巴黎有咁多優點,列入「人生必遊勝地」實在名副其實!市內嘅建築歷史悠久,遺跡同樣值得你尋根究底;而時尚達人就鍾意去至潮精品店大買特買;為食一族可以試盡一流嘅美酒佳餚,興奮之情絕對難以掩飾。

    巴黎景點眾多,要選出最 Fun 活動,濃縮成一段精華遊,真係唔容易!觀光名勝「各花入各眼」,喺有限篇幅之下,呢度就係我哋最精挑細選嘅推介—如果咁啱冇你心愛嘅巴黎景點,敬請期待精彩內容陸續登場,為你介紹人稱「光之城」嘅法國首都巴黎有咩不容錯過之處!

    巴黎最好玩嘅活動係乜嘢?

    1

    喺香榭麗舍大道展開一日行程

    喺「世界最美麗大道」漫步

    香榭麗舍大道 (Champs-Élysées Avenue) 全長大約 2 公里,由戴高樂廣場 (Place Charles de Gaulle) 延伸至協和廣場 (Place de la Concorde),算得上係巴黎招牌地標,又以街上嘅時尚餐廳、Café、奢華精品店、大牌名店同劇院而聞名。行到戴高樂廣場凱旋門 (Arc de Triomphe) 嘅頂部,你可以飽覽綠樹成蔭嘅香榭麗舍大道,同埋凱旋大道 (Voie Triomphale 或 Triumphal Way) 嘅壯麗景色;而卡魯索凱旋門 (Arc de Triomphe du Carrousel)、協和廣場同新凱旋門 (Grande Arche of La Défense) 喺大道上形成一條直線,蔚為奇觀!

    地點: 法國巴黎第八區 (8th Arrondissement) 西北部

    地圖
    • 伴侶
    • 歷史文化`
    • 拍照
    2

    登上艾菲爾鐵塔頂部

    由巴黎最具標誌性嘅古蹟頂部欣賞靚景

    難得嚟巴黎旅行,一定要探吓呢位精雕細琢嘅「鐵女子 (法文嘅「塔」係女性詞嚟架)」!艾菲爾鐵塔 (Eiffel Tower) 萬眾矚目,高 324 米,分成 3 層,有 674 級樓梯,二樓開咗一間米芝蓮星級餐廳、一間法式馬卡龍店,而三樓仲有一間香檳吧。艾菲爾鐵塔舉世聞名,成日人山人海;如果你想搭 Lift 登頂,就要提前上網訂飛喇!溫馨提示:艾菲爾鐵塔廣場「老千橫行」,記住打醒十二分精神啊!

    地點: 法國巴黎第七區戰神廣場 (Champs de Mars) 塞納河 (Seine River) 邊

    開放時間: 每日 09:30 至 23:00

    地圖
    • 伴侶
    • 歷史文化`
    • 拍照
    3

    必睇景點:羅浮宮

    去見蒙娜麗莎

    羅浮宮 (Louvre) 以前係皇宮,而家成為法國最出名嘅博物館,入面所有嘢都相當浮誇,收藏咗 35,000 件藝術品,另加超過 350,000 件展品,由油畫、雕塑、考古發現到繪畫都有,常設藏品系列佔地 60,600 平方米!提提你:羅浮宮係世界上最大型嘅博物館之一,開始參觀之前,最好先去售票處攞份地圖同導覽機喇!

    地點: 法國巴黎第一區 (1st Arrondissement) 里沃利街 (Rue de Rivoli)

    開放時間: 星期五至三 09:00 至 22:00;其他日子 09:00 至 18:00 (逢星期二休館)

    地圖
    • 歷史文化`
    • 拍照
    4

    狂食法式馬卡龍

    品嚐巴黎至潮脆餅甜品,為味蕾奉上盛宴

    法式馬卡龍堪稱巴黎最時尚嘅脆餅甜品之一!呢款用蛋白做嘅甜品起源於 8 世紀嘅威尼斯,到咗 20 世紀初喺法國改頭換面,雖然以香榭麗舍大道 (Champs-Élysées Avenue) 上嘅 Ladurée Paris 出品最遠近馳名,但係其實區內仲有好多其他選擇—其中,Rue de la Sainte-Croix-de-la-Bretonnerie 大街上嘅 Pierre Hermé、聖奧諾雷郊區路 (Rue du Faubourg Saint Honoré) 上嘅 La Maison du Chocolat、同埋聖奧諾雷路 (Rue Saint Honoré) 上嘅 Pierre Marcolini 售賣嘅馬卡龍都超級好味架!

    地點: 法國巴黎香榭麗舍大道 (Champs-Élysées Avenue) 同林肯街 (Rue Lincoln) 交界街角

    開放時間: 每日 07:30 至 23:00

    地圖
    • 品嚐美食
    5

    必睇景點:巴黎聖母院

    參觀巴黎聖母院

    巴黎聖母院 (Notre Dame Cathedral) 位於城島 (Île de la Cité) 嘅東南端,俯瞰塞納河 (Seine River),既係世界上最大型嘅教堂建築之一,亦係法國哥德式建築嘅傑出典範,會帶你走入神秘嘅歷史世界,俾你欣賞大教堂珍寶館嘅天主教重要文物,以至大教堂塔樓雨漏同雕塑等等嘅鬼斧神工!如果你唔想同人迫,最好就喺下晝 17:30 嚟參觀喇。

    地點: 位於巴黎第四區 (4th Arrondissement) 城島 (Île de la Cité)

    開放時間: 每日 07:45 至 18:45 (週末至 19:15)

    地圖
    • 歷史文化`
    • 拍照
    6

    去巴黎迪士尼樂園狂歡

    帶埋你嘅小朋友 (仲有你內心嗰個小朋友) 去法國最受歡迎嘅遊樂園玩餐飽

    巴黎迪士尼樂園 (Disneyland Paris) 位於巴黎市中心以東 30 公里處嘅馬恩拉瓦萊 (Marne-la-Vallée),絕對係合家歡必遊景點!呢個佔地 20 平方公里嘅公園擁有眾多遊樂設施同景點,靈感嚟自華特迪士尼嘅卡通人物同電影系列,當中包括《星球大戰 (Star Wars)》同 Marvel 英雄;園內嘅主題過山車、鬼屋、海盜船等等,通通叫人樂而忘返。玩到攰攰哋?樂園裡面仲有 50 幾間餐廳同 7 間酒店,另外亦設 9 洞同 18 洞嘅迪士尼高爾夫球場 (Golf Disneyland),俾你隨時打返 round,鬆鬆筋骨。

    地點: 位於法國巴黎市中心以東 30 公里嘅馬恩拉瓦萊 (Marne-la-Vallée)

    開放時間: 每日 10:00 至 20:00

    地圖
    • 家庭
    • 拍照
    • 遊歷
    7

    探索巴黎葡萄園

    學習葡萄栽種法,品嚐葡萄酒

    由羅馬帝國時期開始,巴黎已經有栽種葡萄同埋釀製葡萄酒,雖然唔及鄰近嘅勃艮第 (Burgundy) 同香檳 (Champagne) 葡萄園咁出名,但係區內嘅 The Clos Montmartre 都值得一去,試吓佢出產嘅葡萄酒—呢個葡萄園佔地 1,550 平方米,距離聖心大教堂 (Sacré-Coeur Basilica) 只有 300 米,園內出品嘅加美 (Gamay) 同黑比諾 (Pinot Noir) 葡萄酒相當出色。每年 10 月嘅蒙馬特豐收節 (Harvest Festival),呢度仲會舉辦慶祝活動,好熱鬧架!

    地點: 法國巴黎第 18 區 (18th Arrondissement) 蒙馬特 (Montmartre) Rue des Saules

    地圖
    • 伴侶
    • 品嚐美食
    • 非一般行程

    相片由 Son of Groucho 提供 (CC BY 2.0) 經修改

    8

    塞納河觀光遊船之旅

    由露天觀光船欣賞巴黎古蹟

    塞納河 (Seine) 係法國第五長嘅河流,河道橫跨巴黎市中心,可以俾你由獨特角度觀賞市內眾多著名古蹟。河上又長又薄嘅露天觀光船有個好得意嘅別名—「小飛船 (bateaux mouches)」,船程一個鐘頭多少少,沿途會見到艾菲爾鐵塔 (Eiffel Tower)、巴黎聖母院 (Notre Dame Cathedral)、羅浮宮 (Louvre Museum)、市政廳 (Town Hall) 等等人氣景點。真係想放縱自己一晚嘅話,俾多少少錢喺塞納河食返餐船上晚餐,都好抵架!喺晚燈之下,周圍嘅文物古蹟格外動人。

    地點: 法國巴黎塞納河觀光遊船嘅出發碼頭包括 Port de la Conférence、Port de la Bourdonnais、Quai Branly 同埋 Quai de Montebello。

    • 伴侶
    • 家庭
    • 拍照
    9

    參觀凡爾賽宮

    追隨太陽王嘅足跡

    凡爾賽宮 (Palace of Versailles) 其實唔算位於巴黎市內,因為佢距離市中心西南都有成 20 公里;不過,呢座建築咁宏偉,幾遠都要去睇吓啦!凡爾賽宮象徵絕對君主制隨住 1789 年法國大革命而結束,而家化身博物館,仲係法國最多人參觀嘅歷史遺跡之一添。經過修復之後,凡爾賽宮回復 17 世紀嘅輝煌舊貌;當你行過鏡廳 (Hall of Mirrors) 或者國王寢宮 (King’s Apartment),真係好似搭咗時光機「回到過去」架!環繞凡爾賽宮嘅花園充分展現法式園林特色,令人大開眼界;公園隔籬有好多餐廳同小食店,就算你喺凡爾賽宮玩足一日,都唔怕餓親。

    地點: 位於法國巴黎市中心西南 20 公里嘅凡爾賽 (Versailles)

    開放時間: 宮殿星期二至日 09:00 至 17:30 開放;花園 08:00 至 18:00 開放;特里亞農莊園 (Estate of Trianon) 12:00 至 17:30 開放;皇家馬廐 12:30 至 17:30 開放;逢星期一休息。

    電話: +33 (0)1 30 83 78 00

    地圖
    • 伴侶
    • 歷史文化`
    • 拍照
    10

    最後一站去蒙馬特

    喺巴黎最具藝術氣息嘅地區漫步

    蒙馬特 (Montmartre) 係巴黎最靚嘅地區之一,氣氛古樸,感覺就好似大城市裡面嘅村莊;而建於小山頭嘅聖心大教堂 (Sacré-Coeur Basilica) 富麗堂皇,為蒙馬特錦上添花。蒙馬特喺藝術界享負盛名,至今仍然吸引畫家、音樂家同作家慕名而來。呢度嘅夜生活都相當活躍,有夜店、現場音樂表演場地等等;落返山向西南邊行,你仲可以去紅磨坊 (Moulin Rouge) 觀賞舉世聞名嘅歌舞表演添!

    地點: 法國巴黎第 18 區 (18th Arrondissement)

    地圖
    • 伴侶
    • 品嚐美食
    • 晚間娛樂
    Stephan Audiger | 旅遊常客

    開始計劃行程

    Maps