道院 (Moni Profiti Ilia) 好似堡壘一樣,位於聖托里尼島 (Santorini) 海拔約 565 米嘅最高點,可以俾你由露台同行人道上睇勻成片群島!呢間修道院建於 1711 年左右,曾經非常富有強大,而家嘅影響力可能不復當年喇,而堂內嘅基克拉迪 (Cycladic) 華麗建築仲喺 1956 年地震期間受損添!好彩,教堂成功保存住非凡壁畫、罕見宗教手工藝品同拜占庭古老雕塑。行上修道院嘅路線奇妙又具挑戰性,另外亦都有一條瀝青路,俾你向東南方揸車 3 公里,直達皮爾戈斯 (Pyrgos)。途中想食小食或者點心?不妨向修士買啲農產品吖!

    地點: Epar.Od.Pirgou Kallistis - Profiti Ilia, Moni Profitou Iliou, Pyrgos 847 00, Greece

    開放時間: 每日 10:00 至 16:00

    電話: +30 2286 031210

    地圖

    相片由 Klearchos Kapoutsis 提供 (CC BY 2.0) 經修改

    6

    品味世界上最古老嘅幾款葡萄酒

    參加品酒之旅

    • 伴侶
    • 拍照
    • 品嚐美食

    眾所周知,聖托里尼島 (Santorini) 種植葡萄嘅歷史可以追溯到公元前 1200 年,仲有證據顯示呢個行業早多 500 年就存在添!本地嘅種植方法係將葡萄藤切成近乎地面嘅高度,再將藤枝織成籃仔形狀,放葡萄入去,免受強風同嚴酷嘅火山沙侵襲。區內以出產 Assyrtiko 白葡萄最為普及,佢釀出嚟嘅葡萄酒乾度極高,帶有柑橘味同天然泥味。只要參加品酒之旅,你就可以深入探索聖托里尼獨一無二嘅葡萄酒釀造過程,仲可以試埋成品架!其中,Megalochori 傳統村莊入面嘅 Boutari 酒莊都有開辦呢類品酒團。另外,呢度亦係島上眾多夢幻日落景點之一。

    地點: 847 00 希臘 Megalochori, Boutari Winery Santorini

    開放時間: 每日 10:00 至 15:00

    電話: +30 2286 081011

    地圖
    7

    必睇景點:史前城鎮阿克羅蒂里

    呢度唔通就係傳說中失落嘅亞特蘭蒂斯市 (Atlantis)?

    • 家庭
    • 歷史文化`
    • 拍照

    位於聖托里尼島南岸嘅米諾 (Minoan) 古鎮阿克羅蒂里 (Akrotiri) 有時會被稱為「希臘龐貝古城」,因為佢同呢個比較出名嘅姊妹城市一樣,喺公元前 1642 年至 1540 年間被巨大嘅火山爆發摧毀,後來幸而保存落嚟。雖然事發日期並非完全一致,但有人認為阿克羅蒂里可能就係希臘哲學家柏拉圖所描述嘅亞特蘭蒂斯失落都市!當你置身喺呢個源自青銅時代、依然保留舊貌嘅聚居地,就會發現周圍嘅建築物、壁畫、陶器以至傢俱都保存得出奇咁好,肯定令你深受感動。另一方面,呢度唔似龐貝咁,並冇發現人類遺骸,所以都好啱帶小朋友嚟觀光。

    地點: Epar.Od.Akrotiriou, Akrotiri 847 00, Greece

    開放時間: 11月至3月:周三至周一08:30至15:30。 4月-10月:星期三-星期一,08:00至18:00。周二不营业。

    電話: +30 2286 081939

    地圖

    相片由 Tatiana Matlina 提供 (CC BY-SA 4.0) 經修改

    8

    喺紅海灘享受日光浴

    IG 打卡勝地!

    • 伴侶
    • 家庭
    • 拍照
    • 經濟實惠

    紅海灘 (Red Beach) 上面滿佈卵石,附近設施又少,想認真曬日光浴嘅遊客應該唔會鍾意呢度…不過,每逢旺季,呢片海灘又總係人滿為患,皆因佢「灘」如其名,確係紅色架!狹窄嘅沙灘後面,聳立鏽紅色嘅石壁,紅岩慢慢變黑,然後又突然融入白沙之中,景象相當特別。紅海灘嘅海水清澈見底,碧水紅崖形成強烈對比,難怪成為「打卡」勝地啦!通往海灘嘅小路雖然好短,但係非常崎嶇,記住著對舒服好行嘅鞋嚟喎!

    地點: Akrotiri 847 00, Greece

    地圖
    9

    喺伊亞睇日落

    煩囂而優美

    • 伴侶
    • 家庭
    • 拍照
    • 經濟實惠

    毫無疑問,喺伊亞 (Oia) 睇日落絕對係聖托里尼島必做行程之一!即使你住喺海島東面,至少都一定要搵個下晝,嚟西邊朝聖。喺聖托里尼島眾多靚景之中,最具標誌性嘅就係位於北部嘅伊亞村,村內房屋粉刷雪白,加上鮮豔藍色嘅圓屋頂同百葉窗,旋即令呢度成為全希臘 (甚至全世界) 最受 IG 達人追捧嘅「打卡勝地」之一。

    伊亞村朝早景色固然唔錯,但係要數最佳拍攝時份,首推日落—屆時,夕陽西下,崖邊村莊晚燈初上,特別令人神往,大受遊客歡迎!正正因為咁樣,村內窄巷每到傍晚就變得人頭湧湧,敬請做好心理準備!

    地圖
    10

    由費拉嘅夜店為一日行程畫上句號

    海島首府酒吧逐個捉

    • 伴侶
    • 晚間娛樂

    聖托里尼島係後生仔嘅熱門旅遊勝地,處處林立熱鬧夜店,尤以島上首府費拉 (Fira) 至為璀璨!雖然區內嘅夜生活場所種類繁多,但大多數都聚集喺費拉中心廣場 (Theotokopoulou Square) 以北嘅小區裡面,選擇唔算多。唔使擔心—「夜蒲」中堅份子仲可以幫襯 Enigma Club 之類嘅夜店;想講究少少?MoMix 酒吧精心調配嘅雞尾酒值得一試;要物色安靜浪漫氛圍嘅你,就一定會鍾情 Franco’s Bar。溫馨提示:出門在外,最好咪著高踭鞋喇—費拉到處都係鵝卵石街同陡峭梯級,仲著高踭鞋,咪即係勞役自己對美腿?!

    地圖
    Ben Reeves | 旅遊常客

    開始計劃行程

    Maps