德國幅員廣闊,有好多由中世紀遺留落嚟嘅迷人村莊同城鎮,最古老嗰啲自遠古羅馬時代就喺度㗎喇!南部區域坐擁巴伐利亞阿爾卑斯山白雪皚皚嘅美景,而北部風景如畫嘅湖泊城鎮就靠近漢堡同柏林等現代城市。

    呢啲地方一年四季都啱去;不過,如果你想欣賞經典雋永、跨越時空嘅靚景,就最好冬天出發喇!隆冬及至,白雪覆蓋中世紀建築,中心廣場化身熱熱鬧鬧嘅聖誕市集,感覺就好似時光倒流一樣。心動不如行動—而家就睇吓我哋精選嘅德國絢麗城鎮同村莊,嗱嗱臨 Plan 番轉德國童話之旅,瘋狂影相「打卡」啦!

    1

    陶伯河羅滕堡

    佈滿半木結構建築物嘅童話小鎮

    • 伴侶
    • 家庭
    • 歷史文化`
    • 拍照
    • 團體
    • 單人旅客

    陶伯河羅滕堡 (Rothenburg ob der Tauber) 距離斯圖加特東北 115 公里,係一座邊防城鎮,歷史可以追溯至中世紀時代,舊城區嘅鵝卵石街兩邊有由磚木建成嘅房屋同商舖,仲有一啲古蹟地標,例如市政廳 (Rathaus)、建築大師之家 (Baumeisterhaus) 同埋舊鐵匠工場 ( Gerlachschmiede)。

    冬日時份,市集廣場化身風景如畫嘅聖誕市集,仲有幾十個攤位出售裝飾品同德國美食添!陶伯河羅騰堡就好似童話場景一樣,難怪喺荷里活好多套電影都亮相過,計有 1968 年嘅《飛天萬能車 (Chitty Chitty Bang Bang)》、2010 年同 2011 年嘅《哈利波特之死神的聖物 (Harry Potter and the Deathly Hallows)》等等。

    地圖
    2

    什未林

    德國最細嘅州份首府

    • 伴侶
    • 家庭
    • 歷史文化`
    • 拍照
    • 經濟實惠

    什未林係梅克倫堡-西波美恩州 (Mecklenburg-Vorpommern) 嘅首府,周圍環繞住 7 個湖泊,鎮上有好多中世紀建築物都「避過一劫」,冇受到第二次世界大戰破壞。要數呢度最令人印象深刻嘅地標,什未林城堡 (Schwerin Castle) 絕對名列前茅,佢位於什未林湖 (Lake Schwerin) 同伯格湖 (Lake Burgsee) 之間嘅島上,

    附近仲有舊皇宮 (Altes Palais)、新古典風格嘅國家美術館 (State Art Museum)國家劇院 (Staatstheater) 等著名建築。每年夏天,什未林都會喺舊花園廣場 (Old Garden Square) 舉辦露天歌劇節,吸引古典樂迷湧至。

    地圖
    3

    巴特梅根特海姆

    德國南部嘅田園溫泉小鎮

    • 伴侶
    • 家庭
    • 歷史文化`
    • 拍照
    • 團體
    • 經濟實惠
    • 單人旅客

    巴特梅根特海姆 (Bad Mergentheim) 嘅礦泉水遠近馳名,好多人都會用佢嚟緩解胃灼熱同胃酸過多等症狀!一如德國嘅大多數村莊,巴特梅根特海姆都有鵝卵石路同建於中世紀嘅半木結構建築;而且,呢度仲係德國最大型嘅溫泉小鎮添!

    鎮上嘅溫泉公園 (Spa Park) 佔地 70,000 平方米,坐擁色彩繽紛嘅薰衣草同草藥田、玫瑰花園同日本庭園,任你探索。如果你想喺逗留期間 Keep 住做運動,巴特梅根特海姆亦都有好多條步行徑,全長 140 幾公里,其中嘅全景步道長約 18 公里,可以飽覽城鎮同周圍陶伯谷地 (Tauber Valley) 嘅絕世靚景。

    地圖

    相片由 Pierre André LECLERCQ 提供 (CC BY-SA 2.0) 經修改

    4

    呂貝克

    德國北部嘅聯合國教科文組織世界文化遺產

    • 伴侶
    • 家庭
    • 歷史文化`
    • 拍照

    呂貝克 (Luebeck) 源於 12 世紀,曾經係德國主要港口之一,而家獲聯合國教科文組織列為世界文化遺產,舊城區 (Altstadt) 內保存完好嘅基督教建築往往吸引遊客湧至。鎮上嘅中世紀區林立 7 座教堂尖塔,其中一座就係以末哥德式同巴洛克風格建成嘅呂貝克大教堂 (Lübecker Dom),悠久歷史冠絕全市!

    呂貝克出名生產用杏仁粉同糖 (有時用蜂蜜) 製成嘅杏仁糕 (marzipan) 麵包,當地仲開設咗一間杏仁糕博物館,正正位於 Café Niederegger 咖啡廳二樓。

    地圖
    5

    特里爾

    參觀德國最大型嘅羅馬大教堂

    • 伴侶
    • 家庭
    • 歷史文化`
    • 拍照
    • 團體
    • 單人旅客

    特里爾 (Trier) 喺德國最古老嘅城鎮之一,由羅馬人喺公元前 1 世紀建立,鎮上嘅羅馬建築數量冠絕全歐洲,最具代表性嘅名勝包括黑門 (Porta Nigra) 城門、特里爾圓形劇場 (Trier Amphitheater),同埋 3 個羅馬浴場遺址,又以市內大教堂為必睇景點,皆因全長 67 米嘅羅馬皇帝君士坦丁大帝寶座 (Roman Emperor Constantine) 大廳就喺呢座教堂裡面!

    特里爾亦都係德國人氣極旺嘅葡萄酒產區,出名生產摩澤爾 (Moselle) 葡萄酒,周圍有幾十座葡萄園,會開辦導賞團同品酒會,為呢座迷人小鎮更添特色。

    地圖
    6

    班伯格

    品嚐班伯格嘅 Rauchbier 煙熏啤酒

    • 伴侶
    • 家庭
    • 歷史文化`
    • 拍照
    • 團體
    • 經濟實惠
    • 單人旅客

    班伯格 (Bamberg) 位於法蘭克尼亞 (Franconia),由 7 座山丘組成,每座山丘都有專屬教堂,俯瞰住呢座中世紀小鎮。鎮內舊城區經已列入聯合國教科文組織世界文化遺產,皆因呢度保留咗好多 11 至 19 世紀興建嘅拱形橋樑,同埋美輪美奐嘅建築物。要數班伯格最出名嘅地標,一定唔少得班伯格大教堂 (Bamberg Cathedral),佢以晚期羅馬風格建成,亦都係亨利二世國皇 (Emperor Henry II) 同教宗克勉二世 (Pope Clement II) 長眠之地。另一方面,阿爾滕堡城堡 (Altenburg Castle) 坐落全鎮最高嘅山丘上,歷史可以追溯到 1109 年,截至 1553 年前都係班伯格主教嘅住所。

    班伯格嘅傳統釀酒廠馳名遠近,如果你想飲返杯德國啤酒,就一定要試吓煙熏啤酒 Rauchbier,係 SchlenkerlaSpezial出品嘅喇!

    地圖

    相片由 rey perezoso 提供 (CC BY-SA 2.0) 經修改

    7

    貝希特斯加登

    遠足到德國最凍嘅湖泊—芬滕斯湖

    • 伴侶
    • 家庭
    • 拍照
    • 遊歷

    想度過一段冬季假期?貝希特斯加登 (Berchtesgaden) 嘅山區村莊係你必遊之地!呢度以巴伐利亞阿爾卑斯山 (Bavarian Alps) 嘅壯麗景色聞名,你可以玩盡各種戶外活動,例如喺貝希特斯加登國家公園 (Berchtesgaden National Park) 滑雪,又或者喺國王湖 (Königssee Lake) 揸帆船。村內亦有幾英里長嘅遠足徑,其中一條可以通往全德國最凍嘅地方—芬滕斯湖 (Funtensee)

    貝希特斯加登嘅市集廣場一般都好熱鬧,日頭會有銅管樂隊奏樂,仲有著住巴伐利亞服裝嘅小朋友表演民間舞蹈添。由貝希特斯加登向東南偏東揸車 10 分鐘,就會嚟到大名鼎鼎嘅第三帝國 (Third Reich) 時代建築,包括上薩爾茨堡山 (Obersalzberg) 同希特拉嘅鷹巢 (Eagle’s Nest)

    地圖
    8

    麥森

    德國境內嘅「布拉格風」景致

    • 伴侶
    • 家庭
    • 歷史文化`
    • 拍照
    • 團體

    麥森 (Meissen) 係緊站德國接壤捷克邊界嘅古樸小鎮,地貌似足布拉格,最顯眼嘅建築係 15 世紀嘅亞伯茲堡 (Albrechtsburg)麥森大教堂 (Meissen Cathedral),兩者都可以俯瞰易北河 (Elbe River)。另一方面,麥森亦都以出產全德國最優質嘅瓷器聞名,鎮上仲開設咗博物館,展示源於 18 世紀嘅精美瓷器。

    一年四季,麥森嘅慶祝活動多不勝數,例如 9 月下旬嘅葡萄酒節 (Weinfest) 就有現場音樂同撒克遜葡萄酒產區品酒會,歌頌鎮上嘅葡萄酒收成。

    地圖
    9

    雷根斯堡

    有自家啤酒節嘅巴伐利亞小鎮

    • 伴侶
    • 家庭
    • 歷史文化`
    • 拍照
    • 團體
    • 經濟實惠
    • 單人旅客

    雷根斯堡 (Regensburg) 係列入聯合國教科文組織世界文化遺產嘅巴伐利亞小鎮,亦都係少數未被第二次世界大戰破壞嘅城鎮之一,源於中世紀,俯瞰多瑙河 (Danube River),市貌由古羅馬、羅馬風同哥德式建築交織組成。雷根斯堡舊城區相當好行;沿路之上,你仲會見到老石橋 (Old Stone Bridge)聖伯多祿大教堂 (St. Peters Cathedral) 等等嘅歷史建築添!

    另一方面,雷根斯堡嘅表演藝術氣息濃厚,雷根斯堡劇院 (Theater Regensburg) 舉辦嘅世界一流歌劇、芭蕾舞、輕歌劇同音樂劇表演全年無休。鎮上另一項極具人氣嘅活動,就係雷根斯堡多特小型啤酒節 (Regensburg Dult),氣氛拍得上慕尼黑啤酒節 (Oktoberfest),每年兩度上演,通常喺 5 月同 9 月初舉行,歷時兩星期。

    地圖
    10

    林道

    德國南部島鎮

    • 伴侶
    • 家庭
    • 歷史文化`
    • 拍照
    • 經濟實惠

    林道 (Lindau) 位於德國南部,坐落德國同奧地利邊界之間嘅小島上面,可以遠眺博登湖 (Bodensee;又名 Lake Constance) 嘅如畫靚景,又以夏天為旅遊旺季,皆因湖面屆時會成為遊船同游水嘅熱門勝地。另一方面,博登湖單車徑 (Bodensee-Radweg) 全長 260 公里,環繞湖泊,啱哂踩單車觀光!

    鎮中心滿佈以半木結構建成嘅房屋同歷史建築物,當中嘅林道燈塔 (Lindau Lighthouse)、同埋喺 12 世紀建成嘅 Mangturm 塔都可以欣賞到林道同博登湖嘅全景。要數林道最獨特嘅建築物,13 世紀嘅盜賊塔 (Thieves Tower) 一定榜上有名,佢前身係一座監獄塔,上面鋪著顏色鮮艷嘅瓦磚,絢麗得格格不入。

    地圖
    Penny Wong | 旅遊常客

    開始計劃行程

    Maps