伊奧尼亞海同愛琴海有 6,000 幾個希臘島嶼同島礁,雲集全歐洲最靚嘅海灘、自然奇觀同歷史遺跡。每年夏天,部分島嶼會化身 Party 勝地;而由於呢度一年四季都氣溫宜人,活動種類又多,探洞以至出海搵龜通通有得玩,所以無論乜嘢季節,都總有一個希臘島嶼樂趣滿 Fun!

    你想去天體海灘、參觀古城、食 Mezze 希臘料理,定係玩水上運動?希臘群島一定幫你夢想成真!呢個係我哋精選嘅希臘最佳島嶼名單,希望幫到你 Plan 下嚟緊嘅歷險旅程。

    1

    米科諾斯

    基克拉澤斯群島上嘅 Party 島

    • 拍照
    • 晚間娛樂
    • 單人旅客

    每逢旺季,米科諾斯島 (Mykonos) 都會成為基克拉澤斯群島 (Cyclades) 嘅終極「Party 島」,遠近馳名!之不過,島上嘅純白教堂﹑16 世紀風車,同埋綿延萬里嘅白色沙灘同樣具有獨特魅力嘅。

    你可以喺海濱享受傳統嘅希臘 mezze 餐飲氣氛同海鮮美食,又或者到訪米科諾斯鎮橫街窄巷上嘅商舖同小酒館,感受吓當地文化。想飲 Cocktail 到天光?天堂海灘 (Paradise Beach) 就係你必遊之地—每年夏天,呢個沙灘嘅夜店仲會請到世界知名嘅 DJ 嚟,炒熱全場!唔講唔知—呢區有好多隱世天體海灘,啱哂你邊 hea 邊曬日光浴,收穫一身健康小麥膚色。

    地圖
    2

    科孚島

    遊覽威尼斯風格遺址同寧靜葡萄園

    • 歷史文化`
    • 拍照
    • 遊歷

    科孚島 (Corfu) 喺 1864 年與同希臘統一,堪稱建築文化之鄉,處處盡顯當地喺英國﹑法國同威尼斯統治下嘅歲月痕跡。崎嶇嘅山巒映襯綠意盎然嘅景致,為海岸同僻靜海灣增添自然風光;而科孚島最古老村莊 Old Perithia 附近嘅葡萄園正正係幽靜嘅靈修同品酒勝地。

    沉醉歷史嘅你,不妨參觀科孚鎮嘅威尼斯碉堡要塞,同埋位於 Palaiokastritsa 嘅 13 世紀修道院;鍾意冒險嘅話,仲可以去埋 Sidari 試玩懸崖跳水同浮潛,又或者去水上樂園瘋返日;自問「勇氣與體力並重」,可以遠足登上 Pantokrator 山頂,飽覽海島全景。

    地圖
    3

    米洛斯島

    純淨不染嘅彩色之島

    • 歷史文化`
    • 拍照
    • 遊歷

    米洛斯島 (Milos) 係基克拉澤斯群島 (Cyclades) 上面嘅火山島,自然景觀未受破壞,因而贏得「彩色之島」嘅美譽。當地人歷年一直鍾情於岩山碧水嘅景色,但係呢座寧靜小島目前仍然冇乜點吸引海外遊客注目…

    或者,米洛斯島嘅海濱風光同脫俗地質先係最出名,你可以向薩拉基尼科 (Sarakiniko) 進發,喺白色火山岩所圍繞嘅海灣裡面曬吓日光浴;亦都可以去克列夫科 (Kleftiko),探索「水路限定」嘅洞穴同大片岩層。難得嚟到,不妨都喺米洛斯古老嘅地下墓穴漫步吖,佢嘅歷史可以追溯至 2,000 幾年前架!

    地圖
    4

    克里特

    歐洲最古老城市嘅所在地

    • 歷史文化`
    • 拍照
    • 遊歷

    克里特島 (Crete) 憑藉數之不盡嘅海灘、隱蔽嘅山坡小酒館同夏日 Party 氣氛而廣受國際遊客歡迎,而源於公元前 7,000 年嘅克諾索斯宮 (Palace of Knossos) 都吸引唔少歷史發燒友架!米諾 (Minoan) 宮殿同青銅時代嘅考古遺址令克里特島別樹一格,島上嘅山脈﹑峽谷同壯麗海灘何其寧靜,絕對係遠離煩囂人群嘅好去處。

    玩到餓餓哋?你仲可以體驗吓當地人嘅飲食文化,試食蝸牛,炸﹑蒸、燒煮法層出不窮;食飽飽喇,係時候喺公認為全球最正沙灘嘅 Elafonisi 海灘上面曬一身小麥膚色,然後去傳統小酒館飲返幾杯地道飲品,再喺馬利亞 (Malia) 夜蒲到天光!

    地圖
    5

    納克索斯島

    「希臘版」夏威夷

    • 伴侶
    • 歷史文化`
    • 遊歷

    納克索斯 (Naxos) 擁有將近 100 公里長嘅沙灘同清澈見底嘅海水,又有「希臘夏威夷」嘅美譽,除咗自然風光之外,區內歷史仲好悠久添!無他,呢度正正係中世紀威尼斯大宅﹑古希臘遺址﹑13 世紀山頂城堡,仲有一間間博物館嘅所在地。

    不妨去吓西岸玩盡水上運動、浮潛、曬日光浴,再喺舊城區嘅窄街漫步,選購當地商品,試勻外賣小吃吖。海灘、歷史兼冒險之旅完結後,係時候去海濱嘅傳統酒吧,飲返杯納克索斯柑橘口味利口酒—Kitron 喇!

    地圖
    6

    聖托里尼

    基克拉澤斯嘅火山島

    • 伴侶
    • 拍照

    聖托里尼島 (Santorini) 嘅峭壁多姿多彩,海灘紅黑相間,鄉郊葡萄園同巨型火山口相映成趣,絕對可以為一眾冒險家同觀光客帶嚟感官刺激之旅!呢座希臘小島嘅白色沙灘可能無鄰島咁多,但勝在擁有數之不盡嘅古蹟熱點﹑醉人風景,同埋佈滿白色屋仔同教堂嘅迷人山城小鎮。

    踏上全球最正嘅遠足徑,你可以睇盡古樸村莊﹑古老廢墟﹑陡峭懸崖同秀美風景,然後再搵間隱世小酒館,喺「火山臼」嘅崖頂小鎮品嚐地道小食同飲品。玩到攰攰哋,你仲可以搭船遊覽,又或者喺島上嘅溫泉鬆一鬆添!

    地圖
    7

    阿洛尼索斯島

    歐洲最大型嘅海洋公園

    • 遊歷

    阿洛尼索斯 (Alonissos) 擁有純淨不染嘅鵝卵石灘﹑天然洞穴,同埋歐洲最大型嘅海洋公園;其中,喬拉 (Chora) 就係阿洛尼索斯區內歷史最悠久嘅小鎮,位於山頂,可以飽覽島嶼全景。多得保育人士同埋義工嘅努力,阿洛尼索斯島已經成為生態遊客嘅首選目的地,

    你可以參加水肺潛水之旅,探望各種各樣嘅海洋生物,當中仲包括瀕臨絕種嘅和尚海豹添!鍾意行山?咁就要沿住幾十條步行徑,踏遍古樸嘅村莊﹑崎嶇嘅地形同山谷,再喺南部嘅田園地貌之中,搵吓橄欖樹﹑楓樹同松樹嘅蹤影。

    地圖
    8

    帕莫斯

    坐擁聯合國教科文組織洞穴嘅寧靜島嶼

    • 歷史文化`
    • 拍照
    • 遊歷

    帕莫斯島 (Patmos) 係愛琴海上嘅美麗小島,唔單止貴為基督教重要朝聖地,島上嘅洞穴仲被聯合國教科文組織列為世界文化遺產添!再加上隱世海灘,難怪呢度吸引尋求刺激嘅旅客同大自然發燒友紛紛湧至。

    其中,天啟洞 (Cave of Apocalypse;相傳係撰寫《啟示錄》嘅地方)﹑妙趣民俗博物館﹑16 世紀莊園,以至幾十座粉刷純白嘅修道院,通通都係不容錯過嘅地標;而島上最知名嘅景點就係聖約翰修道院 (Monastery of Saint John),歷史可以追溯到 11 世紀,雄據帕莫斯島舊城區嘅天際線,蔚為奇觀!

    地圖
    9

    羅德

    聯合國教科文組織世界文化遺產城市所在地

    • 歷史文化`
    • 拍照

    羅德島 (Rhodes) 嘅面積冠絕多德卡尼斯群島 (Dodecanese Islands),成個夏天都充滿活力,島上夜店吸引嚟自世界各地嘅「蒲友」;而中世紀城堡﹑古老廢墟﹑如畫村莊同幼沙海灘就令呢度一年四季都高踞「最受歡迎旅遊勝地」榜首位置。

    島上最大型、最古老嘅城市同樣叫做「羅德」,因為擁有豐富嘅文化底蘊同中世紀魅力,而被聯合國教科文組織列為世界文化遺產。除咗博物館、考古遺址同沙灘之外,羅德島嘅自然奇觀都好架勢,當中包括溫泉、茂密植被,同埋不容錯過嘅蝴蝶谷 (Butterfly Valley)。

    地圖
    10

    扎金索斯

    有如明信片嘅海灘,仲有海龜同水上運動等你探索

    • 拍照
    • 遊歷

    扎金索斯州 (Zakynthos) 西部同北部都丘陵起伏,東岸就遍佈全希臘最「上鏡」嘅海灘。白色嘅石灰岩懸崖、金色嘅沙灘同碧綠嘅海水照亮海底洞穴嘅頂巔,無疑令呢個島嶼澄麗有加;另一方面,島上林立一間又一間夜店,夏天嘅 Party 氣氛熾熱!

    扎金索斯被風景如畫嘅小島環繞,當中包括拉加納斯灣 (Laganas Bay;又叫做「海龜島」),可以俾你搭玻璃底船遊覽。如果你想了解呢區嘅歷史,不妨參觀埋島上嘅修道院同博物館吖;之後,你仲可以任揀幾十個海灘之一,曬吓太陽,玩盡刺激水上活動添!

    地圖
    Joshua Saunders | 特約撰稿人

    開始計劃行程

    Maps