米科諾斯島 (Mykonos) 因為海灘酒吧同夏日 Party 氣氛而越嚟越受歡迎;另一方面,島上數之不盡嘅純白教堂、商舖同博物館都吸引咗歷史發燒友同追求靈修嘅旅客慕名而嚟。環顧米科諾斯島,好多建築物早於 16 世紀就落成:當時,呢度嘅山頂磨穀風車獨一無二,仲令海島成為繁華港口同農業經濟體添!

    今時今日,你反而可以聽住世界知名 DJ 捽碟嘅節拍,漫步於查羅 (Charo) 嘅綠茵巷仔裡面,行勻哂米科諾斯島嘅海灘,順道留宿幾宵。夏日炎炎,小島迸發無窮活力,景點百花齊放,絕對係最佳遊覽時節!

    1

    喺喬拉展開一日行程

    米科諾斯島首府嘅白牆小酒館、房屋同風車

    喬拉 (Chora) 又名霍拉 (Hora) 或者米科諾斯鎮 (Mykonos Town),係米科諾斯島 (Mykonos) 上面積最大、最熱鬧嘅住宅區。山邊嘅白牆建築分佈散亂,正正係基克拉迪 (Cycladic) 建築風格嘅典型特徵,喺島上隨處可見。狹窄嘅巷仔蜿蜒無車,不過有時遊客比較多,要做定「路面擠塞」嘅心理準備喇!

    朝頭早,米科諾斯鎮老港口 (Old Port of Mykonos Town) 附近嘅漁市場有平價海鮮賣—想感受當地人生活風情,就梗係要去朝聖啦!如果你只係想吹住海風曬太陽,又或者喺海邊試吓當地開胃菜、飲杯葡萄酒,日頭大多數餐廳都唔爆滿,任你揀邊間都得。

    地點: Mykonos 846 00, Greece

    開放時間: 24/7

    • 拍照
    • 經濟實惠
    2

    揸車去亞美尼亞提斯燈塔

    欣賞陸地、海洋同附近島嶼嘅全景

    位於米科諾斯島 (Mykonos) 西北端嘅亞美尼亞提斯燈塔 (Faros Armenistis Lighthouse) 建於 1891 年,高 19 米,雖然塔身內部冇開放俾遊客入去,但係塔外飽覽到愛琴海 (Aegean Sea) 同鄰近提諾斯島 (Tinos) 嘅全景,日落時分嚟睇就最靚喇!要嚟呢座燈塔玩,最簡單嘅方法係租車或者參加導賞團,費用大約係 EUR18,以米科諾斯鎮為起點,開辦次數都幾頻密架。

    我哋誠意推介你喺太陽準備落山前嚟到,睇完夕陽西下嘅靚景,仲可以喺酒吧迫滿遊客之前返到米科諾斯鎮添!

    地點: Fáros Armenistís 846 00, Greece

    開放時間: 24/7

    • 歷史文化`
    • 拍照

    相片由 Francesco Fallica 提供 (CC BY-SA 2.5) 經修改

    3

    必睇景點:小威尼斯

    喺海旁嘆希臘美食

    小威尼斯 (Little Venice) 以懸於海面嘅 18 世紀釣魚屋而聞名,而家大多數屋仔都已經有餐廳、Café、酒吧同商舖進駐,朝頭早食肆會有大把位,但係到咗下晝同夜晚,你就要有心理準備同熱情嘅遊客迫喇。

    我哋強烈建議你提前 Book 定枱—如果你想一路品嚐正宗嘅希臘美食,一路細賞日落時分嘅粉紅同橙色霞彩,就更加唔可以懶啦!咁啱喺米科諾斯鎮落腳?只要沿住通向大海嘅狹巷漫步,就可以嚟到小威尼斯架喇,簡單又好玩。

    地點: Mykonos 846 00, Greece

    • 歷史文化`
    • 拍照
    4

    喺阿格拉里海灘放鬆身心

    去偏遠嘅沙灘帶避世

    相比起米科諾斯島 (Mykonos) 大多數海灘,阿格拉里海灘 (Agrari Beach) 到而家都唔算發達,而且係「天體」勝地,自然成為輕鬆自在嘅避世天堂,俾你「無遮無擋」咁曬日光浴,添上一身均勻嘅古銅膚色。喺呢一大片海灘上面,有一半地方都配置咗太陽傘同日光浴床,其餘範圍就得金黃色嘅沙粒,流淌住清澈見底嘅海水,景致賞心悅目!

    要嚟阿格拉里海灘,最簡單嘅方法係搭巴士去到以利亞海灘 (Elia Beach),再行大約 5 分鐘,越過岩石就到,雖然路程有啲辛苦,但可以喺米科諾斯島度過優悠愉快嘅一日,已經係最好嘅回報啦!

    地點: Agrari Beach, Mykonos 846 00, Greece

    • 伴侶
    • 家庭
    • 經濟實惠
    • 單人旅客

    相片由 karlygr 提供 (CC BY-SA 3.0) 經修改

    5

    欣賞歷史悠久嘅風車

    米科諾斯島上最古老嘅建築

    卡特米利 (Kato Myli) 磨穀風車都算係區內地標,俯瞰住小威尼斯 (Little Venice),歷史可以追溯到 16 世紀。每座風車都呈現白色圓筒形,配搭茅草屋頂,獨一無二!喺喬拉 (Chora) 嘅所有街道上面,幾乎都會見到其中 6 座風車;而如果你想爬上山近距離觀賞嘅話,就要小心山間強風。

    由卡特米利風車群向東行,短短 600 米外仲有一座波尼風車 (Boni’s Windmill),每年 7 月至 9 月對遊客開放。想深入了解風車呢項古早發明,同埋佢哋內部嘅運作原理,就要趁 9 月第二個星期日嘅豐收節參觀米科諾斯島 (Mykonos) 喇!

    • 家庭
    • 歷史文化`
    • 拍照
    6

    必睇景點:巴拉波特尼尼聖母教堂

    希臘最受歡迎嘅影相熱點之一

    米科諾斯島 (Mykonos) 當地人會話你知:島上有 365 間教堂,夠你全年一日去一間;之但係,最出名嗰間就梗係純白色嘅巴拉波特尼尼聖母教堂 (Panagia Paraportiani Church) 啦!呢座建築群實際上包含 5 間教堂,位於喬拉嘅卡斯楚 (Kastro) 街區入口處,喺 14、16 同 17 世紀逐漸建成,二樓由聖母教堂 (Panagia) 獨佔,

    地下其中一間教堂仔有對遊客開放,而且至今都仲係禮拜場所。巴拉波特尼尼聖母教堂固然係米科諾斯島不容錯過嘅景點,參觀嗰陣記得尊重其他人,尤其係信眾禱告期間,更加要保持莊嚴。

    地點: Mykonos 846 00, Greece

    開放時間: 每日 06:00 至 18:00

    • 拍照
    • 經濟實惠

    相片由 momo 提供 (CC BY 2.0) 經修改

    7

    坐船去希臘聖島

    探索提洛島嘅古代遺跡

    由米科諾斯島 (Mykonos) 出發搭渡輪,好快就會去到古希臘嘅聖島提洛島 (Delos)。相傳,呢度係希臘神祇阿耳忒彌斯 (Artemis) 同阿波羅 (Apollo) 嘅出生地嚟架!2,000 幾年前,大約有 30,000 個希臘人佔領咗呢度;時至今日,眼前就剩低相對保存完好嘅劇院、寺廟、房屋,同埋其他具有紀念意義嘅建築遺跡。自 1990 年以嚟,成座提洛島都納入咗聯合國教科文組織世界受保護文化遺產,

    由米科諾斯島過嚟大約需要 30 分鐘,而夏天每日都有幾班渡輪開出,班班迫爆!如果你想享受更加獨特嘅體驗,可以租遊艇去提洛島,但係費用就比較高昂喇 (笑~)。

    地點: Mykonos 846 00, Greece

    開放時間: 4 月至 10 月:每日 08:00 至 20:00

    • 伴侶
    • 家庭
    • 歷史文化`
    • 遊歷

    相片由 Ggia 提供 (CC BY-SA 3.0) 經修改

    8

    喺 Matogianni 血拼

    Window Shopping 都夠寫意

    Matogianni 係米科諾斯島 (Mykonos) 最熱鬧嘅巷仔,開滿咗各式各樣嘅商舖、餐廳,仲有營業至夜深嘅酒吧,嚟到雖然要同人迫吓,但都係值得嘅!街上所有店舖都保留咗島上傳統嘅基克拉迪 (Cycladic) 建築風格,而且貨色各適其適,既有奢侈品,亦有平價手信,

    就算你最憎人山人海,都建議你至少快快趣趣嚟呢度行番轉,Window Shopping 吓,之後再喺商舖之間嘅 Café 或者小酒館飲杯咖啡、嘆支啤酒,坐低 hea 番陣,感受地道風情。

    地點: Matogianni, Mykonos 846 00, Greece

    • 購物
    9

    大擦希臘生猛海鮮

    嘆盡小食,品嚐希臘多姿多彩嘅美食風味

    米科諾斯島 (Mykonos) 有好多希臘餐廳同歐洲餐廳,當中最出名嘅應該都係地中海美食、新鮮海產同 Mezze 料理文化,獨有菜餚包括「Kopanisti」香烤辣芝士,同埋用辛辣熟豬肉薄片製成嘅「Louza」。要數當地人嘅最愛,又點可以唔提希臘千層麵「Pastitsio」,同埋地位媲美漢堡包嘅希臘烤肉捲「Gyros」?

    想一次過試勻哂正宗希臘同地中海美食,首推主打 Mezze 菜式嘅 Captain's 海濱餐廳—呢間餐廳一向都由清晨營業到深夜;之不過,如果你想喺日落時分安坐海邊食餐飯,就建議你提前 Book 枱喇!

    地點: Mykonos Waterfront, Mykonos 846 00, Greece

    開放時間: 每日 07:00 至 23:00

    電話: +30 22890 23283

    地圖
    • 品嚐美食
    10

    最後一站:天堂海灘

    入夜 Party 之前,率先曬黑黑

    天堂海灘 (Paradise Beach) 係米科諾斯島 (Mykonos) 上最原始嘅「天體」海灘之一,而家周圍遍佈幾十間餐廳、酒吧同夜店,仲開到去柔滑嘅沙地上面添!沿住海岸向東行一細段路,就會嚟到超級天堂海灘 (Super Paradise Beach)—呢片海灘極受 LGBT 同志社群歡迎,而且人潮比較少;

    灘上最熱鬧嘅 Tropicana Club 夜店屢獲殊榮,每年吸引成千上萬嘅遊客嚟開 Party,亦都有世界知名嘅 DJ 同名人坐陣。雖然海灘躺椅本身唔收費,但都不妨帶定幾蚊歐羅喺身,隨時添飲 Cocktail 都好吖!

    地點: 希臘米科諾斯島天堂海灘

    開放時間: 4 月至 11 月:每日 16:30 至深夜

    電話: +30 22890 23582

    • 伴侶
    • 晚間娛樂
    • 豪華住宿
    • 單人旅客
    Joshua Saunders | 特約撰稿人

    開始計劃行程

    Maps