柏林 10 大最好玩活動

柏林最出名嘅係乜嘢?

    貴為德國首都,柏林係歐洲最具標誌性嘅城市之一,始建於 12 世紀,歷史源遠流長,亦經歷過動盪,而家已經發展成融合創意、技術同文化嘅世界城市。柏林於 1990 年重新統一,保留自身歷史遺產,同時又有多姿多彩嘅景點,扣人心弦,亦值得國民引以為傲。

    由見證德意志民主共同國時期嘅亞歷山大廣場 (Alexanderplatz),到 19 世紀德意志帝國嘅德國國會大廈 (Reichstag Building) 古蹟建築,柏林帶你漫步往昔。歷年以嚟,柏林亦都不斷進步,晉身歐洲最熱門度假勝地之列,不妨參考下面嘅指南,睇睇應該由邊度起步,遊覽呢個迷人都會啦!

    柏林最好玩嘅活動係乜嘢?

    1

    喺亞歷山大廣場展開一日行程

    喺市內人流最旺嘅廣場開始旅程

    當地人暱稱佢做「Alex」嘅亞歷山大廣場 (Alexanderplatz) 係柏林最大型嘅公共廣場。廣場位於東柏林中心地段,係重要嘅公共交通樞紐,周圍環繞百貨公司同購物中心,你可以喺人民友誼噴水池 (Brunnen der Völkerfreundschaft) 附近嘅小食店坐低,欣賞吓市內僅存嘅社會主義城市美學,例如 365 米高嘅電視塔,同埋建於 1969 年嘅烏拉尼亞世界時鐘 (Urania World Clock) 等地標。

    地點: 位於市中心東部嘅城中區 (Mitte) 自治市鎮內

    地圖
    • 伴侶
    • 家庭
    • 歷史文化`
    • 拍照
    • 經濟實惠
    2

    必睇景點:布蘭登堡門

    參觀柏林最具代表性嘅歷史地標

    今時今日,布蘭登堡門 (Brandenburg Gate) 象徵和平統一,仲可能係柏林最經典嘅地標添!呢座 18 世紀新古典主義紀念碑同柏林嘅動盪歷史關係密切,每年除夕夜都吸引大約 100 萬人嚟到倒數慶祝。布蘭登堡門喺歷史上佔據重要地位,往往人頭湧湧,所以最好喺清晨時份嚟參觀,避開人群;而大門附近遍佈酒吧、餐廳同街頭小食檔,行幾耐都唔怕餓親啦!

    地點: 位於市中心西部、亞歷山大廣場 (Alexanderplatz) 以西 2.5 公里

    地圖
    • 伴侶
    • 家庭
    • 歷史文化`
    • 拍照
    • 經濟實惠
    3

    參觀博物館島

    喺柏林國家博物館遊走,穿梭歷史印記

    博物館島 (Museum Island) 嘅德文名係「Museumsinsel」,佢位於市中心嘅施普雷河 (Spree River) 北部,島上有 5 間世界級精選博物館,而北端嘅博物館建築群仲被聯合國教科文組織列為世界文化遺產,可以俾你漫步歷史之中添!博物館島既有由佩加蒙博物館 (Pergamon Museum) 保存嘅宏偉佩加蒙祭壇同巴比倫伊什塔爾大門 (Ishtar Gate of Babylon),又有喺新博物館 (Neues Museum) 內珍藏嘅娜芙蒂蒂胸像 (Bust of Nefertiti),的確值得一遊,不妨買張 3 日通行證,按照個人步伐隨心參觀。

    地點: 距離市中心亞歷山大廣場 (Alexanderplatz) 東南面 900 米

    開放時間: 星期二至日 10:00 至 18:00;逢星期一休息

    地圖
    • 伴侶
    • 家庭
    • 歷史文化`
    • 拍照
    4

    喺 Mauerpark 跳蚤市場行街

    感受柏林獨特嘅購物體驗

    嚟到 Mauerpark 跳蚤市場,你可以行吓街,食吓嘢,感受歌唱歡樂氣氛,度過正到爆嘅星期日!呢個熱鬧市集裡面有數之不盡嘅新舊貨品,由傢俬、服裝到古董都應有盡有,而主打地道同國際美食嘅攤檔亦唔少,不妨買啲野食,然後飲返杯啤酒或者葡萄酒,清清味蕾。到咗 15:00,係時候參加圓形劇場舉辦嘅卡拉 OK 演唱會,聽吓又唱吓!Mauerpark 嘅跳蚤市場極具人氣,又潮又開心,難怪成為柏林必到景點之一。

    地點: 亞歷山大廣場 (Alexanderplatz) 以北 2 公里嘅普倫茨勞爾貝格區 (Prenzlauer Berg)

    開放時間: 星期日 09:00 至 18:00

    地圖
    • 伴侶
    • 家庭
    • 經濟實惠
    5

    必睇景點:國會大廈

    由歷史建築物欣賞柏林靚景

    國會大廈 (Reichstag Building) 建於 19 世紀末,係柏林城內歷史最悠久嘅建築物,位於布蘭登堡門 (Brandenburg Gate) 正北,90 年代曾經重建,屋頂加蓋咗大型玻璃穹頂,可以 360 度全方位睇盡柏林景色。如果你唔想排隊等入場,最好嘅方法係事先 Book 定觀光名額;而場內有提供好多種語言嘅語音指南,為你介紹國會大廈嘅歷史資料,仲會 Pin-point 喺圓頂見到嘅所有得意景點添!

    地點: 市中心西部布蘭登堡門以北 150 米

    開放時間: 每日 08:00 至 00:00

    電話: +49 (0)30 22 73 21 52

    地圖
    • 伴侶
    • 家庭
    6

    試食德國咖哩腸

    品嚐柏林當地最受歡迎嘅特色菜

    德國咖哩腸幾乎喺市內每個角落都買得到,係柏林、甚至全德國最具人氣嘅街頭小食,受歡迎到當地人要專程喺 Schützenstraße 街道嘅查理檢查哨 (Checkpoint Charlie) 附近設立博物館,歌頌佢嘅歷史!德國咖哩腸於 1949 年喺柏林發明,做法係將番茄醬、咖哩同其他香料製成嘅調味料,倒喺切成薄片嘅烤豬肉腸上,整好之後通常會放喺紙碟上面,用叉直接拮嚟食。要數品嚐正宗柏林德國咖哩腸嘅名店,首推位於 Schönhauser Allee 44B 嘅 Konnopke’s Imbiss,同埋位於 Mehringdamm 嘅 Curry 36

    • 伴侶
    • 家庭
    • 品嚐美食
    • 經濟實惠
    7

    必睇景點:大屠殺紀念館

    遊覽撼動人心嘅紀念館

    大屠殺紀念館 (Holocaust Memorial) 官方名稱係歐洲被害猶太人紀念館 (Memorial to the Murdered Jews of Europe),位於布蘭登堡門 (Brandenburg Gate) 正南方,會帶你深入了解呢場 20 世紀慘烈悲劇,並且向受害者致哀。館上嘅紀念碑由 2,711 塊唔同高度嘅混凝土板組成;一邊遊覽其中,一邊反思歷史教訓,你會有相當動人嘅感受。而紀念碑下面嘅博物館同樣極具啟發性,賺人熱淚。

    地點: 市中心西部布蘭登堡門以南 250 米

    開放時間: 戶外紀念碑全天候開放。博物館開放時間為星期二至日 10:00 至 20:00;逢星期一休館

    電話: +49 (0)30 263 9430

    地圖
    • 歷史文化`
    8

    喺選帝侯路堤大街 Shopping

    漫步柏林最熱鬧嘅商業街

    選帝侯路堤 (Kurfürstendamm) 大道全長 4 公里,由西面嘅 Beton-Cadillacs 紀念碑延伸至東面嘅威廉皇帝紀念教堂 (Kaiser Wilhelm Memorial Church),拍得上巴黎香榭麗舍大街 (Champs-Élysées)!呢條步行街環境怡人,到處都係精品店、餐廳、酒店、房車展廳同 Café,而且成條街種滿哂梧桐樹,形成重重樹影。雖然街上嘅商舖以高檔名店為主,不過你都仲搵到 Bershka 同 H&M 等等相對「貼地」嘅品牌嘅。順帶一提:柏林規模最大嘅百貨公司 KaDeWe 都係立足於選帝侯路堤大街架!

    地點: 柏林-夏洛滕堡 (Berlin-Charlottenburg) 火車站以南 600 米

    地圖
    • 伴侶
    • 家庭
    • 豪華住宿

    相片由 Fridolin freudenfett 提供 (CC BY-SA 3.0) 經修改

    9

    喺潘科區 (Pankow District) 嘅水塔附近食嘢

    發掘型格社區嘅飲食文化

    水塔 (Wasserturm) 位於普倫茨勞爾貝格 (Prenzlauer Berg) 嘅亞歷山大廣場 (Alexanderplatz) 以北 1.5 公里,悠久歷史冠絕全柏林,算得上係歷史地標,周圍仲有熱鬧嘅飲食區,供應各式佳餚。其中,Gugelhof 係喺 Knaackstraße 街上面開咗好耐嘅餐廳,主打阿爾薩斯 (Alsatian) 同德國南部菜式;Café Anna Blume 餐廳就型格十足,位於 Kollwitzstraße 同 Sredzkistraße 嘅轉角位,以早餐特別出名。如果你鍾意 fondue 火鍋同葡萄酒,仲可以試下 Sredzkistraße 街嘅 Ars Vini,佢哋供應嘅 fondue 類型選擇多到揀唔到,就連甜品都可以整成 fondue!

    地點: 亞歷山大廣場東北 1.5 公里

    地圖
    • 伴侶
    • 家庭
    • 品嚐美食
    10

    喺普倫茨勞爾貝格度過開心一晚

    遊走熱鬧社區裡面嘅各式酒吧

    普倫茨勞貝格 (Prenzlauer Berg) 係喺柏林狂歡一晚嘅好去處,單係科維茲廣場 (Kollwitzplatz) 以北嘅街道上面,就有好多地方俾你飲返杯:如果你鍾情啤酒,Danzigerstraße 街嘅 Monterey Bar 應該係你嘅首選,有至少 250 款德國啤同各國品牌啤酒任你揀;想物色型格又趣怪嘅聚腳點?Lettestraße 街嘅WohnZimmer 實啱你心水,成間酒吧裝修到好似跳蚤市場一樣,Cool 到爆;想喺柏林尋覓紐約 Old School 酒吧嘅氣氛,你仲可以去 Stargarder Straße 街嘅 Badfish Bar 飲吓嘢—嗰度嘅威士忌、精釀啤酒,以至超級 Nice 嘅店員同管理層都會令你嘅夜晚極盡精彩。

    地點: 亞歷山大廣場 (Alexanderplatz) 東北 2 公里

    地圖
    • 伴侶
    Stephan Audiger | 旅遊常客

    開始計劃行程

    Maps