科隆 (Cologne) 嘅旅遊活動宜古宜今,又以萊茵河 (River Rhine) 西岸嘅舊城區特別好玩!踏足狹窄嘅鵝卵石街,全市最型最潮嘅酒吧、精品購物街、博物館以至歷史建築統統映入眼簾,

    風格各有不同,舉凡又嘈又熱鬧嘅 Pub、啱哂靜思冥想嘅畫廊、以至大型商場同獨立小店,你將會周旋喺簡約樂趣同奢華體驗之間。另一方面,科隆亦都係「大學城」同文化之都,面積之廣屬德國數一數二,民風亦最開放自由,絕對係休閒度假嘅理想勝地!

    科隆最好玩嘅活動係乜嘢?

    1

    喺聖安妮絲區展開一日行程

    喺科隆傳統得嚟又時尚嘅舊城區行街

    漫步科隆 (Cologne) 中心地帶嘅舊城區 (Old Town),無疑係一種有趣經歷,而聖安妮絲 (Agnesviertel) 社區特別值得一提—呢度結合歷史古蹟同波希米亞風情,某程度上可以話係集「潮流」同「傳統」於一身,北城門 (North City Gate)、Fort X 同宏偉嘅聖安妮絲教堂 (Agneskirche) 旁邊,林立住獨立酒吧、美術館、名店同書店,有排你行!

    而如果你搭 U-Bahn 地鐵去到埃伯特廣場站 (Ebertplatz),一落車就會置身於科隆最精彩嘅「Veedel」傳統街區景點之間,行幾分鐘去到舊消防局 (Alte Feuerwache),可以參觀政治展覽,行吓充滿異國風情嘅跳蚤市場 (佢哋淨係喺夏天每隔 4 星期架設一次架咋~)。諾伊斯街 (Neusserstrasse) 酒吧大道、呂貝克街 (Lübeckerstrasse) 富有藝術氣息嘅戲院,同埋埃伯特廣場都喺附近,當中唔少地方遍佈色彩繽紛嘅古典建築同鵝卵石街道,為舊城區更添姿彩。

    • 歷史文化`
    • 拍照
    • 經濟實惠
    2

    必睇景點:科隆大教堂

    拜訪東方三王

    科隆大教堂 (Cologne Cathedral) 係德國最多人到訪嘅地標,一方面係因為好多基督徒都鍾意嚟呢度朝聖—耶穌啱啱出世嗰陣,有三位賢士由東方遠道而嚟送禮,而佢哋合稱三王 (Three Kings),所屬聖龕自從 1164 年就安放喺教堂裡面架喇!另一方面,大教堂採用哥德式建築,宏偉瑰麗,難怪成日人頭湧湧,入面可能會有啲迫,勝在由內到外都仍然散發令人敬畏嘅氣息,

    除咗古老嘅金色聖龕之外,16 世紀彩色玻璃窗、10 世紀藝術品同埋 14 世紀黑色大理石雕刻聖壇同樣造工精緻,值得細賞。只要俾少少入場費,你仲可以行埋上去大教堂嘅南塔,攀沿 509 級樓梯,用大約 1 個鐘行到頂樓。呢段行程都需要有返咁上下體力,記得著對舒服鞋,先好起行。之不過咁,上到塔頂,望見靚到絕嘅如畫風景,乜都抵返晒啦!

    地點: Domkloster 4, 50667 Cologne, Germany

    開放時間: 星期一至日 06:00 至 19:30

    地圖
    • 歷史文化`
    • 拍照
    • 經濟實惠
    3

    喺霍亨索倫大橋上表達愛意

    將你個心鎖喺欄杆上面,掉走埋條鎖匙

    單係霍亨索倫大橋 (Hohenzollern Bridge) 本身嘅工業作用,都足以令佢魅力非凡啦!呢座繫拱橋全長大約 400 米,由 3 個橋拱組成,位於科隆大教堂同現代化商廈科隆三角大廈 (KölnTriangle) 之間,俾行人同火車跨越萊茵河 (Rhine)。霍亨索倫大橋同科隆其他橋樑之所以截然不同,皆因佢被席捲歐洲嘅「愛情鎖」風潮佔據,

    情侶、夫妻但凡嚟到橋上,都會將寫咗個名縮寫嘅鎖頭扣喺行人路邊嘅欄杆度,然後將鎖匙掉落橋下條河—唔出動到重型器械,都冇人撬得開你兩個嘅感情啊!大家用呢種方式去表達永恆不變嘅愛,變相增加咗大橋承受嘅重量,亦都搞到歐洲個別橋樑倒塌…好彩,霍亨索倫橋由結實嘅材料建造,雖然扣上嘅鎖頭估計已經有 2 噸重,橋身依然未有變形跡象。

    地圖
    • 伴侶
    • 經濟實惠
    • 非一般行程
    4

    萊茵河觀光遊船之旅

    由另一角度欣賞城市歷史中心

    幾百年嚟,氣勢磅礡嘅萊茵河 (River Rhine) 對科隆 (Cologne) 都至關重要,雖然內河貿易而家冇以前咁繁盛,但係船艇仍然係遊覽科隆歷史中心嘅重要交通工具,一般由霍亨索倫大橋 (Hohenzollern Bridge) 向南出發,經過科隆大教堂 (Cologne Cathedral)、迷人舊城區 (Old Town),同埋歷經翻修嘅雷瑙港 (Rheinauhafen) 舊海港區。當區嘅現代建築別緻精巧,係模仿舊時嘅貨櫃起重機設計架!經過大約 1 個鐘頭嘅優悠巡航,你就會嚟到古老漁區羅登基興 (Rodenkirchen)。

    地圖
    • 伴侶
    • 家庭
    • 拍照
    5

    喺朱古力博物館自製糖果

    喺朱古力博物館品嚐自己親手整嘅糖果

    科隆朱古力博物館 (Imhoff-Schokoladenmuseum) 同我地喺《朱古力獎門人 (Willy Wonka)》入面睇到嘅未必一樣,但都相差唔遠架喇!呢座博物館同瑞士蓮 (Lindt & Sprüngli) 朱古力公司合作營運,被譽為世界上最頂尖嘅朱古力博物館之一,館內有介紹可可豆嘅歷史,講解點樣將苦澀嘅可可豆變成食完開心哂嘅甜品,另設種植可可樹嘅溫室,仲有好多將可可豆製成朱古力嘅迷你版機器,成個製作流程搬到訪客眼前,肯定令你眼界大開!

    地點: Am Schokoladenmuseum 1A, Rheinauhafen, Cologne, Germany

    開放時間: 星期二至五 10:00 至 18:00;星期六至日 10:00 至 19:00 (逢星期一休館)

    電話: +49 (0)221 9318880

    地圖
    • 伴侶
    • 家庭
    • 歷史文化`
    • 品嚐美食

    相片由 Arminia 提供 (CC BY-SA 3.0) 經修改

    6

    喺舊城區飲啤酒、食芝士黑麥麵包

    嘆當地啤酒,試萊茵蘭嘅簡樸特產

    講到科隆 (Cologne) No. 1 嘅地道美食,又點少風行德國各大城市嘅啤酒配麵包?具體啲講,應該係用本地釀製嘅稻草色 Kölsch 比爾森啤酒配搭「Halve Hahn」,大擦一餐!「Halve Hahn」字面意思係「半隻公雞」,實際上係柔軟嘅黑麥麵包捲,裡面夾咗好厚嘅一舊高達芝士,通常會加埋洋蔥條同芥辣伴碟,

    簡單而踏實,又以舊城區 (Altstadt) 嘅出品最佳。舊城區有好多傳統「Kneipen」酒吧,仲有幾間始創釀製 Pale Lager 淡啤酒嘅啤酒廠,鍾意邊間任你揀。德國嘅飲酒場地出名好玩,活力四射,而科隆舊城區嘅酒吧梗係唔例外啦!

    開放時間: 大部分酒吧由 11:00 開到深夜,實際時間因個別店家而異

    地圖
    • 品嚐美食
    7

    製作屬於自己嘅古龍水

    向專家偷師,深入了解知名香水嘅由來

    古龍水英文名係「Cologne」,同科隆 (Cologne) 同名,諗都諗到係呢度嘅名產啦!古龍水嘅正確名稱叫「Eau de Cologne」,係 18 世紀由約翰法利納 (Johann Maria Farina) 發明嘅香水,極具標誌性。如果你自問創意滿分,咁就一定要去 4711 嘅旗艦店玩吓—逢星期四 15:00 開始,呢間歷史悠久嘅香水店都會舉辦為時 90 分鐘嘅研習班,由駐場專家教你點樣將科隆嘅芳香清水混合其他香味,創造專屬於你嘅香水。呢啲公開課程淨係用德文授課,但你都可以安排英文或者法文嘅私人課堂嘅!

    由 4711 行 6 分鐘左右,去到市政廳 (Rathaus) 附近仲有一間博物館,專門介紹科隆嘅招牌古龍水,館內嘅 45 分鐘導賞團會帶你遊覽全球現存最古老而保留完好嘅香水廠。

    地點: Glockengasse 4, 50667 Cologne, Germany

    開放時間: 星期一至六 09:30 至 18:00 (逢星期日休息)

    電話: +49 (0)221 27099910

    地圖
    • 伴侶
    • 歷史文化`
    • 豪華住宿
    8

    喺 Globetrotter 購物中心 Shopping

    行戶外用品店,試啱先買

    Globetrotter 係遍佈德國各地嘅知名連鎖購物中心,專賣戶外服裝同用品,而科隆 (Cologne) 舊城區呢間 Outlet 仲擁有獨特設施,「零舍不同」!如果你想買件新外套,要點先知道自己揀得啱唔啱呢?你可以喺步入式淋浴間測試佢嘅防水性能,又可以行入冷藏室,睇吓件衫嘅禦寒效果如何,仲可以喺 4 層購物中心最底嘅水池撐獨木舟,試吓好唔好 Feel。

    大部分戶外裝備名牌都可以喺 Globetrotter 搵到,當中亦都有比較平價嘅選擇,貨色包羅萬有,靴、外套、背囊、旅遊書、單車以至登山裝備都一應俱全。另外,購物中心入面嘅餐廳仔會定期舉辦特別活動,既有工作坊,亦會請嘉賓演講。熱索探索戶外活動嘅你,又點可以錯過呢個殿堂級景點?

    地點: Richmodstraße 10, 50667 Cologne, Germany

    開放時間: 星期一至六 10:00 至 20:00 (逢星期日休息)

    電話: +49 (0)221 2772880

    地圖
    • 購物
    • 非一般行程

    相片由 ZH2010 提供 (CC BY-SA 3.0) 經修改

    9

    必睇景點:納粹文獻中心

    深入了解科隆近代歷史

    如果大教堂帶你認識咗科隆 (Cologne) 輝煌嘅過去,咁納粹文獻中心 (NS Documentation Centre) 就集中於呢座城市相對近代史上嘅黑暗一面。場館位於阿佩爾霍夫廣場 (Appellhofplatz),望落一啲都唔起眼,仲曾經係蓋世太保 (Gestapo) 秘密警察喺當地嘅總部,而家改為陳列常設展覽,展示科隆喺納粹主義制度下嘅面貌,

    雖然可能會令人不安,但係你一定獲益良多。博物館嘅地牢,正正係德國呢段殘酷年代之內保存得最完好嘅監獄同審問中心之一,囚室牆上有大約 1,800 個由囚犯刻上嘅銘文,至今依然清晰可見。館內較高樓層就展出咗蓋世太保掌握嘅市民資料文件,另外仲有一個大型圖書室同文檔庫。

    地點: Appellhofplatz 23-25, 50667 Cologne, Germany

    開放時間: 星期二至五 10:00 至 18:00;星期六至日 11:00 至 18:00

    電話: +49 (0)221 22126332

    地圖
    • 歷史文化`

    相片由 Bryan MacKinnon 提供 (CC BY-SA 4.0) 經修改

    10

    喺比利時區結束一日行程

    喺舊城區至潮地帶品嚐美酒佳餚

    想買絕無僅有嘅手信、獨一無二嘅時裝?去科隆嘅比利時區 (Belgian Quarter) 就啱晒喇!喺舊城區 (Old Town) 東部嘅亞琛大街 (Aachener Straße) 同弗里森廣場 (Friesenplatz) 之間,所有街道都係以比利時嘅地名命名,以紀念德國贏出 1870 至 71 年間嘅法普戰爭。嗰幾條街開滿至 In 嘅精品店、美術館、現場音樂表演場地同劇院,

    而且交通方便,搭 U-Bahn 地鐵去魯道夫廣場站 (Rudolfplatz) 或者弗里森廣場站 (Friesenplatz) 都一樣咁近。「血拚」過後,記得順便遊覽同區中心地帶嘅布魯塞爾廣場 (Brüsseler Platz) 喎—呢個廣場環繞迷人嘅聖彌額爾教堂 (Saint Michael Church),場內酒吧同餐廳林立,係科隆 (Cologne) 後生仔嘅聚腳勝地嚟架!

    • 購物
    • 歷史文化`
    • 晚間娛樂

    相片由 Bordeaux 提供 (CC BY-SA 3.0) 經修改

    Ben Reeves | 旅遊常客

    開始計劃行程

    Maps