慕尼黑係全世界數一數二嘅啤酒之都,亦係歐洲嘅釀酒中樞!識飲嘅你,一定要去一年一度嘅慕尼黑啤酒節 (Oktoberfest),喺人山人海嘅啤酒帳篷入面飲返夠本;每年暑假,當地人都鍾意去啤酒花園暢飲,一樣咁爽。除咗「隊啤」,你仲可以參觀巴洛克同文藝復興時期嘅大教堂,同埋建於 12 至 18 世紀嘅豪華皇宮—呢啲建築物大部分都位於市中心,有好多行人路同單車徑經過,交通方便。

    慕尼黑市中心四周圍遍佈公共廣場同花園,觀光行足成日,可以坐低品嚐惹味嘅德國美食、糕點,嘆返杯咖啡,好寫意架!不妨參考我哋嘅指南,睇吓慕尼黑有咩最佳景點、好玩活動、嶄新嘗試,把握數之不盡嘅影相「打卡」機遇啦。

    慕尼黑最好玩嘅活動係乜嘢?

    1

    喺瑪利亞廣場展開一日行程

    欣賞 Rathaus-Glockenspiel 鐘樓表演

    瑪利亞廣場 (Marienplatz Square) 嘅歷史可以追溯到 12 世紀初,而家仲成為慕尼黑市中心最繁忙嘅地標之一添!呢個中世紀廣場採用哥德式設計,飾有滴水嘴石像,場中心嘅立柱撐住聖母瑪利亞嘅雕像,周圍都有好多值得影相「打卡」嘅景點。如果你喺 11:00、12:00 或者 17:00 嚟到呢度,不妨去瑪利亞廣場北邊嘅 Rathaus-Glockenspiel 鐘樓,欣賞電動雕像喺塔內表演跳舞同比武丫!冬季時份,廣場中央會架設起聖誕市集 (Christkindlmarkt),通常喺聖誕節前 3 個星期就開始營業,非常熱鬧。

    地點: Marienplatz 1, 80331 Munich, Bavaria, Germany

    地圖
    • 家庭
    • 歷史文化`
    2

    必睇景點:慕尼黑皇宮

    欣賞文藝復興同巴洛克時期嘅畫作真跡、陶器、掛毯同宗教寶物

    慕尼黑皇宮 (Munich Residenz) 係巴伐利亞最令人印象深刻嘅宏偉宮殿之一,值得你用幾個鐘頭探索宮內嘅 14 世紀建築物、庭院同花園。宮殿裡面有 130 間房,當中包括博物館、兩層高嘅禮拜堂、祖傳畫廊、金庫同宴會廳;而呢啲房室好多都以古董傢俬、壁畫同掛毯裝飾,歷史可以追溯到文藝復興時期、新古典主義時期同巴洛克時期添架!由瑪利亞廣場 (Marienplatz Square) 輕鬆步行 1 公里,就會嚟到慕尼黑皇宮。

    地點: Residenzstraße 1, 80333 Munich, Bavaria, Germany

    開放時間: 每日 09:00 至 18:00

    電話: +49 (0)89 290 671

    地圖
    • 伴侶
    • 歷史文化`

    相片由 Jiuguang Wang 提供 (CC BY-SA 2.0) 經修改

    3

    去馬克西米利安大街購物

    喺高檔社區嘅名店 Shopping

    馬克西米利安大街 (Maximilianstrasse) 係一條優雅嘅海濱長廊,亦係慕尼黑「有錢一族」嘅據點,由巴伐利亞國王馬克西米利安二世 (King Maximilian II of Bavaria) 於 1850 年建造,距離瑪利亞廣場 (Marienplatz Square) 只需步行 5 分鐘。時至今日,呢度已經成為名店街,兩邊都係珠寶店、五星級酒店同美術館;區內亦都有唔錯嘅餐廳同 Cafe 選擇,好多間仲可以飽覽到馬克西米利安大街嘅新哥德式建築添!如果你唔多鍾意買名牌,都可以去上巴伐利亞議會 (Upper Bavarian Parliament) 同國家人類學博物館 (State Museum of Ethnology) 參觀一下。

    地點: Maximilianstrasse, 80331 Munich, Bavaria, Germany

    地圖
    • 家庭
    • 歷史文化`
    • 豪華住宿
    4

    必睇景點:德意志博物館

    喺遊客 DNA 實驗室提取 DNA 進行測試

    伊薩爾河 (Isar River) 上嘅德意志博物館 (Deutsches Museum) 科學技術展覽令人印象深刻,值得你用幾個鐘頭探索一番!呢座六層高嘅博物館佔地超過 70,000 平方米,雲集各式互動展覽、實驗室同現場演示;館內仲設有名人堂,紀念著名科學家同諾貝爾得獎者,例如愛因斯坦、海森堡 (Werner Heisenberg)、威廉·倫琴 (Wilhelm Conrad Röntgen)、馬克斯·普朗克 (Max Planck) 同奧托·哈恩 (Otto Hahn)。遊客可以喺德意志博物館參加 DNA 分離課程,逢星期六 15:00 開始;而其他活動當然同樣多姿多彩啦!

    地點: Museumsinsel 1, 80538 Munich, Bavaria, Germany

    開放時間: 每日 09:00 至 18:00

    電話: +49 (0)89 217 9333

    地圖
    • 歷史文化`

    相片由 Julian Herzog 提供 (CC BY 4.0) 經修改

    5

    喺英國公園唞一唞

    喺慕尼黑最大嘅啤酒花園品嚐 Hofbräu 啤酒

    英國公園 (Englischer Garten) 位於慕尼黑市中心一座 18 世紀城市公園裡面,佔地 50,000 平方米,係休息、慢跑同踩單車等等活動嘅人氣熱點,而 25 米高嘅「Chinesischen Turm」中式塔樓園算係園內最重要嘅景點之一。如果想睇靚景,可以去附近嘅慕尼黑第二大啤酒花園,任揀 7,000 張面向塔樓嘅花園長椅之一,坐低 hea 吓。另一方面,地道正宗嘅日本茶館位於英國公園南端嘅小島上面,為訪客呈獻傳統茶道藝術。

    如果天氣溫暖,你間中仲可能會喺日本茶館旁邊嘅 Schönfeldwiese 廣闊草地上,見到一大班人曬天體日光浴添—呢個景象喺夏季好常見,想冒險嘗新嘅你,不妨試下!

    地點: Verwaltung des Englischen Gartens München, 80538 Munich, Bavaria, Germany

    開放時間: 每日 07:00 至 20:00

    電話: +49 (0)89 217 9333

    地圖
    • 家庭
    • 歷史文化`
    • 經濟實惠
    6

    穀物市集嘅小食

    喺歷史悠久嘅農貿市集買新鮮農產品、芝士同肉類

    穀物市集 (Viktualienmarkt) 歷史悠久,源於 1823 年,算係慕尼黑最古老嘅購物熱點之一,場中心有一支五彩繽紛嘅五朔節花柱,上面擺咗各種著住傳統服裝嘅小雕像,別具特色!市集裡面大約有 140 個攤位,出售嘅產品幾乎應有盡有,包括新鮮肉類、海鮮、生果、手工製芝士、葡萄酒同香腸等等;場內仲有一個光猛通風嘅啤酒花園,可以俾你喺度飲返一、兩杯冰鎮啤酒,試食傳統德國小吃。

    有別於大多數市集,穀物市集大部分攤位閒日 18:00 就收檔,星期六就喺 15:00 休息,所以最好朝早參觀,先可以體驗到熱鬧蓬勃嘅氣氛!

    地點: Viktualienmarkt 3, 80331 Munich, Bavaria, Germany

    開放時間: 星期一至五 10:00 至 18:00,星期六 10:00 至 15:00 (逢星期日休息)

    地圖
    • 家庭
    • 歷史文化`
    • 經濟實惠
    7

    寶馬博物館

    欣賞德國招牌車廠嘅復古車款

    寶馬博物館 (BMW Museum) 展出咗呢間知名汽車公司嘅 100 幾種車款,當中包括電單車、跑車同貨車。博物館本身以「未來世界」為設計概念,場館好似一隻銀色大碗咁,由慕尼黑任何一座高層建築物都可以見到佢嘅 BMW 招牌標誌。另一方面,寶馬博物館同寶馬世界 (BMW Welt) 直接相連—呢個未來主義陳列室展出最新汽車型號,10:15 至 16:30 有開辦英文同德文導賞團,為遊客講解精彩點滴。

    地點: Am Olympiapark 1 & 2, 80809 Munich, Bavaria, Germany

    開放時間: 星期二至日 10:00 至 18:00 (逢星期一休息)

    電話: +49 (0)89 125 016 001

    地圖
    • 家庭
    • 歷史文化`
    8

    品嚐蘋果酥卷

    參觀巴伐利亞咖啡館,品嚐慕尼黑最好味嘅蘋果酥卷

    蘋果酥卷 (Apfelstrudel) 就好似叉燒酥咁鬆脆可口,不過裡面換咗蘋果餡,面層撒上糖粉,暖笠笠奉客。蘋果酥卷好可能源於奧地利,但喺慕尼黑好多咖啡館同市集都搵得到,上面嘅配料層出不窮,包括雪糕、雲呢拿醬同吉士醬等等。我哋誠意推介位於特埃蒂娜教堂 (Theatinerkirche St. Cajetan) 下面嘅 Cafe Arzmiller—自 1948 年開業以來,呢度供應嘅蘋果酥卷同咖啡一直深受當地人推崇架!

    地點: Theatinerhof–Salvatorstr.2 80333 Munich, Bavaria, Germany

    開放時間: 星期一至六 08:30 至 18:30;星期日 10:00 至 18:00

    電話: +49 (0)89 294 273

    • 伴侶
    • 家庭
    • 品嚐美食
    • 經濟實惠
    9

    必睇景點:阿薩姆教堂

    欣賞畫家阿薩姆嘅壁畫《聖內波穆克的一生》

    阿薩姆教堂 (Asamkirche) 建於 18 世紀,由阿薩姆家嘅雕塑家 Egid Quirin Asam 同畫家 Cosmas Damian Asam 兩兄弟設計建造,坐落於 Sendlinger Strasse 街上,係德國國內保存得最完整嘅巴洛克式建築之一,飾有大細天使嘅雕刻、鍍金柱同大型傢俱,而鍛鐵大門後面仲展示咗唔少宗教文物添!要數呢度嘅特色之一,大型天花壁畫肯定榜上有名,上面描繪咗聖約翰·內波穆克 (Saint John Nepomuk) 嘅一生。阿桑教堂向公眾開放,遊客可以入嚟觀光同參加彌撒。不過,我們強烈建議你喺清晨嚟參觀,避開旅客人潮。

    地點: Sendlinger Strasse 32, 80331, Munich, Bavaria, Germany

    開放時間: 每日 08:00 至 18:00

    電話: +49 (0)89 236 87 989

    地圖
    • 伴侶
    • 家庭
    • 歷史文化`
    • 經濟實惠
    10

    喺慕尼黑著名嘅啤酒館同啤酒花園結束一日活動

    欣賞正宗嘅 Oompah 風格樂隊表演

    慕尼黑嘅啤酒館好受歡迎,算係飲返杯 hea 吓嘅好地方!呢類型嘅室內啤酒館好多都會釀造自家啤酒,仲有賣德國腸 (bratwurst)同椒鹽脆餅 (pretzel) 等等嘅地道小食。Hofbräuhaus 喺慕尼黑人氣極旺,創於 1589 年,當時仲係巴伐利亞王國嘅皇家啤酒廠添!每到夏季,慕尼黑區區都有嘅啤酒花園 (Biergartens) 旋即人頭湧湧,大家都會喺度享受陽光。

    地點: Hofbräuhaus, Platzl 9, 80331 Munich, Bavaria, Germany

    開放時間: 每日 09:00 至 00:00

    電話: +49 (0)89 29 0136 100

    • 品嚐美食
    • 經濟實惠

    相片由 Carla Wosniak 提供 (CC BY 2.0) 經修改

    Penny Wong | 旅遊常客

    開始計劃行程

    Maps