雅典歷史悠久,充滿文化魅力,集齊「難忘歐洲城市」同「休閒之旅」所需嘅要素,市內有古老建築、古蹟名勝、熱鬧社區,各適其適。無論係陽光明媚嘅溫暖朝早,定係生氣勃勃嘅涼爽夜晚,你都唔愁冇節目,

    既可以深入探索呢座城市嘅過去、沉醉於當地美食,亦可以同當地人一齊享受優悠氣氛,令每分每秒都極盡精彩!我哋整理咗 10 大休閒活動,啱哂呢個希臘首都頭一、兩日嘅行程,務求令你玩得充實。

    雅典最好玩嘅活動係乜嘢?

    1

    喺憲法廣場展開一日行程

    全城最重要嘅廣場

    • 歷史文化`
    • 拍照
    • 經濟實惠

    憲法廣場 (Syntagma Square) 既係遊覽雅典嘅理想起點,亦係市內最出名﹑最熱鬧嘅名勝之一!貴為全市交通樞紐,廣場周圍都係五星級酒店,之所以成為遊客以至當地人首選嘅聚腳點,原因顯而易見。

    講到廣場上最引人注目嘅焦點地標,就梗係憲法廣場噴泉 (Syntagma Fountain) 啦;而遠近馳名嘅無名戰士墓 (Tomb of the Unknown Soldier)、同埋宏偉壯觀嘅希臘議會大樓 (Hellenic Parliament) 都喺廣場上分庭伉禮。行到攰攰哋?附近街道林立數之不盡嘅商舖﹑Café 同餐館,歇腳啱哂!

    地點: Syntagma Square, Athens 105 63, Greece

    地圖

    相片由 Άργος 提供 (CC BY-SA 4.0) 經修改

    2

    喺無名戰士墓睇衛兵換崗儀式

    欣賞總統衛隊著住傳統服裝巡遊

    • 歷史文化`
    • 拍照
    • 經濟實惠

    憲法廣場 (Syntagma Square) 對面就係無名英雄墓 (Tomb of the Unknown Soldier),專為悼念殉國嘅希臘士兵而建,悲壯至極,有希臘埃夫宗 (Evzone) 總統衛隊全天候監察守護,每個鐘準點換崗一次。

    要數觀賞換崗儀式嘅最佳時間,肯定係星期日 11:00—到時,全隊埃夫宗精銳部隊都會著住傳統服裝 foustanella (白色打褶蘇格蘭裙),同軍樂隊合作完成典禮,記住早啲出發,霸定個靚位!

    地點: Leoforos Vasilisis Amalias 133, Athens 105 57, Greece

    地圖
    3

    必睇景點:雅典衛城

    最偉大嘅古希臘地標

    • 家庭
    • 歷史文化`
    • 拍照

    雅典衛城 (Acropolis) 被聯合國教科文組織列為世界文化遺產,歷史可以追溯到公元前 448 年,係西方世界最重要﹑最具影響力嘅古代遺址—未嚟過呢度,你嘅希臘之行又點算圓滿?不妨探究過去,靜心參觀呢座龐大壯觀嘅城堡,順便遊訪帕台農神廟 (Parthenon),令精彩旅程達致頂峰!

    衛城距離憲法廣場 (Syntagma Square) 20 分鐘步程,你可以搭的士慳返啲腳骨力,留返到埗之後再喺附近散步。喺衛城登頂嘅路線非常陡峭,夏天仲熱到暈添,記得要帶帽﹑太陽油同足量嘅水啊!

    地點: Acropolis of Athens, Athens 105 58, Greece

    開放時間: 每日 08:00 至 20:00 (11 月至 3 月開放至 15:00)

    地圖
    4

    喺雅典衛城博物館了解更多

    深探往昔

    • 家庭
    • 歷史文化`

    歷史悠久嘅雅典衛城 (Acropolis) 固然必遊,但係要真正欣賞呢個歷史遺蹟嘅宏偉奇觀,建議你去埋城堡南邊山腳下嘅雅典衛城博物館 (Acropolis Museum) 參觀!

    呢個寶庫珍藏咗超過 4,250 件文物,全部都係喺雅典衛城考古遺址嘅岩石上出土,歷經時間考驗。其中,館內頂層嘅帕台農神廟 (Parthenon) 雕塑畫廊算係一大亮點,千祈咪錯過!

    地點: Acropolis Museum, Dionysiou Areopagitou 15, Athens 117 42, Greece

    開放時間: 4 至 10 月:星期一 08:00 至 16:00,星期二至日 08:00 至 20:00 (星期五開放至 22:00)。11 月至 3 月:星期一至四 09:00 至 17:00,星期五至日 09:00 至 20:00 (星期五開放至 22:00)

    地圖
    5

    食 souvlaki 烤肉

    經典希臘菜

    • 品嚐美食

    Souvlaki 係傳統希臘菜,足以為你奉上感官盛宴,單係讀個名已經捲脷到抽筋,滿足感堪比菜式嘅濃郁滋味喺你味蕾跳動!之不過…呢樣到底係咩嚟架?Souvlaki 係肉質軟嫩嘅烤肉串,有時會夾喺 Pitta 麵包入面,行住食定坐低食都一樣咁啱。

    雅典市內不乏主打呢款多汁肉串嘅餐館同快餐店,而我哋推介距離憲法廣場 (Syntagma Square) 幾步路嘅 O Kostas,作為入門之選。

    6

    探索蒙塔斯提拉奇

    熱鬧繁華嘅跳蚤市場區

    • 伴侶
    • 家庭
    • 購物
    • 拍照
    • 經濟實惠

    蒙塔斯提拉奇 (Montastiraki) 位於雅典舊城區,係一個熙熙攘攘嘅跳蚤市場區,附近商舖﹑麵包店同傳統小酒館林立,任你探索,最啱隨心漫步其中,感受城市氛圍。

    呢區以蒙塔斯提拉奇廣場 (Montastiraki Square) 為中心;一場嚟到,可以順道參觀埋建於公元 132 年嘅哈德良圖書館 (Hadrian’s Library) 添!另一方面,蒙塔斯提拉奇開咗好多頂樓花園同酒吧,眺望雅典衛城 (Acropolis) 嘅壯麗景色。

    地圖
    7

    必睇景點:雅典中央市場

    售賣本地產品嘅繁華市集

    • 購物
    • 經濟實惠

    雅典中央市場 (Athens Central Market) 遠近馳名,以「色」、「香」、「味」引人入勝,主打肉類﹑鮮魚,仲有各式新鮮地道農產品,貨色齊全。除咗星期日之外,呢度日日營業,充滿生氣,繽紛熱鬧,充分體現希臘文化,

    雖然唔似得你所認知嘅典型遊客市集,冇賣俗氣手信,但係勝在本身已經極具魅力,會透過好多種方式,帶你感受地道風情。不妨喺場內穿梭探索,停低食吓嘢,又同店主講吓價吖!

    地點: Athens Central Market, Athinas, Athens 105 51, Greece

    開放時間: 星期一至六 07:00 到 18:00 (逢星期日休息)

    地圖

    相片由 Herbert Ortner 提供 (CC BY 4.0) 經修改

    8

    欣賞呂卡維多斯山景色

    飽覽雅典靚景嘅 No. 1 觀景點

    • 伴侶
    • 家庭
    • 拍照
    • 經濟實惠

    呂卡維多斯山 (Mount Lycabettus) 係樹木繁茂嘅白堊紀山,高高聳立,同市中心嘅建築擺埋一齊,難免顯得有啲格格不入。呢座山高達 277 米,係雅典 7 座山丘裡面最高嘅一座,值得一遊,而你仲可以喺山頂將城市全景盡收眼底添!

    自問體能唔錯,可以徒步攻頂;想慳返啲腳骨力嘅話,都有纜車俾你搭嘅。立足山頂,19 世紀聖喬治教堂 (Chapel of St. George)﹑露天劇院,甚至海鮮餐廳旋即映入眼簾。唔使問都知—呢度嘅焦點梗係無敵靚景啦!不妨晏少少上嚟,天氣涼啲,仲可以睇埋日落添。

    地圖

    相片由 George E. Koronaios 提供 (CC BY-SA 4.0) 經修改

    9

    喺普拉卡享用一流嘅「掟碟」晚餐

    食完傳統晚餐,仲可以試吓掟碟

    • 品嚐美食
    • 非一般行程

    你以為希臘人嘅「掟碟」儀式只會喺電影出現?非也…今時今日,普拉卡山坡 (Plaka) 附近風光明媚嘅區域都仲保留住呢個傳統,

    一場嚟到,又點可以唔試吓?Tavern Kalokerinos 之類嘅餐廳有舉辦正宗「希臘之夜」,俾你試勻傳統美食;而本地 Dancers 就會著住鄉土服裝表演。夜幕低垂,隨著舞台上杯碟橫飛,一番高潮又再掀起!

    地圖
    10

    喺加濟嘅 Rebetiko 表演場地結束一日行程

    體驗「希臘藍調」之音

    • 晚間娛樂

    嚟到至潮至 In 嘅加濟 (Gazi) 街區,你可以一邊聽 Rebetiko 音樂,一邊暢飲 Mythos 啤酒。呢區嘅街道兩邊林立餐廳﹑酒吧同 Café,每個角落都有現場音樂響起;

    其中,Rebetiko 係都市民俗音樂,喺 20 世紀興起,一路都係希臘最流行嘅傳統音樂流派,用好幾種弦樂器演奏,一般以布祖基 (bouzouki) 為主調,而佢即係曼陀林同吉他 Crossover 嘅樂器。

    地圖

    相片由 Badseed 提供 (CC BY-SA 3.0) 經修改

    Sadie Geoghegan-Dann | 特約撰稿人

    開始計劃行程

    Maps