巴黎羅浮宮博物館 (Musée du Louvre) 可能係世界上最出名嘅博物館,難怪遊客人數冠絕全球,而羅浮宮附近亦都有唔少熱門酒店任你揀。有咗以下 5 大貼士,你嘅旅程就更加順利無阻啦!

    1

    參觀建築物

    羅浮宮 (Louvre) 中央金字塔 (Pyramid) 門口嗰條人龍,幾乎同博物館本身一樣咁出名 (笑~)!想喺金字塔入口買張門票,有時要排成個鐘頭隊,不過都無損每日 15,000 位遊客嘅參觀雅興。事實上,羅浮宮仲有其他四個入口嘅,你又知唔知喺邊?

    如果你唔想排咁耐隊,不妨試吓去皇家橋 (Pont Royal) 以東獅子門 (Porte des Lions)、里沃利街 (Rue du Rivoli) 99 號、卡魯索凱旋門 (Arc du Carousel) 嘅入口,又或者直接由羅浮宮皇家博物館 (Palais Royal-Musée du Louvre) 地鐵站 (1 號線平台) 入嚟啦。

    只要喺 FNAC 等等嘅百貨公司提前買定入場券,就可以避開人龍喇;不過,預先購票係會收返幾蚊歐羅服務費嘅!

    2

    超值門票

    羅浮宮 (Louvre) 嘅入場費係 EUR15,而只要俾 EUR17 上網買飛,就可以快速入場,唔使排長龍架喇!未滿 18 歲嘅小朋友全年免費入場,而逢星期五晚未滿 26 歲嘅遊客亦都免收入場費;嚟到每個月嘅第一個星期六 (18:00 至 21:45) 同埋法國國慶日 (7 月 14 日全日),博物館仲全面免費開放添,只係各個展廳到時都肯定人頭湧湧啫。

    3

    由專家為你講解

    羅浮宮 (Louvre) 佔地龐大,入面有成 35,000 件藝術品380,000 件館藏,想行勻哂所有展廳,唔覺唔覺就用足一日時間,更加唔使諗睇得哂所有藝術品喇!

    所以,要概括了解呢座巨型博物館,其中一個好方法就係參加全日唔同時間由金字塔 (Pyramide) 出發嘅導賞團

    呢啲觀光行程嘅講授語言同難易程度各有不同,無論你係第一次嚟,定係藝術專家,都會獲益良多。導賞團遊覽時間日日都唔同,嚟到嗰陣記得要 Check 吓是日行程表喇!

    4

    預先 Check 清楚

    睇唔到《蒙娜麗莎 (Mona Lisa)》同埋《米洛的維納斯 (Venus de Milo)》,又點算係嚟過羅浮宮 (Louvre) 呢?羅浮宮成日喺「無預警」下搬動啲藝術傑作,如果你唔想無休止咁逐間展廳盲搵展品,就要記得喺遊覽之前上 www.louvre.fr 確認清楚位置喇!

    5

    休息吓,充充電

    羅浮宮 (Louvre) 有咁多間展廳要睇,途中點都要唞吓嘅!羅浮宮嘅餐飲場地都唔少,不過 Café Denon 同埋 Café Richelieu 嘅收費會偏高囉;而 Café Mollien 就位於一樓,設有夏季露台,索價仲比較相宜添。

    如果你想暫時離開吓呢座建築,不妨去杜樂麗花園 (Jardins des Tuileries) 嘅靚靚 Café,嘆啲精美小食同快餐吖!嗰度嘅流動小食店咖啡品質超卓,價格只係博物館 Café 嘅一半咋。

    開始計劃行程

    Maps