作為法國大東部地區嘅首府,斯特拉斯堡既具有中世紀城市古樸嘅往昔魅力,亦都有歐洲強大政治中心嘅「權能」氣息。斯特拉斯堡毗鄰德國邊境,所以建築、美食同文化都融合咗德法元素。

    由佔據市中心大部分領地嘅舊區、到現代科學技術博物館等等,斯特拉斯堡往往俾人一種穿越時空、雋永經典嘅感覺;而飲食文化亦都係呢度嘅另一個寶藏—惹味嘅地道菜、優質嘅葡萄酒、清爽嘅本地啤酒樣樣俱全,叫呢座城市做「歐洲十字路口」絕對事出有因!

    斯特拉斯堡最好玩嘅活動係乜嘢?

    1

    漫步小法國區

    喺歷史悠久嘅小法國區散步

    • 歷史文化`
    • 拍照
    • 經濟實惠

    小法國 (La Petite France 或 Little France) 亦稱為皮革區 (Quartier des Tanneurs),係位於大島 (Grande Île 或 Big Island) 西端歷史悠久嘅街區,喺斯特拉斯堡 (Strasbourg) 市中心好易搵路去到。而大島被伊爾河 (River Ill) 環繞,成座島都列為聯合國教科文組織世界文化遺產架!

    中世紀時期,小法國曾經住滿皮革工人、漁民同磨坊主,呢度嘅中世紀建築遺蹟保存完好,其中包括半木結構建築、狹窄嘅鵝卵石巷同有蓋橋樑;區內仲有好多古樸嘅小酒館,行到攰可以坐低食啲小食,飲返杯嘢。

    地點: 位於斯特拉斯堡中心大島西端

    地圖
    2

    必睇景點:斯特拉斯堡大教堂

    參觀世界上最高嘅教堂之一

    • 歷史文化`
    • 拍照
    • 經濟實惠

    斯特拉斯堡大教堂 (Cathédrale Notre Dame de Strasbourg) 建於 11 世紀初,高 142 米,係世界上最高嘅教堂之一,建築非凡,最初採用羅馬式風格,後來增添咗哥德式建築元素,喺時光鴻流嘅洗禮下,成為咗一件令人嘆為觀止嘅藝術品。舉凡 12 世紀嘅彩色玻璃窗、16 世紀嘅聖潘克拉斯 (St. Pancrace) 祭壇、17 世紀嘅天文鐘等等…斯特拉斯堡大教堂嘅特色數之不盡!

    地點: 位於斯特拉斯堡中心大島

    開放時間: 4 月至 9 月每日 09:00 至 19:30;10 月至 3 月每日 10:00 至 17:30;6 月至 8 月逢星期五及六開放至 22:00

    地圖
    3

    品嚐阿爾薩斯特色美食

    食盡法式酸菜、火焰薄餅同薑餅

    • 品嚐美食

    斯特拉斯堡 (Strasbourg) 同阿爾薩斯 (Alsatian) 料理融合德法風味,主要食材係豬肉,特色名物包括開胃酸菜 (choucroute garnie;即係用鹽水發酵嘅白菜絲,通常配薯仔、厚煙肉片同煙熏香腸食),仲有皇后酥 (Bouchées à la Reine;即係塞滿蔬菜、肉同白汁嘅酥餅)。如果你減緊肥嘅話,斯特拉斯堡就可能未必啱你喇 (笑~)…認真返先—阿爾薩斯料理嘅美食豐富程度冠絕法國,呢個絕對係事實!

    4

    沃邦攔河壩

    立足歷史建築嘅全景露台上

    • 伴侶
    • 歷史文化`
    • 拍照

    沃邦攔河壩 (Barrage Vauban 或 Vauban Dam) 建於 17 世紀末,當時係用嚟保衛斯特拉斯堡 (Strasbourg),萬一有人入侵,就會用洪水淹沒城市南邊嘅入口!今時今日,呢度既見證住沃邦 (Vauban) 呢位工程天才嘅橫溢才華,亦都存放咗羅昂宮 (Palais Roha) 同大教堂歷史悠久嘅石膏像,仲有雕像複製品添!沃邦攔河壩頂部嘅平台絕對係焦點特色,你可以喺上面欣賞到伊爾河 (River Ill) 同小法國 (Petite France) 嘅景色,盡情影靚相。

    地點: 斯特拉斯堡市中心大島 (Grande Île) 西南端對開

    開放時間: 每日 09:00 至 19:30

    地圖
    5

    斯特拉斯堡聖誕市集小食

    喺歐洲最古老嘅聖誕市集之一同賀佳節

    • 伴侶
    • 家庭
    • 購物
    • 拍照
    • 品嚐美食

    斯特拉斯堡聖誕市集 (Christmas Market;正式名稱係「Christkindelsmärik」) 每年 11 月底至 12 月底喺斯特拉斯堡大教堂 (Strasbourg Cathedral) 前面架設,氣氛正到你唔信,尤其係夜晚街燈同聖誕裝飾閃閃發光嗰陣,就更加璀璨無雙!節日氣氛咁濃厚,周圍又有咁多地道產品任你揀,你喺攤檔之間行街途中,一定會俾薑餅同香料酒 (mulled wine) 嘅氣味所吸引。溫馨提示:呢個市集嘅人氣屬全歐洲數一數二,如果你想喺酒店行幾步就嚟到,就要盡早 book 房喇!

    地點: 斯特拉斯堡大教堂前廣場

    開放時間: 12 月每日 11:00 至 20:00

    地圖
    6

    喺橘園公園放鬆身心

    喺景色怡人嘅公園呼吸新鮮空氣

    • 伴侶
    • 家庭
    • 拍照
    • 經濟實惠

    橘園公園 (Parc de l'Orangerie) 建於 18 世紀末,坐落喺斯特拉斯堡 (Strasbourg) 東北部,佔地 26 公頃,之所以叫做「橘園公園」,皆因園內種滿橙樹;而呢啲橙樹其實係共和黨人喺法國大革命期間去布維萊城堡 (Bouxwiller Castle) 偷返嚟,交俾市政廳嘅!今時今日,橘園公園成為最啱散步嘅幽靜樂園,有動物園、保齡球場、兒童遊樂場、法式滾球場 (pétanque)、運動場,另外有一間叫做 Le Buerehiesel 嘅米芝蓮星級餐廳;而你仲可以租返艘船仔,喺湖上嚟個浪漫之旅添!

    地點: 斯特拉斯堡東北部歐洲人權法院 (European Court of Human Rights) 大樓附近

    開放時間: 24/7

    地圖
    7

    參觀阿爾薩斯博物館

    探索阿爾薩斯人過去嘅日常生活

    • 歷史文化`
    • 拍照

    阿爾薩斯博物館 (Alsatian Museum) 坐落於精心修復嘅 5 層高木框架建築裡面,歡迎你親臨發掘當地歷史同文化。雖然博物館格局相當隨意,但係都樂趣無窮,珍藏住絢麗嘅阿爾薩斯傳統服裝、器皿、傢俱、工具同玩具,其中大部分歷史可以追溯到 2 個世紀、甚至更早之前。售票處有提供好多種語言嘅小冊子,仲有附帶耳筒嘅導覽機,俾你借用;而館內庭院係人氣超旺嘅影相「打卡點」,千祈咪錯過!

    地點: 古坦魯區 (Krutenau District) 聖尼古拉斯之墓 (Quai Saint-Nicolas)

    開放時間: 星期三至一 10:00 至 18:00 (逢星期二休館)

    地圖

    相片由 Anna Doorenbos 提供 (CC BY 3.0) 經修改

    8

    暢飲阿爾薩斯葡萄酒同啤酒

    淺酌當地生產嘅葡萄酒同啤酒

    • 品嚐美食

    阿爾薩斯 (Alsace) 地區以白葡萄酒同啤酒而聞名,其中嘅「雷司令 (Riesling)」、「瓊瑤漿 (Gewurztraminer)」、「灰皮諾 (Pinot Gris)」呢啲酒名,鍾意飲白酒嘅人應該聽慣聽熟啦!呢幾款果味濃郁嘅白酒喺時尚酒吧就飲得到,可以推介幾間俾大家,例如鏡街 (Rue du Miroir) 嘅 Terre à Vin、木板步道 (Rue des Planches) 嘅 The XX,或者老葡萄酒街 (Rue du Vieux Marché aux Vins) 嘅 Le Grincheux,都相當唔錯。

    至於啤酒喇喎,正因為斯特拉斯堡 (Strasbourg) 喺正德國隔籬,所以當地嘅啤酒文化同樣興旺。最初,啤酒係喺修道院入面釀造嘅;到咗今時今日,幾乎度度都可以釀啤酒喇!想試下新鮮釀製嘅阿爾薩斯啤酒嘅話,可以去燈籠街 (Rue de la Lanterne) 嘅 La Lanterne,或者大拱廊街 (Rue des Grandes Arcades) 嘅 Kohler-Rehm。Cheers!

    相片由 Will Bakker 提供 (CC BY-SA 2.0) 經修改

    9

    Le Vaisseau 科學探索之旅

    帶埋你嘅小朋友 (仲有你內心嗰個小朋友) 去妙趣科學中心玩餐飽

    • 家庭
    • 拍照

    Le Vaisseau 科學科技博物館位於市中心南部,經過特別設計,用有趣而富教育意義嘅方式介紹科學,主要對象係 3 至 15 歲嘅細路仔,難怪成為合家歡旅遊勝地!Le Vaisseau 有 6 個常設展覽,每個都有特定主題,分別係關於人類嘅「Being Human」、關於動物嘅「The Animals」、關於建造嘅「I Build」、關於水嘅「Water」、關於邏輯思考嘅「Log’hic」,同埋關於大自然嘅「The Garden」,俾你同小朋友透過 100 幾種互動元素,以休閒方式探索科學。

    地點: 1 Bis Rue Philippe Dollinger, 67100 Strasbourg, France

    開放時間: 星期二至日 10:00 至 18:00 (逢星期一休館)

    電話: +33 (0)3 69 33 26 69

    地圖

    相片由 Ralph Hammann 提供 (CC BY-SA 4.0) 經修改

    10

    最後一站去古坦魯區

    喺呢區度過熱鬧一夜

    • 晚間娛樂

    古坦魯區 (Quartier Krutenau) 係斯特拉斯堡 (Strasbourg) 最古老嘅地區之一,位於大島 (Grande Île) 東南部,兩者被伊爾河 (Ill River) 上面嘅狹長港灣隔開。呢區而家人氣爆燈,區內有好多精心修復嘅半木框架結構房屋,周圍仲開滿現代風格酒吧、餐廳、時裝店同美術館添!天黑之後,你可以先去伴侶街 (Rue des Couples) 嘅 Ze Trou 飲返杯,先至再去屠夫街 (Rue des Bouchers) 嘅 Stand Up 徹夜熱舞。

    地點: 斯特拉斯堡市中心附近大島正東南部

    地圖

    相片由 fotogoocom 提供 (CC BY 3.0) 經修改

    Stephan Audiger | 旅遊常客

    開始計劃行程

    Maps