夏天嚟到巴黎,你可能會有「獨佔全市」嘅霸氣感覺 (笑~),皆因唔少巴黎人到時都會去咗其他地方度假,令到市內各處少人啲,氣氛又輕鬆啲。喺涼爽嘅氣溫下,你由清晨到深夜都可以充分享用市內嘅公園同室外休憩區設施,兼玩盡「光之城」喺 6 月至 9 月所舉辦嘅繽紛活動同節慶。

    一於除低冬裝,同我哋一齊出發,親身探索夏天遊覽巴黎嘅強大理由啦!時值夏季,除咗喺海灘上面散步或者瘋狂「血拚」,你亦都會有唔少趣怪得嚟超正嘅機會,喺法國巴黎玩餐飽。

    1

    喺夏日沙灘節去海灘 Hea 返吓

    夏日炎炎,你知唔知巴黎市中心邊個沙灘最啱休閒放鬆呢?巴黎市政廳每年 7 月至 8 月都會喺塞納河 (Seine River) 河畔舉辦夏日沙灘節 (Paris-Plage),俾遊客喺市政廳前面嘅塞納河畔公園 (Parc Rives de Seine),同埋城市東北面嘅葉維特水道大池 (La Villette Canal Basin) 赤足漫步沙灘。只要鋪層幼沙,加啲躺椅、太陽傘同埋棕櫚樹,河堤旋即化身沙灘,而小食飲品攤同埋獨木舟等活動場地亦都近在咫尺。

    • 家庭
    • 經濟實惠
    • 非一般行程

    相片由 S. Faric 提供 (CC BY 2.0) 經修改

    2

    參加音樂電影節

    無可否認,巴黎夏日最多喜慶節目,6 月中至 8 月底仲會吸引成大班音樂發燒友嚟到,參加一系列大型戶外音樂節添!由 6 月嘅巴黎世界音樂節 (Fête de la Musique)、爵士音樂節 (Paris Jazz Festival)、Lollapalooza Paris 以至塞納河搖滾節 (Rock en Seine),巴黎嘅夏季充滿搖滾氣息。而電影迷一定會鍾意喺拉維萊特公園 (Parc de La Villette) 草坪舉行嘅露天電影院節 (Open-Air Cinema),皆因可以免費睇精選電影吖嘛!

    • 拍照
    • 晚間娛樂

    相片由 Anthony Molina 提供 (CC BY-SA 4.0) 經修改

    3

    夏季嘅巴黎繁忙又安靜

    雖然咁講可能會有啲矛盾,但係巴黎嘅夏季又真係繁忙而安靜架喎!喺悠長暑假期間,唔少巴黎人都會離開城市,去其他地方度假,令公共交通同埋市區街道相對安靜;另一方面,巴黎夏天迎嚟大批遊客,艾菲爾鐵塔 (Eiffel Tower) 同埋羅浮宮博物館 (Le Louvre) 等一眾地標都會排晒長龍。想避開巴黎嘅旅客人潮,不妨預先喺網上買定飛,早啲起身,揀啱最佳遊覽日子,又或者行吓啲冇咁出名嘅景點都得。

    4

    夏天係巴黎嘅大特價季節!

    夏日折扣季嘅法文叫做「les soldes」,每年 7 月初至 8 月底舉行,貨品定價低至原價三至七折架!只要提前做定 Research,就會搵到有賣最多啱心水商品嘅店鋪。記得要喺開賣第一日晨早到埗,做足準備,先可以喺人群之中瘋狂 Shopping!講樣得意嘢你聽:夏日折扣季嘅折扣優惠會逐步遞增:第一個星期大約係七折,去到仲夏期間係四折左右,最後喺 8 月底仲會減至兩折添,就算嚟到夏日折扣季尾聲,依然大把平嘢買!

    • 購物
    5

    喺艾菲爾鐵塔底野餐

    戰神廣場 (Parc du Champs de Mars) 係艾菲爾鐵塔 (Eiffel Tower) 周圍嘅公共綠化地帶,佔地 300,000 平方米,堪稱夏日最佳野餐勝地,可以俾你喺「鐵娘子」腳下嘅草坪度休閒 Hea 吓。不妨去戰神廣場 300 米以外聖多明尼克大道 (Rue Saint-Dominique) 嘅 Le Champ des Délices 買件三文治,再去 Le Repaire de Bacchus 買枝酒,然後返嚟草地,搵個啱心水嘅據點,一邊野餐,一邊沉醉喺當下環境之中,度過難忘一午吖!

    • 伴侶
    • 家庭
    • 拍照
    6

    喺塞納河遊船河嘅最佳時機

    唔使問都知,本身已經大受歡迎嘅塞納河 (Seine River) 遊船河之旅,嚟到夏天肯定人氣倍增啦!7 月至 8 月期間,巴黎氣溫大約係 16°C 至 25°C,而塞納河遊船 (bateaux mouches) 嘅甲板就化身至正嘅日光浴場地,仲可以俾你一路睇盡巴黎嘅地標,包括巴黎聖母院 (Notre-Dame Cathedral)、艾菲爾鐵塔 (Eiffel Tower) 同埋羅浮宮博物館 (Louvres Museum) 等等,行程精彩。

    • 伴侶
    • 家庭
    • 拍照
    7

    喺 Café 露台細賞時光流轉

    講到一年之中最啱喺巴黎市中心 Café 露台嘆咖啡嘅季節,絕非夏天莫屬,一於坐低飲啖咖啡,細味時光流轉吖!浪漫巴黎,點少得經典 Café?小編誠意推薦以下三間,絕對不容錯失:

    • Café de Flore 1880 年喺聖日耳曼林蔭大道 (Boulevard Saint-Germain) 開業,因為 1940 年代畢加索 (Picasso) 成日喺度「打躉」而聞名;
    • Le Fouquet's 係位於香榭麗舍大街 (Avenue des Champs-Élysées) 嘅 Café,同所處街區一樣咁豪華,嚟到飲咖啡固然係獨特體驗,不過消費絕對唔低;
    • Café Beaubourg 對面就係聖梅里街 (Rue Saint-Merri) 嘅蓬皮杜藝術中心 (Pompidou Centre),店外露台每年夏天都成為極具人氣嘅聚腳點。
    • 伴侶
    • 品嚐美食
    8

    夜探巴黎

    巴黎大多數古蹟同建築物都有燦爛嘅燈光裝飾,夜晚別有另一番風味!叫得「光之城」,巴黎絕對實至名歸,難得夏季氣候溫暖,你入黑之後都仲可以舒適自在咁遊覽市內各處。不妨沿住塞納河 (Seine River),喺新橋 (Pont Neuf) 同埋蘇利橋 (Pont de Sully) 之間漫步,細賞巴黎聖母院大教堂 (Notre-Dame Cathedral) 嘅璀璨華燈,同埋沿河兩岸舊式建築交織出嚟嘅瑰麗景色吖?唔想行路嘅話,就要留意塞納河遊船嘅運行時間—每年 4 月至 9 月,遊船服務都會喺 22:30 結束。

    • 伴侶
    • 拍照
    • 晚間娛樂
    Stephan Audiger | 旅遊常客

    開始計劃行程

    Maps