巴黎係適合一家大細度假嘅好地方,就算有啲小朋友會嫌市內數之不盡嘅知名博物館同地標悶悶哋,呢度都仲有各式各樣嘅景點同活動,肯定會令大人細路樂而忘返!我哋講緊嘅,梗係唔止市郊鼎鼎大名嘅主題公園啦—

    由室內短片廊、科學博物館,以至室外遊樂園、動物園等等,通通都會為你嘅小朋友帶嚟畢生難忘嘅旅程。咁就不如跟住我哋,虛擬遊覽巴黎最適合家庭暢玩嘅地方啦!

    1

    巴黎迪士尼樂園

    去歐洲至 Hit 主題公園玩餐勁

    巴黎迪士尼樂園 (Disneyland Paris) 位於巴黎以北 32 公里,建築群佔地 19 平方公里,廣闊無邊,揉合咗迪士尼樂園 (Disneyland Park) 同華特迪士尼影城 (Walt Disney Studios Park) 特色,分成好多個主題區域,包括 Frontierland、Adventureland、Fantasyland、Toon Studio 等等,而每區都有刺激嘅遊樂設施同過山車。要數樂園最受歡迎嘅景點,「加勒比海盜 (Pirates of the Caribbean)」、「小小世界 (It’s a Small World)」、「巨雷山 (Big Thunder Mountain)」、「星戰極速穿梭 (Star Wars Hyperspace Mountain)」等等肯定榜上有名;而園內遍佈住宿、餐館同商舖,玩耐啲都得!

    地點: Disneyland Paris, 77777 Marne-la-Vallée, France

    開放時間: 每日 10:00 至 23:00

    地圖
    • 家庭
    • 拍照
    2

    維萊特公園

    多嘢睇、多嘢玩嘅公園

    維萊特公園 (Parc de la Villette) 位於巴黎市中心東北 5 公里,有多姿多彩嘅活動上演,一家大細各適其適!講到園內嘅兩大主力景點,又點可以唔提科學與工業城 (Cité des Sciences et de l'Industrie 或 City of Science and Industry) 同埋 Géode IMAX 戲院?維萊特公園免費入場,適逢氣候溫暖,呢度就最適合散步;而園內嘅大型兒童遊樂場 Dragon's Garden 亦都深得小朋友歡心。自問係「藝文青」?公園裡面仲有好多文化景點,例如露天戲院同現場音樂表演場地,你一定樂而忘返!

    地點: 211 Avenue Jean Jaurès, 75019 Paris, France

    開放時間: 每日 06:00 至 01:00

    地圖
    • 家庭
    • 經濟實惠
    3

    阿斯特里克斯公園

    喺大熱遊樂園裡面,坐時光機返去鐵器時代

    離開巴黎市中心,去到北面 35 公里外,你就會嚟到阿斯特里克斯公園 (Parc Astérix),可以探索法國經典漫畫人物嘅世界!呢個主題樂園設有大約 40 個景點,包括 6 座過山車同 4 個水上遊樂設施,帶你返去鐵器時代嘅高盧 (Gaul);另外仲有魔術表演、角鬥士戰鬥,同埋養殖古老動物品種嘅農場,歡樂氣氛滿瀉。園內有 4 間酒店同 6 家餐廳,你嚟玩足一日、甚至玩多幾日都仲得!

    地點: Parc Astérix, 60128 Plailly, France

    開放時間: 4 月至 10 月 10:00 至 18:00 (全年開放時間唔同)

    地圖
    • 家庭
    • 拍照
    4

    國家自然歷史博物館

    參觀世界上最豐富嘅動物駭骨收藏庫

    國家自然歷史博物館 (National Museum of Natural History) 好玩有趣,充滿教育意義,絕對係你必遊嘅親子景點!呢座博物館建於 1793 年,毗鄰植物園,樓高 3 層,收藏咗各式各樣嘅恐龍駭骨、植物、昆蟲等等,無論裝修定係氣氛,都令人感覺有如置身於《翻生侏羅館 (Night at the Museum)》電影場景!館址附近嘅花園環境怡人,啱哂漫步遊覽,而且仲設有小型動物園;而博物館旁邊有一間戶外露台餐廳,有籐架遮蔭,係夏天嘅乘涼好去處。

    地點: 57 Rue Cuvier, 75005 Paris, France

    開放時間: 星期三至一 10:00 至 18:00 (逢星期二休息)

    地圖
    • 家庭
    • 拍照
    • 經濟實惠

    相片由 Benh LIEU SONG 提供 (CC BY 3.0) 經修改

    5

    Playmobil FunPark 遊樂園

    令 2 至 12 歲嘅細路仔夢想成真

    而家就帶你嘅小朋友嚟呢個大型室內遊樂場玩餐飽啦!Playmobil FunPark 遊樂園位於巴黎市中心以南 12 公里嘅大型購物中心裡面,滿載各種各樣嘅 Playmobil 玩具,分成好多個主題遊樂區,而且入場費仲抵到爛,只需 EUR3 咋!場內有好正嘅 Café 餐廳,亦都有間手信小店—唔使問都知,呢度嘅 Playmobil 玩具梗係「買之不盡」啦!Playmobil FunPark 遊樂園大受歡迎,成日人山人海,建議你最好閒日早啲去到,避過週末人潮。

    地點: 24 Allée des Jachères, 94260 Fresnes, France

    開放時間: 星期二至日 10:00 至 19:00 (逢星期一休息)

    地圖
    • 家庭
    • 經濟實惠
    6

    巴黎動物園

    參觀乾淨整齊嘅動物園

    到咗而家,巴黎動物園依然被稱為「溫森斯動物園 (Vincennes Zoo)」,位於市中心東南 6 公里,搭地鐵好快就到。呢座動物園佔地 14.5 公頃,擁有 4,000 平方米嘅溫室,營造熱帶雨林氣候;園內乾淨易行,仲可以俾你親眼見證小動物獲得妥善照顧添!最常見嘅獅子、長頸鹿同馬騮之類梗係見得到,而呢度亦都有啲稀有物種,例如海牛同切葉蟻,令人大開眼界。行到攰攰哋,不妨去園內嘅餐廳同手信店唞返吓吖!

    地點: Avenue Daumesnil, 75012 Paris, France

    開放時間: 每日 09:30 至 20:30

    地圖
    • 家庭
    • 拍照

    相片由 Guilhem Vellut 提供 (CC BY 2.0) 經修改

    7

    巴黎兒童樂園

    Old-school 樂趣

    巴黎兒童樂園 (Jardin d’Acclimatation) 位於巴黎市中心以西 7 公里,又型又正,早在 1860 年落成,雖然係有啲「Out」,但係園內 40 個景點同遊樂設施依然樂趣不減,當中包括農場仔、騎馬仔遊戲、迷你過山車、鏡廳,仲有科學館同埋藝術館,啱哂細路仔。你可以搭迷你火車,喺 19 公頃嘅公園裡面遊走;而園內設有 5 間餐廳同 6 個美食攤檔,你玩足一日都唔驚餓親啦!

    地點: Rue du Bois de Boulogne, 75116 Paris, France

    開放時間: 星期一至五 10:00 至 19:00;星期六至日 10:00 至 20:00

    地圖
    • 家庭
    • 拍照
    8

    La Tête dans les Nuages

    向歐洲最大型嘅機舖之一進發

    La Tête dans les Nuages 字面意思解做「雲中頭角」,係一間佔地 1,500 平方米嘅遊戲機舖,位於巴黎市中心,啱哂鍾意打機或者追尋刺激嘅你,可以嚟呢度玩盡各款街機遊戲,另外亦都有桌上足球、迷你保齡球同桌球等等嘅運動 games,各適其適。呢間遊戲機中心位置優越,附近有好多餐飲選擇,玩幾耐都唔怕餓親啦!

    地點: 5 Boulevard des Italiens, 75002 Paris, France

    開放時間: 星期一、二及四 11:00 至 00:30;星期三及日 10:00 至 00:30;星期五 11:00 至 02:00;星期六 10:00 至 02:00

    地圖
    • 家庭
    9

    發現宮

    喺宏麗宮殿裡面遊覽科學博物館

    發現宮 (Palais de la Découverte 或 Discovery Palace) 科學博物館佔地 25,000 平方米,位於巴黎市中心美輪美奐嘅大皇宮 (Grand Palais) 裡面,滿載精心設計嘅常設展覽同互動實驗,帶你更深入了解天文學、生物學同化學等主題。而且,呢間博物館仲設有 15 米高嘅圓頂天文館,係好好玩嘅娛樂教育中心;唯一缺點就係真人演繹嘅展覽淨係得法文版本,小編聽唔明啊~!

    地點: Avenue Franklin Delano Roosevelt, 75008 Paris, France

    開放時間: 星期二至六 09:30 至 18:00;星期日 10:00 至 19:00 (逢星期一休館)

    地圖
    • 家庭
    • 拍照

    相片由 Lionel Allorge 提供 (CC BY-SA 3.0) 經修改

    10

    比特紹蒙公園

    喺幽靜嘅公園漫步

    比特紹蒙公園 (Parc des Buttes-Chaumont) 地勢較高,可以飽覽巴黎嘅遼闊景色。呢個公園佔地大約 25 公頃,種咗各種各樣嘅植物同樹木,而且仲有源於 19 世紀嘅壯麗人造建築添!園內嘅人工湖同附帶瀑布嘅大型石窟,都為公園增添魅力,而且仲有好多地方俾小朋友玩「伏匿匿」;而木偶劇院同露天遊樂場都好受細路仔歡迎架!公園裡面有 3 間食肆選擇,唔驚會餓親。

    地點: 1 Rue Botzaris, 75019 Paris, France

    開放時間: 每日 07:00 至 21:00

    地圖
    • 家庭
    • 拍照
    • 經濟實惠

    相片由 Traktorminze 提供 (CC BY 3.0) 經修改

    Stephan Audiger | 旅遊常客

    開始計劃行程

    Maps