我哋嘅巴黎旅遊懶人包羅列出你需要嘅基本資料,幫你 Plan 定法國行程,向各大人氣熱點進發!無論你去旅行去得幾密,都要留意以下問題:當地天氣係點?點樣由機場去酒店?需要邊種貨幣同插頭?我哋會為你提供所有答案,同場加映最佳旅遊時機、交通資訊、各類基本資料,同埋實用旅遊貼士,

    一切盡在呢份巴黎旅遊懶人包之中。睇完呢份簡短易明嘅指南之後,你嘅巴黎旅程應該就準備得七七八八架喇!

    1

    去巴黎嘅最佳時機 (天氣方面)

    • 巴黎屬於海洋性氣候,冬天溫度最低 2ºC,夏天就大概 25ºC。
    • 10 月同 5 月算係雨季,不過全年都有雨落。
    • 春天同夏天係當地嘅旅遊旺季,酒店同機票價格都會相應上漲。
    • 9 月係最佳遊覽時機,皆因到時市內溫度怡人,而且降雨量少。
    2

    巴黎基本資訊

    • 語言:法文
    • 插頭類型:C、E 同 F 型
    • 電壓:220-240 V
    • 貨幣:歐元 (EUR)
    • 國際電話代碼:+33 1
    3

    城市交通

    戴高樂機場

    戴高樂機場 (Charles de Gaulle Airport) 係法國嘅主要交通樞紐,距離巴黎東北面 25 公里,繁忙程度喺歐洲排名第二。

    • 城市交通:所有客運大樓都會連接巴黎嘅 RER 站 (區域快速網絡) 同埋 TGV 站 (高速火車),載你去到全國大部分地方。而開往巴黎市中心同巴黎迪士尼樂園 (Disneyland Paris) 嘅巴士、的士,以至租汽公司亦都近在咫尺。搭的士由 CDG 機場去市中心需要 75 分鐘,車費大約 EUR60。


    奧利機場

    奧利機場 (Orly) 係法國嘅第二國際機場,亦都係最繁忙嘅內陸機場,位於巴黎以南 17 公里。

    • 城市交通:奧利機場經由 RER (區域快速網絡)、巴士同旅遊巴連接市中心以至巴黎周圍嘅其他地方。你亦都可以租車自駕,經連接機場嘅 A106 高速公路輕鬆抵達市中心。搭的士去巴黎市中心大約需要 40 分鐘,費用係 EUR35 左右。


    博韋提耶機場

    如果你搭包機或者廉航過嚟,好可能會喺博韋提耶機場 (Beauvais-Tillé Airport) 降落。呢個國際機場距離巴黎 85 公里。

    • 城市交通:搭旅遊巴的話,只需大約 80 分鐘就去到巴黎市中心,費用係 EUR17,經濟實惠。你亦都可以搭的士去最近嘅火車站 (4 公里) 轉搭火車,只需 125 分鐘左右就去到巴黎,車費大約 EUR20。最後仲有個貴啲嘅方法,就係直接由機場搭的士去巴黎,車程 70 分鐘,費用大約係 EUR170。


    巴黎火車站

    巴黎有至少 7 個火車站,每個站都會根據各自嘅位置,為特定區域服務:

    • Gare du Nord (北站) 係最重要嘅火車站,歐洲之星 (Eurostar) 就係喺呢度連接巴黎同倫敦,亦有班次往來法國北部同比利時。
    • Montparnasse 主要為法國西部服務。
    • Austerlitz 主要為法國中部同埋西南部服務。
    • Gare de l’Est 連接法國東部、德國同埋瑞士。
    • Gare de Lyon 主要為法國東南部服務。
    • Saint-Lazare 負責諾曼第 (Normandy) 地區。
    • Bercy 連接法國南部、法國東南部同埋意大利。
    4

    巴黎市內交通

    旅遊貼士

    只要買張 Paris Visite Travel Pass,你就可以輕鬆遊覽巴黎喇!呢張通行票可以用 1 至 5 日,俾你搭地鐵、巴士、電車、RER 同埋郊區火車網絡,當堂慳唔少錢。巴黎市中心一日通行票嘅價格大約係每位成人 EUR12;如果你打算參觀大部分景點,不妨買張巴黎通行證 (Paris Pass),除咗搭公共交通工具之外,仲可以俾你免費入場、或者用優惠價參觀 60 幾個景點,同埋參加觀光團添!你可以喺所有地鐵、RER 同電車站、部分巴士站同便利店售票機,同埋/或者有人駐場嘅櫃枱買車票同旅遊通行證。

    相片由 Łukasz Pojezierski 提供 (CC BY-SA 3.0) 經修改

    5

    搭地鐵遊巴黎

    巴黎地鐵 (全名係「巴黎大都會鐵路公司」) 喺 1900 年啟用,係歐洲最繁忙嘅地鐵系統之一,喺 90 平方公里嘅區域裡面已經有成 245 個車站,密集程度冠絕全球!

    • 單程票可以喺地鐵同 RER 網絡使用,有效期係 2 個鐘
    • 成個網絡總共有 16 條線路,全部都用數字同埋顏色標識,而方向就會由終點站嘅站名指示
    • 列車平日由 05:30 開到 00:30,而週末會開到 02:15
    6

    搭巴士出遊

    巴黎有 69 條巴士路線,同地鐵一樣咁方便,仲可以俾你透過車窗欣賞巴黎景色添!

    • 單程票統一收費,喺巴士網絡裡面嘅有效期係 90 分鐘
    • 如果你無車飛,可以問司機買
    • 只要喺前門上車,再透過自動售票機驗證車飛,又或者向巴士司機出示通行證就得
    • 乘客會喺中門或者後門落車
    • 巴士站有地圖,可以幫你搵到適用路線
    • 所有線路都用數字同埋顏色標識,而方向就會由終點站嘅站名指示
    • Noctilien 負責提供巴黎嘅夜班巴士服務,總共有 48 條路線,由 00:30 開到 05:30

    相片由 Mariordo 提供 (CC BY-SA 3.0) 經修改

    7

    搭的士

    巴黎大約有 18,000 架持牌的士,你亦都可以用 Uber App 叫車。

    • 想搭的士嘅話,最簡單嘅方法就係去巴黎 500 個的士站之一上車
    • 如果 50 米以內都無的士站,喺街邊都可能截到的士嘅
    • 大多數持牌的士都可以用信用卡俾錢,但最好都係喺上車之前問吓司機先喇
    • 望吓的士車頂:綠燈表示係空車,而紅燈就係已經載客
    8

    租車

    如果你打算留喺巴黎市中心,租車並唔係最好嘅選擇:巴黎交通擠迫,停車場又少,而且泊車費可以好貴添架!

    相片由 Mariordo 提供 (CC BY-SA 3.0) 經修改

    開始計劃行程

    Maps